ຂ່າວຫຼ້າສຸດ

ເຈົ້າຄອງ ເນັ້ນຄະນະພັກຮາກຖານ ຕ້ອງປັບປຸງແກ້ໄຂຈຸດອ່ອນຊອກວິທີແກ້ໄຂໃຫ້ໄດ້

788 08 ກ.ພ. 2019 ຂ່າວໜ້າ​ໜຶ່ງ
ເຈົ້າຄອງ ເນັ້ນຄະນະພັກຮາກຖານ ຕ້ອງປັບປຸງແກ້ໄຂຈຸດອ່ອນຊອກວິທີແກ້ໄຂໃຫ້ໄດ້

    ກອງ​ປະ­ຊຸມ​ເຊື່ອມ​ຊຶມ ແລະ ຜັນ​ຂະ­ຫຍາຍ​ມະ­ຕິ 7 ສະ­ໄໝ​ທີ X ຂອງ​ສູນ​ກາງ​ພັກ ໄດ້​ແບ່ງ​ເປັນ 3 ຊຸດ ຈັດ​ຂຶ້ນ​ວັນ​ທີ 5-7 ມັງ­ກອນ 2019 ຢູ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ (ນວ) ໂດຍ​ວັນ​ທີ 6 ມັງ­ກອນ ແມ່ນ​ດຳ­ເນີນ​ເປັນ​ຊຸດ​ທີ 2 ໂດຍ​ເປັນ​ປະ­ທານ​ຂອງ​ສະ­ຫາຍ ສິນ​ລະ​ວົງ ຄຸດ​ໄພ­ທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ​ຄະ­ນະ​ພັກ ເຈົ້າ​ຄອງ ນວ ມີ​ບັນ­ດາ​ຄະ­ນະ​ບໍ­ລິ­ຫານ​ງານ​ພັກ​ເມືອງ 9 ຕົວ​ເມືອງ ພະ​ແນກ ຫ້ອງ­ການ ອົງ­ການ​ທຽບ​ເທົ່າ​ເຂົ້າ​ຮ່ວມ.

    ໃນ​ຊຸດ​ທີ 2 ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ເຜີຍ­ແຜ່​ມະ­ຕິ ວ່າ​ດ້ວຍ​ການ​ເພີ່ມ​ທະ­ວີ​ການ​ນຳ­ພາ​ແກ້​ໄຂ​ຄວາມ​ຫຍຸ້ງ­ຍາກ​ທາງ​ດ້ານ​ເສດ­ຖະ­ກິດ-ການ​ເງິນ ແລະ ສ້າງ​ຄວາມ​ເຂັ້ມ­ແຂງ​ຂອງ​ການ​ຄຸ້ມ​ຄອງ​ມະ­ຫາ​ພາກ ຈາກ​ສະ­ຫາຍ ອາ­ນຸ­ພາບ ຕຸ​ນາ​ລົມ ກຳ­ມະ­ການ​ສູນ​ກາງ​ພັກ ຮອງ​ເລ­ຂາ​ຄະ­ນະ​ພັກ ປະ­ທານ​ສະ­ພາ​ປະ­ຊາ­ຊົນ ນວ ແລະ ມະ­ຕິ​ວ່າ​ດ້ວຍ​ການ​ປັບ­ປຸງ​ຮາກ​ຖານ​ການ­ເມືອງ​ຂອງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ໃຫ້​ເຂັ້ມ­ແຂງ ໜັກ​ແໜ້ນ ຈາກ​ສະ­ຫາຍ ສີ​ຫຸນ ສິດ­ທິ​ລື​ໄຊ ຮອງ​ເລ­ຂາ​ຄະ­ນະ​ພັກ ຮອງ​ເຈົ້າ​ຄອງ ນວ ຈາກ​ນັ້ນ ກໍ​ໄດ້​ພ້ອມ​ກັນ​ປະ­ກອບ​ຄຳ​ຄິດ​ເຫັນ​ເພື່ອ​ແລກ­ປ່ຽນ ເພື່ອ​ເປັນ​ເອ­ກະ​ພາບ​ແຕ່​ລະ​ບັນ­ຫາ.

    ໂອ­ກາດ​ນີ້ ສະ­ຫາຍ ສິນ​ລະ​ວົງ ຄຸດ​ໄພ­ທູນ ກໍ​ເນັ້ນ​ໃຫ້​ບັນ­ດາ​ຄະ­ນະ​ພັກ​ຮາກ​ຖານ ຂະ­ແໜງ­ການ ເອົາ­ໃຈ­ໃສ່​ຕໍ່​ບັນ­ຫາ​ທີ່​ພົ້ນ​ເດັ່ນ​ທີ່​ເປັນ​ຈຸດ​ອ່ອນ​ຄົງ​ຄ້າງ ຊອກ​ຫາ​ວິ­ທີ​ແກ້​ໃຫ້​ໄດ້ ກຳ­ນົດ​ມະ­ຕິ ທິດ​ທາງ​ໃນ­ຕໍ່­ໜ້າ​ການ​ລົງ​ຮາກ​ຖານ​ຂອງ​ບັນ­ດາ​ສະ­ຫາຍ​ຄະ­ນະ​ພັກ ຕ້ອງ​ສຸມ​ໃສ່​ການ​ຊີ້​ນຳ-ນຳ­ພາ​ວຽກ​ງານ​ໃຫ້​ມີ​ຄວາມ​ເຂັ້ມ­ແຂງ ເສີມ​ຂະ­ຫຍາຍ​ມູນ­ເຊື້ອ​ການ​ນຳ​ຂອງ​ພັກ​ໃຫ້​ສູງ​ຂຶ້ນ ແລະ ຄວາມ​ຮັບ­ຜິດ­ຊອບ​ຂອງ​ຕົນ​ເອງ​ຢູ່​ໃນ​ຂັ້ນ​ຮາກ​ຖານ​ນັ້ນ ແຕ່ງ­ຕັ້ງ​ພະ­ນັກ­ງານ​ຮາກ​ຖານ​ລົງ​ເຮັດ​ວຽກ​ເປັນ​ປະ­ຈຳ ເພື່ອ​ຂະ­ຫຍາຍ​ບົດ­ບາດ​ການ​ນຳ­ພາ​ຂອງ​ຄະ­ນະ​ພັກ ປຸກ­ລະ­ດົມ-ນຳ­ພາ​ປະ­ຊາ­ຊົນ​ໃຫ້​ມີ​ຄວາມ​ສາ­ມັກ­ຄີ ແລະ ຮັ່ງ­ມີ​ຜາ​ສຸກ ນຳ­ພາ​ປະ­ຕິ­ບັດ​ຕົວ​ຈິງ ຕ້ອງ​ມີ​ການ​ກວດ­ກາ​ເປັນ​ປະ­ຈຳ ຂະ­ຫຍາຍ​ພັກ​ໃຫ້​ໄດ້​ໃນ​ແຕ່​ລະ​ປີ ເພື່ອ​ໃຫ້​ມີ​ຜູ້​ສືບ​ທອດ​ຢູ່​ຂັ້ນ​ຮາກ​ຖານ​ເມືອງ ຮາກ​ຖານ​ບ້ານ ລົງ​ໃກ້­ຊິດ­ຕິດ­ແທດ​ຊີ້​ນຳ​ແກ້​ໄຂ​ບັນ­ຫາ​ທີ່​ເປັນ​ຈຸດ​ອ່ອນ ຂໍ້­ຄົງ­ຄ້າງ​ໃຫ້​ເປັນ​ລະ­ບົບ​ຕໍ່​ເນື່ອງ ໃຫ້​ບັນ­ດາ​ສະ­ຫາຍ​ຄະ­ນະ​ພັກ ກຳ​ແໜ້ນ​ເປັນ​ເອ­ກະ​ພາບ ກຽມ­ພ້ອມ​ຮັບ​ມື​ກັບ​ການ​ພັດ­ທະ­ນາ​ທີ່​ດີ​ຂອງ​ປະ­ເທດ ເຮັດ​ໃຫ້​ເສດ­ຖະ­ກິດ​ຂະ­ຫຍາຍ­ຕົວ​ມີ​ຄວາມ​ໝັ້ນ​ທ່ຽງ ປີ 2012 ນວ ພົບ​ບັນ­ຫາ​ຄວາມ​ຫຍຸ້ງ­ຍາກ​ດ້ານ​ເສດ­ຖະ­ກິດ​ເປັນ­ຕົ້ນ: ງົບ­ປະ­ມານ ໜີ້​ສິນ ເງິນ­ຕາ​ຕ່າງ­ປະ­ເທດ ແລະ ອື່ນໆ ປີ 2019 ນວ ຕ້ອງ​ປະ­ຕິ­ບັດ​ໃຫ້​ໄດ້​ຄາດ­ໝາຍ ບໍ່​ລວມ​ບັນ­ດາ​ເມືອງ ຍົກ​ລະ­ດັບ​ຫົວ­ໜ່ວຍ​ທຸ­ລະ​ກິດ​ທີ່​ມີ​ແລ້ວ​ໃຫ້​ສູງ​ຂຶ້ນ ເປັນ​ສິນ­ຄ້າ​ໂອ​ດ໊ອບ ເພື່ອ​ສົ່ງ​ຂາຍ​ຕ່າງ­ປະ­ເທດ.

    ບັນ­ດາ​ສະ­ຫາຍ​ທີ່​ລົງ​ກໍ່­ສ້າງ​ຮາກ​ຖານ​ການ­ເມືອງ ຕ້ອງ​ຊອກ​ໃຫ້​ເຫັນ​ຄວາມ​ອ່ອນ­ແອ ແລະ ຫາ​ວິ­ທີ​ແກ້​ໄຂ ເປັນ­ຕົ້ນ​ຂັ້ນ​ເມືອງ​ເຄື່ອນ​ໄຫວ​ປັບ­ປຸງ​ໃໝ່​ດ້ານ​ຕົວ​ຈິງ ສ້າງ​ກອງ​ທຶນ​ຂັ້ນ​ບ້ານ ເຝິກ­ອົບ­ຮົມ​ໃຫ້​ພະ­ນັກ­ງານ​ຂັ້ນ​ບ້ານ ຕ້ອງ​ຮັບ­ຜິດ­ຊອບ​ດ້ານ​ໜ້າ­ທີ່​ການ­ເມືອງ ຕ້ອງ​ເອົາ​ຜູ້​ມີ​ຄວາມ​ຮູ້ ຜູ້​ໜຸ່ມ​ໄປ​ເປັນ​ຜູ້­ນຳ​ພາ​ຂັ້ນ​ບ້ານ ຕ້ອງ​ປະ­ກອບ­ສ່ວນ​ພັນ­ທະ​ຂອງ​ຕົນ ໃນ​ການ​ພັດ­ທະ­ນາ​ເສດ­ຖະ­ກິດ​ຢູ່ ນວ ຕ້ອງ​ເອົາ 2 ມະ­ຕິ​ດັ່ງ­ກ່າວ​ນີ້ ລົງ​ໄປ​ເຊື່ອມ​ຊຶມ​ໃນ​ກອງ​ປະ­ຊຸມ​ຂອງ​ຄະ­ນະ​ພັກ​ຮາກ​ຖານ ສຳ­ຄັນ​ທີ່​ສຸດ​ຕ້ອງ​ປ່ຽນ­ແປງ​ຕົນ​ເອງ​ໃຫ້​ໄດ້ ແລະ ປະ­ຕິ­ບັດ​ຕາມ​ຄຳ​ຂວັນ ນວ 3 ຫຼຸດ 3 ເພີ່ມ ນວ.

ຂ່າວທີ່ກ່ຽວຂ້ອງ