ດອກປີກໄກ່ ເບຍລາວ ອິນເຕີ ຊີຣີ 2019 ຈະຈັດຂຶ້ນທ້າຍເດືອນນີ້

337 11 ກ.ພ. 2019 ວົງຈອນກີລາ
ດອກປີກໄກ່ ເບຍລາວ ອິນເຕີ ຊີຣີ 2019 ຈະຈັດຂຶ້ນທ້າຍເດືອນນີ້

    ພິ­ທີ​ຖະ­ແຫຼງ​ຂ່າວ ການ​ແຂ່ງ­ຂັນ​ກີ­ລາ​ດອກ​ປີກ​ໄກ່ ຊີງ​ແຊັມ​ນາໆຊາດ ຫຼື Badminton Beerlao International Series ໄດ້​ມີ​ຂຶ້ນ​ວັນ​ທີ 8 ກຸມ­ພາ 2019 ຜ່ານ​ມາ ທີ່​ຫ້ອງ­ການ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ໂດຍ​ມີ​ທ່ານ ກະ­ເສມ ອິນ​ທະ­ລາ ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ທ່ານ ສົມ​ສະ­ແຫວງ ແສງ​ສີ​ລາ​ວົງ ຮັກ­ສາ​ການ​ປະ­ທານ ແລະ ເລ­ຂາ­ທິ­ການ ສະ­ຫະ­ພັນ​ດອກ​ປີກ​ໄກ່​ແຫ່ງ​ຊາດ​ລາວ ທ່ານ ຈັນ​ສະ­ໝອນ ຜອງ​ຈັນ­ທາ ຜູ້​ຈັດ­ການ​ຝ່າຍ​ການ​ຕະ­ຫຼາດ ບໍ­ລິ­ສັດ ເບຍ​ລາວ ຈຳ­ກັດ ມີ​ຜູ້­ຕາງ­ໜ້າ​ສະ­ຖານ­ທູດ​ມາ​ເລ​ເຊຍ ປະ­ຈຳ ສປປ ລາວ ພ້ອມ​ດ້ວຍ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ດອກ​ປີກ​ໄກ່​ແຫ່ງ​ຊາດ ຄູ​ເຝິກ ແລະ ນັກ­ກີ­ລາ ຕະ­ຫຼອດ​ຮອດ​ສື່​ມວນ​ຊົນ​ທຸກ​ຂະ­ແໜງ­ການ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ສະ­ແຫວງ ແສງ​ສີ​ລາ​ວົງ ກ່າວ​ວ່າ: ການ​ແຂ່ງ­ຂັນ​ດັ່ງ­ກ່າວ ແມ່ນ​ຈະ​ໄດ້​ຈັດ​ຂຶ້ນ​ໃນ​ລະ­ຫວ່າງ​ວັນ​ທີ 19-24 ກຸມ­ພາ​ນີ້ ທີ່​ສະ­ໂມ­ສອນ​ດອກ​ປີກ​ໄກ່​ເຊດ​ຖາ (ບຶງ​ຂະ​ຫຍອງ) ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ຊີງ​ເງິນ​ລາ­ງວັນ​ລວມ 87 ລ້ານ​ກີບ ເພື່ອ​ເປັນ​ການ​ສະ​ສົມ​ຄະ­ແນນ​ລະ­ດັບ​ໂລກ ຫຼື ເວີດ​ແລັງ​ກິງ ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ຫຼາຍ​ພາກ­ສ່ວນ ໂດຍ​ສະ­ເພາະ ບໍ­ລິ­ສັດ ເບຍ​ລາວ ຈຳ­ກັດ ຈຳ­ນວນ 108 ລ້ານ​ກີບ ລາຍ­ການ​ນີ້ ສປປ ລາວ ເຄີຍ​ຮັບ​ກຽດ​ເປັນ​ເຈົ້າ­ພາບ​ຈັດ​ແຂ່ງ­ຂັນ​ມາ​ແລ້ວ 4 ຄັ້ງ ກໍ່​ຄື ຈັດ​ຂຶ້ນ​ປີ 2008 2009 2010 ແລະ ປີ 2017 ລາຍ­ການ​ດັ່ງ­ກ່າວ ມີ​ນັກ­ກີ­ລາ 190 ກວ່າ​ຄົນ ລະ­ດັບ​ທ໊ອບ​ຂອງ​ໂລກ ຈາກ 14 ປະ­ເທດ ເຂົ້າ​ຮ່ວມ ປະ­ກອບ​ມີ ສປປ ລາວ ເຈົ້າ­ພາບ ໄທ ສສ ຫວຽດ­ນາມ ມາ​ເລ​ເຊຍ ສິງ­ກະ­ໂປ ອົດ​ສະ​ຕຣາ​ລີ ຍີ່­ປຸ່ນ ອິນ​ເດຍ ສະ­ຫະ­ລັດ​ອາ​ເມ​ຣິ​ກາ ອັງ­ກິດ ກາ​ນາ​ດາ ຊູ​ແອັດ ດານ​ມາກ ແລະ ອິນ​ໂດ​ເນ​ເຊຍ ມີ​ທັງ​ໝົດ 5 ລາຍ­ການ ຄື: ປະ­ເພດ​ດ່ຽວ​ຍິງ ດ່ຽວ​ຊາຍ ຄູ່​ຍິງ ຄູ່​ຊາຍ ແລະ ທີມ​ຄູ່​ປະ­ສົມ.

    ທ່ານ ບຸນ​ຍະ​ແສງ ນະ​ຊຽງ​ຄຳ ຮອງ​ເລ­ຂາ­ທິ­ການ​ສະ­ຫະ­ພັນ​ດອກ​ປີກ​ໄກ່​ແຫ່ງ​ຊາດ​ລາວ ໃຫ້​ຮູ້​ວ່າ: ການ​ແຂ່ງ­ຂັນ​ຄັ້ງ​ນີ້ ມີ​ຄວາມ​ພ້ອມ 100% ລາຍ­ການ​ດັ່ງ­ກ່າວ ໃນ​ເບື້ອງ​ຕົ້ນ​ມີ​ນັກ­ກີ­ລາ​ດອກ​ປີກ​ໄກ່​ລາວ ລົງ­ທະ­ບຽນ​ເຂົ້າ​ຮ່ວມ​ແຂ່ງ­ຂັນ 31 ຄົນ ແຕ່​ຜ່ານ​ການ​ສະ­ໝັກ ແລະ ຄັດ​ເລືອກ​ຕົວ​ຈິງ ໄດ້​ສົ່ງ​ພຽງ 23 ຄົນ ຍິງ 3 ຄົນ ປັດ­ຈຸ­ບັນ​ໄດ້​ເກັບ​ຕົວ​ເຝິກ­ຊ້ອມ​ຢ່າງ​ເຕັມ­ທີ່ ໂດຍ​ມີ​ຄູ​ເຝິກ​ຕ່າງ­ປະ­ເທດ​ເຝິກ­ຊ້ອມ​ໃຫ້​ທີ່​ສະ­ໂມ­ສອນ​ດອກ​ປີກ​ໄກ່​ເຊດ​ຖາ ພວກ​ເຮົາ​ຕັ້ງ​ເປົ້າ​ໄວ້​ທີ່​ປະ­ເພດ​ຄູ່​ຊາຍ ແລະ ຄູ່​ປະ­ສົມ ຈະ​ສາ­ມາດ​ຜ່ານ​ເຂົ້າ​ເຖິງ​ຮອບ 8 ຄົນ​ສຸດ​ທ້າຍ.

ຂ່າວທີ່ກ່ຽວຂ້ອງ