ຈາກຄວາມມັກຮັກໃນດ້ານກະສິກຳ ກາຍເປັນເຈົ້າຂອງຟາມໄກ່ໄຂ່

285 13 ກ.ພ. 2019 ຂ່າວໜ້າ​ໜຶ່ງ
ຈາກຄວາມມັກຮັກໃນດ້ານກະສິກຳ ກາຍເປັນເຈົ້າຂອງຟາມໄກ່ໄຂ່

    ອາ­ຊີບ​ໃດ​ກໍ່​ດີ​ຂໍ​ພຽງ​ແຕ່​ມີ​ຄວາມ​ດຸ­ໝັ່ນ ແລະ ລົງ­ມື​ກະ­ທຳ​ຢ່າງ​ຈິງ​ຈັງ​ທ່ານ​ກໍ​ສາ­ມາດ​ປະ­ສົບ​ຜົນ­ສຳ­ເລັດ ດັ່ງ​ທ່ານ ຢໍ້ ຢ່າ ບ້ານ​ໂພນ​ທອງ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ທີ່​ເຄີຍ​ເຮັດ​ກະ­ສິ­ກຳ​ທົ່ວ​ໄປ ເປັນ­ຕົ້ນ ການ​ໃຫ້​ບໍ­ລິ­ການ​ຮັບ​ໄຖ​ສວນ ໄຖ​ໄຮ່ ແລະ ອື່ນໆ ແລ້ວ​ຫັນ​ມາ​ທົດ​ລອງ​ລ້ຽງ​ໄກ່​ພັນ​ໄຂ່ ຈົນ​ກາຍ­ເປັນ​ເຈົ້າ​ຂອງ​ຟາມ​ໄກ່​ໄຂ່​ໃນ​ປັດ­ຈຸ­ບັນ.

    ທ່ານ ຢໍ້ ຢ່າ ໃຫ້​ສຳ­ພາດ​ເມື່ອ​ບໍ່​ດົນ​ນີ້​ວ່າ: ຕົນ​ເອງ​ເປັນ​ບຸກ­ຄົນ​ທີ່​ມີ​ຄວາມ​ມັກ​ຮັກ​ໃນ​ການ​ເຮັດ​ກະ­ສິ­ກຳ ໃນ​ເມື່ອ​ກ່ອນ​ຕົນ​ເປັນ​ຄົນ​ແຂວງ​ຊຽງ​ຂວາງ ທີ່​ໄດ້​ປະ­ກອບ​ອາ­ຊີບ​ກະ­ສິ­ກຳ​ທົ່ວ​ໄປ ເຫັນ​ວ່າ​ເປັນ​ວຽກ​ທີ່​ໜັກ ແລະ ບໍ່​ມີ​ເວ­ລາ​ຢູ່​ນຳ​ຄອບ­ຄົວ ຈາກ​ນັ້ນ ໄດ້​ເຫັນ​ໜູ່​ເພື່ອນ​ເຮັດ​ຟາມ​ລ້ຽງ​ໄກ່​ພັນ​ໄຂ່​ເຫັນ​ວ່າ​ຜົນ​ໄດ້​ຮັບ​ດີ ຈຶ່ງ​ໄດ້​ປຶກ­ສາ​ກັບ​ຄອບ­ຄົວ​ແລ້ວ​ຕັດ­ສິນ​ໃຈ​ມາ​ລົງ­ທຶນ​ຢູ່​ນະ­ຄອນ­ຫຼວງ​ວຽງ​ຈັນ​ໃນ​ປີ 2011 ໂດຍ​ໄດ້​ເລີ່ມ​ເຮັດ​ຟາມ​ໄກ່​ໄຂ່ ເຊິ່ງ​ເບື້ອງ​ຕົ້ນ​ໄດ້​ທົດ​ລອງ​ເຮັດ​ເປັນ​ສອງ​ຫຼັງ ໂດຍ​ຊື້​ໄກ່​ແມ່​ສາວ​ທີ່​ມີ​ອາ­ຍຸ 12 ເດືອນ ມາ​ລ້ຽງ​ຈຳ­ນວນ 8.000 ໂຕ ຜ່ານ​ການ​ລ້ຽງ​ເຫັນ​ວ່າ​ຜົນ​ຜະ­ລິດ​ໄດ້​ດີ​ພໍ​ສົມ­ຄວນ ແລະ ໄດ້​ຮັບ​ຜົນ​ຕອບ​ຮັບ​ຈາກ​ລູກ​ຄ້າ ກໍ​ຄື​ຜູ້​ບໍ­ລິ­ໂພກ​ເປັນ​ຈຳ­ນວນ​ຫຼາຍ ມາ​ຮອດ​ປີ 2013 ຈຶ່ງ​ໄດ້​ກູ້​ຍືມ​ເງິນ​ຈາກ​ທະ­ນາ­ຄານ​ແຫ່ງ​ໜຶ່ງ​ຈຳ­ນວນ 1 ຕື້​ກີບ ເພື່ອ​ມາ​ຂະ­ຫຍາຍ​ຟາມ​ໄກ່​ໄຂ່​ເພີ່ມ​ອີກ​ສອງ​ຫຼັງ ປັດ­ຈຸ­ບັນ​ມີ​ຟາມ​ໄກ່​ໄຂ່ 4 ຫຼັງ ມີ​ແມ່​ໄກ່​ໄຂ່​ຈຳ­ນວນ 160.000 ໂຕ ສາ­ມາດ​ເກັບ​ໄຂ່​ໄດ້​ວັນ​ລະ 500 ແຕະ ຫຼື ປະ­ມານ 15.000 ໜ່ວຍ ນອກ​ນີ້ ຍັງ​ໄດ້​ລ້ຽງ​ປາ​ນິນ​ສອງ​ໜອງ​ເພື່ອ​ກິນ​ຂີ້​ໄກ່ ໂດຍ​ປ່ອຍ​ປາ​ຊຸດ​ລະ 130.000 ໂຕ ຊຸດ​ໜຶ່ງ​ໃຊ້​ເວ­ລາ 8-9 ເດືອນ ຈຶ່ງ​ສາ­ມາດ​ຈຳ­ໜ່າຍ​ໄດ້ ແລະ ຂາຍ​ອອກ​ຄັ້ງ​ໜຶ່ງ 15 ໂຕນ.

    ຟາມ​ໄກ່​ໄຂ່​ມີ​ເນື້ອ­ທີ່​ທັງ​ໝົດ 21 ເຮັກ­ຕາ ມີ​ໜອງ​ປາ 2 ໜອງ ເຊິ່ງ​ການ​ລ້ຽງ​ໄກ່​ຊຸດ​ໜຶ່ງ​ແມ່ນ​ໃຊ້​ເວ­ລາ 18 ເດືອນ ໃນ​ນີ້ ຈະ​ປ່ອຍ​ປາ​ໄດ້ 2 ຊຸດ ສ່ວນ​ຕະ­ຫຼາດ​ຈຳ­ໜ່າຍ​ແມ່ນ​ມີ​ແມ່​ຄ້າ​ມາ​ຊື້​ກັບ​ທີ່ ແລະ ຈຳ­ນວນ​ໜຶ່ງ​ໄດ້​ເອົາ​ໄປ​ສົ່ງ​ຕາມ​ຮ້ານ​ຕ່າງໆ​ໃນ​ນະ­ຄອນ­ຫຼວງ​ວຽງ​ຈັນ ຂາຍ​ໃນ​ລາ­ຄາ 16-20 ພັນ​ກີບ​ຕໍ່​ແຕະ ອີງ​ຕາມ​ຂະ­ໜາດ​ຂອງ​ໄຂ່​ໜ່ວຍ​ນ້ອຍ​ໜ່ວຍ​ໃຫຍ່ ສ່ວນ​ປາ​ນິນ 10.000 ກີບ​ຕໍ່​ກິ​ໂລ ສະ­ເລ່ຍ​ເດືອນ​ໜຶ່ງ​ສາ­ມາດ​ສ້າງ​ລາຍ​ຮັບ​ໃຫ້​ຄອບ­ຄົວ​ໄດ້ 60 ລ້ານ​ກີບ ບໍ່​ນັບ​ຕົ້ນ​ທຶນ ປັດ­ຈຸ­ບັນ​ສາ­ມາດ​ໃຊ້​ໜີ້​ທະ­ນາ­ຄານ​ເປັນ​ທີ່​ຮຽບ​ຮ້ອຍ​ແລ້ວ.

ຂ່າວທີ່ກ່ຽວຂ້ອງ