ເຊີນທ່ຽວຊົມຊື້ສິນຄ້າຢູ່ງານວາງສະແດງສິນຄ້າ ເມືອງນາຊາຍທອງ

291 13 ກ.ພ. 2019 ຂ່າວໜ້າ​ໜຶ່ງ
ເຊີນທ່ຽວຊົມຊື້ສິນຄ້າຢູ່ງານວາງສະແດງສິນຄ້າ ເມືອງນາຊາຍທອງ

    ເພື່ອ​ເປັນ​ການ​ຊຸກ­ຍູ້​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ຂອງ​ຊາວ​ກະ­ສິ­ກອນ​ທົ່ວ​ເມືອງ​ນາ​ຊາຍ​ທອງ ກໍ​ຄື​ຄອບ­ຄົວ​ຕົວ​ແບບ​ດ້ານ​ຕ່າງໆ ໃຫ້​ມີ​ການ​ຂະ­ຫຍາຍ­ຕົວ​ຢ່າງ​ແຂງ­ແຮງ ແລະ ກວ້າງ­ຂວາງ ເພື່ອ​ເຮັດ​ໃຫ້­ການ​ຜະ­ລິດ​ຕິດ​ພັນ​ກັບ​ຕະ­ຫຼາດ​ພາຍ​ໃນ​ເມືອງ ແລະ ສົ່ງ​ອອກ.

    ຫ້ອງ​ວ່າ­ການ​ປົກ­ຄອງ​ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ (ນວ) ຮ່ວມ​ກັບ​ບັນ­ດາ​ຫ້ອງ­ການ​ອ້ອມ​ຂ້າງ​ເມືອງ ຫົວ­ໜ່ວຍ​ທຸ­ລະ​ກິດ ແລະ ຄອບ­ຄົວ​ຕົວ​ແບບ ຈັດ​ພິ­ທີ​ເປີດ​ງານ​ຕະ­ຫຼາດ­ນັດ​ວາງ­ສະ­ແດງ​ສິນ­ຄ້າ​ກະ­ສິ­ກຳ ຫັດ­ຖະ­ກຳ ແລະ ອຸດ­ສາ­ຫະ­ກຳ ປະ­ຈຳ​ປີ 2019 ຂຶ້ນ​ວັນ​ທີ 12 ກຸມ­ພາ 2019 ທີ່​ບ້ານ​ແຈ້ງ​ສະ­ຫວ່າງ ເມືອງ​ນາ​ຊາຍ​ທອງ ມີ​ທ່ານ ອຸ­ດອນ ໄຊ​ມຸນ­ຕີ ຮອງ​ປະ­ທານ​ສະ­ພາ​ປະ­ຊາ­ຊົນ ນວ ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ທ່ານ ເບີ​ລິນ ເພັດ​ຈັນ­ທະ​ຣາດ ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ພ້ອມ​ດ້ວຍ​ຄະ­ນະ​ຮັບ­ຜິດ­ຊອບ​ຈັດ​ງານ ຫົວ­ໜ່ວຍ​ທຸ­ລະ​ກິດ ຄອບ­ຄົວ​ຕົວ​ແບບ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ພູ​ວຽງ ເພຍ​ເທບ ຮອງ​ເຈົ້າ­ເມືອງ​ນາ​ຊາຍ​ທອງ ກ່າວ​ວ່າ: ແຕ່​ລະ​ປີ​ເມືອງ​ນາ​ຊາຍ​ທອງ ໄດ້​ຈັດ​ງານ​ຕະ­ຫຼາດ­ນັດ​ວາງ­ສະ­ແດງ​ຂາຍ​ສິນ­ຄ້າ​ກະ­ສິ­ກຳ​ອຸດ­ສາ­ຫະ­ກຳ ແລະ ຫັດ­ຖະ­ກຳ ໂດຍ​ໄດ້​ເລີ່ມ​ແຕ່​ປີ 1995 ເປັນ­ຕົ້ນ​ມາ ແລະ ມາ​ຮອດ​ປັດ­ຈຸ­ບັນ​ແມ່ນ​ຄົບ­ຮອບ 24 ປີ ແລະ ໃນ​ປີ​ນີ້​ການ​ນຳ​ຂອງ​ເມືອງ​ໄດ້​ກຳ­ນົດ​ເອົາ​ວັນ​ທີ 12-18 ກຸມ­ພາ 2019 ເປັນ​ມື້​ຈັດ​ຕະ­ຫຼາດ­ນັດ​ເພື່ອ​ແລກ­ປ່ຽນ ຊື້-ຂາຍ​ສິນ­ຄ້າ​ປະ­ເພດ​ຕ່າງໆ ເຊິ່ງ​ການ​ຈັດ​ງານ​ດັ່ງ­ກ່າວ ເປັນ​ວຽກ​ໜຶ່ງ​ທີ່​ສຳ­ຄັນ ແລະ ນອນ​ຢູ່​ໃນ​ບູ​ລິ​ມະ​ສິດ​ຂອງ​ຄະ­ນະ​ພັກ​ອົງ­ການ​ປົກ­ຄອງ​ເມືອງ​ນາ​ຊາຍ​ທອງ ຕໍ່​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ພ້ອມ​ນັ້ນ ງານ​ຕະ­ຫຼາດ­ນັດ​ຄັ້ງ​ນີ້​ຍັງ​ເປັນ​ການ​ຕີ​ລາ­ຄາ​ລວມ ຫຼື ກວດ­ກາ​ຄືນ​ວຽກ​ງານ​ການ​ຊຸກ­ຍູ້-ສົ່ງ­ເສີມ​ການ​ສ້າງ​ຄອບ­ຄົວ​ຕົວ​ແບບ​ການ​ຜະ­ລິດ​ເປັນ​ສິນ­ຄ້າ ໃນ​ຂົງ­ເຂດ​ກະ­ສິ­ກຳ ຫັດ­ຖະ­ກຳ ອຸດ­ສາ­ຫະ­ກຳ ການ​ຄ້າ ແລະ ການ​ບໍ­ລິ­ການ​ໃຫ້​ມີ​ການ​ເຕີບ​ໃຫຍ່​ເຂັ້ມ­ແຂງ.

    ສຳ­ລັບ​ງານ​ວາງ­ສະ­ແດງ​ປີ 2019 ໄດ້​ມີ​ຮ້ານ​ເຂົ້າ​ຮ່ວມ​ທັງ​ໝົດ 345 ຮ້ານ ທີ່​ເປັນ​ຕົວ​ແທນ​ໃນ​ການ​ຜະ­ລິດ​ສິນ­ຄ້າ​ຕ່າງໆ​ຢູ່​ຂັ້ນ​ບ້ານ ໃນ​ນີ້ ຄອບ­ຄົວ​ທີ່​ຜະ­ລິດ​ກະ­ສິ­ກຳ ຫັດ­ຖະ­ກຳ​ມີ 49 ພາກ­ສ່ວນ ນອກ​ນີ້​ຍັງ​ມີ​ຕົວ​ແທນ​ການ​ຜະ­ລິດ​ສິນ­ຄ້າ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ (ໂອ​ດອບ) ສິນ­ຄ້າ​ປະ­ເພດ​ຕ່າງໆ​ຈາກ​ຕ່າງ​ເມືອງ ແລະ ຕ່າງ​ແຂວງ​ຈຳ­ນວນ​ໜຶ່ງ ເຂົ້າ​ຮ່ວມ​ຕື່ມ​ອີກ ແລະ ຖ້າ​ສົມ​ທຽບ­ໃສ່​ປີ 2018 ເຫັນ​ວ່າ​ຮ້ານ​ວາງ­ສະ­ແດງ​ສິນ­ຄ້າ​ປະ­ເພດ​ຕ່າງໆ​ປີ​ນີ້​ເພີ່ມ​ຂຶ້ນ 3% ແລະ ມູນ​ຄ່າ​ລວມ​ຂອງ​ສິນ­ຄ້າ​ທັງ​ໝົດ​ມີ 7,345 ຕື້​ກີບ ທຽບ­ໃສ່​ປີ 2018 ເພີ່ມ​ຂຶ້ນ 3,5% ແລະ ຄາດ​ວ່າ​ລາຍ​ຮັບ​ຈາກ​ການ​ຂາຍ​ສິນ­ຄ້າ​ພາຍ​ໃນ​ງານ​ຈະ​ເພີ່ມ​ຂຶ້ນ​ກວ່າ​ປີ­ຜ່ານ­ມາ ແລະ ເປັນ​ກຳ­ລັງ​ແຮງ​ສຳ­ຄັນ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ ໃຫ້​ເຕີບ​ໃຫຍ່​ຂະ­ຫຍາຍ­ຕົວ​ຢູ່​ໃນ​ລະ­ດັບ 9,2% ຕໍ່​ປີ.

    ໃນ​ໂອ­ກາດ​ນີ້ ຂໍ​ເຊີນ­ຊວນ​ປະ­ຊາ­ຊົນ​ຊາວ​ນະ­ຄອນ­ຫຼວງ​ວຽງ​ຈັນ ແລະ ຕ່າງ​ແຂວງ​ທ່ຽວ​ຊົມ​ຊື້​ສິນ­ຄ້າ ທີ່​ຜະ­ລິດ​ຈາກ​ພາຍ​ໃນ​ຢູ່​ພາຍ​ໃນ​ງານ​ດັ່ງ­ກ່າວ ເພື່ອ​ເປັນ​ການ​ຊຸກ­ຍູ້​ສົ່ງ­ເສີມ​ຜະ­ລິດ​ຕະ​ພັນ​ທີ່​ຜະ­ລິດ​ຈາກ​ຄົນ​ລາວ​ເຮົາ ໂດຍ​ມີ​ສິນ­ຄ້າ​ຫຼາຍ​ຢ່າງ​ໃຫ້​ເລືອກ.

ຂ່າວທີ່ກ່ຽວຂ້ອງ