ເລັ່ງສ້າງເມືອງເປັນຫົວໜ່ວຍເຂັ້ມແຂງຮອບດ້ານໃຫ້ໄດ້ 75 ເມືອງ

436 13 ກ.ພ. 2019 ຂ່າວໜ້າ​ໜຶ່ງ
ເລັ່ງສ້າງເມືອງເປັນຫົວໜ່ວຍເຂັ້ມແຂງຮອບດ້ານໃຫ້ໄດ້ 75 ເມືອງ

    ກະ­ຊວງ​ພາຍ​ໃນ​ຈັດ​ກອງ​ປະ­ຊຸມ​ສະ­ຫຼຸບ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂະ­ແໜງ​ພາຍ​ໃນ ແລະ ວຽກ​ງານ 3 ສ້າງ ປີ 2018 ແລະ ທິດ​ທາງ​ແຜນ­ການ​ປີ 2019 ຂຶ້ນ​ວັນ​ທີ 12-13 ກຸມ­ພາ 2019 ທີ່​ຫໍ​ປະ­ຊຸມ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ຄຳ​ໝັ້ນ ສູນ​ວິ​ເລີດ ລັດ­ຖະ­ມົນ­ຕີ​ກະ­ຊວງ​ພາຍ​ໃນ ມີ​ຮອງ​ລັດ­ຖະ­ມົນ­ຕີ ຫົວ­ໜ້າ​ຫ້ອງ­ການ ຫົວ­ໜ້າ​ກົມ​ຈັດ​ຕັ້ງ-ພະ­ນັກ­ງານ​ບັນ­ດາ​ກະ­ຊວງ ອົງ­ການ​ລັດ​ທຽບ​ເທົ່າ​ກະ­ຊວງ ອົງ​ການ­ຈັດ­ຕັ້ງ​ມະ­ຫາ­ຊົນ​ຂັ້ນ​ສູນ​ກາງ ແລະ ບັນ­ດາ​ຮອງ​ເຈົ້າ­ແຂວງ ຮອງ​ເຈົ້າ​ຄອງ​ນະ­ຄອນ­ຫຼວງ ເຈົ້າ­ເມືອງ ຮອງ​ເຈົ້າ­ເມືອງ ເຈົ້າ​ນະ­ຄອນ-ຮອງ​ເຈົ້າ​ນະ­ຄອນ ແລະ ຫົວ­ໜ້າ​ພະ​ແນກ​ພາຍ​ໃນ​ແຂວງ-ນະ­ຄອນ­ຫຼວງ ພ້ອມ​ດ້ວຍ​ພະ­ນັກ­ງານ-ວິ­ຊາ​ການ​ກະ­ຊວງ​ພາຍ​ໃນ​ເຂົ້າ​ຮ່ວມ.

    ໃນ​ກອງ​ປະ­ຊຸມ ທ່ານ ທອງ​ຈັນ ມະ­ນີ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ໄດ້​ຂຶ້ນ​ຜ່ານ​ບົດ​ສະ­ຫຼຸບ ຍົກ​ໃຫ້​ເຫັນ​ຜົນ­ງານ​ແຕ່​ລະ​ຂົງ­ເຂດ​ເຊັ່ນ: ຂົງ­ເຂດ​ການ​ບໍ­ລິ­ຫານ​ລັດ ແລະ ວຽກ​ງານ​ປົກ­ຄອງ ເຫັນ​ວ່າ​ສະ­ພາບ​ກົງ­ຈັກ​ການ­ຈັດ­ຕັ້ງ​ຂອງ​ບັນ­ດາ​ກະ­ຊວງ-ອົງ­ການ​ຂັ້ນ​ສູນ​ກາງ ແລະ ທ້ອງ­ຖິ່ນ ມີ​ຄວາມ​ສະ­ຫງົບ​ໂດຍ​ພື້ນ­ຖານ ມີ​ຄວາມ​ກະ­ທັດ​ຮັດ ແລະ ມີ​ປະ­ສິດ­ທິ­ພາບ​ຫຼາຍ​ຂຶ້ນ ມີ​ຫຼາຍ​ນິ­ຕິ​ກຳ ແລະ ລະ­ບຽບ​ບໍ­ລິ­ຫານ​ທີ່​ກ່ຽວ­ຂ້ອງ​ກັບ​ວຽກ​ງານ​ຂອງ​ຂະ­ແໜງ​ພາຍ​ໃນ ໄດ້​ຮັບ​ການ​ສ້າງ​ຂຶ້ນ ແລະ ປັບ­ປຸງ​ຄືນ​ໃຫ້​ມີ​ຄວາມ​ເໝາະ​ສົມ ກາຍ­ເປັນ​ເຄື່ອງ­ມື​ທີ່​ສຳ­ຄັນ ເພື່ອ​ອຳ­ນວຍ​ຄວບ​ຄຸມ​ໃຫ້​ແກ່​ການ​ຄຸ້ມ​ຄອງ​ລັດ​ດ້ວຍ​ກົດ­ໝາຍ ລະ­ບົບ​ການ​ປົກ­ຄອງ​ຂັ້ນ​ຮາກ​ຖານ​ໄດ້​ຮັບ​ການ​ປັບ­ປຸງ​ໄປ​ຕາມ​ທິດ​ຊີ້​ນຳ ແລະ ນິ­ຕິ​ກຳ​ຂອງ​ລັດ­ຖະ­ບານ​ເທື່ອ​ລະ​ກ້າວ ເຮັດ​ໃຫ້­ການ​ບໍ­ລິ­ຫານ​ຂັ້ນ​ບ້ານ​ມີ​ຄວາມ​ເຂັ້ມ­ແຂງ​ເທື່ອ​ລະ​ກ້າວ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ມີ​ຄວາມ​ເຂົ້າ­ໃຈ ແລະ ໃຫ້​ຄວາມ​ສຳ­ຄັນ​ຕໍ່​ວຽກ​ງານ​ຄຸ້ມ​ຄອງ​ພົນ­ລະ­ເມືອງ ເຮັດ​ໃຫ້​ວຽກ​ງານ​ຈົດ​ທະ­ບຽນ ແລະ ການ​ຕິດ­ຕາມ​ການ​ເຄື່ອນ​ຍ້າຍ​ຂອງ​ພົນ­ລະ­ເມືອງ ໄດ້​ຮັບ​ການ​ຄຸ້ມ​ຄອງ​ດ້ວຍ​ກົດ­ໝາຍ.

    ຂົງ­ເຂດ​ລັດ­ຖະ­ກອນ ໂດຍ​ສະ­ເພາະ​ວຽກ​ງານ​ຄຸ້ມ​ຄອງ​ລັດ­ຖະ­ກອນ ໄດ້​ມີ​ການ​ພັດ­ທະ­ນາ ແລະ ຫັນ​ໄປ​ສູ່​ການ​ຄຸ້ມ​ຄອງ​ດ້ວຍ​ກົດ­ໝາຍ ແລະ ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເຮັດ​ໃຫ້­ການ​ຄິດ­ໄລ່ ແລະ ເບີກ​ຈ່າຍ​ເງິນ­ເດືອນ​ມີ​ຄວາມ​ວ່ອງ­ໄວ ຫຼຸດ­ຜ່ອນ​ຄວາມ​ຜິດ­ພາດ​ທາງ​ດ້ານ​ຂໍ້​ມູນ ສາ­ມາດ​ກວດ­ກາ​ຈຳ­ນວນ​ລັດ­ຖະ­ກອນ​ທີ່​ມີ­ໜ້າ​ຕົວ​ຈິງ ພະ­ນັກ­ງານ-ລັດ­ຖະ­ກອນ ໄດ້​ຮັບ​ການ​ສົ່ງ­ເສີມ​ພັດ­ທະ­ນາ​ຄວາມ​ຮູ້ ຄວາມ​ສາ­ມາດ ແລະ ໄດ້​ຮັບ​ນະ­ໂຍ­ບາຍ​ຕາມ​ທີ່​ໄດ້​ລະ­ບຸ​ໄວ້​ໃນ​ກົດ­ໝາຍ ແລະ ລະ­ບຽບ​ການ ສ່ວນ​ຂົງ­ເຂດ​ເຕັກ­ນິກ​ດ້ານ​ການ​ປົກ­ຄອງ ໄດ້​ກາຍ­ເປັນ​ອົງ​ປະ­ກອບ​ສຳ­ຄັນ​ໜຶ່ງ ໃນ​ການ​ສົ່ງ­ເສີມ​ກະ­ຕຸກ​ຊຸກ­ຍູ້​ຈິດ­ໃຈ ຍົກ​ສູງ​ຄວາມ​ຮັບ­ຜິດ­ຊອບ ແລະ ເພີ່ມ​ຄວາມ​ຫ້າວ­ຫັນ​ໃຫ້​ແກ່​ຜູ້​ທີ່​ມີ​ຜົນ­ງານ​ດີ­ເດັ່ນ ທັງ​ຕອບ​ສະ­ໜອງ​ຂໍ້​ມູນ​ສຳ­ຄັນ ໃຫ້​ແກ່​ການ​ວາງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ວຽກ​ງານ​ປ້ອງ​ກັນ​ຊາດ ແລະ ປ້ອງ​ກັນ​ຄວາມ​ສະ­ຫງົບ ໂດຍ​ສະ­ເພາະ ການ​ແກ້​ໄຂ​ບັນ­ຫາ​ເຂດ​ເຊື່ອມ​ຕໍ່​ລະ­ຫວ່າງ​ແຂວງ​ກັບ​ແຂວງ ແລະ ເຂດ​ແດນ​ລະ­ຫວ່າງ​ປະ­ເທດ ແລະ  ວຽກ​ງານ​ພົວ­ພັນ ແລະ ຮ່ວມ​ມື​ກັບ​ຕ່າງ­ປະ­ເທດ ໄດ້​ເອົາ­ໃຈ​ໃສ​ພົວ­ພັນ​ຮ່ວມ​ມື​ກັບ​ບັນ­ດາ​ປະ­ເທດ​ເພື່ອນ​ມິດ ຍຸດ​ທະ​ສາດ​ໃນ​ພາກ​ພື້ນ ແລະ ສາ­ກົນ ປີ 2018 ທຶນ​ຊ່ວຍ­ເຫຼືອ​ຂອງ​ຕ່າງ­ປະ­ເທດ ແລະ ອົງ​ການ­ຈັດ­ຕັ້ງ​ສາ­ກົນ ທີ່​ນຳ​ໃຊ້​ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ ແລະ ກິດ­ຈະ­ກຳ​ຕ່າງໆ ພາຍ​ໃຕ້​ຄວາມ​ຮັບ­ຜິດ­ຊອບ​ຂອງ​ກະ­ຊວງ​ພາຍ​ໃນ ປະ­ມານ 34,56 ຕື້​ກີບ ຫຼື 4.164.356 ໂດ​ລາ​ສະ­ຫະ­ລັດ.

    ພ້ອມ​ດຽວ​ກັນ​ນັ້ນ ທ່ານ ຄຳ​ມູນ ວິ​ພົງ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ໄດ້​ຜ່ານ​ບົດ​ສະ­ຫຼຸບ​ຕີ​ລາ­ຄາ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ 3 ສ້າງ​ໃນ​ໄລ­ຍະ​ຜ່ານ​ມາ​ວ່າ: ໂດຍ​ລວມ​ແລ້ວ​ພາຍ­ຫຼັງ​ສຳ­ເລັດ​ການ​ເຮັດ​ທົດ​ລອງ​ວຽກ​ງານ 3 ສ້າງ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ຕໍ່​ເນື່ອງ​ເຊັ່ນ: ໄດ້​ສ້າງ­ຕັ້ງ​ສະ­ພາ​ປະ­ຊາ­ຊົນ​ຂັ້ນ​ແຂວງ ເຊິ່ງ​ເປັນ​ອົງ­ການ​ສູງ​ສຸດ​ໃນ​ທ້ອງ­ຖິ່ນ ໄດ້​ປັບ­ປຸງ​ລັດ​ຖະ​ທຳ​ມະ­ນູນ ແລະ ບັນ­ດາ​ກົດ­ໝາຍ​ທີ່​ເປັນ​ກົດ­ໝາຍ​ພື້ນ­ຖານ​ຕິດ​ພັນ​ກັບ​ການ​ແບ່ງ​ຂັ້ນ​ຄຸ້ມ​ຄອງ ກໍ​ຄື​ການ​ກຳ­ນົດ​ສິດ​ໜ້າ­ທີ່​ແຕ່​ລະ​ຂັ້ນ ເຊັ່ນ: ກົດ­ໝາຍ​ວ່າ​ດ້ວຍ​ລັດ­ຖະ­ບານ ກົດ­ໝາຍ​ວ່າ​ດ້ວຍ​ການ​ປົກ­ຄອງ​ທ້ອງ­ຖິ່ນ ກົດ­ໝາຍ​ວ່າ​ດ້ວຍ​ພະ­ນັກ­ງານ-ລັດ­ຖະ­ກອນ ກົດ­ໝາຍ​ວ່າ​ດ້ວຍ​ສະ­ພາ​ແຫ່ງ​ຊາດ ກົດ­ໝາຍ​ວ່າ​ດ້ວຍ​ສະ­ພາ​ປະ­ຊາ­ຊົນ​ຂັ້ນ​ແຂວງ ແລະ ບັນ­ດາ​ກະ­ຊວງ ໄດ້​ປັບ­ປຸງ​ກົດ­ໝາຍ​ດ້ານ​ວິ­ຊາ​ການ​ຂອງ​ຕົນ​ຕາມ​ທິດ 3 ສ້າງ ສືບ­ຕໍ່​ປັບ­ປຸງ​ນິ­ຕິ​ກຳ​ລຸ່ມ​ກົດ­ໝາຍ​ເພື່ອ​ຜັນ​ຂະ­ຫຍາຍ​ວຽກ​ງານ 3 ສ້າງ ເຂົ້າ​ສູ່​ລວງ​ເລິກ ອົງ­ການ​ປົກ­ຄອງ​ທ້ອງ­ຖິ່ນ ໄດ້​ຍົກ​ລະ­ດັບ​ຄວາມ​ສາ­ມາດ​ໃນ​ການ​ບໍ­ລິ­ຫານ​ທ້ອງ­ຖິ່ນ​ຂອງ​ຕົນ ມີ​ສິດ​ຕັດ­ສິນ​ບັນ­ຫາ ແລະ ມີ​ຄວາມ​ຮັບ­ຜິດ­ຊອບ​ຕໍ່​ການ​ພັດ­ທະ­ນາ​ຮອບ­ດ້ານ​ຢູ່​ຂັ້ນ​ທ້ອງ­ຖິ່ນ​ຫຼາຍ​ຂຶ້ນ ພິ­ເສດ​ມີ 3 ເມືອງ​ໄດ້​ປະ­ກາດ​ສ້າງ​ເປັນ​ນະ­ຄອນ​ຄື: ນະ­ຄອນ­ຫຼວງ​ພະ​ບາງ ນະ­ຄອນ​ໄກ­ສອນ​ພົມ­ວິ­ຫານ ແລະ ນະ­ຄອນ​ປາກ​ເຊ ທຸກ​ແຂວງ​ໄດ້​ຜັນ​ຂະ­ຫຍາຍ​ມະ­ຕິ 25 ແລະ ຄຳ​ສັ່ງ 34 ກ່ຽວ​ກັບ​ວຽກ​ງານ 3 ສ້າງ ອອກ​ເປັນ​ນິ­ຕິ​ກຳ​ຂອງ​ແຂວງ ແລະ ກຳ­ນົດ​ເປົ້າ​ໝາຍ ຮອດ​ປີ 2020 ໃນ​ທົ່ວ​ປະ­ເທດ​ຈະ​ສ້າງ​ເມືອງ​ເປັນ​ຫົວ­ໜ່ວຍ​ເຂັ້ມ­ແຂງ​ຮອບ­ດ້ານ 75 ເມືອງ ແລະ ສ້າງ​ບ້ານ​ເປັນ​ຫົວ­ໜ່ວຍ​ພັດ­ທະ­ນາ 1.383 ບ້ານ.

ຂ່າວທີ່ກ່ຽວຂ້ອງ