ຮອງນາຍົກ ເນັ້ນໃຫ້ ຖວທ ເອົາໃຈໃສ່ຫັນລະບົບອະນາລ໋ອກ ເປັນລະບົບດີຈີຕອນທີ່ທັນສະໄໝໃນທົ່ວປະເທດ

404 13 ກ.ພ. 2019 ຂ່າວໜ້າ​ໜຶ່ງ
ຮອງນາຍົກ ເນັ້ນໃຫ້ ຖວທ ເອົາໃຈໃສ່ຫັນລະບົບອະນາລ໋ອກ ເປັນລະບົບດີຈີຕອນທີ່ທັນສະໄໝໃນທົ່ວປະເທດ

    ກອງ​ປະ­ຊຸມ​ວຽກ​ງານ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ທົ່ວ​ປະ­ເທດ​ປີ 2019 ຈັດ​ຂຶ້ນ​ວັນ​ທີ 12 ກຸມ­ພາ 2019 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ ຖວ​ທ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ ຮອງ​ກົມ ຫົວ­ໜ້າ​ພະ​ແນກ ຖວ​ທ ນະ­ຄອນ­ຫຼວງ ແລະ ບັນ­ດາ​ແຂວງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

    ກອງ​ປະ­ຊຸມ​ໄດ້​ສະ­ຫຼຸບ​ຕີ​ລາ­ຄາ​ຜົນ­ສຳ­ເລັດ​ວຽກ​ງານ ຖວ​ທ ປີ 2018 ມີ​ອັນ​ພົ້ນ​ເດັ່ນ​ຫຼາຍ​ດ້ານ ເປັນ­ຕົ້ນ ໄດ້​ສຸມ​ໃສ່​ໂຄ­ສະ­ນາ​ປີ​ທ່ອງ​ທ່ຽວ​ລາວ 2018 ງານ​ສະ­ເຫຼີມ­ສະ­ຫຼອງ​ເມືອງ​ວຽງ​ໄຊ​ຖານ​ທີ່​ໝັ້ນ​ການ​ປະ­ຕິ­ວັດ​ລາວ ຄົບ­ຮອບ 50 ປີ ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ແລະ ວັນ​ສຳ­ຄັນ​ຕ່າງໆ​ຂອງ​ຊາດ ສຸມ​ໃສ່​ສ້າງ​ຄວາມ​ເຂົ້າ­ໃຈ ແລະ ປຸກ­ລະ­ດົມ​ຂົນ­ຂວາຍ​ສັງ­ຄົມ ໃຫ້­ການ​ຊ່ວຍ­ເຫຼືອ​ຕໍ່​ເຫດ­ການ​ນ້ຳ​ຖ້ວມ​ໃນ​ທົ່ວ​ປະ­ເທດ ໂດຍ​ສະ­ເພາະ​ເຫດ­ການ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ທັງ​ໃຫ້​ຂໍ້​ມູນ​ຂ່າວ­ສານ​ການ​ພັດ­ທະ­ນາ​ຊີ­ວິດ ແລະ ສັງ­ຄົມ​ໃນ​ຫຼາຍ​ແງ່​ມູມ​ທີ່​ອຸ­ດົມ­ສົມ­ບູນ ແລະ ຕອບ​ຕ້ານ​ຖ້ອຍ​ທຳ­ນອງ​ຂອງ​ຄົນ​ບໍ່​ດີ ແລະ ອິດ​ທິ​ກຳ­ລັງ​ປໍ​ລະ​ປັກ​ໄດ້​ຢ່າງ​ວ່ອງ­ໄວ ແລະ ກວ້າງ­ຂວາງ.

    ສື່​ມວນ​ຊົນ​ໄດ້​ມີ​ລະ­ບົບ​ການ­ຈັດ­ຕັ້ງ​ຄຸ້ມ​ຄອງ​ທີ່​ແໜ້ນ­ໜາ ແຕ່​ຂັ້ນ​ສູນ​ກາງ​ລົງ​ຮອດ​ທ້ອງ­ຖິ່ນ ສຸມ​ໃສ່​ໃນ​ການ​ສ້າງ​ບຸ​ຄະ­ລາ​ກອນ​ຢູ່​ທັງ​ພາຍ​ໃນ ແລະ ຕ່າງ­ປະ­ເທດ ທັງ​ໄລ­ຍະ​ສັ້ນ ແລະ ໄລ­ຍະ​ຍາວ ປັດ­ຈຸ­ບັນ​ມີ​ນັກ­ຮົບ​ສື່​ມວນ​ຊົນ​ທັງ​ໝົດ 3.000 ກວ່າ​ຄົນ ການ​ຄຸ້ມ​ຄອງ​ປະ­ສານ​ງານ​ທີ່​ໄດ້­ຜົນ​ດີ ແມ່ນ​ໃຊ້​ກົນໄກ​ກອງ​ປະ­ຊຸມ​ປະ­ສານ​ຂ່າວ ຂອງ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ກອງ​ປະ­ຊຸມ​ສ່ອງ​ແສງ​ຂ່າວ​ປະ­ຈຳ​ອາ­ທິດ ແລະ ເດືອນ ໄດ້​ເຮັດ​ໃຫ້​ສື່​ມວນ​ຊົນ​ເຄື່ອນ​ໄຫວ​ຢ່າງຖືກ­ຕ້ອງ​ຕາມ​ລະ­ບຽບ​ກົດ­ໝາຍ ປັດ­ຈຸ­ບັນ ພາ­ຫະ­ນະ​ສື່​ມວນ​ຊົນ​ໃນ​ຂອບ​ເຂດ​ທົ່ວ​ປະ­ເທດ ມີ​ສື່​ສິ່ງ​ພິມ​ທັງ​ໝົດ 148 ສະ­ບັບ ໃນ​ນີ້ ພາກ​ເອ­ກະ​ຊົນ​ມີ 49 ສະ­ບັບ ເປັນ​ລາຍ​ວັນ 11 ສະ­ບັບ ສະ­ຖາ­ນີ​ວິ­ທະ­ຍຸ​ກະ­ຈາຍ­ສຽງ​ມີ​ທັງ​ໝົດ 76 ສະ­ຖາ­ນີ ໃນ​ນັ້ນ ຢູ່​ສູນ​ກາງ 3 ສະ­ຖາ­ນີ ແລະ ທ້ອງ­ຖິ່ນ 73 ສະ­ຖາ­ນີ ແຕ່​ຈຳ­ນວນ​ໜຶ່ງ​ໄດ້​ຢຸດ​ເຊົາ​ການ­ເຄື່ອນ­ໄຫວ ເພາະ­ວ່າ​ມີ​ການ​ເປ່​ເພ ແລະ ບໍ່​ທັນ​ມີ​ງົບ​ສ້ອມ­ແປງ ສ່ວນ​ໂທລະ­ພາບ​ມີ 42 ສະ­ຖາ­ນີ ໃນ​ນັ້ນ ຢູ່​ສູນ​ກາງ​ມີ 6 ສະ­ຖາ­ນີ ແລະ ທ້ອງ­ຖິ່ນ​ມີ 36 ສະ­ຖາ­ນີ ການ​ຕິດ​ຕັ້ງ​ໂທລະ​ໂຄ່ງ​ມາ​ຮອດ​ປີ 2018 ໄດ້​ຕິດ​ຕັ້ງ​ແລ້ວ​ທັງ​ໜົດ 5.747 ບ້ານ ໃນ​ຈຳ­ນວນ 8.495 ບ້ານ ທົ່ວ​ປະ­ເທດ ຍັງ​ມີ 2.748 ບ້ານ ທີ່​ບໍ່​ທັນ​ມີ​ໂທລະ​ໂຄ່ງ ສະ­ເພາະ​ປີ 2018 ສາ­ມາດ​ຕິດ​ຕັ້ງ​ໂທລະ​ໂຄ່ງ​ໄດ້​ພຽງ​ແຕ່ 84 ບ້ານ ບໍ່​ບັນ­ລຸ​ຄາດ­ໝາຍ​ທີ່​ສະ­ພາ​ຮັບ­ຮອງ ຍ້ອນ​ງົບ­ປະ­ມານ​ມີ​ຈຳ­ກັດ ແຕ່​ໂດຍ​ລວມ​ແລ້ວ ວຽກ​ງານ ຖວ​ທ ໃນ​ຂອບ​ເຂດ​ທົ່ວ​ປະ­ເທດ​ມີ​ການ​ພັດ­ທະ­ນາ​ດີ​ຂຶ້ນ.

    ສຳ­ລັບ​ແຜນ​ປີ 2019 ສຸມ​ໃສ່​ໂຄ­ສະ­ນາ​ໃຫ້​ແກ່​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ວຽກ​ງານ​ຈຸດ​ສຸມ​ຂອງ​ລັດ­ຖະ­ບານ ກອງ​ປະ­ຊຸມ​ສະ­ພາ​ແຫ່ງ​ຊາດ ປີ​ທ່ອງ​ທ່ຽວ ລາວ-ຈີນ 2019 ການ​ກໍ່­ສ້າງ​ເສັ້ນ­ທາງ​ລົດ­ໄຟ ລາວ-ຈີນ ການ­ເຄື່ອນ­ໄຫວ​ຂອງ​ການ​ນຳ ການ​ສ້າງ­ສາ​ພັດ­ທະ­ນາ ແລະ ເຫດ­ການ​ສຳ­ຄັນ​ຕ່າງໆ​ທີ່​ເກີດ​ຂຶ້ນ​ໃນ​ສັງ­ຄົມ ສືບ­ຕໍ່​ປັບ­ປຸງ​ເນື້ອ​ໃນ ແລະ ຮູບ​ແບບ​ຂອງ​ຂ່າວ ບົດ ແລະ ລາຍ­ການ​ຂອງ​ສື່​ສິ່ງ​ພິມ ສື່​ເອ​ເລັກ​ໂຕຣ​ນິກ ແລະ ສື່​ແບບ​ໃໝ່​ໃຫ້​ມີ​ຄວາມ​ຖືກ­ຕ້ອງ ຊັດ​ເຈນ​ເລິກ­ເຊິ່ງ​ແຫຼມ​ຄົມ ມີ​ການ​ວິ­ເຄາະ​ວິ­ຈານ​ໃຫ້​ຫຼາຍ​ຂຶ້ນ ແລະ ຕອບ​ໂຕ້​ການ​ໃສ່​ຮ້າຍ​ປ້າຍ​ສີ​ໃຫ້​ວ່ອງ­ໄວ​ທັນ​ການ​ຂຶ້ນ​ຕື່ມ ສືບ­ຕໍ່​ຄົ້ນ­ຄວ້າ​ປັບ­ປຸງ​ກົງ­ຈັກ​ການ­ຈັດ­ຕັ້ງ​ພາຍ​ໃນ​ຈຳ­ນວນ​ໜຶ່ງ ແກ້​ໄຂ​ບັນ­ຫາ​ພະ­ນັກ­ງານ​ເຫຼືອ​ບໍ່​ພໍ​ຕາມ​ມະ­ຕິ​ກອງ​ປະ­ຊຸມ​ຄົບ​ຄະ­ນະ ຄັ້ງ​ທີ 7 ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ສະ­ໄໝ​ທີ X ຈັດ​ເຝິກ­ອົບ­ຮົມ​ຍົກ​ລະ­ດັບ​ຄວາມ​ຮູ້​ຄວາມ​ສາ­ມາດ​ຢ່າງ​ມີ​ຈຸດ​ສຸມ ໃນ​ຫົວ­ຂໍ້​ທີ່​ຈຳ­ເປັນ​ໃຫ້​ແກ່​ສື່​ມວນ​ຊົນ​ທັງ​ຢູ່​ສູນ​ກາງ ແລະ ທ້ອງ­ຖິ່ນ ໃຫ້​ປະ­ຕິ­ບັດ​ຕາມ​ມະ­ຕິ​ຂອງ​ສະ­ພາ​ຮັບ­ຮອງ ໃນ​ການ​ສູ້​ຊົນ​ຫັນ​ຈາກ​ລະ­ບົບ​ອະ​ນາ​ລ໋ອກ ມາ​ເປັນ​ລະ­ບົບ​ດີ​ຈີ​ຕອນ​ທີ່​ທັນ​ສະ­ໄໝ ໃນ​ຂອບ​ເຂດ​ທົ່ວ​ປະ­ເທດ ຂະ­ຫຍາຍ​ຕາ​ໜ່າງ​ໂທລະ​ໂຄ່ງ​ໃຫ້​ໄດ້​ຕື່ມ 350 ບ້ານ​ໃນ​ທົ່ວ​ປະ­ເທດ ເພີ່ມ​ທະ­ວີ​ການ​ຊອກ​ແຫຼ່ງ​ລາຍ​ຮັບ​ດ້ວຍ​ການ​ນຳ​ໃຊ້​ທຸກ​ທ່າ­ແຮງ​ທີ່​ມີ ໃຫ້​ນັບ​ມື້​ຫຼາຍ​ຂຶ້ນ ຄົ້ນ­ຄວ້າ​ສ້າງ ແລະ ປັບ­ປຸງ​ນິ­ຕິ​ກຳ​ທີ່​ຈຳ­ເປັນ​ຈຳ­ນວນ​ໜຶ່ງ​ໃຫ້​ວ່ອງ­ໄວ ແລະ ສືບ­ຕໍ່​ເພີ່ມ​ທະ­ວີ​ການ​ຮ່ວມ​ມື ແລະ ຍາດ​ແຍ່ງ​ການ​ຊ່ວຍ­ເຫຼືອ​ຈາກ​ບັນ­ດາ​ອົງ​ການ­ຈັດ­ຕັ້ງ​ສາ­ກົນ ແລະ ປະ­ເທດ​ເພື່ອນ​ມິດ​ຕ່າງໆ ສູ້​ຊົນ​ປະ­ຕິ­ບັດ​ຕາມ​ມະ­ຕິ​ຂອງ​ສະ­ພາ​ຮັບ­ຮອງ ໃນ​ການ​ສ້າງ​ຄອບ­ຄົວ​ວັດ­ທະ­ນະ­ທຳ​ໃຫ້​ໄດ້​ຕື່ມ 30.000 ຄອບ­ຄົວ ສ້າງ​ບ້ານ​ວັດ­ທະ­ນະ­ທຳ​ໃຫ້​ໄດ້​ຕື່ມ 250 ບ້ານ ແລະ ຊຸກ­ຍູ້​ສົ່ງ­ເສີມ​ສູ­ນວັດ­ທະ­ນະ­ທຳ​ໃຫ້​ມີ​ປະ­ລິ­ມານ ແລະ ຄຸນ​ນະ​ພາບ​ເພີ່ມ​ຂື້ນ.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ໂອ້​ລົມ​ຕໍ່​ກອງ​ປະ­ຊຸມ ກ່ອນ​ອື່ນ​ທ່ານ​ໄດ້​ສະ­ແດງ​ຄວາມ​ຊົມ­ເຊີຍ ຕໍ່​ຄະ­ນະ​ນຳ​ທຸກ​ຂັ້ນ​ທີ່​ໄດ້​ເອົາ­ໃຈ­ໃສ່ ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ​ຂອງ​ຕົນ ບັນ­ລຸ​ຜົນ­ສຳ­ເລັດ​ຕາມ​ແຜນ­ທີ່​ວາງ​ໄວ້​ໃນ​ໜຶ່ງ​ປີ­ຜ່ານ­ມາ ເຮັດ​ໜ້າ­ທີ່​ເປັນ​ເສ­ນາ​ທິ​ການ​ໃຫ້​ແກ່​ພັກ ແລະ ລັດ­ຖະ­ບານ ໄດ້​ເປັນ​ຢ່າງ​ດີ ແລະ ມີ​ຜົນ­ງານ​ອັນ​ພົ້ນ​ເດັ່ນ​ຫຼາຍ​ດ້ານ ເປັນ­ຕົ້ນ ວຽກ​ງານ​ຖະ­ແຫຼງ​ຂ່າວ ເຫັນ​ວ່າ​ມີ​ການ​ພັດ­ທະ­ນາ​ດີ​ຂຶ້ນ​ຫຼາຍ​ທັງ​ດ້ານ​ປະ­ລິ­ມານ ແລະ ຄຸນ​ນະ​ພາບ ເອົາ­ໃຈ­ໃສ່​ປັບ­ປຸງ​ພື້ນ­ຖານ​ໂຄງ​ລ່າງ​ອຸ­ປະ­ກອນ​ເຕັກ­ນິກ​ໃຫ້​ທັນ​ສະ­ໄໝ​ຂຶ້ນ ສາ­ມາດ​ເບິ່ງ​ໄດ້​ໃນ​ຫຼາຍ​ຊ່ອງ​ທາງ ໂດຍ​ສະ­ເພາະ​ຜ່ານ​ສື່​ແບບ​ໃໝ່​ສາ­ມາດ​ເບິ່ງ​ຜ່ານ​ມື​ຖື​ໄດ້​ຢ່າງ​ວ່ອງ­ໄວ ທັນ​ການ ຂໍ້​ມູນ​ຂ່າວ­ສານ​ໄປ​ຮອດ​ໄປ​ເຖິງ​ປະ­ຊາ­ຊົນ​ໄດ້​ງ່າຍ ແລະ ກວ້າງ­ຂວາງ ດ້ານ​ເນື້ອ​ໃນ ເຫັນ​ວ່າ​ມີ​ການ​ປັບ­ປຸງ​ດີ​ຂຶ້ນ​ມີ​ຫຼາຍ​ສີ­ສັນ​ຫຼາຍ​ຮູບ​ແບບ​ທີ່​ດຶງ​ດູດ​ຜູ້​ຟັງ​ຜູ້​ຊົມ ແລະ ຜູ້​ອ່ານ​ໄດ້​ດີ ສື່​ມວນ​ຊົນ​ໄດ້​ເຮັດ​ໜ້າ­ທີ່​ເປັນ​ກະ­ບອກ​ສຽງ​ທີ່​ສຳ­ຄັນ​ໃຫ້​ແກ່​ພັກ ແລະ ລັດ ໃນ​ການ​ໂຄ­ສະ­ນາ​ເຜີຍ­ແຜ່​ແນວ­ທາງ​ນະ­ໂຍ­ບາຍ​ລະ­ບຽບ​ກົດ­ໝາຍ​ຂອງ​ລັດ ໃຫ້​ໄປ​ຮອດ​ໄປ​ເຖິງ​ປະ­ຊາ­ຊົນ ປີ 2018 ເຫັນ​ໄດ້​ວ່າ​ສາ­ມາດ​ປະ­ຕິ­ບັດ​ໜ້າ­ທີ່​ໃນ​ການ​ອະ­ນຸ​ຮັກ ປົກ​ປັກ​ຮັກ­ສາ​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ​ໄວ້​ໄດ້​ເປັນ​ຢ່າງ​ດີ ແລະ ຍັງ​ໄດ້​ສືບ​ທອດ​ເສີມ​ຂະ­ຫຍາຍ​ມູນ­ເຊື້ອ​ວັດ­ທະ­ນະ­ທຳ ອັນ​ດີ­ງາມ​ຂອງ​ຊາດ ເຮັດ​ໃຫ້​ຊາວ​ໂລກ​ຮັບ​ຮູ້​ຢ່າງ​ກວ້າງ­ຂວາງ ເປັນ­ຕົ້ນ ໄດ້​ຈັດ​ງານ​ສະ­ເຫຼີມ­ສະ­ຫຼອງ​ສຽງ​ແຄນ​ລາວ ເປັນ​ມໍ­ລະ­ດົກ​ວັດ­ທະ­ນະ­ທຳ​ນາມ​ມະ​ທຳ​ຂອງ​ມວນ​ມະ­ນຸດ​ໂລກ ແລະ ການ​ທ່ອງ​ທຽ່ວ ກໍ່​ເຫັນ​ວ່າ​ມີ​ຜົນ­ສຳ­ເລັດ ພ້ອມ​ນີ້ ການ​ເປີດ​ປີ​ທ່ອງ​ທ່ຽວ​ລາວ 2018 ໄດ້​ເປັນ​ເຈົ້າ​ການ​ຊີ້​ນຳ-ນຳ­ພາ ແລະ ຈັດ​ຕັ້ງ​ຫຼາຍ​ກິດ­ຈະ­ກຳ​ສົ່ງ­ເສີມ​ການ­ທ່ອງ­ທ່ຽວ​ຢູ່​ບັນ­ດາ​ແຂວງ​ໃນ​ທົ່່ວ​ປະ­ເທດ ຢ່າງ​ເປັນ​ຂະ​ບວນ​ຟົດ­ຟື້ນ ເຮັດ​ໃຫ້​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ຈາກ​ຕ່າງ­ປະ­ເທດ ເຂົ້າ​ມາ​ທ່ຽວ​ລາວ​ຈຳ­ນວນ 4.186.000 ກວ່າ​ເທື່ອ​ຄົນ ເຊິ່ງ​ເພີ່ມ​ຂຶ້ນ 8,2% ເມື່ອ​ທຽບ​ປີ 2017 ແລະ ສ້າງ​ລາຍ​ຮັບ​ເຂົ້າ​ປະ­ເທດ​ໄດ້ 755.000.000 ກວ່າ​ໂດ​ລາ​ສະ­ຫະ­ລັດ ເພີ່ມ​ຂຶ້ນ 17% ເມື່ອ​ທຽບ­ໃສ່​ປີ 2017 ນັ້ນ​ແມ່ນ​ຜົນ­ງານ​ສຳ­ຄັນ ໃນ​ການ​ປະ­ກອບ­ສ່ວນ​ສ້າງ­ສາ​ພັດ­ທະ­ນາ​ປະ­ເທດ​ຊາດ ສັງ​ລວມ​ແລ້ວ ຜົນ­ງານ​ການ­ເຄື່ອນ­ໄຫວ​ໃນ​ໜຶ່ງ​ປີ­ຜ່ານ­ມາ ມີ​ຢ່າງ​ຫຼວງ­ຫຼາຍ​ເປັນ​ການ​ຢັ້ງ­ຢືນ​ເຖິງ​ຄວາມ​ຮັບ­ຜິດ­ຊອບ​ສູງ ຄວາມ​ເອົາ­ໃຈ­ໃສ່​ເຮັດ​ຫຼ້ອນ​ໜ້າ­ທີ່​ການ­ເມືອງ​ທີ່​ພັກ-ລັດ ແລະ ປະ­ຊາ­ຊົນ​ມອບ​ໝາຍ​ໃຫ້.

ຂ່າວທີ່ກ່ຽວຂ້ອງ