ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 13/02/2019

602 13 ກ.ພ. 2019 ຫົວຂໍ້ຂ່າວອື່ນໆ

    ຄໍ​ລຳ​ທີ່​ທ່ານ​ພວມ​ອ່ານ​ຢູ່​ນີ້ ມີ​ສອງ​ບັນ­ຫາ​ຄື ການ​ຫ້າມ​ພະ­ນັກ­ງານ​ຂັ້ນ​ສູງ​ເດີນ­ທາງ​ໄປ​ຕ່າງ­ປະ­ເທດ​ຢູ່ ເນ​ປານ ແລະ ເລື່ອງ​ແຜນ​ພັດ­ທະ­ນາ​ກະ­ສິ­ກຳ ເພື່ອ​ຄວາມ​ໝັ້ນ­ຄົງ​ດ້ານ​ສະ­ບຽງ​ອາ­ຫານ​ທີ່​ສິງ­ກະ­ໂປ.

    ທີ່ ເນ​ປານ: ກ່ອນ​ໜ້າ​ນີ້ 5 ປີ ມີ​ຂ່າວ​ໃຫຍ່​ໄຟ​ແຮງ​ຈາກ​ປະ­ເທດ​ເນ​ປານ ເຊິ່ງ​ປະ­ເທດ​ເຮົາ​ຄວນ​ໃຫ້​ຄວາມ​ສົນ­ໃຈ​ເບິ່ງ​ໄວ້​ເປັນ​ບົດ­ຮຽນ ນັ້ນ​ກໍ​ຄື ເລື່ອງ​ການ​ອອກ​ໃບ​ອະ­ນຸ­ຍາດ​ລົງ­ທຶນ​ສ້າງ​ເຂື່ອນ​ຜະ­ລິດ​ໄຟ­ຟ້າ​ນ້ຳ­ຕົກ ເລື່ອງ​ມີ​ຢູ່​ວ່າ ໃນ​ທ້າຍ​ເດືອນ​ສິງ­ຫາ ປີ 2013 ລັດ­ຖະ­ບານ​ເນ​ປານ ໄດ້​ຕັດ­ສິນ​ໃຈ​ຢຶດ ແລະ ຍົກ­ເລີກ​ໃບ​ອະ­ນຸ­ຍາດ​ລົງ­ທຶນ​ສ້າງ​ເຂື່ອນ​ໄຟ­ຟ້າ​ຈຳ­ນວນ​ຫຼາຍ​ກວ່າ 600 ໃບ ທີ່​ອະ­ນຸ­ຍາດ​ໃຫ້​ບໍ­ລິ­ສັດ ເອ­ກະ​ຊົນ​ສ້າງ​ເພື່ອ​ຜະ­ລິດ​ພະ­ລັງ­ງານ​ໄຟ­ຟ້າ ໃຫ້​ໄດ້ 11.000 ເມ​ກາ​ວັດ (WM) ແຕ່​ແລ້ວ​ບັນ­ດາ​ບໍ­ລິ­ສັດ​ທີ່​ໄດ້​ຮັບ​ອະ­ນຸ­ຍາດ​ຜັດ​ໄດ້​ແຕ່​ກອດ​ເອ­ກະ­ສານ​ໄວ້​ຊື່ໆ ບໍ່​ລົງ­ມື​ປະ­ຕິ­ບັດ​ເປັນ​ເວ­ລາ​ຫຼາຍ​ປີ​ຊ້ອນ​ກັນ ສຸດ​ທ້າຍ​ທາງ​ການ​ເນ​ປານ ກໍ​ຕັດ­ສິນ​ໃຈ​ຍົກ­ເລີກ​ໃບ​ອະ­ນຸ­ຍາດ​ທັງ​ໝົດ ແລ້ວ​ເລີ່ມ​ຕັ້ງ​ຂະ​ບວນ​ການ​ຄືນ­ໃໝ່ ທ່ານ ໂກ​ກາກ​ນາ ພັນ (Gokarna Pant) ໂຄ­ສົກ​ປະ­ຈຳ​ກົມ​ພັດ­ທະ­ນາ​ພະ­ລັງ­ງານ​ໄຟ­ຟ້າ​ເນ​ປານ ໃຫ້​ຮູ້​ກ່ຽວ​ກັບ​ບັນ­ຫາ​ນີ້​ວ່າ ທາງ​ກົມ​ໄດ້​ເປັນ​ເຈົ້າ​ການ​ຍົກ­ເລີກ​ໃບ​ອະ­ນຸ­ຍາດ ຈຳ­ນວນ 500 ໃບ ກະ­ຊວງ​ພະ­ລັງ­ງານ​ຍົກ­ເລີກ ຈຳ­ນວນ 100 ໃບ ລະ­ຫວ່າງ​ແຕ່​ປີ 2012 ຫາ​ເດືອນ​ກໍ­ລະ­ກົດ ປີ 2013 ທ່ານ​ໂຄ­ສົກ​ບອກ​ວ່າ ມາດ​ຕະ­ການ​ຍົກ­ເລີກ ແລະ ຖອນ​ຄືນ​ໃບ​ອະ­ນຸ­ຍາດ​ນີ້ ຈະ​ຊ່ວຍ​ປ້ອງ​ກັນ​ບໍ່​ໃຫ້​ມີ​ການ​ຊື້-ຂາຍ​ໃບ​ອະ­ນຸ­ຍາດ​ຊະ­ຊາຍ ພວກ​ນັກ​ລົງ­ທຶນ​ຫົວ​ໃສ​ທັງ­ຫຼາຍ​ມັກ​ຈະ​ວິ່ງ​ເຕັ້ນ​ຂໍ​ໃບ​ອະ­ນຸ­ຍາດ ຈາກ​ນັ້ນ ກໍ​ຂາຍ​ໃບ​ອະ­ນຸ­ຍາດ​ໃຫ້​ພວກ​ນາຍ­ທຶນ​ຄົນ​ອື່ນ ແທນ​ທີ່​ຈະ​ລົງ­ມື​ພັດ­ທະ­ນາ​ເອງ ທ່ານ ໂກ​ກາກ​ນາ ບິດ​ສະ​ຕາ (Gokarna Bista) ອະ­ດີດ​ລັດ­ຖະ­ມົນ­ຕີ​ພະ­ລັງ­ງານ​ເນ​ປານ ຊົມ­ເຊີຍ​ການ​ຕັດ­ສິນ​ໃຈ​ຂອງ​ລັດ­ຖະ­ບານ​ກ່ຽວ​ກັບ​ບັນ­ຫາ​ນີ້ ແຕ່​ອອກ­ປາກ​ເຕືອນ​ວ່າ ລັດ­ຖະ­ບານ​ຕ້ອງ​ຮັບ­ປະ­ກັນ​ບໍ່​ໃຫ້​ໃບ​ອະ­ນຸ­ຍາດ​ທີ່​ຖອນ​ຄືນ​ມາ​ນັ້ນ ຕົກ​ໃສ່​ມື​ພວກ​ສວຍ­ໂອ­ກາດ ຫຼິ້ນ​ພັກ​ພວກ ຮັກ​ບັງ​ຊັງ​ບ່ຽງ ໃນ​ສະ­ໄໝ​ທ່ານ ໂກ​ກາກ​ນາ ບິດ​ສະ​ຕາ ເປັນ​ລັດ­ຖະ­ມົນ­ຕີ​ພະ­ລັງ­ງານ​ນັ້ນ ການ​ອອກ​ໃບ​ອະ­ນຸ­ຍາດ​ດຳ­ເນີນ​ໄປ​ຕາມ​ລະ­ບົບ​ແຂ່ງ­ຂັນ (ປະ­ມູນ) ແບບ​ເປີດ­ເຜີຍ ແນ­ໃສ່​ປ້ອງ​ກັນ​ບໍ່​ໃຫ້​ມີ​ການ​ນຳ​ໃຊ້​ໃບ​ອະ­ນຸ­ຍາດ​ໄປ​ໃນ​ທາງ​ຜິດ.

    ທີ່ ສິງ­ກະ­ໂປ: ປະ­ເທດ​ເກາະ​ນ້ອຍໆ​ມີ​ຊື່­ວ່າ ສິງ­ກະ­ໂປ ນີ້ ມີ​ພື້ນ​ທີ່​ຈຳ­ກັດ​ທີ່​ສຸດ​ສຳ­ລັບ​ການ​ຜະ­ລິດ​ກະ­ສິ­ກຳ ແຕ່​ປານ​ນັ້ນ​ທາງ​ການ​ຂອງ​ປະ­ເທດ​ນີ້​ຍັງ​ຢັ້ງ­ຢືນ​ວ່າ ຈະ​ສາ­ມາດ​ຮັບ­ປະ­ກັນ​ຄວາມ​ໝັ້ນ­ຄົງ​ດ້ານ​ສະ­ບຽງ​ອາ­ຫານ ໂດຍ​ການ​ພັດ­ທະ­ນາ​ວຽກ​ງານ​ກະ­ສິ­ກຳ​ທີ່​ກ້າວ­ໜ້າ ຜົນ​ຜະ­ລິດ​ກະ­ສິ­ກຳ​ພາຍ​ໃນ​ປະ­ເທດ​ນີ້ ຈະ​ສາ­ມາດ​ຊ່ວຍ​ແກ້​ໄຂ​ເມື່ອ​ໃດ​ເກີດ​ມີ​ສະ­ພາບ​ສະ­ໜອງ​ສະ­ບຽງ​ອາ­ຫານ​ຈາກ​ພາຍ​ນອກ​ບໍ່​ທ່ວງ​ທັນ​ຂ່າວ (ວຽງ​ຈັນ​ທາມ 11 ພຶດ­ສະ­ພາ 2017) ບອກ​ວ່າ ລັດ­ຖະ­ບານ​ໄດ້​ຂຶ້ນ​ແຜນ​ປະ­ມູນ​ເນື້ອ­ທີ່​ຜະ­ລິດ​ກະ­ສິ­ກຳ​ໃຫ້​ເຊົ່າ​ສຳ­ລັບ​ການ​ຜະ­ລິດ​ດ້ວຍ​ລະ­ບົບ​ໄຮ​ເທັກ ທີ່​ມີ​ປະ​ສິດ­ທິ​ຜົນ​ສູງ ເປັນ​ໄລ­ຍະ​ເວ­ລາ 20 ປີ ເພີ່ມ​ຈາກ​ທີ່​ໄດ້​ປະ­ກາດ​ໄປ​ກ່ອນ​ໜ້າ​ວ່າ 10 ປີ ທ່ານ ລໍ​ເຣັນ ວອງ (Lawrence Wong) ລັດ­ຖະ­ມົນ­ຕີ​ກະ­ຊວງ​ພັດ­ທະ­ນາ​ແຫ່ງ​ຊາດ ໄດ້​ໃຫ້​ລາຍ​ລະ­ອຽດ​ຕື່ມ​ກ່ຽວ​ກັບ​ແຜນ​ຈັດ​ປະ­ມູນ​ດິນ​ກະ­ສິ­ກຳ​ຄັ້ງ​ນີ້​ວ່າ ທາງ​ການ​ໄດ້​ຮັບ​ການ​ສ່ອງ​ແສງ​ວ່າ ຊາວ­ນາ​ຕ້ອງ­ການ​ນຳ​ໃຊ້​ດິນ​ເປັນ​ເວ­ລາ​ຍາວ​ນານ ເພາະ​ຕ້ອງ​ໄດ້​ລົງ­ທຶນ​ໃສ່​ເຕັກ​ໂນ​ໂລ​ຊີ​ຫຼາຍ ດັ່ງ­ນັ້ນ ຈຶ່ງ​ໄດ້​ເພີ່ມ​ເວ­ລາ​ນຳ​ໃຊ້​ທີ່​ດິນ​ຈາກ 10 ເປັນ 20 ປີ ທ່ານ​ລັດ­ຖະ­ມົນ­ຕີ​ຍອມ­ຮັບ​ວ່າ ສິງ­ກະ­ໂປ​ມີ​ພື້ນ​ທີ່​ດິນ​ຈຳ­ກັດ​ຫຼາຍ ດັ່ງ­ນັ້ນ ຈຶ່ງ​ບໍ່​ສາ­ມາດ​ຜະ­ລິດ​ສະ­ບຽງ​ອາ­ຫານ​ທັງ​ໝົດ​ເອົາ​ເອງ ແນວ­ໃດ​ກໍ​ດີ ການ​ນຳ​ໃຊ້​ເຕັກ​ໂນ​ໂລ​ຊີ​ການ​ຜະ­ລິດ​ກະ­ສິ­ກຳ​ແບບ​ໃໝ່​ທີ່​ທັນ​ສະ­ໄໝ ຈະ​ຊ່ວຍ​ຍົກ​ປະ­ສິດ­ທິ­ພາບ​ການ​ຜະ­ລິດ​ຂອງ​ສິງ­ກະ­ໂປ​ໄດ້​ຢ່າງ​ຫຼວງ­ຫຼາຍ ບໍ່​ພຽງ​ແຕ່​ເພື່ອ​ເພີ່ມ​ຈຳ­ນວນ​ຜົນ​ຜະ­ລິດ​ພາຍ​ໃນ ແຕ່​ຍັງ​ຈະ​ຊ່ວຍ​ໃຫ້​ທຸ­ລະ​ກິດ​ຊາວ­ນາ​ເຕີບ​ໃຫຍ່​ຂຶ້ນ​ຕໍ່ໆ​ໄປ.

ຂ່າວທີ່ກ່ຽວຂ້ອງ