ຂ່າວຫຼ້າສຸດ

ສ້າງຄວາມຮັບຮູ້ກ່ຽວກັບວິຊາຊີບທ່ອງທ່ຽວອາຊຽນ

209 14 ກ.ພ. 2019 ຂ່າວໜ້າ​ໜຶ່ງ
ສ້າງຄວາມຮັບຮູ້ກ່ຽວກັບວິຊາຊີບທ່ອງທ່ຽວອາຊຽນ

    ວັນ​ທີ 7 ກຸມ­ພາ 2019 ຜ່ານ​ມາ ທີ່​ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ໄດ້​ຈັດ​ກອງ​ປະ­ຊຸມ​ສະ­ຫຼຸບ​ວຽກ​ງານ ການ­ຈັດ­ຕັ້ງ​ປະ­ຕິ­ບັດ​ສັນ­ຍາ​ຮັບ​ຮູ້​ເຊິ່ງ​ກັນ ແລະ ກັນ​ກ່ຽວ​ກັບ​ວິ­ຊາ​ຊີບ​ທ່ອງ​ທ່ຽວ​ອາ​ຊຽນ (MRA-TP) ພາຍ​ໃຕ້​ການ​ເປັນ​ປະ­ທານ​ຂອງ​ທ່ານ ອຸ່ນ​ທວງ ຂາວ​ພັນ ຮອງ​ລັດ­ຖະ­ມົນ­ຕີ​ກະ­ຊວງ ຖວ​ທ ມີ​ບັນ­ດາ​ຫົວ­ໜ້າ​ກົມ ຮອງ​ກົມ ພະ­ແນກ­ການ ແລະ ວີ​ຊາ​ການ​ກົມ​ອ້ອມ​ຂ້າງ​ກະ­ຊວງ​ເຂົ້າ​ຮ່ວມ.

    ກອງ​ປະ­ຊຸມ​ໃນ​ຄັ້ງ​ນີ້ ໄດ້​ລາຍ​ງານ​ກ່ຽວ​ກັບ​ກົນ​ໄກ​ການ​ຮ່ວມ​ມື ແຜນ​ຍຸດ​ທະ​ສາດ​ວຽກ​ງານ​ການ­ທ່ອງ­ທ່ຽວ 2016-2025 ຄວາມ​ຄືບ​ໜ້າ ໃນ​ການ­ຈັດ­ຕັ້ງ​ປະ­ຕິ­ບັດ​ສັນ­ຍາ​ຮັບ​ຮູ້​ເຊິ່ງ​ກັນ ແລະ ກັນ ກ່ຽວ​ກັບ​ວິ­ຊາ​ຊີບ​ທ່ອງ​ທ່ຽວ​ອາ​ຊຽນ​ໃນ ສປປ ລາວ ໃນ​ໄລ­ຍະ​ຜ່ານ​ມາ ແລະ ແຜນ​ການ­ຈັດ­ຕັ້ງ​ປະ­ຕິ­ບັດ​ໃນ­ຕໍ່­ໜ້າ ຊຶ່ງ​ປະ­ກອບ​ມີ ການ​ສ້າງ​ຄູ​ເຝິກ ແລະ ຄູ​ປະ​ເມີນ​ຜົນ​ວິ­ຊາ​ຊີບ ທ່ອງ​ທ່ຽວ​ອາ​ຊຽນ ການ​ເຜີຍ­ແຜ່​ສັນ­ຍາ MRA-TP ການ​ສ້າງ​ລະ­ບົບ​ການ​ລົງ­ທະ­ບຽນ​ວິ­ຊາ​ຊີບ​ທ່ອງ​ທ່ຽວ​ອາ​ຊຽນ ການ​ສ້າງ​ລະ­ບົບ​ທຽບ​ໂອນ (RPL) ແລະ ກິດ­ຈະ­ກຳ​ອື່ນໆ​ທີ່​ກ່ຽວ­ຂ້ອງ.

    ໃນ​ພິ­ທີ ທ່ານ ອຸ່ນ​ທວງ ຂາວ​ພັນ ໄດ້​ຕາງ­ໜ້າ​ໃຫ້​ແກ່​ກະ­ຊວງ ຖວ​ທ ມອບ​ລາ­ງວັນ​ການ­ຈັດ­ຕັ້ງ​ປະ­ຕິ­ບັດ​ສັນ­ຍາ MRA-TP ໃຫ້​ແກ່​ສະ​ຖາ​ບັນ ສວ​ທ ຕື່ມ​ອີກ ຊຶ່ງ​ເປັນ​ລາ­ງວັນ​ອັນ​ຊົງ​ກຽດ​ລະ­ດັບ​ອາ​ຊຽນ ເພື່ອ​ຈາ­ລຶກ ແລະ ຮັບ​ຮູ້​ເຖິງ​ການ­ຈັດ­ຕັ້ງ​ປະ­ຕິ­ບັດ​ສັນ­ຍາ MRA-TP ກໍ​ຄື​ການ​ພັດ­ທະ­ນາ​ບຸ​ຄະ­ລາ​ກອນ​ທ່ອງ​ທ່ຽວ ໃຫ້​ສາ­ມາດ​ເຊື່ອມ​ໂຍງ​ກັບ​ພາກ​ພື້ນ​ອາ​ຊຽນ ແລະ ສາ­ກົນ​ໄດ້​ເທື່ອ​ລະ​ກ້າວ.

    ພ້ອມ​ນີ້ ທ່ານ​ຮອງ​ລັດ­ຖະ­ມົນ­ຕີ ຍັງ​ໄດ້​ຮຽກ­ຮ້ອງ​ໃຫ້​ທຸກ​ພາກ­ສ່ວນ ໂດຍ​ສະ­ເພາະ​ສະ​ຖາ​ບັນ ສວ​ທ ເພີ່ມ​ທະ­ວີ​ການ​ພັດ­ທະ­ນາ​ບຸ​ຄະ­ລາ​ກອນ​ທ່ອງ​ທ່ຽວ​ລາວ ໃຫ້​ມີ​ຄຸນ​ນະ​ພາບ​ທີ່​ດີ ທັງ​ນີ້ ກໍ​ເພື່ອ​ເປັນ​ການ​ຍົກ​ລະ­ດັບ​ຄຸນ​ນະ​ພາບ​ດ້ານ​ການ​ບໍ­ລິ­ການ​ສ້າງ​ຊື່​ສຽງ ດ້ານ​ການ­ທ່ອງ­ທ່ຽວ​ຂອງ​ລາວ​ໃຫ້​ດີ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ