ຍີ່ປຸ່ນ ໃຫ້ທຶນຊ່ວຍເຫຼືອໂຄງການຮັກສາສຸຂະພາບ

320 14 ກ.ພ. 2019 ຂ່າວໜ້າ​ໜຶ່ງ
ຍີ່ປຸ່ນ ໃຫ້ທຶນຊ່ວຍເຫຼືອໂຄງການຮັກສາສຸຂະພາບ

    ລັດ­ຖະ­ບານ​ຍີ່­ປຸ່ນ ໄດ້​ໃຫ້​ທຶນ​ຊ່ວຍ­ເຫຼືອ​ລ້າ​ຜ່ານ​ອົງ­ການ​ຊ່ວຍ­ເຫຼືອ​ສາ­ກົນ ທາງ​ດ້ານ​ການ​ສຶກ​ສາ​ທັນ​ຕະ​ກຳ​ແຫ່ງ​ປະ­ເທດ​ຍີ່­ປຸ່ນ​ປະ­ຈຳ​ລາວ (OISDE) ມູນ​ຄ່າ​ປະ­ມານ 2,751 ຕື້​ກີບ ຫຼື 320.997 ໂດ​ລາ​ສະ­ຫະ­ລັດ ເພື່ອ​ຈັດ​ຕັ້ງ​ປະ­ຕິ­ບັດ​ໂຄງ­ການ​ບໍ­ລິ­ການ​ດ້ານ​ສຸ­ຂະ­ພາບ​ປາກ ແລະ ແຂ້ວ ໃນ​ລາວ​ໄລ­ຍະ 3 ປີ ໂດຍ​ສະ­ເພາະ​ຢູ່​ບັນ­ດາ​ແຂວງ​ເປົ້າ​ໝາຍ ເຊັ່ນ: ນະ­ຄອນ­ຫຼວງ​ວຽງ​ຈັນ ແຂວງ​ບໍ​ລິ​ຄຳ​ໄຊ ຄຳ​ມ່ວນ ວຽງ​ຈັນ ແລະ ແຂວງ​ສະ­ຫວັນ​ນະ​ເຂດ ແນ­ໃສ່​ເພື່ອ​ສົ່ງ­ເສີມ​ຂີດ​ຄວາມ​ສາ­ມາດ​ດ້ານ​ການ​ຮັກ­ສາ​ສຸ­ຂະ­ພາບ​ໃຫ້​ເຂັ້ມ­ແຂງ ແລະ ມີ​ຜົນ­ສຳ­ເລັດ​ຫຼາຍ​ຂຶ້ນ.

    ພິ­ທີ​ເຊັນ​ສັນ­ຍາ​ຊ່ວຍ­ເຫຼືອ​ໂຄງ­ການ​ດັ່ງ­ກ່າວ ໄດ້​ຈັດ​ຂຶ້ນ​ວັນ​ທີ 13 ກຸມ­ພາ 2019 ທີ່​ສະ­ຖານ­ທູດ​ຍີ່­ປຸ່ນ​ປະ­ຈຳ​ລາວ ລະ­ຫວ່າງ​ທ່ານ ທາ​ຄາ​ຊິ ມິ​ຢາ​ຕະ ຫົວ­ໜ້າ​ອົງ­ການ​ຊ່ວຍ­ເຫຼືອ​ສາ­ກົນ​ທາງ​ດ້ານ​ການ​ສຶກ​ສາ​ທັນ​ຕະ​ກຳ​ແຫ່ງ​ປະ­ເທດ​ຍີ່­ປຸ່ນ ແລະ ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ​ປະ­ຈຳ​ລາວ ມີ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ພະ­ນັກ­ງານ​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

    ໂຄງ­ການ​ນີ້​ມີ​ເປົ້າ​ໝາຍ​ທີ່​ຈະ​ຈັດ​ຕັ້ງ​ການ​ບໍ­ລິ­ການ​ສຸ­ຂະ­ພາບ​ປາກ-ແຂ້ວ ແລະ ຊ່ວຍ​ຫຼຸດ​ຈຳ­ນວນ​ການ​ຕິດ­ເຊື້ອ​ຈາກ​ພະ­ຍາດ​ລວມ​ໄປ​ເຖິງ​ພະ­ຍາດ​ແຂ້ວ ແລະ ປາກ​ໃນ​ລາວ ອົງ­ການ​ຊ່ວຍ­ເຫຼືອ​ສາ­ກົນ ທາງ​ດ້ານ​ການ​ສຶກ​ສາ​ທັນ​ຕະ​ກຳ​ແຫ່ງ​ປະ­ເທດ​ຍີ່­ປຸ່ນ ຈະ​ສ້າງ​ພື້ນ­ຖານ​ທີ່​ລວມ​ສູນ​ການ​ສຸ​ຂະ​ສຶກ​ສາ ແລະ ໃຫ້​ຄວາມ​ຮູ້​ພະ­ຍາ­ບານ​ໃນ​ຂອບ​ເຂດ​ທົ່ວ​ປະ­ເທດ ນອກ​ນີ້​ອົງ­ການ​ຍັງ​ໄດ້​ຊື້​ລົດ­ເມ​ຂົນ­ສົ່ງ ແລະ ຈັດ​ເຝີກ​ອົບ­ຮົມ​ຕົວ​ຈິງ​ກ່ຽວ​ກັບ​ການ​ພະ­ຍາ­ບານ​ທົ່ວ​ໄປ​ໃຫ້​ກັບ 4 ແຂວງ​ເປົ້າ​ໝາຍ​ອີກ​ດ້ວຍ (ແຂວງ​ວຽງ​ຈັນ ບໍ​ລິ​ຄຳ​ໄຊ ຄຳ​ມ່ວນ ແລະ ສະ­ຫວັນ​ນະ​ເຂດ).

ຂ່າວທີ່ກ່ຽວຂ້ອງ