ຂ່າວຫຼ້າສຸດ

ສືບຕໍ່ລົງແກ້ໄຂຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງ

460 14 ກ.ພ. 2019 ຂ່າວໜ້າ​ໜຶ່ງ
ສືບຕໍ່ລົງແກ້ໄຂຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງ

    ກອງ​ປະ­ຊຸມ​ສຳ​ມະ​ນາ​ຮ່ວມ​ກັນ​ເປັນ​ເຈົ້າ­ພາບ ແກ້​ໄຂ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ດ້ານ​ວັດ­ທະ­ນະ­ທຳ ແລະ ທ່ອງ​ທ່ຽວ​ຢູ່​ນະ­ຄອນ­ຫຼວງ​ວຽງ​ຈັນ ໄດ້​ຈັດ​ຂຶ້ນ​ວັນ​ທີ 13 ກຸມ­ພາ 2019 ຢູ່​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ມີ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ທ່ານ ບົວ​ເງິນ ຊາ​ພູ​ວົງ ຮອງ​ລັດ­ຖະ­ມົນ­ຕີ ກະ­ຊວງ ຖວ​ທ ຫົວ­ໜ້າ​ກົມ​ກ່ຽວ­ຂ້ອງ ທ່ານ ເຂັມ​ເພັດ ແພງ​ດວງ​ຈັນ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ ນວ ມີ​ຫົວ­ໜ້າ ຮອງ​ຫົວ­ໜ້າ​ພະ​ແນກ ຖວ​ທ ນວ ບັນ­ດາ​ຮອງ​ເຈົ້າ­ເມືອງ ຫົວ­ໜ້າ​ຫ້ອງ­ການ ຖວ​ທ ເມືອງ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ກ່າວ​ວ່າ: ເປົ້າ​ໝາຍ​ການ​ຈັດ​ສັນ​ແມ່ນ​ແນ­ໃສ່​ບັນ­ດາ 9 ຕົວ​ເມືອງ ໂດຍ​ເລັ່ງ​ໃສ່ 4 ເມືອງ​ໃນ​ເທ­ສະ​ບານ​ຄື: ຈັນ­ທະ​ບູ​ລີ ສີ​ສັດ­ຕະ​ນາກ ສີ​ໂຄດ​ຕະ­ບອງ ແລະ ໄຊ​ເຊດ​ຖາ ເຊິ່ງ​ເອົາ​ເມືອງ​ສີ​ໂຄດ​ຕະ­ບອງ​ເປັນ​ເມືອງ​ເລີ່ມ​ຕົ້ນ​ກ່ອນ ແລະ ເມືອງ​ອື່ນໆ​ກໍ​ດຳ­ເນີນ​ໄປ​ພ້ອມ​ກັນ ການ​ຈັດ​ສັນ​ແມ່ນ​ອີງ­ໃສ່ 21 ເສັ້ນ­ທາງ​ຫຼັກ ໂດຍ​ຖື​ເອົາ​ຖະ­ໜົນ​ສຸ​ພາ­ນຸ​ວົງ​ເປັນ​ບ່ອນ​ເລີ່ມ​ຕົ້ນ ແລະ ເສັ້ນ­ທາງ​ອື່ນໆ​ແມ່ນ​ປະ­ຕິ­ບັດ​ໄປ​ພ້ອມ​ເຊັ່ນ​ດຽວ​ກັນ ເລັ່ງ​ໃສ່​ແກ້​ໄຂ​ໃນ​ທຸກ​ຫົວ­ໜ່ວຍ​ທຸ­ລະ​ກິດ​ນັບ​ທັງ​ມີ​ອະ­ນຸ­ຍາດ ແລະ ບໍ່​ມີ​ອະ­ນຸ­ຍາດ​ທີ່​ມີ​ຫາງ​ສຽງ​ຈາກ​ສັງ­ຄົມ ແລະ ການ​ສົ່ງ​ຂ່າວ​ຂອງ​ປະ­ຊາ­ຊົນ​ທີ່​ເປັນ​ບ່ອນ​ເຕົ້າ­ໂຮມ​ຂອງ​ກຸ່ມ​ແກ້ງ​ກວນ​ເມືອງ ມົ້ວ​ສຸມ​ຢາ​ເສບ​ຕິດ ອາ​ລະ​ວາດ​ຕີ​ກັນ ຮ້ານ​ແຄມ​ທາງ​ບ່ອນ​ທີ່​ມີ​ນາງ​ສາວ​ບໍ­ລິ­ການ (ຄ້າ​ໂສ­ເພ­ນີ) ການ​ສົ່ງ​ສຽງ​ດັງ​ລົບ​ກວນ​ຂ້າງ­ຄຽງ ການ​ບໍ­ລິ­ການ​ກາຍ​ໂມງ​ເວ­ລາ​ທີ່​ທາງ​ການ​ກຳ­ນົດ​ໄວ້ ແລະ ການ​ຕິດ​ຕັ້ງ​ປ້າຍ​ໂຄ­ສະ­ນາ​ບໍ່​ຖືກ­ຕ້ອງ.

    ນອກ­ຈາກ​ນີ້ ຍັງ​ໄດ້​ສຸມ​ໃສ່​ການ​ສັງ​ລວມ​ສະ­ຖິ­ຕິ​ບັນ­ດາ​ຫົວ­ໜ່ວຍ​ທຸ­ລະ​ກິດ​ບໍ­ລິ­ການ ດ້ານ​ວັດ­ທະ­ນະ­ທຳ ແລະ ທ່ອງ​ທ່ຽວ​ທົ່ວ ນວ ໃຫ້​ຊັດ​ເຈນ ໂດຍ​ປະ­ຕິ­ບັດ​ຕາມ​ວຽກ​ງານ 3 ສ້າງ ໄດ້​ມີ​ການ​ແບ່ງ​ຂັ້ນ​ຄຸ້ມ​ຄອງ​ບັນ­ດາ​ຫົວ­ໜ່ວຍ​ທຸ­ລະ​ກິດ​ຕ່າງໆ ລະ­ຫວ່າງ​ຂັ້ນ ນວ ແລະ ຂັ້ນ​ເມືອງ ໃນ​ນັ້ນ ຂັ້ນ ນວ ຄຸ້ມ​ຄອງ ແລະ ອອກ​ອະ­ນຸ­ຍາດ​ມີ​ຄື: ບໍ­ລິ­ສັດ​ທ່ອງ​ທ່ຽວ 292 ບໍ­ລິ­ສັດ ໂຮງ­ແຮມ 230 ແຫ່ງ ເຮືອນ​ພັກ 228 ແຫ່ງ ຣີ​ສອດ 25 ແຫ່ງ ອາ​ພັດ​ເມັນ 21 ແຫ່ງ ພັດ​ຕະ​ຄານ-ສວນ​ອາ­ຫານ 108 ແຫ່ງ ແລະ ຮ້ານ​ບັນ­ເທີງ 38 ແຫ່ງ (ເມືອງ​ສີ​ໂຄດ 6 ແຫ່ງ ສີ​ສັດ­ຕະ​ນາກ 3 ແຫ່ງ ຈັນ­ທະ​ບູ​ລີ 3 ແຫ່ງ ໄຊ​ເຊດ​ຖາ 2 ແຫ່ງ ນາ​ຊາຍ​ທອງ 2 ແຫ່ງ ແລະ ໄຊ​ທາ­ນີ 2 ແຫ່ງ) ໃນ​ນີ້ ມີ​ປະ­ເພດ​ໄນ​ຄັບ 3 ແຫ່ງ ດິ​ສ​ໂກ້​ເທັກ 15 ແຫ່ງ ຮ້ານ​ຄາ​ລາ​ໂອ​ເກະ 20 ແຫ່ງ ວົງ​ດົນ­ຕີ 18 ວົງ ສອນ​ດົນ­ຕີ 1 ແຫ່ງ ຄະ­ນະ​ໝໍ​ລຳ 3 ຄະ­ນະ ແລະ ປ້າຍ​ໂຄ­ສະ­ນາ​ຕ່າງໆ​ທີ່​ອອກ​ອະ­ນຸ­ຍາດ​ດ້ານ​ເນື້ອ​ໃນ​ມີ 701 ປ້າຍ ແລະ ອອກ​ອະ­ນຸ­ຍາດ​ປ້າຍ​ຂ້າມ​ທາງ​ມີ 499 ປ້າຍ (ໃນ​ນີ້ ມີ​ທັງ​ປ້ານ​ໂຄ­ສະ­ນາ​ຂອງ​ພາກ​ລັດ).

    ສ່ວນ​ຫ້ອງ­ການ ຖວ​ທ ເມືອງ​ຄຸ້ມ​ຄອງ ແລະ ອອກ​ອະ­ນຸ­ຍາດ ປະ­ກອບ​ມີ ປ້າຍ​ໂຄ­ສະ­ນາ​ຕ່າງໆ​ມີ 1.586 ປ້າຍ ຮ້ານ​ອາ­ຫານ-ກິນ​ດື່ມ​ກາງ­ແຈ້ງ​ທີ່​ເປີດ​ເຄື່ອງ​ສຽງ ຫຼື​ຮ້ອງ­ເພງ​ຄາ​ລາ​ໂອ​ເກະ​ມີ 93 ຮ້ານ ຮ້ານ​ອາ­ຫານ-ກິນ​ດື່ມ​ທົ່ວ​ໄປ​ມີ 896 ຮ້ານ ຮ້ານ​ເສີມ​ຄວາມ​ງາມ​ມີ 293 ຮ້ານ ໃນ​ນີ້​ຂອງ​ຄົນ​ຕ່າງ­ປະ­ເທດ​ມີ 73 ຮ້ານ ຮ້ານ​ກາ­ເຟ​ຢອດ​ຊາວ​ຕ່າງ­ປະ­ເທດ​ມີ 20 ຮ້ານ ຮ້ານ​ນວດ​ແຜນ​ບູ­ຮານ​ມີ 71 ຮ້ານ ໃນ​ນີ້ ບໍ່​ມີ​ໃບ​ອະ­ນຸ­ຍາດ 19 ຮ້ານ ຮ້ານ​ອາ­ຫານ-ກິນ​ດື່ມ​ທີ່​ມີ​ນາງ​ສາວ​ບໍ­ລິ­ການ​ມີ 169 ຮ້ານ ຮ້ານ​ຄົນ​ຕ່າງ­ປະ­ເທດ​ມີ 42 ຮ້ານ ສວນ​ອາ­ຫານ​ມີ 9 ແຫ່ງ ແລະ ຮ້ານ​ບັນ­ເທີງ-ຄາ​ລາ​ໂອ​ເກະ​ມີ 7 ຮ້ານ (ສະ­ເພາະ​ເມືອງ 3 ສ້າງ).

    ເພື່ອ​ເຮັດ​ໃຫ້​ສັງ­ຄົມ​ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ເສດ­ຖະ­ກິດ-ສັງ­ຄົມ​ມີ​ການ​ຂະ­ຫຍາຍ­ຕົວ ພວກ​ເຮົາ​ຈະ​ຕ້ອງ​ໄດ້​ສືບ­ຕໍ່​ລົງ​ແກ້​ໄຂ​ບັນ­ດາ​ຫົວ­ໜ່ວຍ​ທຸ­ລະ​ກິດ ທີ່​ເຄື່ອນ​ໄຫວ​ດຳ­ເນີນ​ທຸ­ລະ​ກິດ​ທີ່​ບໍ່​ຖືກ­ຕ້ອງ ລວມ​ທັງ​ບ່ອນ​ທີ່​ມີ​ອະ­ນຸ­ຍາດ ແລະ ບໍ່​ມີ​ອະ­ນຸ­ຍາດ​ໃຫ້​ປະ­ຕິ­ບັດ​ຕາມ​ຂໍ້​ກຳ­ນົດ ລະ­ບຽບ​ການ​ຕ່າງໆ​ທີ່​ທາງ​ການ​ກຳ­ນົດ​ໄວ້​ຢ່າງ​ເຂັ້ມ​ງວດ ເປັນ­ຕົ້ນ ທຸ­ລະ​ກິດ​ທີ່​ພັກ​ແຮມ ຮ້ານ​ອາ­ຫານ-ກິນ​ດື່ມ ບັນ­ເທີງ ເສບ​ດົນ­ຕີ​ກາງ­ແຈ້ງ​ໃນ​ງານ​ຄົບ­ງັນ​ບຸນ​ສິນ​ກິນ​ທານ ກໍ​ຄື ການ​ຫຼິ້ນ​ເຄື່ອງ​ຫຼິ້ນ​ຕ່າງໆ​ທີ່​ມີ​ຮູບ​ແບບ​ການ​ຫຼິ້ນ​ການ​ພະ­ນັນ ທີ່​ໄດ້​ສົ່ງ​ຜົນ​ກະ­ທົບ​ດ້ານ​ສຽງ ສະ­ພາບ​ແວດ​ລ້ອມ ແລະ ອື່ນໆ ຕໍ່​ຜູ້​ຢູ່​ບ້ານ​ໃກ້​ເຮືອນ​ຄຽງ​ໃຫ້​ຫຼຸດ​ລົງ​ເທື່ອ​ລະ​ກ້າວ.

ຂ່າວທີ່ກ່ຽວຂ້ອງ