ຂ່າວຫຼ້າສຸດ

ຍ້ອງຍໍຜູ້ມີຜົນງານຮຽບຮຽງປະຫວັດຂອງທ່ານ ໜູຮັກ ພູມສະຫວັນ

435 14 ກ.ພ. 2019 ຂ່າວໜ້າ​ໜຶ່ງ
ຍ້ອງຍໍຜູ້ມີຜົນງານຮຽບຮຽງປະຫວັດຂອງທ່ານ ໜູຮັກ ພູມສະຫວັນ

    ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ໄດ້​ຕາງ­ໜ້າ​ໃຫ້​ລັດ­ຖະ­ບານ​ຈັດ​ພິ­ທີ​ປະ­ດັບ​ຫຼຽນ​ໄຊ​ແຮງ​ງານ ຊັ້ນ I ຊັ້ນ II ແລະ ຊັ້ນ III ໃຫ້​ຄະ­ນະ​ຄົ້ນ­ຄວ້າ​ເກັບ​ກຳ ແລະ ຮຽບ​ຮຽງ​ປະ­ຫວັດ​ຂອງ​ທ່ານ ໜູ​ຮັກ ພູມ​ສະ­ຫວັນ ອະ­ດີດ​ປະ­ທານ​ປະ­ເທດ ຂຶ້ນ​ວັນ​ທີ 13 ກຸມ­ພາ 2019 ທີ່​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ (ຫຼັກ 6) ໃຫ້​ກຽດ​ປະ­ດັບ​ຫຼຽນ​ໂດຍ​ທ່ານ ກິ​ແກ້ວ ໄຂ​ຄຳ​ພິ­ທູນ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ມີ​ບັນ­ດາ​ຫົວ­ໜ້າ​ກົມ ສະ​ຖາ​ບັນ ແລະ ພະ­ນັກ­ງານ-ວິ­ຊາ​ການ​ກ່ຽວ­ຂ້ອງ​ເຂົ້າ​ຮ່ວມ.

   ໂອ­ກາດ​ນີ້ ທ່ານ ກິ​ແກ້ວ ໄຂ​ຄຳ​ພິ­ທູນ ໄດ້​ປະ­ດັບ​ຫຼຽນ​ໄຊ​ແຮງ​ງານ ຊັ້ນ I ໃຫ້​ທ່ານ ດວງ​ໄຊ ຫຼວງ​ພະ​ສີ ນັກ​ປະ­ພັນ​ແຫ່ງ​ຊາດ ຫຼຽນ​ໄຊ​ແຮງ​ງານ ຊັ້ນ II ໃຫ້​ທ່ານ​ນາງ ພູ­ທອນ ພູມ​ສະ­ຫວັນ ທ່ານ ຍອດ​ອຳ­ນາດ ຫຼວງ​ພະ​ສີ ແລະ ປະ­ດັບ​ຫຼຽນ​ໄຊ​ແຮງ​ງານ ຊັ້ນ III ໃຫ້​ທ່ານ ເອກ​ອົງ­ອາດ ຫຼວງ​ພະ​ສີ ທ່ານ​ນາງ ແກ້ວ​ມະ­ນີ ພູມ​ສະ­ຫວັນ ແລະ ທ່ານ​ຮ້ອຍ​ໂທ​ນາງ ຄຳ​ພວງ ພູມ​ສະ­ຫວັນ ໂອ­ກາດ​ນີ້ ທ່ານ​ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ບັນ­ດາ​ຄະ­ນະ​ຄົ້ນ­ຄວ້າ​ເກັບ​ກຳ ແລະ ຮຽບ​ຮຽງ​ຄັ້ງ​ນີ້​ທີ່​ໄດ້​ເອົາ­ໃຈ­ໃສ່​ຢ່າງ​ຕັ້ງ­ໜ້າ ເກັບ​ກຳ​ຂໍ້​ມູນ​ວິ­ຖີ​ຊີ­ວິດ​ການ­ເຄື່ອນ­ໄຫວ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ ຕະ­ຫຼອດ​ເຖິງ​ພາ­ລະ­ກິດ​ການ​ປະ­ກອບ­ສ່ວນ​ທັງ​ກຳ­ລັງ ເຫື່ອ­ແຮງ ສະ­ຕິ​ປັນ­ຍາ​ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ​ຂອງ​ທ່ານ ໜູ​ຮັກ ພູມ​ສະ­ຫວັນ ຜູ້­ນຳ​ທີ່​ເຄົາ­ລົບ​ຮັກ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ຕະ­ຫຼອດ​ໄລ­ຍະ​ຜ່ານ​ມາ ເຊິ່ງ​ປຶ້ມ​ພາ­ລະ​ກຳ​ປະ­ຫວັດ­ສາດ ຊີ­ວິດ​ການ​ເຮັດ​ປະ­ຕິ­ວັດ​ຂອງ​ທ່ານ ໜູ​ຮັກ ພູມ​ສະ­ຫວັນ ເຫຼັ້ມ​ນີ້ ຈະ​ເປັນ​ການ​ປະ­ກອບ­ສ່ວນ​ສຳ­ຄັນ ໃນ​ການ​ປົກ​ປັກ​ຮັກ­ສາ​ມູນ­ເຊື້ອ​ປະ­ຫວັດ­ສາດ ເພື່ອ​ໃຫ້​ຄົນ​ຮຸ່ນ​ຫຼັງ​ໄດ້​ສຶກ​ສາ​ຮ່ຳ­ຮຽນ​ຕໍ່​ໄປ.

ຂ່າວທີ່ກ່ຽວຂ້ອງ