ນາຍົກ ເນັ້ນຄົ້ນຄວ້າຫຼຸດຜ່ອນຈຳນວນລັດຖະກອນລົງ ໃຫ້ໄດ້ຕາມສັດສ່ວນ

617 14 ກ.ພ. 2019 ຂ່າວໜ້າ​ໜຶ່ງ
ນາຍົກ ເນັ້ນຄົ້ນຄວ້າຫຼຸດຜ່ອນຈຳນວນລັດຖະກອນລົງ ໃຫ້ໄດ້ຕາມສັດສ່ວນ

    ກອງ​ປະ­ຊຸມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂະ­ແໜງ​ພາຍ​ໃນ ແລະ ວຽກ​ງານ 3 ສ້າງ ປີ 2018 ແລະ ທິດ​ທາງ​ແຜນ­ການ​ປີ 2019 ສຳ­ເລັດ​ວັນ​ທີ 13 ກຸມ­ພາ 2019 ພາຍ­ຫຼັງ​ດຳ­ເນີນ​ມາ​ເປັນ​ເວ­ລາ 2 ວັນ ໂດຍ​ເປັນ​ປະ­ທານ​ຂອງ​ທ່ານ ຄຳ​ໝັ້ນ ສູນ​ວິ​ເລີດ ລັດ­ຖະ­ມົນ­ຕີ​ກະ­ຊວງ​ພາຍ​ໃນ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ມີ​ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ຫ້ອງ­ການ ແລະ ຫົວ­ໜ້າ​ກົມ​ຈັດ​ຕັ້ງ-ພະ­ນັກ­ງານ​ກະ­ຊວງ ອົງ­ການ​ລັດ​ທຽບ​ເທົ່າ​ກະ­ຊວງ ອົງ​ການ­ຈັດ­ຕັ້ງ​ມະ­ຫາ­ຊົນ​ຂັ້ນ​ສູນ​ກາງ ແລະ ບັນ­ດາ​ຮອງ​ເຈົ້າ­ແຂວງ ຮອງ​ເຈົ້າ​ຄອງ​ນະ­ຄອນ­ຫຼວງ ບັນ­ດາ​ເຈົ້າ­ເມືອງ-ຮອງ​ເຈົ້າ­ເມືອງ ເຈົ້າ​ນະ­ຄອນ-ຮອງ​ເຈົ້າ​ນະ­ຄອນ ແລະ ຫົວ­ໜ້າ​ພະ​ແນກ​ພາຍ​ໃນ​ແຂວງ-ນະ­ຄອນ­ຫຼວງ​ທົ່ວ​ປະ­ເທດ ພ້ອມ​ດ້ວຍ​ພະ­ນັກ­ງານ-ວິ­ຊາ​ການ​ກະ­ຊວງ​ພາຍ​ໃນ​ເຂົ້າ​ຮ່ວມ.

    ກອງ​ປະ­ຊຸມ ຜູ້​ເຂົ້າ​ຮ່ວມ​ໄດ້​ຮັບ​ຟັງ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂະ­ແໜງ​ພາຍ​ໃນ ແລະ ການ​ປະ­ຕິ­ບັດ​ວຽກ​ງານ 3 ສ້າງ​ໄລ­ຍະ​ໜຶ່ງ​ປີ­ຜ່ານ­ມາ ແລະ ທິດ​ທາງ​ແຜນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໜຶ່ງ​ປີ​ຕໍ່­ໜ້າ ທີ່​ໄດ້​ຍົກ​ໃຫ້​ເຫັນ​ຜົນ­ງານ​ທີ່​ປະ­ຕິ­ບັດ​ສຳ­ເລັດ ດ້ານ​ດີ ຈຸດ​ອ່ອນ ຂໍ້­ຄົງ­ຄ້າງ ທີ່​ຂະ­ແໜງ​ພາຍ​ໃນ​ຈະ​ໄດ້​ສືບ­ຕໍ່​ແກ້​ໄຂ​ໃຫ້​ສຳ­ເລັດ ແລະ ແຜນ​ວຽກ​ທີ່​ຈະ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໃນ­ຕໍ່­ໜ້າ ພ້ອມ​ນັ້ນ ກອງ​ປະ­ຊຸມ​ຍັງ​ໄດ້​ຮັບ​ຟັງ​ລາຍ​ງານ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ ບາງ​ວຽກ​ງານ​ຈຸດ​ສຸມ​ຂອງ​ຂະ­ແໜງ​ພາຍ​ໃນ ເປັນ­ຕົ້ນ ວຽກ​ງານ​ປັບ­ປຸງ​ກົງ­ຈັກ​ການ­ຈັດ­ຕັ້ງ​ລັດ ວຽກ​ງານ​ຄຸ້ມ​ຄອງ​ລັດ­ຖະ­ກອນ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ແກ້​ໄຂ​ເຂດ​ແດນ​ເຊື່ອມ​ຕໍ່ ແລະ ບາງ​ເນື້ອ​ໃນ ຄຳ​ແນະ­ນຳ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ທະ­ບຽນ​ຄອບ­ຄົວ.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ເນັ້ນ​ໃຫ້​ຂະ­ແໜງ​ພາຍ​ໃນ​ເອົາ­ໃຈ­ໃສ່​ບາງ​ບັນ­ຫາ ເປັນ­ຕົ້ນ ປັບ­ປຸງ​ຄືນ​ກົງ­ຈັກ​ການ­ຈັດ­ຕັ້ງ​ໃຫ້​ມີ​ຄວາມ​ເຂັ້ມ­ແຂງ ໂດຍ​ປັບ­ປຸງ​ກົງ­ຈັກ​ອຳ­ນາດ​ລັດ​ແຕ່​ລະ​ຂັ້ນ​ໃຫ້​ມີ​ຄວາມ​ເໝາະ​ສົມ­ຄົບ​ຊຸດ ເຂັ້ມ­ແຂງ ແລະ ມີ​ຄຸນ​ນະ​ພາບ ເພື່ອ​ເຮັດ​ໃຫ້­ການ​ຄຸ້ມ​ຄອງ​ລັດ​ຄຸ້ມ​ຄອງ​ສັງ­ຄົມ​ມີ​ປະ­ສິດ­ທິ­ພາບ ກົງ­ຈັກ​ການ­ຈັດ­ຕັ້ງ​ຢູ່​ສູນ​ກາງ ແລະ ທ້ອງ­ຖິ່ນ ໂດຍ​ສະ­ເພາະ​ຢູ່​ຂັ້ນ​ເມືອງ ພ້ອມ​ທັງ​ສະ­ເໜີ​ໃຫ້​ສ້າງ​ຄຳ​ຂວັນ “ກະ­ທັດ​ຮັດ​ໜັກ​ແໜ້ນ​ເຂັ້ມ­ແຂງ ມີ​ປະ​ສິດ­ທິ​ຜົນ​ບວກ​ໃສ່​ຮັບ​ໃຊ້​ປະ­ຊາ­ຊົນ​ຢ່າງ​ແທ້​ຈິງ” ທີ່​ສຳ­ຄັນ​ແມ່ນ​ກຳ­ນົດ​ຕຳ­ແໜ່ງ​ງານ​ໃຫ້​ຈະ­ແຈ້ງ ເຊິ່ງ​ຕ້ອງ​ໄດ້​ເຮັດ​ການ​ວິ­ເຄາະ​ງານ ຫຼື ໜ້າ​ວຽກ​ຢູ່​ແຕ່​ລະ​ກົງ​ຈັກ­ຢ່າງ​ລະ­ອຽດ ແລະ ສັບ​ຊ້ອນ​ເຂົ້າ​ເປັນ​ກຸ່ມ​ວຽກ​ໃຫຍ່ ໂດຍ​ນຳ​ໃຊ້​ເຕັກ​ໂນ​ໂລ​ຊີ​ເຂົ້າ​ມາ​ຊ່ວຍ ທັງ​ຈະ​ເຮັດ​ໃຫ້​ວຽກ​ວ່ອງ­ໄວ ແລະ ໂປ່ງ​ໃສ​ຫຼາຍ​ຂຶ້ນ ສຳ­ລັບ​ຂົງ­ເຂດ​ວຽກ​ງານ​ລັດ­ຖະ­ກອນ​ປັດ­ຈຸ­ບັນ ເຫັນ​ວ່າ​ຈຳ­ນວນ​ລັດ­ຖະ­ກອນ​ມີ​ທັງ​ໝົດ 180.000 ຄົນ ຄົ້ນ­ຄວ້າ​ໃຫ້​ຫຼຸດ­ຜ່ອນ​ຈຳ­ນວນ​ລັດ­ຖະ­ກອນ​ລົງ​ໃຫ້​ໄດ້​ຕາມ​ສັດ­ສ່ວນ​ທີ່​ເໝາະ​ສົມ ໂດຍ​ເນັ້ນ​ດ້ານ​ຄຸນ​ນະ​ພາບ ແລະ ພັດ­ທະ­ນາ​ໃຫ້​ລັດ­ຖະ­ກອນ​ລາວ ມີ​ຄຸນ​ນະ​ພາບ​ສູງ​ຂຶ້ນ​ທຽບ​ທັນ​ກັບ​ປະ­ເທດ​ອື່ນໆ ນອກ​ນີ້ ກໍ​ໃຫ້​ຕິດ­ຕາມ ແລະ ຊຸກ­ຍູ້​ການ​ບັນ­ຈຸ​ລັດ­ຖະ­ກອນ​ໃໝ່​ປະ­ຈຳ​ປີ 2019 ຈຳ­ນວນ 1.500 ຄົນ​ທີ່​ໄດ້​ອະ­ນຸ­ມັດ​ໄປ​ແລ້ວ ກວດ­ກາ​ຄືນ​ຈຳ­ນວນ​ພົນ ແລະ ປະ­ຫວັດ​ຂອງ​ລັດ­ຖະ­ກອນ ສືບ­ຕໍ່​ຊຸກ­ຍູ້​ການ​ນຳ​ໃຊ້​ລະ­ບົບ​ການ​ກວດ​ຜ່ານ​ບັນ­ຊີ​ຈຳ­ນວນ​ພົນ ເຊື່ອມ​ຕໍ່​ກັບ​ບັນ­ຊີ​ເງິນ­ເດືອນ​ໃຫ້​ເປັນ​ບັນ­ຊີ​ດຽວ ແລະ ອອກ​ບັດ​ພະ­ນັກ­ງານ-ລັດ­ຖະ­ກອນ​ໃຫ້​ສຳ­ເລັດ​ໃນ​ທົ່ວ​ປະ­ເທດ ສືບ­ຕໍ່​ຄົ້ນ­ຄວ້າ​ສ້າງ ແລະ ພັດ­ທະ­ນາ​ຫຼັກ­ສູດ​ເຝິກ­ອົບ­ຮົມ-ຍົກ​ລະ­ດັບ​ໃຫ້​ແກ່​ລັດ­ຖະ­ກອນ ກວດ­ກາ​ບັນ­ດາ​ຫົວ­ໜ່ວຍ​ວິ­ຊາ​ການ ທີ່​ມີ​ລາຍ​ຮັບ​ດ້ານ​ວິ­ຊາ​ການ​ຢູ່​ບັນ­ດາ​ກະ­ຊວງ-ອົງ­ການ ແລະ ທ້ອງ­ຖິ່ນ ເພື່ອ​ຄົ້ນ­ຄວ້າ​ຊອກ​ຫາ​ວິ­ທີ​ການ ແລະ ເງື່ອນ­ໄຂ​ໃນ​ການ​ຫັນ​ຫົວ­ໜ່ວຍ​ວິ­ຊາ​ການ​ເຫຼົ່າ​ນີ້ ອອກ​ຈາກ​ລະ­ບົບ​ລັດ­ຖະ­ກອນ​ໄປ​ສູ່​ລະ­ບົບ​ພະ­ລາ­ກອນ​ເທື່ອ​ລະ​ກ້າວ ສຳ­ລັບ​ວຽກ​ງານ 3 ສ້າງ​ເນັ້ນ​ໃຫ້​ຄົ້ນ­ຄວ້າ​ຕີ​ລາ­ຄາ ມາດ­ຖານ​ເງື່ອນ­ໄຂ​ວຽກ​ງານ​ສາມ​ສ້າງ​ຂອງ​ແຕ່​ລະ​ຂະ­ແໜງ­ການ ທີ່​ໄດ້​ຮັບ­ຮອງ​ແລ້ວ​ດ້ວຍ​ການ​ປະ​ເມີນ​ຄືນ ການ​ປະ­ຕິ­ບັດ​ຕາມ​ມາດ­ຖານ​ເງື່ອນ­ໄຂ​ດັ່ງ­ກ່າວ ຢູ່​ທ້ອງ­ຖິ່ນ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ ຕາມ​ມາດ­ຖານ​ເງື່ອນ­ໄຂ​ນັ້ນ​ແນວ­ໃດ ແລະ ມີ​ຜົນ­ສຳ­ເລັດ​ດ້ານ​ໃດ​ແດ່​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ເປັນ​ປົກ­ກະ­ຕິ ເພື່ອ​ໃຫ້​ທ້ອງ­ຖິ່ນ (ບັນ­ດາ​ແຂວງ ແລະ ເມືອງ) ຕ້ອງ​ປະ­ຕິ­ບັດ​ຕາມ​ຂອບ​ເຂດ​ສິດ ຄວາມ​ຮັບ­ຜິດ­ຊອບ​ທີ່​ໄດ້​ຮັບ ແລະ ຢູ່​ພາຍ​ໃຕ້​ລະ­ບຽບ-ກົດ­ໝາຍ ພ້ອມ​ກັນ​ນັ້ນ ວຽກ​ປົກ­ຄອງ​ທ້ອງ­ຖິ່ນ​ໃຫ້​ເອົາ­ໃຈ­ໃສ່​ກຳ​ໃຫ້​ໄດ້​ຈຳ­ນວນ​ປະ­ຊາ­ກອນ ພົນ­ລະ­ເມືອງ​ຂອງ​ລາວ ຂຶ້ນ​ບັນ­ຊີ ຫຼື ລົງ­ທະ­ບຽນ​ພົນ­ລະ­ເມືອງ​ຢ່າງ​ມີ​ວິ­ທະ­ຍາ­ສາດ ເອົາ­ໃຈ­ໃສ່​ວຽກ​ງານ​ຈົດ​ທະ­ບຽນ ແລະ ອອກ​ໃບ­ຢັ້ງ­ຢືນ​ການ​ເກີດ​ການ​ໃຫ້​ສັນ­ຊາດ ແລະ ຂໍ​ປະ​ສັນ­ຊາດ ຄົ້ນ­ຄວ້າ​ແກ້​ໄຂ​ບັນ­ຫາ​ການ​ສ້າງ​ຄອບ­ຄົວ​ທີ່​ບໍ່​ຖືກ­ຕ້ອງ​ຂອງ​ພົນ­ລະ­ເມືອງ​ລາວ ຢູ່​ຕາມ​ບໍ­ລິ­ເວນ​ຊາຍ​ແດນ​ຮ່ວມ​ກັບ​ຂະ­ແໜງ­ການ​ກ່ຽວ­ຂ້ອງ ແລະ ທ້ອງ­ຖິ່ນ ສືບ­ຕໍ່​ພັດ­ທະ­ນາ​ຖານ​ຂໍ້​ມູນ​ພົນ­ລະ­ເມືອງ ເພື່ອ​ເປັນ​ເງື່ອນ­ໄຂ​ສະ­ດວກ​ໃນ​ການ​ຄຸ້ມ​ຄອງ​ປະ­ຊາ­ກອນ​ພົນ­ລະ­ເມືອງ​ຊົນ­ເຜົ່າ ສາ­ສະ­ໜາ ແລະ ອົງ​ການ­ຈັດ­ຕັ້ງ​ທາງ​ສັງ­ຄົມ ພ້ອມ​ທັງ​ເພື່ອ​ບັນ­ລຸ​ເປົ້າ​ໝາຍ​ການ​ຈົດ​ທະ­ບຽນ​ການ​ເກີດ​ຂອງ​ເດັກ​ໃຫ້​ໄດ້ 70% ໃນ​ປີ 2024 ຕາມ​ທີ່​ໄດ້​ຮັບ­ຮອງ​ກັບ​ອົງ​ການ­ຈັດ­ຕັ້ງ​ສາ­ກົນ ສ່ວນ​ວຽກ​ງານ​ຊົນ­ເຜົ່າ ເພີ່ມ​ທະ­ວີ​ເອົາ­ໃຈ­ໃສ່ ວຽກ​ງານ​ຄຸ້ມ​ຄອງ​ເຜົ່າ​ເຮັດ​ໃຫ້​ບັນ­ດາ­ເຜົ່າ ໄດ້​ຮັບ​ການ​ພັດ­ທະ­ນາ​ທີ່​ເທົ່າ​ທຽມ​ກັນ ແລະ ເພີ່ມ​ທະ­ວີ​ເອົາ­ໃຈ­ໃສ່​ຄຸ້ມ​ຄອງ​ການ​ເຜີຍ­ແຜ່​ສາ­ສະ­ໜາ ໃນ​ການ​ສ້າງ​ແຜນ­ທີ່​ແມ່ນ​ເນັ້ນ​ໃຫ້​ມີ​ຄວາມ​ຖືກ­ຕ້ອງ ຊັດ​ເຈນ ສອດ­ຄ່ອງ​ກັບ​ສະ­ພາບ​ຄວາມ​ເປັນ​ຈິງ.

ຂ່າວທີ່ກ່ຽວຂ້ອງ