ເບິ່ງບ້ານເຂົາເອົາບົດຮຽນ 14/02/2019

357 14 ກ.ພ. 2019 ຫົວຂໍ້ຂ່າວອື່ນໆ

    ເລື່ອງ​ໃຫຍ່​ປະ­ຈຳ​ວັນ​ນີ້ ລວມ​ມີ​ຄະ­ດີ​ລັກ­ລອບ​ວັດ­ຖຸ​ສ່ວນ​ຕົວ​ຂອງ​ນັກ​ຮ້ອງ ຈອນ ເລັນ​ນອນ ໂດຍ​ຄົນ​ເຢຍ​ລະ​ມັນ ແລະ ຂ່າວ​ກ່ຽວ​ກັບ 2 ຄະ­ດີ​ລາ­ມົກ​ທີ່​ອັງ­ກິດ.

    ທີ່ ເຢຍ​ລະ​ມັນ: ມີ​ຂ່າວ​ອ່າວ​ແປກ​ຈາກ​ເຢຍ​ລະ​ມັນ (ແຫຼ່ງ​ຂ່າວ AFP) ກ່ຽວ​ກັບ​ຊາຍ​ຄົນ​ໜຶ່ງ​ຊື່ ເອີ​ຮານ ຈີ (Erhah G) ອາ­ຍຸ 59 ປີ ຖືກ​ສານ​ຕັດ­ສິນ​ຖານ​ມີ​ຄວາມ​ຜິດ ຍ້ອນ​ໄດ້​ລັກ​ວັດ­ຖຸ​ສິ່ງ​ຂອງ​ຫຼາຍ​ຢ່າງ​ຈາກ​ຫ້ອງ​ສະ​ສົມ​ຂອງ ຈອນ ເລັນ​ນອນ ນັກ​ຮ້ອງ​ດາວ​ຄ້າງ​ຟ້າ​ຂອງ​ຄະ­ນະ​ເດິ​ບິດ​ເຕີນ ທີ່​ຖືກ​ຄາ­ຕະ­ກຳ​ຢູ່​ນິວ​ຢອກ ໃນ​ຕົ້ນ​ປີ 1979 ວັດ­ຖຸ​ທີ່​ຂະ­ໂມຍ​ມາ​ນັ້ນ ລວມ​ມີ​ທັງ​ປື້ມ​ບັນ­ທຶກ​ປະ­ຈຳ​ວັນ​ຫຼາຍ​ເຫຼັ້ມ​ຂອງ​ນັກ​ຮ້ອງ​ລະ­ດັບ​ຕຳ­ນານ ຂ່າວ​ໃຫ້​ຮູ້​ຕື່ມ​ວ່າ ໃນ​ປີ 2014 ທ້າວ ເອີ​ຮານ ໄດ້​ຮັບ​ເງິນ​ຈຳ​ລ່ວງ​ໜ້າ​ຈຳ­ນວນ 785.150 ໂດ​ລາ​ສະ­ຫະ­ລັດ ຈາກ​ຮ້ານ​ຂາຍ­ເຄື່ອງ​ເກົ່າ ທີ່​ຮັບ​ຊື້​ວັດ­ຖຸ​ທີ່​ເຂົາ​ລັກ​ມາ​ຈາກ​ເຮືອນ​ພັກ​ຂອງ ໂຢ​ໂກະ​ໂອ​ໂນະ ພັນ​ລະ​ຍາ​ໝ້າຍ​ຂອງ ຈອນ ເລັນ​ນອນ ທີ່​ນິວ​ຢອກ ສະ­ຫະ­ລັດ​ອາ​ເມ​ຣິ​ກາ ທ້າວ ເອີ​ຮານ ຖືກ​ຈັບ​ກຸມ​ຢູ່​ນະ­ຄອນ­ຫຼວງ​ແບກ​ແລງ ໃນ​ປີ­ຜ່ານ­ມາ ແລະ ໄດ້​ສາ­ລະ­ພາບ​ຄວາມ​ຈິງ​ກ່ຽວ​ກັບ​ຄະ­ດີ​ຢ່າງ​ລະ­ອຽດ ນອກ­ຈາກ​ປື້ມ​ບັນ­ທຶກ​ປະ­ຈຳ​ວັນ​ຂອງ​ຈອນ ເລັນ​ນອນ ແລ້ວ ຕຳ­ຫຼວດ​ເຢຍ​ລະ​ມັນ​ຍັງ​ພົບ​ເຫັນ​ວັດ­ຖຸ​ອື່ນໆ​ຂອງ​ນັກ​ຮ້ອງ​ຕື່ມ ຢູ່​ຮ້ານ​ຂາຍ­ເຄື່ອງ​ເກົ່າ​ທີ່​ມີ­ຄ່າ​ສູງ ເຊັ່ນ: ບັດ​ອວຍ­ພອນ ຮູບ­ແຕ້ມ ມ້ວນ​ເທັບ​ບັນ­ທຶກ​ລາຍ​ການ­ສະ­ແດງ​ສົດ​ຂອງ​ຄະ­ນະ ເດິ​ບິດ​ເຕິນ  (Beatles) ແລະ ແວ່ນ­ຕາ​ວັດ­ຖຸ​ເຫຼົ່າ​ນີ້​ຖືກ​ໂຊ​ເຟີ (ຄົນ​ຂັບ​ລົດ) ສ່ວນ​ຕົວ​ຂອງ ໂຢ​ໂກະ​ໂອ​ໂນະ ລັກ​ມາ​ໃນ​ປີ 2006 ໂຊ​ເຟີ​ຊື່ ທ້າວ ໂກ​ຣານ ຄາ​ຊານ ໃນ​ປັດ­ຈຸ­ບັນ​ອາ­ໄສ​ຢູ່​ປະ­ເທດ ເຕີ​ຄີ ແຕ່​ປີ 1995 ຫາ​ປີ 2006 ຊາຍ​ຄົນ​ນີ້​ເຮັດ​ໜ້າ­ທີ່​ຂັບ​ລົດ​ຮັບ​ໃຊ້​ພັນ​ລະ​ຍາ​ໝ້າຍ​ຂອງ​ຈອນ ເລັນ​ນອນ ຜ່ານ​ມາ​ຜູ້­ກ່ຽວ​ເຄີຍ​ຕິດ​ຄຸກ​ເປັນ​ເວ­ລາ 60 ວັນ ຢູ່​ສະ­ຫະ­ລັດ​ອາ​ເມ​ຣິ​ກາ ດ້ວຍ​ໂທດ​ໃຊ້​ວິ­ທີ​ຂົ່ມ­ຂູ່ ໂຈ​ໂກະ​ໂອ​ໂນະ ໃຫ້​ຍອມ​ປະ­ຕິ­ບັດ​ຕາມ​ຄວາມ​ປະ­ສົງ​ຂອງ​ຕົນ.

    ທີ່ ອັງ­ກິດ: ມີ​ສອງ​ເຫດ­ການ​ທີ່​ສ້າງ​ຄວາມ​ກະ­ທົບ­ກະ­ເທືອນ​ໃນ​ວົງ​ການ​ການ­ເມືອງ​ຂອງ​ອັງ­ກິດ ຍ້ອນ​ການ​ປະ­ພຶດ​ແຕກ​ປອກ​ທາງ​ເພດ​ຂອງ​ບຸກ­ຄົນ​ລະ­ດັບ​ສະ­ມາ­ຊິກ​ລັດ​ຖະ​ສະ­ພາ ເລື່ອງ​ທີ​ໜຶ່ງ​ເກີດ​ຂຶ້ນ​ກັບ​ທ່ານ ແອນ​ໂທ​ນີ ເລ​ສະ​ເຕ ໃນ​ປັດ­ຈຸ­ບັນ​ມີ​ອາ­ຍຸ 82 ປີ ເຂົາ​ເປັນ​ສະ­ມາ­ຊິກ​ສະ­ພາ​ຜູ້​ແທນ​ລາດ​ຊະ​ດອນ​ອັງ­ກິດ ຄວາມ​ຜິດ​ຂອງ​ທ່ານ ແອນ​ໂທ​ນີ ກໍ​ຄື ເຂົາ​ໄດ້​ໃຊ້​ວິ­ທີ​ຈອບ​ອອຍ​ແກມ​ຂົ່ມ­ຂູ່​ໃຫ້​ຍິງ​ຄົນ​ໜຶ່ງ​ຕົກ­ລົງ​ນອນ​ກັບ​ເຂົາ ເພື່ອ​ແລກ​ກັບ​ຕຳ­ແໜ່ງ​ທີ່​ສູງ​ຂຶ້ນ​ພາຍ​ໃນ​ໜຶ່ງ​ປີ ແຕ່​ຖ້າ​ນາງ​ປະ­ຕິ­ເສດ ນອກ­ຈາກ​ຈະ​ບໍ່​ໄດ້​ຂຶ້ນ​ຊັ້ນ​ແລ້ວ ຍັງ​ຈະ​ປະ​ເຊີນ​ກັບ​ຜົນ​ຮ້າຍ​ທີ່​ຈະ​ຕາມ​ມາ ຂ່າວ​ບອກ​ວ່າ ຍິງ​ທີ່​ເປັນ​ໂຈດ​ຄົນ​ນັ້ນ​ປະ­ຕິ­ເສດ​ຂໍ້​ສະ­ເໜີ​ຂອງ​ທ່ານ​ຜູ້​ແທນ ຜົນ​ຕາມ​ມາ ກໍ​ຄື ທ່ານ ແອນ​ໂທ​ນີ ບໍ່​ເຊີນ​ຍິງ​ຄົນ​ນັ້ນ​ເຂົ້າ​ຮ່ວມ​ກອງ​ປະ­ຊຸມ​ທີ່​ກ່ຽວ­ຂ້ອງ​ຕ່າງໆ ເຫດ­ການ​ຈອບ​ອອຍ ແລະ ຂົ່ມ­ຂູ່​ເພື່ອ​ມີ​ເພດ​ສຳ­ພັນ​ກັບ​ຍິງ​ພະ­ນັກ­ງານ​ດັ່ງ­ກ່າວ ເກີດ​ຂຶ້ນ​ເມື່ອ 12 ປີ­ຜ່ານ­ມາ​ແລ້ວ ແຕ່​ໄດ້​ພິ­ຈາ­ລະ­ນາ ແລະ ຕັດ­ສິນ​ຄະ­ດີ​ໃນ​ທ້າຍ​ປີ 2018 ຜ່ານ​ມາ​ນີ້​ເອງ ທ່ານ​ຜູ້​ແທນ ແອນ​ໂທ​ນີ ເລ​ສະ​ເຕ ໄດ້​ຖືກ​ງົດ​ຖາ­ນະ​ເປັນ​ຜູ້​ແທນ​ສະ­ພາ​ຜູ້​ແທນ​ລາດ​ຊະ​ດອນ​ເປັນ​ເວ­ລາ 3 ປີ ຈົນ​ເຖິງ​ປີ 2022.

    ເລື່ອງ​ຕໍ່​ໄປ ກໍ​ແມ່ນ​ຄະ­ດີ​ທີ່​ເກີດ​ຂຶ້ນ​ກັບ​ສະ­ມາ­ຊິກ​ສະ­ພາ​ຜູ້​ແທນ​ລາດ​ຊະ​ດອນ​ອັງ­ກິດ​ເຊັ່ນ​ກັນ ຊື່​ທ່ານ ມາກ ກາກ​ເຢ (Mark Garnier) ເຊິ່ງ​ທັງ​ມີ​ຕຳ­ແໜ່ງ​ເປັນ​ລັດ­ຖະ­ມົນ­ຕີ​ຄະ­ນະ​ລັດ­ຖະ­ບານ​ອັງ­ກິດ ຄວາມ​ຜິດ​ຂອງ​ທ່ານ ມາກ ກາກ​ເຢ​ນີ້ ພົວ­ພັນ​ກັບ​ການ​ປະ­ພຶດ​ທີ່​ຝືນ​ຈັນ​ຍາ​ບັນ ແລະ ຈັນ­ຍາ­ທຳ​ຂອງ​ຜູ້​ມີ​ຕຳ­ແໜ່ງ​ອັນ​ຊົງ​ກຽດ ເລື່ອງ​ມີ​ຢູ່​ວ່າ ໃນ​ປີ 2010 ທ່ານ ມາກ​ກາກ​ເຢ ໄດ້​ເອົາ​ເງິນ​ໃຫ້​ນາງ ແຄ​ໂຣ​ລິນ ເອດ​ມອນ​ເຊິນ (Caroline Edmondson) ເພື່ອ​ໄປ​ຊື້​ຜະ­ລິດ​ຕະ​ພັນ​ຊ່ວຍ​ປົດ​ເປື້ອງ​ຄວາມ​ໄຄ່​ທາງ​ເພດ​ໃຫ້​ຕົນ (ອະ​ໄວ​ຍະ​ວະ​ປອມ​ເພດ​ຍິງ) ຈຳ­ນວນ 2 ຊຸດ ຢູ່​ຮ້ານ​ຂາຍ​ສະ­ເພາະ ໃນ​ປັດ­ຈຸ­ບັນ ສາວ ແຄ​ໂຮ​ລິນ ເຮັດ​ໜ້າ­ທີ່​ເປັນ​ເລ­ຂາ​ຮັບ​ໃຊ້​ສະ­ມາ­ຊິກ ລັດ​ຖະ​ສະ­ພາ​ຄົນ​ອື່ນ ເຫດ­ການ​ດັ່ງ­ກ່າວ ໄດ້​ຮ້ອນ​ໄປ​ເຖິງ​ທ່ານ​ນາ­ຍົກ ເທ​ເຣ​ຊາ ເມ ແລະ ທ່ານ​ກໍ​ໄດ້​ອອກ​ມາ​ຮຽກ­ຮ້ອງ​ໃຫ້​ມີ​ການ​ປັບ­ປຸງ ຫຼັກ­ການ​ປະ­ພຶດ​ຂອງ​ສະ­ມາ­ຊິກ​ລັດ​ຖະ​ສະ­ພາ​ຄືນ­ໃໝ່​ທັງ​ໝົດ ອັງ­ກິດ​ເປັນ​ປະ­ເທດ​ທີ່​ໃຫ້​ຄວາມ​ສຳ­ຄັນ​ເປັນ​ພິ­ເສດ​ຕໍ່​ຫຼັກ­ການ ການ​ປະ­ພຶດ​ຂອງ​ນັກ​ການ­ເມືອງ ທັງ​ສອງ​ເຫດ­ການ​ນີ້ ແກະ​ມາ​ຈາກ​ໜັງ­ສື­ພິມ The Nation.

ຂ່າວທີ່ກ່ຽວຂ້ອງ