ຍົກລະດັບກະຕິກາໃຫ້ກຳມະການຕັດສິນ ກຽມລາວພຣີເມຍລີກ

351 14 ກ.ພ. 2019 ວົງຈອນກີລາ
ຍົກລະດັບກະຕິກາໃຫ້ກຳມະການຕັດສິນ ກຽມລາວພຣີເມຍລີກ

    ພິ­ທີ​ປິດ​ເຝິກ­ອົບ­ຮົມ​ກຳ­ມະ­ການ​ຕັດ­ສິນ ກຽມ​ຄວາມ​ພ້ອມ​ໃສ່​ການ​ແຂ່ງ­ຂັນ​ເຕະ­ບານ​ເປບ​ຊີ ລາວ​ພຣີ​ເມຍ​ລີກ 2019 ຈັດ​ຂຶ້ນ​ວັນ​ທີ 8 ກຸມ­ພາ 2019 ທີ່​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ມີ​ທ່ານ​ນາງ ກັນ­ຍາ ແກ້ວ​ມະ­ນີ ເລ­ຂາ­ທິ­ການ ສຕລ ທ່ານ ສີ​ປະ­ເສີດ ສິນ​ບັນ­ດິດ ຫົວ­ໜ້າ​ພະ​ແນກ​ກຳ­ມະ­ການ​ຕັດ­ສິນ ສຕລ ຜູ້​ປະ​ເມີນ​ກຳ­ມະ­ການ​ຕັດ­ສິນ ແລະ ກຳ­ມະ­ການ​ທີ່​ຈະ​ລົງ​ຕັດ­ສິນ​ໃນ​ເຕະ­ບານ ເປບ​ຊີ ລາວ​ພຣີ​ເມຍ​ລີກ ທີ່​ມາ​ຈາກ​ຫຼາຍ​ພາກ­ສ່ວນ 31 ຄົນ​ເຂົ້າ​ຮ່ວມ.

    ການ​ເຝິກ­ອົບ­ຮົມ​ກຳ­ມະ­ການ​ຕັດ­ສິນ​ຄັ້ງ​ນີ້ ໄດ້​ໃຊ້​ເວ­ລາ 4 ວັນ ໂດຍ​ສຳ​ມະ­ກອນ​ໄດ້​ຮຽນ​ຮູ້​ທາງ​ດ້ານ​ທິດ​ສະ​ດີ ແລະ ການ​ປະ­ຕິ­ບັດ​ຕົວ​ຈິງ ແກ້​ໄຂ້​ປັບ­ປຸງ​ຂໍ້​ຜິດ­ພາດ​ທີ່​ຜ່ານ​ມາ ພ້ອມ​ດຽວ​ກັນ​ນັ້ນ ຍັງ​ໄດ້​ມີ​ການ​ທົດ​ສອບ​ພະ­ລະ​ກຳ­ລັງ ເຊິ່ງ​ໄດ້​ໃຊ້​ກຳ­ມະ­ການ​ຕັດ­ສິນ​ລົງ​ທຳ​ການ​ຕັດ­ສິນ​ທັງ​ໝົດ 25 ຄົນ.

    ສຳ­ລັບ​ການ​ແຂ່ງ­ຂັນ​ເຕະ­ບານ ເປບ​ຊີ ລາວ​ພຣີ​ເມຍ​ລີກ 2019 ມີ​ທັງ​ໝົດ 6 ທີມ​ເຂົ້າ​ຮ່ວມ​ແຂ່ງ­ຂັນ​ຄື: ສະ­ໂມ­ສອນ​ລາວ​ໂຕ​ໂຢ​ຕ້າ​ເອັບ​ຊີ (ແຊັມ​ເກົ່າ) ສະ­ໂມ­ສອນ ປກສ ເອັບ​ຊີ ສະ­ໂມ­ສອນ​ມາ​ສ​ເຕີ​ເຊ​ເວັນ​ເອັບ​ຊີ ສະ­ໂມ­ສອນ​ຊ້າງ​ນ້ອຍ​ເອັບ​ຊີ ສະ­ໂມ­ສອນ​ກອງ­ທັບ ເອັບ​ຊີ ແລະ ສະ­ໂມ­ສອນ​ອີ​ໂວ​ຢູ​ໄນ​ເຕັດ (ນ້ອງ​ໃໝ່) ໂດຍ​ຈະ​ເລີ່ມ​ແຂ່ງ­ຂັນ​ວັນ​ທີ 23 ກຸມ­ພາ ຫາ 28 ກັນ­ຍາ 2019 ສ່ວນ​ຮູບ​ແບບ​ການ​ແຂ່ງ­ຂັນ​ຈະ​ແຂ່ງ­ຂັນ​ແບບ​ພົບ​ກັນ​ໝົດ ມີ 3 ຮອບ​ຄື: ຮອບ​ຂາ​ໄປ ຮອບ​ຂາ​ກັບ ແລະ ຮອບ​ທີ 3 ເຊິ່ງ​ໃນ​ການ​ແຂ່ງ­ຂັນ​ຮອບ​ທີ 3 ນັ້ນ​ຈະ​ນຳ​ໃຊ້​ຫຼັກ­ການ Head to Head ໂດຍ​ທີມ​ທີ່​ມີ​ຜົນ Head to Head ຈາກ​ການ​ແຂ່ງ­ຂັນ 2 ຮອບ​ໄປ-ກັບ​ດີ​ກວ່າ​ຈະ​ໄດ້​ລົງ​ແຂ່ງ­ຂັນ​ຮອບ​ທີ 3 ໃນ​ສະ­ໜາມ​ຂອງ​ຕົນ​ເອງ ລວມ​ທັງ​ໝົດ 48 ນັດ ແລະ ທຸກ​ນັດ​ສາ­ມາດ​ຕິດ­ຕາມ​ການ​ຖ່າຍ​ທອດ​ສົດ​ໄດ້​ທີ່ Mycujoo.

ຂ່າວທີ່ກ່ຽວຂ້ອງ