ອິດ​ສະ​ຣາ​ແອນ-ໄຊ​​ປຣັສ ຮ່ວມ​ມື​ພັດທະນາ​ທໍ່​ສົ່ງ​ແກ​​ັສ ທີ່​ມີ​ຄວາມ​ຍາວ 2.200​ ກມ

412 15 ກ.ພ. 2019 ຂ່າວຕ່າງປະເທດ
ອິດ​ສະ​ຣາ​ແອນ-ໄຊ​​ປຣັສ ຮ່ວມ​ມື​ພັດທະນາ​ທໍ່​ສົ່ງ​ແກ​​ັສ ທີ່​ມີ​ຄວາມ​ຍາວ 2.200​ ກມ

   ປະທານາທິບໍດີ ນີກ​​ົສ ອາ​ນາ​​ສ​ຕາ​ເຊຍ​ເດ​​ສ ຂອງ​ໄຊ​​ປຣັສ ກ່າວ​ໃນ​ເວລາ​ຕ້ອນຮັບ ປະທານາທິບໍດີ ຣອຍ​ເວນ ຣິບ​ວິນ ຂອງ​ອິດ​ສະ​ຣາ​ແອນ ທີ່ຢູ່​ລະຫວ່າງ​ການ​ຢ້ຽມຢາມ​ໄຊ​​ປຣັສ ເມື່ອ​ວັນ​ທີ 12 ກຸມພາ ​ນີ້ ວ່າ ໄຊ​​ປຣັສ ແລະ​ອິດ​ສະ​ຣາ​ແອນ ພວມ​ສຸມ​ໃສ່​ພັດທະນາ​ໂຄງການ ກໍ່ສ້າງ​ທໍ່​ສົ່ງ​ແກ​​ັສ ສາຍ​ທະເລ​ເມ​ດີ​ເຕ​ຣາ​ເນ​ຕາເວັນ​ອອກ ຊຶ່ງ​ເປັນ​ທໍ່​ສົ່ງ​ແກ​​ັສ​ທີ່​ມີ​ຄວາມ​ຍາວ ທີ່​ສຸດ​ໃນ​ໂລກ ແລະ ກໍ​ອາດ​ຈະ​ເປັນ​ໜຶ່ງ​ໃນ​ບັນດາ​ທໍ່​ສົ່ງ​ໃຕ້​ນ້ຳ ທີ່​ຍາວ​ທີ່​ສຸດ​ໃນ​ໂລກ​ອີກ​ດ້ວຍ.

   ໃນ​ຂະນະ​ດຽວ​ກັນ ປະທານາທິບໍດີ ຣອຍ​ເວນ ຣິບ​ວິນ ກ່າວ​ວ່າ ການ​ພົວພັນ​ລະຫວ່າງ ອິດ​ສະ​ຣາ​ແອນ ກັບ​ໄຊ​​ປຣັສ ພວມ​ຢູ່​ໃນ​ໄລຍະ​ທີ່​ດີງາມ​ທີ່​ສຸດ ພ້ອມ​ກັນ​ນັ້ນ​ທ່ານ​ກໍ​ໃຫ້​ທັດສະນະ​ວ່າ ຄວນ​ມີ​ທໍ່​ສົ່ງ​ແກ​​ັສ ແລະ​ຂົວ​ຕໍ່​ຕື່ມ​ອີກ ລະຫວ່າງ​ປະຊາຊົນ​ສອງ​ຊາດ ເພື່ອ​ແບ່ງປັນ​ຜົນ​ປະໂຫຍດ ໃນ​ຂົງເຂດ​ພະລັງງານ ເຕັກ​ໂນ​ໂລ​ຊີ ສາທາລະນະ​ສຸກ ຄວາມ​ໝັ້ນຄົງ ແລະ​ສິ່ງແວດລ້ອມ.

    ຈາກ​ທີ່​ມີ​ຄວາມ​ຍາວ 2.200 ​ກມ ແລະ​ ຄ່າ​ໃຊ້​ຈ່າຍ​ໃນ​ການ​ກໍ່ສ້າງ ທີ່​ຄາດ​ວ່າ​ມີ​ທີ່​ປະມານ 7,5 ຕື້ ເອີ​ໂຣ (ເທົ່າ​ກັບ​ກວ່າ 8,4 ຕື້​ໂດ​ລາ​ສະຫະລັດ) ນັ້ນ ທໍ່​ສົ່ງ​ແກ​​ັສ​ດັ່ງກ່າວ ອາດ​ຈະ​ເປັນ​ໜຶ່ງ ໃນ​ບັນດາ​ທໍ່​ສົ່ງ​ແກ​​ັສ​ທີ່​ຍາວ​ທີ່​ສຸດ ແລະ​ ມີຄ່າ​ແພງ​ທີ່​ສຸດ​ໃນ​ໂລກ​ກໍ​ເປັນ​ໄດ້. ເຂົ້າ​ຮ່ວມ​ໃນ​ໂຄງການ ດັ່ງກ່າວ​ກັບ​ອິດ​ສະ​ຣາ​ແອນ ແລະ​ ໄຊ​​ປຣັສ ຍັງ​ມີ​ອີກ 2 ປະເທດ ໄດ້ແກ່​ເກ​​ັຣກ ແລະ​ອີ​ຕາ​ລີ.

    ທໍ່​ສົ່ງ​ດັ່ງກ່າວ ໄດ້​ຮັບ​ການ​ອອກ​ແບບ ຂົນສົ່ງ​ແກ​​ັສ​ປະມານ 10 ຕື້​ແມັດ​ກ້ອນ ໃນ​ແຕ່​ລະ​ປີ ໂດຍ​ມີ​ຈຸດ​ເລີ່ມ​ຕົ້ນ​ຢູ່​ນອກ​ຝັ່ງ​ທະເລ ຫ່າງ​ຈາກ​ແຄມ​ຝັ່ງ​ທະເລ​ທິດໃຕ້​ຂອງ​ໄຊ​​ປຣັສ 170​ ກມ ແລະ ເນັ່ງ​ເຂົ້າ​ໄປ​ໃນ​ດິນແດນ​ຂອງ​ໄປຣ​​ັສ ຕໍ່​ຈາກ​ນັ້ນ​ກໍ​ເຂົ້າ​ໄປ​ໃນ​ເກ​​ັຣກ ແລະ​ຈຸດ​ສຸດ​ທ້າຍ ຈະ​ຢູ່​ໃກ້​ກັບ ນະຄອນ ໂອ​ຕຣັນ​ໂຕ ໃນ​ເຂດ​ທິດຕາເວັນອອກ​ສ່ຽງ​ໃຕ້​ອີ​ຕາ​ລີ.

   ສະຫະພາບ​ເອີ​ຣົບ (EU) ໄດ້​ໃຫ້​ຄວາມ​ຊ່ວຍເຫຼືອ​ດ້ານ​ການ​ເງິນ ເປັນ​ມູນ​ຄ່າ 100 ລ້ານ​ເອີ​ໂຣ (ເທົ່າ​ກັບ​ປະມານ 112 ລ້ານ​ໂດ​ລາ​ສະຫະລັດ) ໃຫ້​ແກ່​ວຽກ​ງານ​ຄົ້ນຄວ້າ​ເຖິງ​ຄວາມ​ສາມາດ​ເປັນ​ໄປ​ໄດ້ ຂອງ​ໂຄງການ​ດັ່ງກ່າວ.

 

ຂ່າວທີ່ກ່ຽວຂ້ອງ