ຫຼາຍກົມກອງ ແລະ ບຸກຄົນ ໄດ້ຮັບການຍ້ອງຍໍຈາກພັກ-ລັດ

559 15 ກ.ພ. 2019 ຂ່າວໜ້າ​ໜຶ່ງ
ຫຼາຍກົມກອງ ແລະ ບຸກຄົນ ໄດ້ຮັບການຍ້ອງຍໍຈາກພັກ-ລັດ

    ກອງ​ປະ­ຊຸມ​ສະ­ຫຼຸບ​ວຽກ​ງານ​ຮອບ­ດ້ານ​ປະ­ຈຳ​ປີ 2018 ແລະ ທິດ​ທາງ​ແຜນ­ການ​ປີ 2019 ຂອງ​ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 12 ກຸມ­ພາ 2019 ເປັນ​ປະ­ທານ​ຂອງ​ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ ນວ ແລະ ທ່ານ ພັນ​ເອກ ສີ ທະ­ວີ​ໄຊ ຫົວ­ໜ້າ​ການ​ທະ­ຫານ​ກອງ​ບັນ­ຊາ​ການ​ທະ­ຫານ ນວ ມີ​ຄະ­ນະ​ພັກ-ຄະ­ນະ​ບັນ­ຊາ ພະ­ນັກ­ງານ​ຫຼັກ​ແຫຼ່ງ​ຈາກ​ອົງ­ການ 5 ຫ້ອງ ແລະ ກົມ​ກອງ​ອ້ອມ​ຂ້າງ​ເຂົ້າ​ຮ່ວມ.

    ທ່ານ ພັນ​ໂທ ດາວ​ບິນ ເລີດ​ລີ​ວັນ ຫົວ­ໜ້າ​ຫ້ອງ­ການ​ກອງ​ບັນ­ຊາ​ການ​ທະ­ຫານ ນວ ໄດ້​ຂຶ້ນ​ລາຍ​ງານ​ບົດ​ສະ­ຫຼຸບ​ເຫັນ​ວ່າ: ໄລ­ຍະ​ໜຶ່ງ​ປີ­ຜ່ານ­ມາ​ຄະ­ນະ​ພັກ-ຄະ­ນະ​ບັນ­ຊາ​ແຕ່​ລະ​ຂັ້ນ ໄດ້​ເອົາ­ໃຈ­ໃສ່​ຊີ້​ນຳ-ນຳ­ພາ​ກົມ​ກອງ​ຂອງ​ຕົນ ແລະ ກົມ​ກອງ​ຮາກ​ຖານ​ທີ່​ຂຶ້ນ​ກັບ​ການ­ຈັດ­ຕັ້ງ​ປະ­ຕິ­ບັດ​ໜ້າ­ທີ່​ວຽກ​ງານ​ຂອງ​ຕົນ ໃຫ້​ມີ​ຜົນ­ສຳ­ເລັດ​ຢ່າງ​ມີ​ຈຸດ​ສຸມ ໂດຍ​ຖື​ເອົາ​ວຽກ​ງານ​ແນວ​ຄິດ-ການ­ເມືອງ​ເປັນ​ວຽກ​ງານ​ທີ່​ສຳ­ຄັນ ແລະ ເປັນ​ວຽກ​ໃຈ­ກາງ​ໃນ​ການ​ສຶກ​ສາ​ອົບ­ຮົມ​ໃຫ້​ພະ­ນັກ­ງານ ແລະ ສະ­ມາ­ຊິກ​ພັກ-ນັກ­ຮົບ​ໃນ​ກົມ​ກອງ​ໃຫ້​ມີ​ຄວາມ​ອຸ່ນ​ອ່ຽນ​ທຸ່ນ​ທ່ຽງ​ຕໍ່­ໜ້າ​ທີ່​ວຽກ​ງານ ເຮັດ​ໃຫ້​ເຂົາ­ເຈົ້າ​ມີ​ທັດ­ສະ­ນະ​ຫຼັກ​ໝັ້ນ ແລະ ມີ​ສະ­ຕິ​ລະ­ວັງ​ຕົວ ພ້ອມ​ທັງ​ຢຶດ​ໝັ້ນ​ຕໍ່­ໜ້າ​ທີ່​ວຽກ​ງານ​ຂອງ​ຕົນ​ຢ່າງ​ເລິກ­ເຊິ່ງ ພ້ອມ​ນັ້ນ ຍັງ​ໄດ້​ຫັນ​ເອົາ​ກຳ­ລັງ​ລົງ​ກໍ່­ສ້າງ​ຮາກ​ຖານ​ການ­ເມືອງ​ແບບ​ມູນ­ເຊື້ອ ເພື່ອ​ປະ­ສານ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ບ້ານ ແລະ ກຳ­ລັງ ປກຊ-ປກສ ແຕ່​ລະ​ທ້ອງ­ຖິ່ນ ເຮັດ​ໜ້າ­ທີ່​ຕິດ­ຕາມ​ສະ­ພາບ​ການ ແລະ ແກ້​ໄຂ​ປາ­ກົດ­ການ​ຫຍໍ້­ທໍ້​ທີ່​ຈະ​ເກີດ​ຂຶ້ນ​ພາຍ​ໃນ​ຂອບ​ເຂດ​ຮັບ­ຜິດ­ຊອບ​ໃຫ້​ທັນ​ເວ­ລາ ແລະ ໃຫ້​ມີ​ຄວາມ​ສະ­ຫງົບ​ໂດຍ​ພື້ນ­ຖານ ເອົາ­ໃຈ­ໃສ່​ປະ­ຕິ­ບັດ​ຂໍ້​ກຳ­ນົດ​ກົດ​ລະ­ບຽບ​ຂອງ​ກອງ­ທັບ ກໍ​ຄື​ຂອງ​ກົມ​ກອງ​ວາງ​ອອກ​ຢ່າງ​ເຂັ້ມ​ງວດ ຕັ້ງ­ໜ້າ​ສຸມ​ໃສ່​ການ​ອົບ­ຮົມ​ຫັດ​ແອບ​ເຝິກ­ຝົນ​ກຳ­ລັງ​ແຮງ​ກາຍ​ປະ­ຈຳ​ປີ ເຮັດ​ໃຫ້​ພະ­ນັກ­ງານ-ນັກ­ຮົບ​ມີ​ຄວາມ​ແຂງ​ແກ່ນ​ທົນ​ທານ ເພື່ອ​ຮັບ­ປະ­ກັນ​ເຮັດ​ສຳ­ເລັດ​ໜ້າ­ທີ່​ຕາມ​ການ­ຈັດ­ຕັ້ງ​ມອບ​ໝາຍ​ໃຫ້.

    ໂດຍ​ຄຽງ​ຄູ່​ກັບ​ວຽກ​ງານ​ດັ່ງ­ກ່າວ ຄະ­ນະ​ພັກ-ຄະ­ນະ​ບັນ­ຊາ​ກອງ​ບັນ­ຊາ​ການ​ທະ­ຫານ ນວ ຍັງ​ໄດ້​ຊີ້​ນຳ​ກົມ​ກອງ​ຂອງ​ຕົນ​ເຮັດ​ໜ້າ­ທີ່​ສ້າງ​ເງື່ອນ­ໄຂ ຊອກ​ຫາ​ແຫຼ່ງ​ລາຍ​ຮັບ​ເຂົ້າ​ກົມ​ກອງ ເພື່ອ​ແກ້​ໄຂ​ຊີ­ວິດ​ການ​ເປັນ​ຢູ່​ຂອງ​ພະ­ນັກ­ງານ-ນັກ­ຮົບ​ໃຫ້​ດີ​ຂຶ້ນ​ຢ່າງ​ຕໍ່​ເນື່ອງ ປັດ­ຈຸ­ບັນ​ກອງ​ບັນ­ຊາ​ການ​ທະ­ຫານ ນວ ມີ​ເນື້ອ­ທີ່​ປູກ​ເຂົ້າ 25 ເຮັກ­ຕາ ເນື້ອ­ທີ່​ປູກ​ພືດ​ຜັກ 8,6 ເຮັກ­ຕາ ປູກ​ຕົ້ນ­ໄມ້​ກິນ​ໝາກ 990 ຕົ້ນ ປູກ​ໄມ້​ອຸດ­ສາ­ຫະ­ກຳ 20.364 ຕົ້ນ ປູກ​ພືດ​ເປັນ​ສິນ­ຄ້າ 11,77 ເຮັກ­ຕາ ສາ­ມາດ​ເກັບ​ກູ້​ການ​ປູກ​ໄດ້​ທັງ​ໝົດ 193.156 ກິ​ໂລ ເປັນ​ເງິນ 587.056.600 ກີບ ລ້ຽງ­ສັດ​ປະ­ເພດ​ງົວ-ຄວາຍ 99 ໂຕ ໝູ-ແບ້ 332 ໂຕ ສັດ​ປີກ 26.196 ໂຕ ສັດ​ນ້ຳ ແລະ ສັດ​ເຄິ່ງ​ບົກ​ເຄິ່ງ​ນ້ຳ 173.351 ໂຕ ຂາຍ​ເປັນ​ເງິນ 781.291.000 ກີບ ນອກ​ນັ້ນ ຍັງ​ໄດ້​ຮັບ​ຈາກ​ການ​ບໍ­ລິ­ການ​ອື່ນໆ​ອີກ ຈຳ­ນວນ 1.551.304.100 ກີບ ສັງ​ລວມ​ແລ້ວ ໜຶ່ງ​ປີ­ຜ່ານ­ມາ ສາ­ມາດ​ຊອກ​ຫາ​ແຫຼ່ງ​ລາຍ​ຮັບ​ເຂົ້າ​ກົມ​ກອງ​ໄດ້​ທັງ​ໝົດ 2.910.651.100 ກີບ ຈາກ​ຜົນ­ງານ​ດັ່ງ­ກ່າວ ບວກ​ກັບ​ການ​ສ້າງ​ຂະ​ບວນ​ການ​ສ້າງ​ຜົນ­ງານ ໃນ​ໂອ­ກາດ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ແລະ ວັນ​ສ້າງ­ຕັ້ງ​ກອງ​ບັນ­ຊາ​ການ​ທະ­ຫານ ນວ ຈຶ່ງ​ເຮັດ​ໃຫ້​ກົມ​ກອງ​ຂອງ​ຕົນ​ມີ​ໃບ​ໜ້າ​ອັນ​ໃໝ່ ພ້ອມ​ທັງ​ໄດ້​ຮັບ​ການ​ຍ້ອງ­ຍໍ​ຂັ້ນ​ຕ່າງໆ​ຈາກ​ຂັ້ນ​ເທິງ ເປັນ­ຕົ້ນ ໄດ້​ຮັບ​ຫຼຽນ​ກາ​ລະ­ນຶກ 70 ປີ ໃຫ້​ພະ­ນັກ­ງານ​ຜູ້​ທີ່​ມີ​ເງື່ອນ­ໄຂ 808 ຄົນ ໃບ​ຍ້ອງ­ຍໍ​ຜົນ­ງານ 5 ປີ ໃນ​ໂອ­ກາດ​ວັນ​ສ້າງ­ຕັ້ງ​ກອງ­ທັບ​ຄົບ­ຮອບ 70 ປີ ຄື: ໄດ້​ຮັບ​ຫຼຽນ​ໄຊ​ອິດ­ສະ­ຫຼະ​ຊັ້ນ II ມີ 1 ກົມ​ກອງ ແລະ 7 ຄົນ ຫຼຽນ​ໄຊ​ອິດ­ສະ­ຫຼະ​ຊັ້ນ III ມີ 2 ກົມ​ກອງ ແລະ 8 ຄົນ ຫຼຽນ​ໄຊ​ແຮງ​ງານ​ຊັ້ນ II ມີ 2 ກົມ​ກອງ ແລະ 46 ຄົນ ຫຼຽນ​ໄຊ​ແຮງ​ງານ​ຊັ້ນ III ມີ 7 ກົມ​ກອງ ແລະ 358 ຄົນ ຫຼຽນ​ກາ​ແຮງ​ງານ 676 ຄົນ ໃບ​ຍ້ອງ­ຍໍ​ລັດ­ຖະ­ບານ 264 ຄົນ ຫຼຽນ​ໄຊ​ພິ­ລະ​ອາດ​ຫານ​ຊັ້ນ II ມີ 7 ກົມ​ກອງ ແລະ 19 ຄົນ ຫຼຽນ​ໄຊ​ພິ­ລະ​ອາດ​ຫານ​ຊັ້ນ III ມີ 8 ກົມ​ກອງ ແລະ 39 ຄົນ ໃບ​ຍ້ອງ­ຍໍ​ກະ­ຊວງ​ປ້ອງ​ກັນ​ປະ­ເທດ 390 ຄົນ ແລະ ໃບ​ຍ້ອງ­ຍໍ​ກົມ​ໃຫຍ່​ການ­ເມືອງ​ກອງ­ທັບ 424 ຄົນ.

ຂ່າວທີ່ກ່ຽວຂ້ອງ