Airbus ປະກາດ​ຢ່າງ​ເປັນ​ທາງ​ການ​ເຖິງ​ການ​ງົດ​ການ​ຜະລິດ​ເຮືອບິນ A380

332 18 ກ.ພ. 2019 ຂ່າວຕ່າງປະເທດ
Airbus ປະກາດ​ຢ່າງ​ເປັນ​ທາງ​ການ​ເຖິງ​ການ​ງົດ​ການ​ຜະລິດ​ເຮືອບິນ A380

   Airbus ຊຶ່ງ​ເປັນ​ບໍລິສັດ​ຜູ້​ຜະລິດ​ເຮືອບິນ​ຂະໜາດ​ໃຫຍ່​ຂອງ​ເອີ​ຣົບ ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 14 ກຸມພາ​ນີ້ ວ່າ​ຈະ​ງົດ​ການ​ຜະລິດ​ເຮືອບິນ A380 ທີ່​ມີ​​ຂ​ະໜາດ​ໃຫຍ່​ນັ້ນ. ເຮືອບິນ​ດັ່ງກ່າວ ເຄີຍ​ໄດ້​ຮັບ​ຄວາມ​ນິຍົມ​ຈາກ​ລູກ​ຄ້າ​ມາ​ແລ້ວ ແຕ່​ວ່າ​ບໍ່​ໄດ້​ຮັບ​ໃບ​ສັ່ງ​ສິນຄ້າ​ພຽງພໍ ເພື່ອ​ຈັດ​ສັນ​ຄ່າ​ໃຊ້​ຈ່າຍ​ໃຫ້​ແກ່​ການເຄື່ອນໄຫວ​ຜະລິດ.

    Airbus ແຈ້ງ​ໃຫ້​ຮູ້​ຢູ່​ໃນ​ຖະແຫຼງການ​ສະບັບ​ໜຶ່ງ​ວ່າ ບໍລິສັດ​ການບິນ Emirates ໄດ້​ຫຼຸດ​ໃບ​ສັ່ງ​ສິນຄ້າ​ກັບ​ເຮືອບິນ A380 ຈາກ 162 ລຳ ລົງ​ມາ​ຍັງ​ເຫຼືອ 123 ລຳ. ເລື່ອງ​ດັ່ງກ່າວ ບວກ​ກັບ​ສະພາບ​ຂາດ​ໃບ​ສັ່ງ​ຈອງ​ສິນຄ້າ​ຈາກ​ບໍລິສັດ​ການບິນ​ອື່ນໆ ເຮັດ​ໃຫ້ Airbus ຕ້ອງ​ໄດ້​ງົດ​ການແຈກຢາຍ​ເຮືອບິນ A380 ພາຍ​ໃນ​ປີ 2021.

    Airbus ຕ້ອງ​ໄດ້​ຫຼຸດ​ການ​ຜະລິດ​ເຮືອບິນ A380 ໃນ​ຊຸມ​ປີ​ມໍ່ໆມານີ້ ກ່ອນ​ທີ່​ຈະ​ໄດ້​ມີ​ຄຳ​ແຈ້ງ​ເຕືອນ​ອອກ​ມາ​ເມື່ອ​ເດືອນ​ມັງກອນ ປີ 2018 ວ່າ​ໂຄງການ​ຜະລິດ​ເຮືອບິນ​ປະເພດ​ນີ້ ຈະ​ໄດ້​ຖືກ​ຍົກເລີກ ຖ້າ​ຫາ​ກວ່າ​ບໍ່​ມີ​ໃບ​ສັ່ງ​ຈອງ​ສິນຄ້າ​ໃໝ່.

    ໃນ​ວັນ​ທີ 14 ກຸມພາ​ນີ້​ເຊັ່ນ​ກັນ Airbus ໄດ້​ເປີດເຜີຍ​ລາຍ​ຮອບ​ຂອງ​ບໍລິສັດ​ນີ້ ພາຍ​ໃນ​ປີ 2018 ໂດຍ​ຊີ້​ໃຫ້​ເຫັນ​ວ່າ ຜົນ​ຕອບ​ແທນ​ສຸດທິ​ບັນລຸ 3 ຕື້​ເອີ​ໂຣ ເພີ່ມ​ຂຶ້ນ 29% ເມື່ອ​ທຽບໃສ່​ປີ  2017. ໃນ​ຂະນະ​ດຽວ​ກັນ Airbus ກໍ​ໃຫ້​ຮູ້​ວ່າ ຈະ​ແຈກ​ຢາຍ​ເຮືອບິນ​ການ​ຄ້າ​ໃໝ່​ປະມານ 880-890 ລຳ ພາຍ​ໃນ​ປີ​ນີ້ ແລະ​ ໃຊ້​ຈ່າຍ 436 ລ້ານ​ເອີ​ໂຣ ໃຫ້​ແກ່​ໂຄງການ​ຜະລິດ​ເຮືອບິນ​ຂົນສົ່ງ​ການ​ທະຫານ A400M.

 

 

ຂ່າວທີ່ກ່ຽວຂ້ອງ