ຂ່າວຫຼ້າສຸດ

NASA ຢຸດຕິພາລະກິດຂອງລົດ Opportunity ທີ່ຂັບເຄື່ອນດ້ວຍຕົວມັນເອງຢູ່ເທິງດາອັງຄານ

350 18 ກ.ພ. 2019 ຂ່າວຕ່າງປະເທດ
NASA ຢຸດຕິພາລະກິດຂອງລົດ Opportunity ທີ່ຂັບເຄື່ອນດ້ວຍຕົວມັນເອງຢູ່ເທິງດາອັງຄານ

    ອົງການການບິນອາວະກາດ ສ ອາເມຣິກາ (NASA) ໄດ້ປະກາດເມື່ອວັນທີ 13 ກຸມພານີ້ ເຖິງການຢຸດຕິພາລະກິດຂອງລົດ Opportunity ທີ່ຂັບເຄື່ອນດ້ວຍຕົວມັນເອງ ຫຼັງຈາກທີ່ໄດ້ເຄື່ອນໄຫວເປັນເວລາ 15 ປີ ນັບແຕ່ລົງຈອດຢູ່ດາວອັງຄານ ເປັນເທື່ອທຳອິດເປັນຕົ້ນມາ.

    ຂໍ້ມູນດັ່ງກ່າວ ຖືກນຳອອມາຢູ່ໃນກອງປະຊຸມຖະແຫຼງຂ່າວ ຢູ່ທີ່ລັດຄາລີຟໍເນຍ (ສ ອາເມຣິກາ) ຫຼັງຈາກໃຊ້ຄວາມພະຍາຍາມສຸດທ້າຍ ເພື່ອເຊື່ອມຕໍ່ກັບລົດຂັບເຄື່ອນດ້ວຍຕົວມັນເອງຂອງ NASA ເມື່ອຄ່ຳຄືນວັນທີ 12 ກຸມພານັ້ນປະລາໄຊ. ເທື່ອຫຼ້າສຸດກ່ອນໜ້ານີ້ ລົດຂັບເຄື່ອນດ້ວຍຕົວມັນເອງ ດັ່ງກ່າວ ໄດ້ສົ່ງສັນຍານມາຍັງໂລກ ແມ່ນໃນວັນທີ 10 ມິຖຸນາ ປີ 2018 ເມື່ອມີພາຍຸຊາຍຄັ້ງໃຫຍ່ ພັດຜ່ານຈຸດຈອດທີ່ລົດຂັບເຄື່ອນດ້ວຍຕົວມັນເອງ ທີ່ແລ່ນດ້ວຍພະລັງງານແສງຕາເວັນ ຢູ່ເທິງດາວອັງຄານນັ້ນ.

   ຍ້ອນບໍ່ສາມາດສາກພະລັງງານໄດ້ ລົດຂັບເຄື່ອນດ້ວຍຕົວມັນເອງ Opportunity ຈຶ່ງບໍ່ໄດ້ຕອບກັບຕໍ່ຂໍ້ຄວາມຈາກພາກພື້ນດິນຫຼາຍຮ້ອຍສະບັບ ຕະຫຼອດເວລາ 8 ເດືອນຫຼັງຈາກນັ້ນ.

   ລົດ Opportunity ທີ່ຂັບເຄື່ອນດ້ວຍຕົວມັນເອງ ໄດ້ລົງຈອດທີ່ດາວອັງຄານ ເມື່ອວັນທີ 24 ມັງກອນ ປີ 2004. ເປົ້າໝາຍດ້ານວິທະຍາສາດລາຍການທຳອິດ ຂອງພາລະກິດດັ່ງກ່າວ ກໍແມ່ນຊອກຫາ ແລະວິໄຈຈຸດພິເສດຂອງຫີນ ແລະ ດິນ ໂດຍຜ່ານນັ້ນກໍຄົ້ນຫາການເຄື່ອນໄຫວຂອງນ້ຳຢູ່ເທິງດາວອັງຄານ.

    ລົດຂັບເຄື່ອນດ້ວຍຕົວມັນເອງທີ່ເປັນ “ຝາແຜດ” ຂອງ Opportunity ກໍແມ່ນ Spirit ໄດ້ລົງຈອດທີ່ດາວອັງຄານໄປກ່ອນ 3 ອາທິດ ແລະໄດ້ເຊົາການເຄື່ອນໄຫວເມື່ອປີ 2010. ປັດຈຸບັນນີ້ ຍັງມີລົດ Curiosity ລົດຂັບເຄື່ອນດ້ວຍຕົວມັນເອງພຽງຄັນດຽວທີ່ຍັງເຄື່ອນໄຫວ. Curiosity ໄດ້ລົງຈອດທີ່ດາວອັງຄານ ເມື່ອປີ 2012 ແລະ ໄດ້ຮັບການສະໜອງພະລັງງານຈາກເຕົາປະຕິກອນນີວເຄລຍຂະໜາດນ້ອຍ.

ຂ່າວທີ່ກ່ຽວຂ້ອງ