ສານປະຊາຊົນສູງສຸດ ຄົ້ນຄວ້າອອກຄຳຊີ້ຂາດ ກ່ຽວກັບໂທດປະຫານຊີວິດ 50 ເລື່ອງ

294 18 ກ.ພ. 2019 ຂ່າວໜ້າ​ໜຶ່ງ

    ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ ຂອງ​ສານ​ປະ­ຊາ­ຊົນ​ສູງ​ສຸດ​ໃນ​ກາງ​ສະ­ໄໝ (2 ປີ​ເຄິ່ງ) ຜ່ານ​ມາ ເຫັນ​ວ່າ​ຫຼາຍ​ວຽກ​ງານ​ປະ­ສົບ​ຜົນ­ສຳ­ເລັດ​ຕາມ​ແຜນ­ການ ເປັນ­ຕົ້ນ ການ​ພິ­ຈາ­ລະ­ນາ​ແກ້​ໄຂ​ຄະ­ດີ​ຂອງ​ສານ​ແຕ່​ລະ​ຂັ້ນ​ມີ​ຄວາມ​ວ່ອງ­ໄວ ແລະ ຄຸນ​ນະ​ພາບ​ດີ​ຂຶ້ນ ເຊິ່ງ​ການ​ຕັດ­ສິນ​ຄະ­ດີ​ຂອງ​ສານ​ຂັ້ນ​ຕົ້ນ​ໄດ້ 90,41% ລື່ນ​ແຜນ­ການ 5,41% ຄູ່​ຄວາມ​ບໍ່​ພໍ­ໃຈ​ຂໍ​ອຸ­ທອນ ກວມ​ເອົາ 14,31% ລື່ນ​ແຜນ 0,69% ສານ​ຂັ້ນ​ອຸ­ທອນ​ພິ­ພາກ­ສາ​ຄະ­ດີ​ໄດ້ 86,86%  ລື່ນ​ແຜນ­ການ 1,86% ນອກ​ນັ້ນ ສານ​ປະ­ຊາ­ຊົນ​ສູງ​ສຸດ ຍັງ​ໄດ້​ຄົ້ນ­ຄວ້າ​ອອກ​ຄຳ​ຊີ້​ຂາດ ກ່ຽວ​ກັບ​ໂທດ​ປະ­ຫານ​ຊີ­ວິດ ຈຳ­ນວນ 50 ເລື່ອງ ແລະ ຄຳ​ຊີ້​ຂາດ​ກ່ຽວ​ກັບ​ສິດ​ອຳ­ນາດ​ຂອງ​ສານ ຈຳ­ນວນ 6 ເລື່ອງ​ເປັນ­ຕົ້ນ.

    ກອງ​ປະ­ຊຸມ​ສະ­ຫຼຸບ​ການ­ເຄື່ອນ­ໄຫວ​ວຽກ​ງານ​ກາງ​ສະ­ໄໝ​ຂອງ​ແຜນ­ການ 5 ປີ ຄັ້ງ​ທີ III (2016-2020) ວຽກ​ງານ​ປະ­ຈຳ​ປີ 2018 ທິດ​ທາງ​ແຜນ­ການ​ຮອດ​ປີ 2020 ແລະ ວຽກ​ງານ​ຈຸດ​ສຸມ​ປີ 2019 ຂອງ​ສານ​ປະ­ຊາ­ຊົນ​ສູງ​ສຸດ ຈັດ​ຂຶ້ນ​ວັນ​ທີ 15 ກຸມ­ພາ 2018 ຢູ​ທີ່​ສານ​ປະ­ຊາ­ຊົນ​ສູງ​ສຸດ ໂດຍ​ການ​ເປັນ​ປະ­ທານ​ຂອງ​ທ່ານ ຄຳ​ພັນ ສິດ­ທິ​ດຳ​ພາ ປະ­ທານ​ສານ​ປະ­ຊາ­ຊົນ​ສູງ​ສຸດ ໃຫ້​ກຽດ​ເຂົ້າ​ຮ່ວມ​ມີ​ທ່ານ ຄຳ​ພັນ ພົມ​ມະ​ທັດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຫ້ອງ​ວ່າ­ການ​ສູນ​ກາງ​ພັກ ພ້ອມ​ດ້ວຍ​ບັນ­ດາ​ສະ­ມາ­ຊິກ​ພັກ-ພະ­ນັກ­ງານ​ກ່ຽວ­ຂ້ອງ.

    ການ­ເຄື່ອນ­ໄຫວ​ວຽກ​ງານ​ກາງ​ສະ­ໄໝ ແລະ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ປະ­ຈຳ​ປີ 2018 ຂອງ​ສານ​ປະ­ຊາ­ຊົນ​ສູງ​ສຸດ ໄດ້​ສຳ­ເລັດ​ຫຼາຍ​ໜ້າ​ວຽກ​ສຳ­ຄັນ ເປັນ­ຕົ້ນ ສ້າງ​ຄວາມ​ເຂັ້ມ­ແຂງ​ໃຫ້​ການ­ຈັດ­ຕັ້ງ ແລະ ເຄື່ອນ​ໄຫວ​ຂອງ​ສານ ການ​ສ້າງ ແລະ ພັດ­ທະ­ນາ​ບຸ​ຄະ­ລາ​ກອນ ພັດ­ທະ­ນາ​ແບບ­ແຜນ ແລະ ກົນ​ໄກ​ການ​ບໍ­ລິ­ຫານ​ຄະ­ດີ ສຳ­ເລັດ​ການ​ປັບ­ປຸງ​ກົດ­ໝາຍ​ວ່າ​ດ້ວຍ​ສານ​ປະ­ຊາ­ຊົນ ແລະ ສ້າງ​ກົດ­ໝາຍ​ວ່າ​ດ້ວຍ​ຜູ້​ພິ­ພາກ­ສາ ເຊິ່ງ​ໄດ້​ປະ­ກາດ​ນຳ​ໃຊ້​ຢ່າງ​ເປັນ​ທາງ​ການ ປັດ­ຈຸ­ບັນ ພວມ​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ປັບ­ປຸງ​ກົດ­ໝາຍ ວ່າ​ດ້ວຍ​ການ​ດຳ­ເນີນ​ຄະ­ດີ​ແພ່ງ ແລະ ກົດ­ໝາຍ​ວ່າ​ດ້ວຍ​ຄ່າ​ທຳ­ນຽມ​ສານ ເອົາ­ໃຈ­ໃສ່​ເກັບ​ກຳ​ສະ­ຖິ­ຕິ​ຄະ­ດີ ກວດ­ກາ​ຄຳ​ຕັດ­ສິນ?ຄຳ​ພິ­ພາກ­ສາ ແລະ ຕິດ­ຕາມ​ການ​ປະ­ຕິ­ບັດ​ໜ້າ­ທີ່​ຂອງ​ຜູ້​ພິ­ພາກ­ສາ ພະ­ນັກ­ງານ​ຂອງ​ສານ ຕາມ​ຄຳ​ຮ້ອງ­ທຸກ ຄຳ​ສະ­ເໜີ​ຂອງ​ປະ­ຊາ­ຊົນ ມີ​ທັງ​ໝົດ 41 ສະ­ບັບ ແຍກ​ເປັນ​ຄຳ​ຮ້ອງ​ຄຳ​ສະ­ເໜີ​ທີ່​ພົວ­ພັນ​ເຖິງ​ການ​ປະ­ຕິ­ບັດ​ໜ້າ­ທີ່​ຂອງ​ຜູ້​ພິ­ພາກ­ສາ ພະ­ນັກ­ງານ​ສານ 27 ສະ­ບັບ ພົວ­ພັນ​ກັບ​ການ​ດຳ­ເນີນ​ຄະ­ດີ​ຂອງ​ສານ 12 ສະ­ບັບ ແລະ ພົວ­ພັນ​ເຖິງ​ພາກ­ສ່ວນ​ອື່ນ​ອີກ 2 ສະ­ບັບ ພ້ອມ​ດຽວ​ກັນ​ນັ້ນ ສານ​ປະ­ຊາ­ຊົນ​ສູງ​ສຸດ ຍັງ​ເປັນ​ເຈົ້າ​ການ​ຢ່າງ​ຕັ້ງ­ໜ້າ ເຂົ້າ​ໃນ​ການ​ພັດ­ທະ­ນາ​ການ​ບໍ­ລິ­ຫານ​ສານ​ໃຫ້​ມີ​ຄຸນ​ນະ​ພາບ ແລະ ປະ​ສິດ­ທິ​ຜົນ​ສູງ ເສີມ​ຂະ­ຫຍາຍ​ວຽກ​ງານ​ການ​ຮ່ວມ​ມື​ກັບ​ຕ່າງ­ປະ­ເທດ ແນ­ໃສ່​ແລກ­ປ່ຽນ​ຖອດ​ຖອນ​ບົດ­ຮຽນ ເພື່ອ​ນຳ​ມາ​ໝູນ​ໃຊ້​ໃຫ້​ເກີດ​ປະ­ໂຫຍດ​ສູງ​ສຸດ ໃນ​ການ​ປະ­ຕິ­ບັດ​ວຽກ​ງານ​ສານ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ