ຂ່າວຫຼ້າສຸດ

ວາລະສານ “Nature" ຍົກປັກກິ່ງ ເປັນສຸດຍອດເມືອງຜູ້ຜະລິດຜົນງານວິໄຈຂອງໂລກ

138 19 ກ.ພ. 2019 ຫົວຂໍ້ຂ່າວອື່ນໆ

    ວາ­ລະ­ສານ “ເນ​ເຈີ ອິນ​ເດັກ 2018 ໄຊ​ແອນ​ຊິ​ຕີ້” (Nature Index 2018 Science Cities) ໃນ​ເຄືອ “ເນ​ເຈີ” (Nature) ຊຶ່ງ​ເປັນ​ຖານ​ຂໍ້​ມູນ​ທີ່​ລວບ​ລວມ​ງານ​ວິ­ໄຈ ທີ່​ລົງ​ພິມ​ໃນ​ວາ­ລະ­ສານ​ວິ­ຊາ​ການ​ຄຸນ​ນະ​ພາບ​ສູງ​ຂອງ​ສະ­ຫະ​ຣາ​ຊະ​ອາ­ນາ­ຈັກ​ອັງ­ກິດ ໄດ້​ຈັດ​ໃຫ້​ມະ­ຫາ​ນະ­ຄອນ​ປັກ​ກິ່ງ​ເປັນ​ສຸດ​ຍອດ​ເມືອງ ທີ່​ຜະ­ລິດ­ຜົນ​ງານ​ວິ­ໄຈ​ຄຸນ​ນະ​ພາບ​ສູງ ໃນ​ປີ 2017.

    ວາ­ລະ­ສານ​ເນ​ເຈີ ໄດ້​ຈັດ​ອັນ​ດັບ​ເມືອງ ໂດຍ​ພິ­ຈາ­ລະ­ນາ​ຜົນ­ງານ​ວິ­ໄຈ​ຈາກ​ເມືອງ​ຊັ້ນ​ແນວ​ໜ້າ 200 ແຫ່ງ​ທົ່ວ​ໂລກ ທີ່​ພິມ​ລົງ​ໃນ​ວາ­ລະ­ສານ​ການ​ວິ­ໄຈ​ຊັ້ນ​ແນວ​ໜ້າ 82 ສະ­ບັບ ໂດຍ​ມະ­ຫາ​ນະ­ຄອນ​ປັກ​ກິ່ງ​ໄດ້​ຄະ­ແນນ​ນຳ​ສູງ​ສຸດ​ທີ່ 2.143,53 ຄະ­ແນນ.

    ນອກ­ຈາກ​ນີ້ ຍັງ​ມີ​ເມືອງ​ນັກ​ວິ­ໄຈ​ຂອງ​ຈີນ​ອີກ 9 ແຫ່ງ ຕິດ​ຜັງ 50 ອັນ​ດັບ​ຕົ້ນ​ໄດ້­ແກ່ ເມືອງ​ຊ່ຽງ​ໄຮ້ ເມືອງ​ໜັນ​ຈິງ ເມືອງ​ອູ່​ຮົ່ນ ເມືອງ​ກ່ວງ​ໂຈວ ເມືອງ​ຮົງ​ກົງ ເມືອງ​ເຫີ​ເຝີຍ ເມືອງ​ຫັງ​ໂຈວ ເມືອງ​ທຽນ​ຈິນ ແລະ ເມືອງ​ສັງ​ຊຸນ.

    ທັ້ງ​ນີ້ ຈີນ​ໃຫ້​ຄວາມ​ສຳ­ຄັນ​ກັບ​ການ​ວິ­ໄຈ​ທາງ​ວິ­ທະ­ຍາ­ສາດ​ຢ່າງ​ຕໍ່​ເນື່ອງ ເພື່ອ​ຍູ້​ດັນ​ປະ­ເທດ​ມຸ່ງ​ສູ່​ຊາດ​ນະ​ວັດ­ຕະ​ກຳ ໂດຍ​ສຳ­ນັກ­ງານ​ສະ­ຖິ­ຕິ​ແຫ່ງ​ຊາດ​ຈີນ ເປິດ​ເຜີຍ​ວ່າ ການ​ໃຊ້​ຈ່າຍ​ງົບ­ປະ­ມານ ເພື່ອ​ການ​ວິ­ໄຈ ແລະ ພັດ­ທະ­ນາ​ໃນ​ປີ 2017 ເພີ່ມ​ຂຶ້ນ 11,6% ເມື່ອ​ທຽບ​ລາຍ​ປີ ແຕະ 1.750.000.000.000 ຢວນ ຄິດ​ເປັນ 2,12% ຂອງ​ຜະ­ລິດ​ຕະ​ພັນ​ມວນ​ລວມ​ພາຍ​ໃນ​ປະ­ເທດ​ຈີນ ເຊິ່ງ​ເພີ່ມ​ຂຶ້ນ 0,01% ຈາກ​ປີ​ກ່ອນ​ໜ້າ ຂະ­ນະ​ທີ່​ຄ່າ​ໃຊ້​ຈ່າຍ​ແຍກ​ໃນ​ສ່ວນ​ສະ​ຖາ​ບັນ​ຂອງ​ລັດ ແລະ ວິ­ທະ­ຍາ­ໄລ ເພີ່ມ​ຂຶ້ນ 7% ແລະ 5,2% ຕາມ​ລຳ­ດັບ.

    ລາຍ​ງານ​ລະ­ບຸ​ວ່າ ປະ­ມານ 9,2 ຕື້​ຢວນ ຫຼື 5,3% ຂອງ​ການ​ໃຊ້​ຈ່າຍ​ໃນ​ປີ 2017 ທັງ​ໝົດ​ຖືກ​ນຳ​ມາ​ໃຊ້​ໃນ​ການ​ວິ­ໄຈ​ພື້ນ­ຖານ.

    ກ່ອນ​ໜ້າ​ນີ້ “ເນ​ເຈີ ອິນ​ເດັກ 2018” (Nature Index 2018) ເຊິ່ງ​ເປັນ​ຖານ​ຂໍ້​ມູນ​ທີ່​ລວບ​ລວມ​ງານ​ວິ­ໄຈ ທີ່​ລົງ​ພິມ​ໃນ​ວາ­ລະ­ສານ​ວິ­ຊາ​ການ​ຄຸນ​ນະ​ພາບ​ສູງ​ຈາກ 68 ສະ­ບັບ ໄດ້​ຈັດ​ໃຫ້​ສະ­ພາ​ບັນ­ດິດ​ວິ­ທະ­ຍາ­ສາດ​ຈີນ (Chinese Academy of Sciences) ຄອງ​ອັນ​ດັບ​ໜຶ່ງ​ສຸດ​ຍອດ​ສະ​ຖາ​ບັນ​ວິ­ໄຈ​ທາງ​ວິ­ທະ­ຍາ­ສາດ​ໂລກ.

ຂ່າວທີ່ກ່ຽວຂ້ອງ