ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 19/02/2019

277 19 ກ.ພ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ເກົ່າ​ເລົ່າ­ຄືນ​ກ່ຽວ​ກັບ​ບັນ­ຫາ​ທີ່​ພົວ­ພັນ​ກັບ​ເຮືອ­ກຳ­ປັ່ນ ເຊ​ໂວນ ຫຼົ້ມ​ຢູ່ ສ ເກົາ­ຫຼີ ເມື່ອ 5 ປີ­ຜ່ານ­ມາ ແລະ ຂ່າວ​ກ່ຽວ​ກັບ​ນະ­ໂຍ­ບາຍ​ເຮືອນ​ຢູ່​ໃຫ້​ຊາວ​ໜຸ່ມ​ໃນ​ອິນ​ໂດ​ເນ​ເຊຍ.

    ທີ່ ສ ເກົາ­ຫຼີ: ຫຼາຍ​ຄົນ​ຍັງ​ຄົງ​ຈຳ​ໄດ້​ເຫດ­ການ​ເຮືອ­ກຳ­ປັ່ນ​ທ່ອງ​ທ່ຽວ​ເຊ​ໂວນ (Sewol) ຂອງ ສ ເກົາ­ຫຼີ ຫຼົ້ມ​ເມື່ອ 5 ປີ­ຜ່ານ­ມາ ເຮັດ​ໃຫ້​ມີ​ຄົນ​ເສຍ​ຊີ­ວິດ​ຍ້ອນ ກວ່າ 300 ຄົນ ເກືອບ​ທັງ​ໝົດ​ແມ່ນ​ນັກ­ຮຽນ​ຂັ້ນ​ມັດ­ທະ­ຍົມ ເຮືອ­ກຳ­ປັ່ນ​ທ່ອງ​ທ່ຽວ ເຊ​ໂວນ ບັນ­ທຸກ​ຜູ້­ໂດຍ­ສານ ທັງ​ໝົດ 476 ຄົນ ເຊິ່ງ​ຖື​ວ່າ​ເກີນ​ນ້ຳ­ໜັກ​ທີ່​ກຳ­ນົດ​ໄວ້ ນອກ​ນັ້ນ ຍັງ​ມີ​ການ​ພົບ​ຂໍ້​ບົກ​ຜ່ອງ​ອື່ນໆ​ອີກ ເຊັ່ນ: ການ​ອອກ​ແບບ ແລະ ດັດ­ແກ້​ດ້ານ​ເຕັກ­ນິກ​ຂອງ​ກຳ­ປັ່ນ​ໂດຍ​ບໍ່​ໄດ້​ຮັບ​ອະ­ນຸ­ຍາດ ແລະ ຄວາມ​ໄຮ້​ປະ­ສິດ­ທິ­ພາບ​ຂອງ​ຄະ­ນະ​ບັນ­ຊາ ແລະ ພະ­ນັກ­ງານ​ຮັບ­ຜິດ­ຊອບ​ກຳ­ປັ່ນ​ລຳ​ເຄາະ​ຮ້າຍ​ດັ່ງ­ກ່າວ ມາ​ຫວ່າງ​ບໍ່​ດົນ​ນີ້ ມີ​ຂ່າວ​ອອກ​ມາ​ວ່າ (The Nation 15/01/2019) ທາງ​ສານ​ກ່ຽວ­ຂ້ອງ​ໄດ້​ອອກ​ຄຳ​ສັ່ງ​ໃຫ້​ທາງ​ບໍ­ລິ­ສັດ​ເຈົ້າ​ຂອງ​ກຳ­ປັ່ນ​ເຊ​ໂວນ ແລະ ລັດ­ຖະ­ບານ​ຈ່າຍ​ເງິນ​ຄ່າ​ເສຍ​ຫາຍ​ໃຫ້​ຜູ້​ລອດ​ຊີ­ວິດ​ຈຳ­ນວນ​ເກືອບ 80 ຄົນ ຈາກ​ເຫດ­ການ​ກຳ­ປັ່ນ​ຫຼົ້ມ​ຄັ້ງ​ນັ້ນ ບໍ່​ພຽງ​ແຕ່​ຈ່າຍ​ໃຫ້​ຜູ້​ລອດ​ຊີ­ວິດ ແຕ່​ຍັງ​ຕ້ອງ​ຈ່າຍ​ໃຫ້​ພີ່­ນ້ອງ​ຂອງ​ຜູ້​ລອດ​ຊີ­ວິດ​ນຳ​ອີກ​ດ້ວຍ ເຫດ­ຜົນ​ວ່າ ຜູ້​ລອດ​ຊີ­ວິດ​ມາ​ໄດ້​ນັ້ນ ໄດ້​ທົນ​ທຸກ­ທໍ­ລະ­ມານ​ທີ່​ສຸດ​ໃນ​ເວ­ລາ​ພະ­ຍາ­ຍາມ​ອອກ​ຈາກ​ກຳ­ປັ່ນ ສ່ວນ​ພີ່­ນ້ອງ​ຂອງ​ຜູ້​ເຄາະ​ຮ້າຍ​ນັ້ນ ກໍ​ມີ​ຄວາມ​ທຸກ­ທໍ­ລະ­ມານ​ດ້ານ​ຈິດ­ໃຈ​ຢ່າງ​ສາ­ຫັດ ມາ​ຮອດ​ປັດ­ຈຸ­ບັນ ບັນ­ດາ​ຜູ້​ລອດ​ຊີ­ວິດ ແລະ ພີ່­ນ້ອງ​ຂອງ​ພວກ​ເຂົາ​ຍັງ​ສືບ­ຕໍ່​ມີ​ອາ­ການ​ຜິດ​ປົກ­ກະ­ຕິ​ທາງ​ດ້ານ​ຈິດ­ໃຈ ເຊັ່ນ: ມີ​ຄວາມ​ຄຽດ ມີ​ອາ­ການ​ກະ­ວົນ­ກະ­ວາຍ ແລະ ພາບ​ຫຼອນ​ທີ່​ບັນ​ທອນ​ທາງ​ດ້ານ​ອາ­ລົມ​ຢູ່​ຕະ­ຫຼອດ​ເວ­ລາ ແລະ ຂ່າວ​ບອກ​ວ່າ ບໍ­ລິ­ສັດ ຈົງ​ແຮ​ຈິນ ມາ​ຣີນ (Cheonghaejin Marine) ເຈົ້າ​ຂອງ​ຜູ້​ຈັດ­ການ​ກຳ­ປັ່ນ ເຊ​ໂວນ ໄດ້​ຈ່າຍ​ເງິນ​ໃຫ້​ຜູ້​ລອດ​ຊີ­ວິດ​ແຕ່­ລະ­ຄົນ ຜູ້​ລະ 80 ລ້ານ​ວອນ (ປະ­ມານ 570 ລ້ານ​ກີບ) ສ່ວນ​ພີ່­ນ້ອງ​ຂອງ​ຜູ້​ລອດ​ຊີ­ວິດ​ນັ້ນ​ໄດ້​ຮັບ​ຜູ້​ລະ ລະ­ຫວ່າງ 2-32 ລ້ານ​ວອນ ການ​ເສຍ​ຄ່າ​ຊົດ​ເຊີຍ ຫຼື ຄ່າ​ເສຍ​ຫາຍ​ໃຫ້​ບັນ­ດາ​ເຫຍື່ອ​ຂອງ​ເຫດ​ຮ້າຍ​ຕ່າງໆ​ຢູ່​ຕ່າງ­ປະ­ເທດ​ນັ້ນ ເຂົາ​ມີ​ລະ­ບຽບ​ກົດ­ໝາຍ​ບັງ­ຄັບ​ຢ່າງ​ເຄັ່ງ​ຄັດ ຈະ​ລໍ­ຖ້າ​ແຕ່​ໃຫ້​ນາຍ­ທຶນ ຫຼື ບຸກ­ຄົນ​ທີ່​ກໍ່​ຄວາມ​ເສຍ​ຫາຍ​ຕື່ນ​ຕົວ​ຈ່າຍ​ເອງ​ນັ້ນ ມັນ​ເປັນ​ໄປ​ໄດ້​ຍາກ​ແທ້ໆ.

    ທີ່ ອິນ​ໂດ​ເນ​ເຊຍ: ມີ​ຂ່າວ​ໜຶ່ງ​ທີ່​ອອກ​ມາ​ໃນ​ຕົ້ນ​ເດືອນ​ມັງ­ກອນ​ປີ​ນີ້ ເຊິ່ງ​ເຮັດ​ໃຫ້​ຊາວ​ໜຸ່ມ​ອິນ​ໂດ​ເນ​ເຊຍ​ຍິ້ມ​ອອກ ເພາະ​ທ່ານ​ປະ­ທາ­ນາ­ທິ­ບໍ­ດີ ໂຈ​ໂກ ວີ​ໂດ​ໂດ ( ຫຼື ໂຈ​ໂກ) ໄດ້​ປະ­ກາດ​ວ່າ ທ່ານ​ມີ​ແຜນ​ຊ່ວຍ​ໃຫ້​ຊາວ​ໜຸ່ມ​ສາ­ມາດ​ຊື້​ເຮືອນ​ຢູ່​ເປັນ​ຂອງ​ຕົນ​ເອງ​ໄດ້ ດ້ວຍ​ລາ­ຄາ​ສົມ​ເຫດ​ສົມ​ຜົນ ຕາມ​ກຳ­ລັງ​ແຮງ​ຂອງ​ຊາວ​ໜຸ່ມ ທ່ານ​ບອກ​ວ່າ ຄວາມ​ໝັ້ນ​ສັນ­ຍາ​ນີ້ ພິ­ສູດ​ໄດ້​ຈາກ​ຄວາມ​ພະ­ຍາ­ຍາມ​ຂອງ​ລັດ­ຖະ­ບານ ໃນ​ການ​ສ້າງ​ທີ່­ຢູ່​ອາ­ໄສ​ຢູ່​ທົ່ວ​ປະ­ເທດ​ໃນ​ໄລ­ຍະ​ຜ່ານ​ມາ ຕົວ­ຢ່າງ ໃນ​ປີ 2014 ໄດ້​ມີ​ການ​ປຸກ​ສ້າງ​ເຮືອນ​ຢູ່​ຫຼັງ​ໃໝ່​ສຳ­ເລັດ​ຈຳ­ນວນ​ປະ­ມານ 1 ລ້ານ​ຫຼັງ ນະ­ໂຍ­ບາຍ​ສ້າງ​ເຮືອນ​ຢູ່​ນີ້ ຈະ​ຊ່ວຍ​ໃຫ້​ຊາວ​ໜຸ່ມ​ມີ​ເຮືອນ​ຫຼັງ​ທຳ​ອິດ​ຂອງ​ຕົນ​ໄດ້​ໂດຍ​ຫຼຸດ­ຜ່ອນ​ພັນ­ທະ ຈ່າຍ​ຜ່ອນ (ດາວ) ທີ່​ບວກ​ດອກ​ເບ້ຍ​ສູງ ທ່ານ​ປະ­ທາ­ນາ­ທິ­ບໍ­ດີ​ບອກ​ວ່າ ນະ­ໂຍ­ບາຍ​ທີ່​ວ່າ​ນີ້ ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ການ​ເງິນ​ຈາກ​ລັດ­ຖະ­ບານ ດັ່ງ­ນັ້ນ ຈຶ່ງ​ສ້າງ​ຄວາມ​ສະ­ດວກ​ໃນ​ການ​ມີ​ເຮືອນ​ຢູ່​ຂອງ​ຄອບ­ຄົວ​ຂອງ​ຄົນ​ໃນ​ໄວ​ໜຸ່ມ ໃນ​ປັດ­ຈຸ­ບັນ ອິນ​ໂດ​ເນ​ເຊຍ​ພວມ​ກະ­ກຽມ​ການ​ເລືອກ​ຕັ້ງ​ປະ­ທາ­ນາ­ທິ­ບໍ­ດີ ເຊິ່ງ​ບັນ­ດາ​ຜູ້​ສະ­ໝັກ (ລວມ​ທັງ​ປະ­ທາ­ນາ­ທິ­ບໍ­ດີ ໂຈ​ໂກ​ວີ) ຕ່າງ​ກໍ​ວາງ​ເປົ້າ​ໝາຍ​ຍາດ​ແຍ່ງ​ຄະ­ແນນ​ສຽງ​ຈາກ​ຄົນ​ໃນ​ໄວ​ໜຸ່ມ ເຊິ່ງ​ມີ​ຖານ​ສຽງ​ສູງ​ເຖິງ 40% ຂອງ​ຜູ້​ມີ​ສິດ​ເລືອກ​ຕັ້ງ​ໃນ​ທົ່ວ​ປະ­ເທດ ດັ່ງ­ນັ້ນ ກໍ​ເລີຍ​ມີ​ຜູ້​ຕັ້ງ​ຂໍ້​ສັງ­ເກດ​ວ່າ ນະ­ໂຍ­ບາຍ​ຊ່ວຍ​ໃຫ້​ຊາວ​ໜຸ່ມ​ມີ​ເຮືອນ​ຢູ່​ນີ້ ແມ່ນ​ວິ­ທີ​ການ​ດຶງ​ດູດ​ຄະ­ແນນ​ສຽງ​ຈາກ​ຊາວ​ໜຸ່ມ​ຂອງ​ທ່ານ​ປະ­ທາ­ນາ­ທິ­ບໍ­ດີ ວ່າ​ຊັ້ນ !.

ຂ່າວທີ່ກ່ຽວຂ້ອງ