ສົ່ງເສີມທຸລະກິດທີ່ມີຄວາມຮັບຜິດຊອບຕໍ່ສັງຄົມ

204 19 ກ.ພ. 2019 ຂ່າວໜ້າ​ໜຶ່ງ

    ວັນ​ທີ 14 ກຸມ­ພາ 2019 ຜູ້­ຕາງ­ໜ້າ​ຈາກ​ອົງ­ການ​ການ​ກຸ­ສົນ Spirit of America ແລະ ສະ­ຖານ­ທູດ​ສະ­ຫະ­ລັດ​ອາ​ເມ​ຣິ​ກາ ປະ­ຈຳ​ລາວ ໄດ້​ມອບ​ອຸ­ປະ­ກອນ​ເປັນ​ຈຳ­ນວນ​ເງິນ​ຫຼາຍ​ກວ່າ 85 ລ້ານ​ກີບ ຫຼື 10.000 ໂດ​ລາ​ສະ­ຫະ­ລັດ ເພື່ອ​ສົ່ງ­ເສີມ Laos Buffalo Dairy (LBD) ຢູ່​ທີ່​ນະ­ຄອນ­ຫຼວງ​ພະ​ບາງ.

    The LBD ເປັນ​ທຸ­ລະ​ກິດ​ຮ່ວມ​ຂອງ​ສະ­ຫະ­ລັດ​ອາ​ເມ​ຣິ​ກາ​ຢູ່​ທີ່​ຫຼວງ​ພະ​ບາງ ໂດຍ​ການ​ເຊົ່າ​ສັດ­ລ້ຽງ ເຊັ່ນ: ຄວາຍ​ຈາກ​ຊາວ​ກະ­ສິ­ກອນ ເພື່ອ​ແລກ­ປ່ຽນ​ກັບ​ນ້ຳ​ນົມ​ຄວາຍ ຫຼັງ​ຈາກ​ນັ້ນ ນ້ຳ​ນົມ​ຄວາຍ​ຈະ​ໄດ້​ຖືກ​ນຳ­ໄປ​ແປ​ຮູບ​ເປັນ​ຫຼາກ​ຫຼາຍ​ຜະ​ລິ​ຕະ​ພັນ ເຊັ່ນ: ເນີຍ​ແຂງ ນົມ​ສົ້ມ ແລະ ກະ​ແລມ ເພື່ອ​ໄປ​ຈຳ­ໜ່າຍ​ໃນ​ຕະ­ຫຼາດ​ທ້ອງ­ຖິ່ນ LBD ໄດ້​ສ້າງ​ລະ­ບົບ​ຕ່ອງ​ໂສ້​ການ​ຜະ­ລິດ ເພື່ອ​ສະ­ໜອງ​ຜະ­ລິດ​ຕະ​ພັນ​ໃຫ້​ແກ່​ຮ້ານ​ອາ­ຫານ​ທີ່​ຫຼວງ​ພະ​ບາງ ແລະ ນະ­ຄອນ­ຫຼວງ​ວຽງ​ຈັນ ແລະ ໃນ​ຫວ່າງ​ບໍ່​ດົນ​ມາ​ນີ້ ໄດ້​ມີ​ບັນ­ດາ​ປະ­ເທດ​ໃນ​ອາ­ຊີ ລວມ​ທັງ​ປະ­ເທດ​ຍີ່­ປຸ່ນ​ທີ່​ໄດ້​ສັ່ງ​ຊື້​ຜະ­ລິດ​ຕະ​ພັນ​ດັ່ງ­ກ່າວ.

    ນັບ​ແຕ່​ເປີດ​ທຳ​ການ​ຜະ­ລິດ​ປີ 2016 The LBD ໄດ້​ເພີ່ມ​ການ​ຜະ­ລິດ​ໃນ​ແຕ່​ລະ​ວັນ ເພື່ອ​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ​ໃຫ້​ແກ່​ລູກ​ຄ້າ​ທັງ​ພາຍ​ໃນ ແລະ ຕ່າງ­ປະ­ເທດ​ທີ່​ມີ​ຈຳ­ນວນ​ເພີ່ມ​ຂຶ້ນ ທັງ​ປະ­ກອບ­ສ່ວນ​ອັນ​ສຳ­ຄັນ​ດ້ານ​ສຸ­ຂະ­ພາບ ແລະ ຄວາມ​ເປັນ​ຢູ່​ທີ່​ດີ​ຂອງ​ເສດ­ຖະ­ກິດ​ທ້ອງ­ຖິ່ນ ຊາວ​ກະ­ສິ­ກອນ​ທີ່​ໃຫ້​ເຊົ່າ​ຄວາຍ​ຂອງ​ເຂົາ­ເຈົ້າ​ເປັນ​ໄລ­ຍະ​ເວ­ລາ​ຫຼາຍ​ກວ່າ 6 ເດືອນ​ໄດ້​ມີ​ລາຍ​ໄດ້​ທີ່​ໝັ້ນ­ຄົງ ຄວາຍ​ທີ່­ຢູ່​ໃນ LBD ຍັງ​ໄດ້​ຮັບ​ການ​ສັກ​ຢາ​ວັກ​ແຊງ​ຊ່ວຍ​ໃຫ້​ອັດ­ຕາ​ການ​ຕາຍ​ຂອງ​ລູກ​ສັດ­ລ້ຽງ​ຫຼຸດ​ລົງ ແລະ ສິ່ງ​ທີ່​ສຳ­ຄັນ​ຍັງ​ເປັນ​ການ​ພັດ­ທະ­ນາ​ສຸ­ຂະ­ພາບ​ຂອງ​ສັດ­ລ້ຽງ​ໃນ​ໄລ­ຍະ​ຍາວ.

    ທ່ານ ຣີ​ນາ ບິດ​ເຕີ ທູດ​ອາ​ເມ​ຣິ​ກາ ປະ­ຈຳ​ລາວ ໄດ້​ກ່າວ​ວ່າ: LBD ເປັນ​ຕົວ​ແບບ​ທຸ­ລະ​ກິດ​ທີ່​ດີ​ຈາກ​ອາ​ເມ​ຣິ​ກາ​ໃນ​ການ​ເຮັດ​ໜ້າ­ທີ່​ຢູ່​ຕ່າງ­ປະ­ເທດ ແລະ ສົ່ງ­ເສີມ​ການ​ເປັນ​ແບບ­ຢ່າງ​ທາງ​ດ້ານ​ທຸ­ລະ​ກິດ​ທີ່​ມີ​ຄວາມ​ຮັບ­ຜິດ­ຊອບ​ຕໍ່​ສັງ­ຄົມ ແລະ ທຸ­ລະ​ກິດ​ນີ້​ທຸກ​ຄົນ​ລ້ວນ​ແຕ່​ມີ​ຜົນ​ປະ­ໂຫຍດ ຊາວ​ກະ­ສິ­ກອນ​ໄດ້​ມີ​ລາຍ​ຮັບ​ສັດ­ລ້ຽງ​ໄດ້​ຮັບ​ວັກ​ແຊງ ແລະ ຜູ້​ບໍ­ລິ­ໂພກ​ຄື​ຂ້າ­ພະ­ເຈົ້າ​ເອງ​ກໍ​ໄດ້​ປະ­ໂຫຍດ​ຈາກ​ເນີຍ​ແຂງ ແລະ ກະ​ແລມ.

    ນອກ­ຈາກ​ຜະ­ລິດ​ຕະ​ພັນ​ນົມ​ນີ້​ແລ້ວ ຍັງ​ໄດ້​ຈັດ­ການ​ເຝິກ­ອົບ­ຮົມ​ໃຫ້​ນັກ​ສຶກ​ສາ​ຈາກ​ວິ­ທະ­ຍາ­ໄລ​ກະ­ເສດ​ທາງ​ພາກ​ເໜືອ ໃນ​ການ​ເພີ່ມ​ທັກ​ສະ​ສັດ­ຕະ­ວະ­ແພດ ແລະ ຍັງ​ເຮັດ​ໃຫ້​ຊຸມ​ຊົນ​ໃນ​ລາວ ໄດ້​ຮັບ​ຜົນ​ປະ­ໂຫຍດ​ຈາກ​ຜະ­ລິດ​ຕະ​ພັນ​ນົມ​ທີ່​ອຸ­ດົມ​ດ້ວຍ​ທາດ​ໂປຼ​ຕິນ​ໃນ​ຄາບ​ອາ­ຫານ ຄວາຍ​ຈຳ­ນວນ 100 ໂຕ​ບວກ​ກັບ​ລູກ​ຂອງ​ພວກ​ມັນ​ຢູ່​ທີ່​ໃນ LBD ແຫ່ງ​ນີ້​ໄດ້​ເຮັດ​ໃຫ້​ຜະ­ລິດ​ຕະ​ພັນ​ນົມ​ເພີ່ມ​ຂຶ້ນ ແລະ ສາ­ມາດ​ສ້າງ​ວຽກ​ໃໝ່​ໄດ້​ເກືອບ​ຮອດ 500 ຕຳ­ແໜ່ງ​ງານ​ໃຫ້​ຕະ­ຫຼາດ​ແຮງ​ງານ​ຢູ່​ໃນ​ທ້ອງ­ຖິ່ນ.

ຂ່າວທີ່ກ່ຽວຂ້ອງ