ຂ່າວຫຼ້າສຸດ

ຫຼາຍ​ປະເທດ​ໃນ​ເອີ​ຣົບ​ຍັງ​ບໍ່​ສຳເລັດ​ພັນທະ​ດ້ານ​ການ​ເງິນ​ກັບ NATO

413 19 ກ.ພ. 2019 ຂ່າວຕ່າງປະເທດ
ຫຼາຍ​ປະເທດ​ໃນ​ເອີ​ຣົບ​ຍັງ​ບໍ່​ສຳເລັດ​ພັນທະ​ດ້ານ​ການ​ເງິນ​ກັບ NATO

    ສະ​ຖາ​ບັນ​ຄົ້ນຄວ້າ​ຍຸດ​ທະ​ສາດ​ສາກົນ (IISS) ມີ​ການ​ສະຫຼຸບ​ຜ່ານ​ບົດ​ລາຍ​ງານ​ປະຈຳ​ປີ ພາຍ​ໃຕ້​ຫົວຂໍ້​ວ່າ “ຄວາມ​ກ້ຳ​ເກິ່ງ​ດ້ານ​ການ​ທະຫານ” ແລະ​ ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 15 ກຸມພາ​ທີ່​ຜ່ານ​ມາ ໂດຍ​ລະບຸ​ວ່າ ເອີ​ຣົບ​ຄວນ​ເພີ່ມ​ເຕີມ​ເງິນ​ກວ່າ 100 ຕື້​ໂດ​ລາ​ສະຫະລັດ ໃຫ້​ແກ່​ການ​ໃຊ້​ຈ່າຍ​ດ້ານ​ປ້ອງ​ກັນ​ຊາດ ເພື່ອ​ຮັບປະກັນ​ການ​ສຳເລັດ​ພັນທະ​ດ້ານ​ການ​ເງິນ ໃນ​ການ​ປະກອບສ່ວນ​ໃຫ້​ແກ່​ອົງການ​ສົນທິສັນຍາ​ປ້ອງ​ກັນ​ອັດ​ລັງ​ຕິກ​ເໜືອ  (NATO).

   ຕົວ​ເລກ​ທີ່​ຍົກ​ອອກ​ມາ​ຢູ່​ໃນ​ບົດ​ລາຍ​ງານ​ຂອງ IISS ຊີ້​ໃຫ້​ເຫັນ​ວ່າ 27 ປະເທດ​ໃນ​ເອີ​ຣົບ ທີ່​ເປັນ​ສະມາຊິກ​ຂອງ NATO ບໍ່​ເຮັດ​ສຳເລັດ​ພັນທະ​ດ້ານ​ການ​ເງິນ​ຕໍ່ NATO ໃນ​ປີ 2018 ນັ້ນ​ກໍ​ໝາຍ​ຄວາມ​ວ່າ​ໃຊ້ 2% ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ໃຫ້​ແກ່​ງົບປະມານ​ດ້ານ​ປ້ອງ​ກັນ​ຊາດ ຊຶ່ງ​ຕາມ​ນັ້ນແລ້ວ​ແມ່ນ​ຍັງ​ຂາດ​ຢູ່​ປະມານ 102 ຕື້​ໂດ​ລາ​ສະຫະລັດ.

    IISS ໃຫ້ການ​ຄິດໄລ່​ວ່າ ບັນດາ​ປະເທດ​ດັ່ງກ່າວ “ຕ້ອງ​ໄດ້​ເພີ່ມ​ຄ່າ​ໃຊ້​ຈ່າຍ​ດ້ານ​ປ້ອງ​ກັນ​ຊາດ​ຕື່ມ 38%" ຈຶ່ງ​ຈະ​ສາມາດ​ສຳເລັດ​ຄາດໝາຍ​ດັ່ງກ່າວ. IISS ຄິດໄລ່​ຄື​ດັ່ງກ່າວ ໂດຍ​ອີງໃສ່​ການ​ໃຊ້​ຈ່າຍ​ຕົວ​ຈິງ​ດ້ານ​ປ້ອງ​ກັນ​ຊາດ ຂອງ​ບັນດາ​ປະເທດ​ເອີ​ຣົບ ພາຍ​ໃນ​ປີ 2018.

    ໃນ​ນັ້ນ ຍອດ​ການ​ໃຊ້​ຈ່າຍ​ດ້ານ​ປ້ອງ​ກັນ​ຊາດ​ຂອງ 27 ປະເທດ​ໃນ​ເອີ​ຣົບ ໃນ​ປີ 2018 ຢູ່​ທີ່  250 ຕື້​ໂດ​ລາ​ສະຫະລັດ ໃນ​ຂະນະ​ທີ່ ສ ອາ​ເມ​ຣິ​ກາ ຍັງ​ຄົງ​ເປັນ​ປະເທດ​ສະມາຊິກ NATO ທີ່​ໃຊ້​ຈ່າຍ​ໃຫ້​ແກ່​ວຽກ​ງານ​ປ້ອງ​ກັນ​ຊາດ​ຫຼາຍ​ທີ່​ສຸດ ທີ່​ເກືອບ 650 ຕື້​ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ