ຂ່າວຫຼ້າສຸດ

ການ​ປຶກສາ​ຫາລື​ລະດັບ​ສູງ​ກ່ຽວ​ກັບ​ເສດຖະກິດ​ການ​ຄ້າ​ຈີນ-ສ ອາ​ເມ​ຣິ​ກາ​ຮອບ​ທີ 6 ສິ້ນ​ສຸດ​ລົງ

426 19 ກ.ພ. 2019 ຂ່າວຕ່າງປະເທດ
ການ​ປຶກສາ​ຫາລື​ລະດັບ​ສູງ​ກ່ຽວ​ກັບ​ເສດຖະກິດ​ການ​ຄ້າ​ຈີນ-ສ ອາ​ເມ​ຣິ​ກາ​ຮອບ​ທີ 6 ສິ້ນ​ສຸດ​ລົງ

    ທ່ານ​ລິວ​ເຮີ້ ກຳມະການ​ກົມ​ການເມືອງ​ສູນ​ກາງ​ພັກ​ກອມ​ມູ​ນິດ​ຈີນ ຮອງ​ນາຍົກລັດຖະມົນຕີ​ຈີນ ຫົວໜ້າ​ຄະນະ​ຝ່າຍ​ຈີນ ຢູ່​ໃນ​ການ​ສົນທະນາ​ເສດຖະກິດ​ຮອບດ້ານ​ຈີນ-ສ ອາ​ເມ​ຣິ​ກາ ແລະ ​ທ່ານ​ໂຣ​ເບີດ ໄລ​ທີ​ເຊີ ຜູ້​ແທນ​ການ​ຄ້າ ສ ອາ​ເມ​ຣິ​ກາ ແລະ​ທ່ານ​ສະຕີ​ເວັນ ມະນູ​ຊິນ  ລັດຖະມົນຕີ​ກະຊວງ​ການ​ເງິນ ​ສ ອາ​ເມ​ຣິ​ກາ ໄດ້​ດຳເນີນ​ການ​ປຶກສາ​ຫາລື​ລະດັບ​ສູງ ກ່ຽວ​ກັບ​ເສດຖະກິດ-ການ​ຄ້າ ລະຫວ່າງ​ຈີນ ກັບ ສ ອາ​ເມ​ຣິ​ກາ ຮອບ​ທີ 6  ຢູ່​ນະຄອນຫຼວງ​ປັກ​ກິ່ງ ແຕ່​ວັນ​ທີ 14-15 ກຸມພາ​ນີ້.

    ໃນ​ການ​ສົນທະນາ​ດັ່ງກ່າວ ສອງ​ຝ່າຍ​ໄດ້​ຕັ້ງ​​ໜ້​າຜັນ​ຂະຫຍາຍ​ຄວາມ​ຮັບ​ຮູ້​ທີ່​ເປັນ​ເອກະ​ພາບ​ກັນ ຂອງ​ປະມຸກ​ລັດ​ສອງ​ປະເທດ ທີ່​ໄດ້​ຕົກລົງ​ຮ່ວມ​ກັນ​ໃນ​ການ​ພົບ​ປະ​ຢູ່​ທີ່​ອາກ​ຊັງ​ຕີນ ແລະ​ໄດ້​ລົງ​ເລິກ​ແລກປ່ຽນ​ຄວາມ​ຄິດ​ຄວາມ​ເຫັນ​ກ່ຽວ​ກັບ​ບັນຫາ​ທີ່​ສົນໃຈ​ຮ່ວມ​ກັນ ແລະ​ບັນຫາ​ທີ່​ຝ່າຍ​ຈີນ​ມີ​ຄວາມ​ສົນໃຈ​ເຊັ່ນ ການ​ໂອນ​ເຕັກນິກ ການ​ປົກ​ປ້ອງ​ຊັບ​ສິນ​ທາງ​ປັນຍາ ກຳແພງ​ການ​ຄ້າ​ທີ່​ບໍ່​ແມ່ນ​ພາສີ ຂະແໜງການ​ບໍລິການ ກະສິກຳ ຄວາມ​ດຸ່ນ​ດ່ຽງ​ດ້ານ​ການ​ຄ້າ ກົນ​ໄກ​ປະຕິບັດ​ແລະ​ອື່ນໆ.

    ສອງ​ຝ່າຍ​ໄດ້​ບັນລຸ​ຄວາມ​ເປັນ​ເອກະ​ພາບ​ກັນ​ທາງ​ດ້ານ​ຫຼັກການ ກ່ຽວ​ກັບ​ບັນຫາ​ສຳຄັນ ທັງ​ໄດ້​ປຶກສາ​ຫາລື​ຢ່າງ​ລະອຽດ ກ່ຽວ​ກັບ​ບົດ​ບັນທຶກ​ຄວາມ​ເຂົ້າໃຈ​ວ່າ​ດ້ວຍ​ບັນຫາ​ເສດຖະກິດ-ການ​ຄ້າ ລະຫວ່າງ​ສອງ​ຝ່າຍ ແລະ​ທັງ​ສອງ​ຝ່າຍ​ຢືນຢັນ​ວ່າ ຈະ​ເລັ່ງ​ລັດ​ປະຕິບັດ​ໜ້າທີ່​ວຽກ​ງານ​ຕາມ​ເວລາ​ກຳນົດ​ຂອງ​ການ​ປຶກສາ​ຫາລື ຊຶ່ງ​ປະມຸກ​ລັດ​ສອງ​ປະເທດ​ໄດ້​ກຳນົດ​ໄວ້ ເພື່ອ​ພະຍາຍາມ​ບັນລຸ​ຄວາມ​ເປັນ​ເອກະ​ພາບ​ກັນ.

    ສອງ​ຝ່າຍ​ໄດ້​ຕົກລົງ​ຈະ​ສືບຕໍ່​ດຳເນີນ​ການ​ປຶກສາ​ຫາລື ຢູ່​ນະຄອນຫຼວງ​ວໍ​ຊິງ​ຕັນ ຂອງ ສ ອາ​ເມ​ຣິ​ກາ ໃນ​ອາທິດ​ໜ້າ.

 

ຂ່າວທີ່ກ່ຽວຂ້ອງ