ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 20/02/2019

346 20 ກ.ພ. 2019 ຫົວຂໍ້ຂ່າວອື່ນໆ

    ມື້­ນີ້ ຂໍ​ເລີ່ມ​ຈາກ​ຂ່າວ​ແມ່­ເຮືອນ​ອິນ​ເດຍ ໃຊ້​ມີດ­ຕັດ​ອະ​ໄວ​ຍະ​ວະ​ເພດ​ຂອງ​ຊາຍ​ໜຸ່ມ​ນັກ­ເລງ ແລະ ປິດ​ທ້າຍ​ຂ່າວ​ກ່ຽວ​ກັບ​ຣີ​ສອດ​ໃຫຍ່​ໃນ​ມະ­ນີ​ລາ ຟີ​ລິບ​ປິນ ຍົກ­ເລີກ​ແຜນ​ປ່ອຍ​ບາ​ລູນ ຕ້ອນ­ຮັບ​ປີ​ໃໝ່ 2019.

    ທີ່ ອິນ​ເດຍ: ມີ​ຂ່າວ​ເມື່ອ​ຟັງ​ແລ້ວ​ອົກ​ສັ່ນ​ຂວັນ​ຫາຍ (ສຳ­ລັບ​ຜູ້​ຊາຍ) ເລື່ອງ​ແມ່­ຍິງ​ອິນ​ເດຍ​ອາ­ຍຸ 47 ປີ ທີ່​ນະ­ຄອນ​ມູມ​ບາຍ ໄດ້​ກໍ່​ເຫດ​ຕັດ​ອະ​ໄວ​ຍະ​ວະ​ເພດ​ຂອງ​ຊາຍ​ນັກ­ເລງ​ອາ­ຍຸ 27 ປີ ຄົນ​ໜຶ່ງ​ທີ່​ພະ­ຍາ­ຍາມ​ຕື້ ແລະ ລວນ​ລານ​ນາງ​ແບບ​ໜ້າ​ດື້ໆ ທັງໆ​ທີ່​ຮູ້​ວ່າ ນາງ​ມີ​ລູກ​ມີ​ຜົວ​ແລ້ວ ສຸດ​ທ້າຍ​ນາງ​ກໍ​ທົນ​ບໍ່​ໄຫວ ເລີຍ​ໄດ້​ຊັກ​ຊວນ​ອວນ​ເອົາ​ຊາຍ​ໜຸ່ມ​ອີກ 2 ຄົນ​ມາ​ຮ່ວມ​ມື ໂດຍ​ໄດ້​ຍົວະ​ຊາຍ​ໜຸ່ມ​ນັກ­ເລງ​ເຂົ້າ​ໄປ​ເຂດ​ລັບ​ຕາ ແລ້ວ​ປຸກ​ປ້ຳ​ປາດ​ອະ​ໄວ​ຍະ​ເພດ​ຜູ້­ກ່ຽວ​ຈົນ​ສຳ­ເລັດ ແຕ່​ພໍ​ເຫັນ​ສະ­ພາບ​ເຫຍື່ອ​ມີ​ເລືອກ​ຕົກ​ຢາງ​ອອກ​ກໍ​ເລີຍ​ໃຈ​ອ່ອນ ຈຶ່ງ​ໄດ້​ຫອບ​ຜູ້­ກ່ຽວ​ໄປ​ໂຮງ­ພະ­ຍາ­ບານ​ດ່ວນ ຂ່າວ​ບອກ​ວ່າ ຍິງ​ອາ­ຍຸ 47 ປີ​ຄົນ​ນີ້ ແລະ ຜູ້​ຮ່ວມ​ມື​ອີກ​ສອງ​ຄົນ​ຖືກ​ເຈົ້າ​ໜ້າ­ທີ່​ຈັບ​ກຸມ​ມາ​ດຳ­ເນີນ​ຄະ­ດີ ຖານ​ມີ​ຄວາມ​ຜິດ​ທຳ­ຮ້າຍ​ຮ່າງ­ກາຍ ນາງ​ຜູ້​ກໍ່​ເຫດ​ໄດ້​ສາ­ລະ­ພາບ​ຜິດ​ວ່າ ຍ້ອນ​ທົນ​ບໍ່​ໄຫວ ເພາະ​ຊາຍ​ໜຸ່ມ​ນັກ­ເລງ​ຄົນ​ນີ້​ໜ້າ­ດ້ານ ຕິດ­ຕາມ​ນາງ​ທຸກ​ບາດ­ຍ່າງ ທັງ​ບອກ​ຮັກ ທັງ​ຂູ່ ທັງ​ຈອງ­ຫອງ​ບອກ​ຜູ້​ເປັນ​ຜົວ​ຂອງ​ນາງ​ແບບ​ໂກ້ໆ​ວ່າ ເຂົາ​ຮັກ ແລະ ຢາກ​ໄດ້​ນາງ​ເປັນ​ຄູ່​ຄອງ ເລື່ອງ​ນີ້​ກາຍ­ເປັນ​ຂ່າວ​ດັງ ແຕ່​ວັນ​ທີ 28 ເດືອນ​ທັນ­ວາ ປີ 2018 ພຸ້ນ (ໜັງ­ສື­ພິມ The Nation) ໂດຍ​ບໍ່​ທັນ​ມີ​ລາຍ​ລະ­ອຽດ​ກ່ຽວ​ກັບ​ການ​ຕັດ­ສິນ ແຕ່​ມັນ​ກໍ​ເປັນ​ອຸ­ທາ­ຫອນ​ເຕືອນ​ຜູ້​ຊາຍ​ທີ່​ບໍ່​ຮູ້ “ຂອງ​ເພິ່ນ​ຂອງ​ໂຕ” ຍ້ອນ​ພະ­ຍາດ​ຕັນ­ຫາ​ໜ້າ​ມືດ ແລະ ນິ­ໄສ “ມື​ໄວ​ໃຈ​ກ້າ​ໜ້າ­ດ້ານ !”.

    ທີ່ ຟີ​ລິບ​ປິນ: ມີ “ກິ່ນ​ຫຼົງ​ຄວັນ​ເຫຼືອ​ຈາກ​ແຜນ­ການ ສົ່ງ​ທ້າຍ​ປີ​ເກົ່າ 2018 ຕ້ອນ­ຮັບ​ປີ​ໃໝ່ 2019 ທີ່ ຣີ​ສອດ ໂອ​ກາ​ດະ ມະ­ນີ​ລາ” ທີ່​ລື​ຊື່ ຄື​ໃນ​ເບື້ອງ​ຕົ້ນ​ທາງ ຣີ​ສອດ ມີ​ແຜນ​ຈະ​ປ່ອຍ​ລູກ​ໂປ່ງ ຫຼື ບາ​ລູນ ຂະ­ໜາດ​ໃຫຍ່ ຈຳ­ນວນ 130.000 ໜ່ວຍ ໃນ​ຄ່ຳ​ຄືນ​ວັນ​ທີ 31/12/2018 ພາຍ­ຫຼັງ​ການ​ນັບ​ຖອຍ­ຫຼັງ (ຄາວ​ດາວ​ສິ້ນ​ສຸດ​ລົງ) ແຜນ­ການ​ທີ່​ວ່າ​ນີ້ ມີ​ເປົ້າ​ໝາຍ​ໂຄ­ສະ­ນາ​ຄວາມ​ຍິ່ງ​ໃຫຍ່​ຂອງ​ຣີ​ສອດ ແຕ່​ເປົ້າ​ໝາຍ​ຕົ້ນ­ຕໍ​ແມ່ນ​ເພື່ອ​ໃຫ້​ມີ​ກິ​ເນັດ (ປຶ້ມ​ບັນ­ທຶກ​ເຫດ­ການ​ຍິ່ງ​ໃຫຍ່​ທີ່​ທຳ­ລາຍ​ສະ­ຖິ­ຕິ​ໂລກ) ບັນ­ທຶກ​ໄວ້​ວ່າ ເປັນ​ການ​ປ່ອຍ​ບາ​ລູນ​ຈຳ­ນວນ​ຫຼາຍ​ເປັນ​ອັນ​ດັບ​ທີ​ໜຶ່ງ​ຂອງ​ໂລກ (ເທົ່າ​ທີ່​ເຄີຍ​ມີ​ມາ) ແຕ່​ໃນ​ທີ່​ສຸດ ຂ່າວ​ບອກ​ວ່າ ແຜນ​ພິ​ຊິດ​ປຶ້ມ​ກິ​ເນັດ​ກໍ​ລົ້ມ​ປ່າງ​ງ່າງ ຍ້ອນ​ບັນ­ດາ​ນັກ​ອະ­ນຸ​ຮັກ​ສະ­ພາບ​ແວດ​ລ້ອມ​ອອກ​ມາ​ຄັດ­ຄ້ານ ບວກ​ກັບ​ຄຳ­ເຕືອນ​ຈາກ​ເບື້ອງ​ລັດ­ຖະ­ບານ​ວ່າ ການ​ປ່ອຍ​ບາ​ລູນ​ໂຄມ­ໄຟ​ຈຳ­ນວນ​ໜຶ່ງ​ແສນ​ສາມ​ໝື່ນ​ໜ່ວຍ​ນັ້ນ ຈະ​ຜະ­ລິດ​ໝອກ​ຄວັນ​ປົກ​ຄຸມ ທົ່ວ​ນະ­ຄອນ­ຫຼວງ​ມະ­ນີ​ລາ ສ້າງ​ມົນ​ລະ​ພິດ​ທຳ­ລາຍ​ສຸ­ຂະ­ພາບ​ຂອງ​ຊາວ​ເມືອງ ຍ້ອນ​ທົນ​ຕໍ່​ແຮງ​ຄັດ­ຄ້ານ​ບໍ່​ໄຫວ ທາງ​ຄະ­ນະ​ຮັບ­ຜິດ­ຊອບ ຣີ​ສອດ ກໍ​ເລີຍ​ຖອດ​ຄືນ​ຄວາມ​ຍາກ​ເດັ່ນ​ດັງ​ລະ­ດັບ​ໂລກ ຢູ່​ບ້ານ​ເຮົາ ທາງ​ການ​ໄດ້​ອອກ​ຄຳ​ສັ່ງ​ເປັນ​ປະ­ຈຳ​ບໍ່​ໃຫ້​ຈູດ​ກະ­ໂພກ ຍິງ​ບັ້ງ­ໄຟ­ດອກ​ໃນ​ໄລ­ຍະ​ປີ​ໃໝ່ ບໍ່​ວ່າ​ຈະ​ເປັນ​ປີ​ໃໝ່​ສາ­ກົນ ປີ​ໃໝ່​ລາວ ບຸນ​ກຸດ ບຸນ​ເຕດ ແຕ່​ຜົນ​ຮັບ​ນັ້ນ “ເປິ !” ກໍ​ເລີຍ​ກາຍ­ເປັນ​ນົກ​ລຶ້ງ​ຜຽກ​ໄປ​ຕາມໆ​ກັນ ເພາະ​ລະ­ບຽບ​ກົດ­ໝາຍ​ຫ້າມ​ເລື່ອງ​ນີ້​ມັນ​ບໍ່​ສູ້ “ກົດ​ໝູ່” ພາ­ກັນ​ເຮັດ !.

ຂ່າວທີ່ກ່ຽວຂ້ອງ