ລາວ ຄອງຂັນຊ່ວງເຮືອມັງກອນ 12 ສີພາຍນາໆຊາດ ທີ່ ສສ ຫວຽດນາມ

206 20 ກ.ພ. 2019 ວົງຈອນກີລາ
ລາວ ຄອງຂັນຊ່ວງເຮືອມັງກອນ 12 ສີພາຍນາໆຊາດ ທີ່ ສສ ຫວຽດນາມ

    ທີມ​ນັກ­ກີ­ລາ​ສີ​ພາຍ­ເຮືອ​ຊ່ວງ ເທບ​ພອນ​ໄຊ ຈາກ​ແຂວງ​ສະ­ຫວັນ​ນະ​ເຂດ ຕາງ­ໜ້າ ສປປ ລາວ ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ ສາ­ມາດ​ແຊງ​ເອົາ​ຊະ­ນະ ເຮືອ​ຈາກ​ຫວຽດ­ນາມ ເຈົ້າ­ພາບ ເຖິງ 3 ລຳ ເຂົ້າ​ເສັ້ນ​ໄຊ​ເປັນ​ອັນ​ດັບ​ທີ 1 ພ້ອມ​ທັງ​ຄອງ​ຂັນ​ຊະ­ນະ​ເລີດ ໃນ​ການ​ແຂ່ງ­ຂັນ​ຊ່ວງ​ເຮືອ​ມັງ­ກອນ ປະ­ເພດ 12 ສີ­ພາຍ ນາໆຊາດ ທີ່​ນະ­ຄອນ­ຫຼວງ​ຮ່າ​ໂນ້ຍ ສສ ຫວຽດ­ນາມ ເປັນ​ເຈົ້າ­ພາບ ພ້ອມ​ເງິນ​ລາ­ງວັນ 100 ລ້ານ​ດົງ (ປະ­ມານ 37 ລ້ານ​ກີບ).

    ທ່ານ ຖາ­ວອນ ອິນ​ສີ​ຊຽງ​ໃໝ່ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ສະ­ຫວັນ​ນະ​ເຂດ ໃຫ້​ສຳ­ພາດ​ວ່າ: ໃນ​ລະ­ຫວ່າງ​ວັນ​ທີ 14-17 ກຸມ­ພາ 2019 ຜ່ານ​ມາ ທີ່​ນະ­ຄອນ­ຫຼວງ​ຮ່າ​ໂນ້ຍ ສສ ຫວຽດ­ນາມ ໄດ້​ເປັນ​ເຈົ້າ­ພາບ ຈັດ­ການ​ແຂ່ງ­ຂັນ​ຊ່ວງ​ເຮືອ​ມັງ­ກອນ ປະ­ເພດ 12 ສີ­ພາຍ ນາໆຊາດ ໂດຍ​ມີ 5 ປະ­ເທດ ເຂົ້າ​ຮ່ວມ​ປະ­ກອບ​ມີ: ສປປ ລາວ ມາ​ເລ​ເຊຍ ສິງ­ກະ­ໂປ ຮົງ​ກົງ ແລະ ສສ ຫວຽດ­ນາມ ເຈົ້າ­ພາບ ໃນ​ນັ້ນ ເຮືອ​ຈາກ ສສ ຫວຽດ­ນາມ ທີ່​ມາ​ຈາກ​ນະ­ຄອນ­ຫຼວງ​ຮ່າ​ໂນ້ຍ ນະ­ຄອນ​ໂຮ່​ຈິ​ມິງ ແລະ ຈາກ​ແຂວງ​ອື່ນໆ​ໄດ້​ສົ່ງ​ເຂົ້າ​ຮ່ວມ 8 ທີມ ລວມ​ທັງ​ໝົດ 12 ພາກ­ສ່ວນ ແບ່ງ​ອອກ​ເປັນ​ສາຍ ແຂ່ງ­ຂັນ​ໄລ­ຍະ 600 ແມັດ ແຕ່​ລະ​ສາຍ​ຄັດ​ເລືອກ​ເອົາ​ເຮືອ​ທີ່​ສາ­ມາດ​ຊະ­ນະ​ໄດ້​ຫຼາຍ​ທີ່​ສຸດ ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ.

    ສຳ­ລັບ ສປປ ລາວ ໄດ້​ສົ່ງ​ນັກ­ກີ­ລາ​ສີ​ພາຍ­ເຮືອ​ເທບ​ພອນ​ໄຊ ຈາກ​ແຂວງ​ສະ­ຫວັນ​ນະ​ເຂດ ຕາງ­ໜ້າ ສປປ ລາວ ເຂົ້າ​ຮ່ວມ​ແຂ່ງ­ຂັນ ຜ່ານ​ການ​ແຂ່ງ­ຂັນ ນັກ­ກີ­ລາ​ສີ​ພາຍ­ເຮືອ​ຊ່ວງ​ລາວ ສາ­ມາດ​ເອົາ​ຊະ­ນະ​ລວດ ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຊີງ​ຊະ­ນະ​ເລີດ ມີ​ເຮືອ 4 ລຳ ໃນ​ນັ້ນ ພົບ​ກັບ​ເຈົ້າ­ພາບ​ທັງ​ໝົດ ສ່ວນ​ມາ​ເລ​ເຊຍ ສິງ­ກະ­ໂປ ແລະ ຮົງ​ກົງ ຕົກ​ຮອບ​ໝົດ ຜ່ານ​ການ​ແຂ່ງ­ຂັນ​ຮອບ​ຊີງ​ຊະ­ນະ​ເລີດ ນັກ­ກີ­ລາ​ລາວ ສາ­ມາດ​ພາຍ­ເຮືອ​ແຂ່ງ­ຂັນ​ກັບ​ເຈົ້າ­ພາບ​ໄດ້​ຢ່າງ​ສູ​ສີ ແລະ ເຂົ້າ​ເສັ້ນ​ໄຊ​ເປັນ​ອັນ​ດັບ​ທີ 1 ແບບ​ຫວຸດ​ຫວິດ ໄດ້​ຮັບ​ຫຼຽນ​ຄຳ​ມາ​ຄ້ອງ​ຄໍ​ຢ່າງ​ສົມ​ກຽດ.

ຂ່າວທີ່ກ່ຽວຂ້ອງ