ຮຽນໜັງສືແມ່ນຮັກຊາດ

970 20 ກ.ພ. 2019 ນານາສາລະ

    ຄຳ​ວ່າ​ຮຽນ​ໜັງ­ສື​ແມ່ນ​ຮັກ​ຊາດ ຫຼາຍ​ຄົນ​ຄົງ​ເຂົ້າ­ໃຈ​ໂລດ​ວ່າ ການ​ສ້າງ​ຊີ­ວິດ​ໃຫ້​ກ້າວ­ໜ້າ ແລະ ສ້າງ​ຊາດ​ໃຫ້​ຈະ­ເລີນ​ກ້າວ­ໜ້າ ໝັ້ນ­ຄົງ​ນັ້ນ ຍ່ອມ​ຂຶ້ນ​ກັບ​ປະ­ຊາ­ຊົນ​ໃນ​ຊາດ​ໄດ້​ຮັບ​ການ​ສຶກ​ສາ ເຊິ່ງ​ຄຳ​ວ່າ​ໄດ້​ຮັບ​ການ​ສຶກ​ສາ​ນັ້ນ​ຕ້ອງ​ແມ່ນ​ຄົນ​ສ່ວນ​ໃຫຍ່ ຫຼື ທຸກ​ຄົນ​ໃນ​ສັງ­ຄົມ​ໄດ້​ຮັບ​ໂອ­ກາດ​ເຂົ້າ​ເຖິງ ການ​ສຶກ​ສາ​ພັດ­ທະ­ນາ​ຕົນ​ໃຫ້​ກາຍ­ເປັນ​ຜູ້​ມີ​ຄວາມ​ຮູ້​ຄື ຮູ້­ຈັກ​ຄິດ​ພັດ­ທະ­ນາ​ຊັບ​ສົມ­ບັດ​ທີ່​ຕົນ​ມີ​ໃຫ້​ໝັ້ນ­ຄົງ ຫຼື ຮູ້­ຈັກ​ສ້າງ​ຕົນ​ເອງ​ຈາກ​ຄຳ​ວ່າ​ຕົ້ນ​ທຶນ​ມະ­ນຸດ ຄື​ຄວາມ​ຮູ້​ນັ້ນ​ໃຫ້​ມີ​ຊີ­ວິດ​ກ້າວ­ໜ້າ ແລະ ໝັ້ນ­ຄົງ​ໃນ​ສັງ­ຄົມ.

    ຄຳ​ວ່າ​ຮັກ​ຊາດ​ນັ້ນ​ໄດ້​ມີ​ຄູ­ບາ​ອາ­ຈານ ຫຼື ປັນ­ຍາ​ຊົນ​ຫຼາຍ​ທ່ານ​ໄດ້​ແນະ­ນຳ​ວ່າ​ຮັກ​ຊາດ ຕ້ອງ​ຮັກ­ຫອມ​ປະ­ເພ­ນີ​ວັດ­ທະ­ນະ­ທຳ​ຂອງ​ຕົນ ຮັກ​ຊາດ​ຕ້ອງ​ມີ​ສະ­ຕິ­ຊາດ ຈຶ່ງ​ຕ້ອງ­ການ​ໃຫ້​ສັງ­ຄົມ​ໄດ້​ຮຽນ​ຮູ້​ແທ້​ຈິງ​ວ່າ ຄຳ​ວ່າ​ຊາດ​ປະ­ກອບ​ດ້ວຍ​ຫຍັງ​ແນ່ ? ຮີດ­ຄອງ​ປະ­ເພ­ນີ ສິ­ລະ​ປະ ແລະ ວັດ­ທະ­ນະ­ທຳ ກໍ​ແມ່ນ​ສ່ວນ​ປະ­ກອບ​ສຳ­ຄັນ​ຂອງ​ພື້ນ­ຖານ​ຄວາມ​ເປັນ​ຊາດ​ໜຶ່ງ ພື້ນ​ຄວາມ​ຮູ້​ຕຳ­ລາ​ເອ­ກະ­ສານ ທີ່​ບັນ­ທຶກ​ພູມ​ປັນ­ຍາ​ຂອງ​ບັນ­ພະ­ບຸ­ລຸດ​ກໍ​ແມ່ນ​ມໍ­ລະ­ດົກ​ສຳ­ຄັນ​ຂອງ​ຊາດ ສິ­ລະ​ປະ​ລວ­ດລາຍ​ໃນ​ອາ­ຄານ ຫຼື ວັດ­ຖຸ​ກໍ່­ສ້າງ​ກໍ​ແມ່ນ​ມໍ­ລະ­ດົກ​ຂອງ​ຊາດ ຖ້າ​ເຮົາ​ຂາດ​ການ​ອະ­ນຸ​ຮັກ ສົ່ງ­ເສີມ ຫຼື ຂາດ​ການ​ສຶກ​ສາ ອາດ​ຖືກ​ເອີ້ນ​ວ່າ ເປັນ​ຄົນ​ຫຼົງ​ຕົວ​ເອງ ຫຼື ບາງ​ກໍ­ລະ­ນີ​ມີ​ຜູ້​ຮູ້​ເທົ່າ​ບໍ່​ເຖິງ​ການ​ພາ­ກັນ​ທຸບ​ມ້າງ​ຖິ້ມ ກໍ​ສ່ຳ​ກັບ​ວ່າ​ເປັນ​ຜູ້​ທຳ­ລາຍ​ສິ­ລະ​ປະ​ຂອງ​ຊາດ ສ່ວນ​ຕົວ​ຜູ້​ຂຽນ​ຈຶ່ງ​ເຫັນ​ວ່າ​ຊາດ​ໃດ​ຊາດ​ໜຶ່ງ ທີ່​ຈະ­ເລີນ​ນັ້ນ​ບໍ່​ໄດ້​ໝາຍ​ເອົາ​ເສດ­ຖະ­ກິດ​ດີ ຫຼື ມີ​ວັດ­ຖຸ​ທັນ​ສະ­ໄໝ ສະ­ໜອງ​ຕອບ​ຄວາມ​ຕ້ອງ­ການ​ຢ່າງ​ດຽວ ແຕ່​ມັນ​ຍັງ​ໝາຍ​ເຖິງ​ເຮົາ​ໄດ້​ຮັກ­ສາ​ມູນ​ມໍ­ລະ­ດົກ​ຂອງ​ຊາດ​ໄດ້​ພຽງ​ໃດ.

    ຮຽນ​ໜັງ­ສື​ແມ່ນ​ຮັກ​ຊາດ ອາດ​ຕ້ອງ­ການ​ຄຳ​ຖາມ​ຕື່ມ​ວ່າ ເຮົາ​ຈະ​ຜະ­ລິດ​ຄົນ​ຮັບ​ໃຊ້​ການ​ຕະ­ຫຼາດ​ຢ່າງ​ດຽວ ຫຼື ຕ້ອງ​ຜະ­ລິດ​ຄົນ​ຮັບ​ໃຊ້​ວັດ­ທະ­ນະ­ທຳ​ຂອງ​ຊາດ​ໄປ​ພ້ອມ​ກັນ ຄວາມ​ຈິງ​ຖ້າ​ຈະ​ເວົ້າ​ແບບ​ລວມ​ໃນ​ເຂດ​ອາ­ຊີ ບາດ​ຢາກ​ເບິ່ງ​ວັດ­ຖຸ ຫຼື ສິ­ລະ​ປະ​ຂອງ​ບັນ­ພະ­ບຸ­ລຸດ​ແມ່ນ​ຕ້ອງ​ໄດ້​ໄປ​ຢູ່​ຫໍ​ພິ​ພິ​ທະ​ພັນ​ຂອງ​ຊາດ ໃນ​ຢູ່​ໂຣບ​ທີ່​ເວົ້າ​ມາ​ອາດ​ບໍ່​ແມ່ນ​ທັງ​ໝົດ ແຕ່​ນັ້ນ​ກໍ​ຄື​ບົດ­ຮຽນ​ອັນ​ລ້ຳ​ຄ່າ ພວກ​ເຮົາ​ຢ່າ​ລືມ​ວ່າ ເພື່ອ​ປະ­ຕິ­ບັດ​ໃຫ້​ໄປ​ແລວ​ດຽວ​ກັນ ທາງ​ການ­ຈັດ­ຕັ້ງ ກໍ​ຮຽກ­ຮ້ອງ​ມີ​ສະ­ຕິ­ຊາດ ສຳ­ນັກ­ງານ ອົງ­ການ​ທັງ​ສູນ​ກາງ ແລະ ທ້ອງ­ຖິ່ນ​ທີ່​ກ່ຽວ​ກັບ​ສິ­ລະ​ປະ​ວັດ­ທະ­ນະ­ທຳ ແລະ ມູນ​ມໍ­ລະ­ດົກ​ຊັບ​ສິນ​ທາງ​ປັນ­ຍາ ຄວນ​ມີ​ສະ­ຕິ​ສູງ​ໃນ​ການ​ອະ­ນຸ​ຮັກ-ຮັກ­ສາ ຕຶກ​ອາ­ຄານ​ທັງ​ຂອງ​ວັດ ແລະ ບ້ານ ເພື່ອ​ໃຫ້​ອະ­ນຸ­ຊົນ​ສືບ​ທອດ​ສຶກ​ສາ​ຕໍ່​ຍອດ​ບໍ່​ໃຫ້​ຂາດ​ເປັນ​ທ່ອນ ຫຼື ເຂີນ​ກັນ​ລະ­ຫວ່າງ​ອາ​ດີດ ແລະ ປັດ­ຈຸ­ບັນ​ຈົນ​ຕໍ່​ບໍ່​ຕິດ...

ຂ່າວທີ່ກ່ຽວຂ້ອງ