ຂ່າວຫຼ້າສຸດ

ບັນຫານ້ຳມັນບໍ່ໄດ້ຄຸນນະພາບ ຍັງພົບເຫັນຢູ່ບາງຕົວເມືອງ ແຕ່ມີທ່າອ່ຽງຫຼຸດລົງ

261 20 ກ.ພ. 2019 ຂ່າວໜ້າ​ໜຶ່ງ

    ກົມ​ມາດ­ຕະ­ຖານ ແລະ ວັດ­ແທກ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໄດ້​ກວດ​ພົບ​ເຫັນ​ນ້ຳ­ມັນ​ຢູ່​ຫຼາຍ​ປ້ຳ ໃນ​ທົ່ວ​ປະ­ເທດ​ບໍ່​ໄດ້​ຄຸນ​ນະ​ພາບ ໃນ​ປີ 2018 ຜ່ານ​ມາ ໃນ​ນີ້ ພົບ​ເຫັນ​ຫຼາຍ​ກວ່າ​ໝູ່​ແມ່ນ​ບັນ­ດາ​ປ້ຳ​ທີ່­ຢູ່​ເຂດ​ນອກ​ຕົວ​ເມືອງ ນະ­ຄອນ­ຫຼວງ​ວຽງ​ຈັນ ແລະ ຢູ່​ລຽບ​ເສັ້ນ­ທາງ​ເລກ​ທີ 13 ໃຕ້ ແຕ່​ໂດຍ​ລວມ​ແລ້ວ ມີ​ທ່າ​ອ່ຽງ​ຫຼຸດ​ລົງ ທຽບ­ໃສ່​ປີ 2017 ທີ່​ຜ່ານ​ມາ.

    ອີງ​ຕາມ​ຂໍ້​ມູນ​ຂອງ​ເວັບ​ໄຊ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ທ່ານ ວຽງ​ທອງ ວົງ​ທະ­ວິ​ໄລ ຫົວ­ໜ້າ​ກົມ​ມາດ­ຕະ­ຖານ ແລະ ວັດ­ແທກ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໄດ້​ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ກົມ​ມາດ­ຕະ­ຖານ ແລະ ວັດ­ແທກ ເລີ່ມ​ຕົ້ນ​ກວດ­ກາ​ຄຸນ​ນະ​ພາບ​ຂອງ​ນ້ຳ­ມັນ​ຢູ່​ຕາມ​ປ້ຳ​ຕ່າງໆ​ໃນ​ທົ່ວ​ປະ­ເທດ ນັບ​ແຕ່​ວັນ​ທີ 1 ສິງ­ຫາ 2016 ເປັນ­ຕົ້ນ​ມາ ໂດຍ​ຜ່ານ 2 ຮູບ​ແບບ ຄື: ກວດ­ກາ​ປົກ­ກະ­ຕິ ປີ​ລະ 2 ຄັ້ງ ແລະ ກວດ­ກາ​ຕາມ​ການ​ຮ້ອງ​ຮຽນ​ຂອງ​ຜູ້​ບໍ­ລິ­ໂພກ ກໍ​ຄື ຜູ້​ຊົມ­ໃຊ້​ນ້ຳ­ມັນ​ຜ່ານ​ສາຍ​ດ່ວນ 1513 ຜ່ານ​ການ​ກວດ­ກາ​ເຫັນ​ວ່າ ສະ­ເພາະ​ໃນ​ປີ 2017 ພົບ​ເຫັນ​ນ້ຳ­ມັນ​ແອັດ​ຊັງ ແລະ ກາ​ຊວນ ຢູ່​ຫຼາຍ​ປ້ຳ​ໃນ​ທົ່ວ​ປະ­ເທດ​ບໍ່​ໄດ້​ຄຸນ​ນະ​ພາບ ຍ້ອນ​ມີ​ທາດ​ເຫຼົ້າ​ເຈືອ​ປົນ ກົດ​ໄຂ­ມັນ ແລະ ນ້ຳ­ມັນ​ກ໊າ​ສ​ເຈືອ​ປົນ​ຢູ່ ໂດຍ​ກວດ​ພົບ​ປະ­ມານ 30% ຂອງ​ຈຳ­ນວນ​ປ້ຳ​ທີ່​ລົງ​ກວດ­ກາ​ທັງ​ໝົດ ແຕ່​ມາ​ໃນ​ປີ 2018 ກວດ​ພົບ​ເຫັນ​ນ້ຳ­ມັນ​ຢູ່​ບັນ­ດາ​ປ້ຳ​ເປົ້າ​ໝາຍ ທີ່​ລົງ​ກວດ­ກາ​ບໍ່​ໄດ້​ຄຸນ​ນະ​ພາບ​ຫຼຸດ​ລົງ​ເຫຼືອ 10% ຂອງ​ຈຳ­ນວນ​ເປົ້າ​ໝາຍ​ທີ່​ຖືກ​ກວດ­ກາ​ທັງ​ໝົດ ສ່ວນ​ເຂດ​ທີ່​ພົບ​ເຫັນ​ປ້ຳ­ນ້ຳ­ມັນ​ທີ່​ບໍ່​ໄດ້​ຄຸນ​ນະ​ພາບ​ຫຼາຍ​ກວ່າ​ໝູ່ ແມ່ນ​ຢູ່​ນອກ​ຕົວ​ເມືອງ​ຂອງ​ນະ­ຄອນ­ຫຼວງ​ວຽງ​ຈັນ ແລະ ຕາມ​ເສັ້ນ­ທາງ​ເລກ​ທີ 13 ໃຕ້.

    ສາ­ເຫດ​ທີ່​ເຮັດ​ໃຫ້​ນ້ຳ­ມັນ​ບໍ່​ໄດ້​ຄຸນ​ນະ​ພາບ ໂດຍ​ລວມ​ມີ 2 ສາ­ເຫດ ຄື: ຜູ້​ປະ­ກອບ​ການ​ຈຳ­ນວນ​ໜຶ່ງ ລັກ­ລອບ​ເອົາ​ນ້ຳ­ມັນ​ທີ່​ຕ້ອງ​ຫ້າມ​ມາ​ປະ­ສົມ​ກັບ​ນ້ຳ­ມັນ​ແອດ​ຊັງ ແລະ ກາ​ຊວນ​ເອງ​ເພື່ອ​ປະ­ຢັດ​ຕົ້ນ​ທຶນ ແລະ ອີກ​ສາ­ເຫດ​ໜຶ່ງ ແມ່ນ​ຍ້ອນ​ຜູ້​ປະ­ກອບ​ການ​ຂາຍ​ນ້ຳ­ມັນ​ບໍ່​ຮູ້​ວ່າ​ນ້ຳ­ມັນ​ມີ​ສານ​ເຈືອ​ປົນ ແລະ ບໍ່​ໄດ້​ຄຸນ​ນະ​ພາບ ຍ້ອນ​ຊື້​ນ້ຳ­ມັນ​ຈາກ​ຜູ້​ປະ­ກອບ​ການ​ອື່ນ.

    ສຳ­ລັບ​ບັນ­ດາ​ປ້ຳ​ໃນ​ທົ່ວ​ປະ­ເທດ ທີ່​ໄດ້​ຜ່ານ​ການ​ກວດ­ກາ​ຄຸນ​ນະ​ພາບ​ນ້ຳ­ມັນ​ຮຽບ​ຮ້ອຍ​ແລ້ວ ກົມ​ມາດ­ຕະ­ຖານ ແລະ ວັດ­ແທກ ໄດ້​ອອກ​ສະ​ຕິກ​ເກີ​ໃຫ້ ໂດຍ​ມີ​ທັງ​ໝົດ 3 ສີ ຄື: ສີ­ຂາວ ໝາຍ​ເຖິງ​ປ້ຳ​ທີ່​ກວດ­ກາ​ແລ້ວ ບໍ່​ມີ​ບັນ­ຫາ​ຫຍັງ​ສີ­ຂຽວ ແມ່ນ​ປ້ຳ​ທີ່​ມີ​ບັນ­ຫາ ແລະ ໄດ້​ຮັບ​ການ​ກ່າວ​ເຕືອນ ເພື່ອ​ສຶກ​ສາ​ອົບ­ຮົມ ແລ້ວ​ນຳ​ເອົາ​ນ້ຳ­ມັນ​ໄປ​ປັບ­ປຸງ​ໃໝ່ ໃຫ້​ໄດ້​ຄຸນ​ນະ​ພາບ ແລະ ສີ­ຟ້າ ແມ່ນ​ປ້ຳ​ທີ່​ມີ​ບັນ­ຫາ​ຖືກ​ປັບ​ໃໝ​ມາ ແລະ ຖືກ​ຢຶດ​ເອົາ​ນ້ຳ­ມັນ​ທີ່​ບໍ່​ໄດ້​ມາດ­ຕະ­ຖານ​ທັງ​ໝົດ​ແລ້ວ.

ຂ່າວທີ່ກ່ຽວຂ້ອງ