ຈັດຂະບວນລົດຖີບສົ່ງເສີມການທ່ອງທ່ຽວ ຕິດພັນກັບການອະນຸຮັກປາບຶກ

176 20 ກ.ພ. 2019 ຂ່າວໜ້າ​ໜຶ່ງ
ຈັດຂະບວນລົດຖີບສົ່ງເສີມການທ່ອງທ່ຽວ ຕິດພັນກັບການອະນຸຮັກປາບຶກ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຮ່ວມ​ກັບ​ຫ້ອງ­ການ ຖວ​ທ ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ສີ​ໂຄດ​ຕະ­ບອງ ແລະ ສະ­ຫະ­ພັນ​ກີ­ລາ​ຖີບ​ລົດ ນວ ຈັດ​ຂະ​ບວນ​ລົດ­ຖີບ​ສູ່​ບ້ານ​ອ່າງ​ໃຫຍ່ ເພື່ອ​ເຂົ້າ​ຮ່ວມ​ພິ­ທີ​ປ່ອຍ​ປາ­ບຶກ ປະ­ຈຳ​ປີ 2019 ຢູ່​ທ່າ​ວັດ​ໂພນ​ສະ­ຫວ່າງ ເມືອງ​ສີ​ໂຄດ​ຕະ­ບອງ ເພື່ອ​ສົ່ງ­ເສີມ​ການ­ທ່ອງ­ທ່ຽວ ຕິດ​ພັນ​ກັບ​ການ​ປົກ​ປັກ​ຮັກ­ສາ​ສັດ​ນ້ຳ ໂດຍ​ສະ­ເພາະ ປາ­ບຶກ​ໃຫ້​ມີ​ຄວາມ​ຍືນ​ຍົງ.

    ພິ­ທີ​ດັ່ງ­ກ່າວ ຈັດ​ຂຶ້ນ​ວັນ​ທີ 19 ກຸມ­ພາ 2019 ຢູ່​ອະ­ນຸ­ສອນ​ສະ­ຖານ​ເຈົ້າ­ຟ້າ​ງຸ່ມ ໂດຍ​ມີ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ມີ​ຕາງ­ໜ້າ​ຫ້ອງ­ການ ຖວ​ທ ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ສີ​ໂຄດ​ຕະ­ບອງ ສະ­ຫະ­ພັນ​ກີ­ລາ​ຖີບ​ລົດ ນວ ພ້ອມ​ນັກ­ກີ­ລາ​ຖີບ​ລົດ​ຈາກ​ພາກ­ສ່ວນ​ຕ່າງໆ​ຫຼາຍ​ກວ່າ 60 ຄັນ​ເຂົ້າ​ຮ່ວມ.

    ຂະ​ບວນ​ລົດ​ຄັ້ງ​ນີ້ ໄດ້​ເລີ່ມ​ເຄື່ອນ​ຈາກ​ອະ­ນຸ­ສອນ​ສະ­ຖານ​ເຈົ້າ­ຟ້າ​ງຸ່ມ ໄປ​ຫາ​ບ້ານ​ອ່າງ​ໃຫຍ່ ເມືອງ​ສີ​ໂຄດ​ຕະ­ບອງ ໄລ­ຍະ​ທາງ 23 ກິ­ໂລ­ແມັດ ຈາກ​ນັ້ນ ກໍ​ໄດ້​ເຂົ້າ​ສູ່​ພິ­ທີ​ປ່ອຍ​ປາ­ບຶກ ຢູ່​ວັງ​ສະ­ຫງວນ​ປາ­ບຶກ ໂດຍ​ມີ​ພະ​ເຖ­ລາ­ນຸ­ເຖລະ ເຈົ້າ​ອະ­ທິ­ການ​ວັດ​ໂພນ​ສະ­ຫວ່າງ ບ້ານ​ອ່າງ​ໃຫຍ່ ທ່ານ ບຸນ​ທອງ ຊາ​ພັກ­ດີ ຮອງ​ຫົວ­ໜ້າ​ກົມ​ລ້ຽງ­ສັດ ແລະ ການ​ປະ­ມົງ ທ່ານ​ຫົວ­ໜ້າ​ພະ​ແນກ ຖວ​ທ ນວ ທ່ານ ຄຳ​ແຫງ ດວງ​ສີ​ລິ ຮອງ​ເຈົ້າ­ເມືອງ​ສີ​ໂຄດ​ຕະ­ບອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ພຸດ ຂອດ​ຈັນ​ທຶກ ນາຍ­ບ້ານ​ອ່າງ​ໃຫຍ່ ກ່າວ​ວ່າ: ວັງ​ສະ­ຫງວນ​ບ້ານ​ອ່າງ​ໃຫຍ່ ແລະ ການ​ປົກ​ປັກ​ຮັກ­ສາ​ປາ­ບຶກ ມີ​ຄວາມ​ຍາວ 350 ແມັດ ກວ້າງ 250 ແມັດ ເລິກ​ປະ­ມານ 30-40 ແມັດ ລັກ­ສະ­ນະ​ພິ­ເສດ​ຂອງ​ວັງ ມີ​ໂງ່ນ​ຫີນ ແລະ ດອນ​ຫາດ​ຊາຍ ສະ­ຫຼັບ​ສັບ​ຊ້ອນ​ລຽນ​ກັນ​ໄປ​ຕາມ​ແລວ​ທາງ­ນ້ຳ ປີ 2015 ພະ​ອາ­ຈານ ສວນ​ຈັນ ເພັງ​ຄຳ​ໄສ ເຈົ້າ​ອະ­ທິ­ການ​ວັດ​ບ້ານ​ອ່າງ​ໃຫຍ່ ໄດ້​ເປັນ​ຜູ້​ລິ​ເລີ່ມ​ປ່ອຍ​ປາ­ບຶກ ເພື່ອ​ທົດ​ແທນ​ຄວາມ​ເສຍ​ຫາຍ​ຂອງ​ປາ​ທີ່​ຖືກ​ລ່າ​ຈາກ​ຊາວ​ປະ­ມົງ ຈາກ​ນັ້ນ​ມາ ກໍ​ໄດ້​ມີ​ການ​ຈັດ​ກິດ­ຈະ­ກຳ​ປ່ອຍ​ປາ​ຂຶ້ນ​ມາ​ເລື້ອຍໆ ໃນ​ມື້​ຂຶ້ນ 15 ຄ່ຳ ເດືອນ​ສາມ​ເພັງ​ຂອງ​ທຸກໆ​ປີ ນັບ​ແຕ່​ປີ 2015-2018 ອຳ­ນາດ​ການ​ປົກ­ຄອງ​ເມືອງ ແລະ ບ້ານ​ໄດ້​ຮ່ວມ​ກັນ​ປ່ອຍ​ປາ­ບຶກ​ລົງ​ສູ່​ວັງ​ສະ­ຫງວນ 3.300 ໂຕ ລວມ​ມູນ​ຄ່າ 149.200 ບາດ ຫຼື ປະ­ມານ 40,92 ລ້ານ​ກີບ ສຳ­ລັບ​ປີ 2019 ຄາດ​ຄະ­ເນ​ຈະ​ປ່ອຍ​ໃຫ້​ໄດ້ 800 ກວ່າ​ໂຕ ເພື່ອ​ເຮັດ​ໃຫ້​ວັງ​ສະ­ຫງວນ​ແຫ່ງ​ນີ້ ມີ​ສັດ​ນ້ຳ​ທີ່​ອຸ­ດົມ­ສົມ­ບູນ ໂດຍ​ສະ­ເພາະ ປາ­ບຶກ​ເພີ່ມ​ຂຶ້ນ​ເລື້ອຍໆ ເພື່ອ​ກາຍ­ເປັນ​ສິ່ງ​ດຶງ​ດູດ​ໃຫ້​ນັກ​ທ່ອງ​ທ່ຽວ​ໄດ້​ເຂົ້າ​ມາ​ຢ້ຽມ​ຊົມ.

ຂ່າວທີ່ກ່ຽວຂ້ອງ