ຂ່າວຫຼ້າສຸດ

ການປະຕິບັດຄຳຕັດສິນຂອງສານມີຄວາມຊັກຊ້າ ປະຊາຊົນສະເໜີໃຫ້ຊ່ວຍແກ້ໄຂ

267 20 ກ.ພ. 2019 ຂ່າວໜ້າ​ໜຶ່ງ
ການປະຕິບັດຄຳຕັດສິນຂອງສານມີຄວາມຊັກຊ້າ ປະຊາຊົນສະເໜີໃຫ້ຊ່ວຍແກ້ໄຂ

    ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ VIII ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ໜ່ວຍ​ທີ 1 ນຳ​ໂດຍ​ທ່ານ ບົວ​ເກດ ພົມ­ມະ­ຈັນ ສສຊ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ 1 ນວ ຄະ­ນະ​ກຳ­ມາ​ທິ​ການ​ຍຸ­ຕິ​ທຳ​ຂອງ​ສະ­ພາ​ແຫ່ງ​ຊາດ ສປ ນວ ຊຸດ​ທີ 1 ທ່ານ​ນາງ ວາ­ລີ ເວດ​ສະ​ພົງ ສສຊ ຊຸດ​ທີ VIII ຄະ­ນະ​ກຳ­ມາ​ທິ​ການ​ແຜນ­ການ ການ​ເງິນ ແລະ ການ​ກວດ​ສອບ​ສະ­ພາ​ແຫ່ງ​ຊາດ ທ່ານ ຈັນ­ທອນ ລັດ​ຖະ​ຈັກ ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ ສປ ນວ ຊຸດ​ທີ 1 ປະ­ຈຳ­ເມືອງ​ຈັນ­ທະ​ບູ​ລີ ລົງ​ພົບ​ປະ​ປະ­ຊາ­ຊົນ ວັນ​ທີ 19 ກຸມ­ພາ 2019 ຢູ່​ວັດ​ອົງ​ຕື້ ເພື່ອ​ພົບ​ປະ ແລະ ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສປ ນວ ຊຸດ​ທີ I ແລະ ຮັບ​ຟັງ​ຄຳ​ຄິດ​ເຫັນ ຄຳ​ສະ­ເໜີ​ຂອງ​ປະ­ຊາ­ຊົນ​ກ່ຽວ​ກັບ​ບັນ­ຫາ​ຂັດ­ຂ້ອງ​ໝອງ​ໃຈ ເພື່ອ​ຈະ​ສະ­ເໜີ​ຕໍ່​ອຳ­ນາດ​ການ​ປົກ­ຄອງ ແລະ ພາກ­ສ່ວນ​ກ່ຽວ­ຂ້ອງ​ປັບ­ປຸງ​ແກ້​ໄຂ ໂດຍ​ມີ​ທ່ານ ຄຳ​ພິ­ທູນ ຈັນ­ທະ​ກູນ ຮອງ​ເຈົ້າ­ເມືອງ​ຈັນ­ທະ​ບູ​ລີ ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ​ເຂົ້າ​ຮ່ວມ.

    ທ່ານ ບົວ​ເກດ ພົມ­ມະ­ຈັນ ໄດ້​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ເຊິ່ງ​ຈັດ​ຂຶ້ນ​ວັນ​ທີ 20 ພະ­ຈິກ-21 ທັນ­ວາ 2018 ເປັນ­ຕົ້ນ ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ລາຍ​ງານ ກ່ຽວ​ກັບ​ການ­ເຄື່ອນ­ໄຫວ​ວຽກ​ງານ​ພົ້ນ​ເດັ່ນ​ຂອງ​ລັດ­ຖະ­ບານ ປະ­ຈຳ​ປີ 2018 ແລະ ແຜນ­ການ ປະ­ຈຳ​ປີ 2019 ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ ແຜນ​ເງິນ­ຕາ ປະ­ຈຳ​ປີ 2018 ແລະ ແຜນ­ການ ປະ­ຈຳ​ປີ 2019 ຂອງ​ລັດ­ຖະ­ບານ ແລະ ຮັບ­ຮອງ​ເອົາ​ກົດ­ໝາຍ 8 ສະ­ບັບ ໃນ​ນີ້ ກົດ­ໝາຍ​ສ້າງ​ໃໝ່ 7 ສະ­ບັບ ກົດ­ໝາຍ​ປັບ­ປຸງ 1 ສະ­ບັບ.

    ຈາກ​ນັ້ນ ກໍ​ໄດ້​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສ ນວ ຊຸດ​ທີ I ເຊິ່ງ​ຈັດ​ຂຶ້ນ​ວັນ​ທີ 25-28 ທັນ­ວາ 2018 ໃນ​ນີ້ ໄດ້​ພິ­ຈາ­ລະ­ນາ ແລະ ຮັບ­ຮອງ​ບົດ​ລາຍ​ງານ​ຂອງ​ອົງ­ການ​ປົກ­ຄອງ ນວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ ປະ­ຈຳ​ປີ 2018 ແລະ ແຜນ­ການ ປະ­ຈຳ​ປີ 2019 ບົດ​ລາຍ​ງານ​ຂອງ​ອົງ­ການ​ກວດ​ສອບ​ແຫ່ງ​ລັດ ປະ­ຈຳ​ພາກ​ກາງ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2018 ແລະ ແຜນ­ການ​ປີ 2019 ນອກ­ຈາກ​ນີ້ ຍັງ​ໄດ້​ຮັບ​ເອົາ​ບົດ​ລາຍ​ງານ​ວຽກ​ງານ​ສຳ­ຄັນ​ອື່ນໆ​ອີກ​ຈຳ­ນວນ​ໜຶ່ງ

    ພາຍ­ຫຼັງ​ການ​ເຜີຍ­ແຜ່​ຜົນ­ສຳ­ເລັດ​ສອງ​ກອງ​ປະ­ຊຸມ​ດັ່ງ­ກ່າວ ກໍ​ໄດ້​ເປີດ​ໂອ­ກາດ​ໃຫ້​ປະ­ຊາ­ຊົນ​ສະ­ເໜີ​ຂໍ້​ຂ້ອງ​ໃຈ​ຕ່າງໆ ໃນ​ນີ້ ປະ­ຊາ­ຊົນ​ໄດ້​ໃຫ້​ຄວາມ​ສົນ­ໃຈ ແລະ ສະ­ເໜີ​ຕໍ່​ຜູ້​ແທນ​ຫຼາຍ​ກວ່າ​ແມ່ນ​ບັນ­ຫາ​ການ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ​ທີ່​ມີ​ຄວາມ​ຊັກ​ຊ້າ ແລະ ໃຫ້​ມີ​ມາດ​ຕະ­ການ​ເຂັ້ມ​ງວດ​ຕໍ່​ຄຳ​ຕັດ­ສິນ​ຂອງ​ສານ ສະ­ເໜີ​ໃຫ້​ກວດ­ກາ​ການ​ຊື້-ຂາຍ​ທີ່​ດິນ​ຂອງ​ຄົນ​ລາວ​ທີ່​ຂາຍ​ໃຫ້​ຄົນ​ຕ່າງ­ປະ­ເທດ (ມີ​ສິດ​ຊື້ ຫຼື ບໍ່) ຄວນ​ແບ່ງ​ເປັນ​ເຂດ​ໃຫ້​ນັກ​ລົງ­ທຶນ​ຕ່າງ­ປະ­ເທດ​ທີ່​ສາ­ມາດ​ຊື້​ໄດ້ ແລະ ເຂດ​ທີ່​ໃຫ້​ປະ­ຊາ­ຊົນ​ສາ­ມາດ​ຊື້ ເພື່ອ​ເປັນ​ທີ່­ຢູ່​ອາ­ໄສ ເນື່ອງ​ຈາກ​ລາ­ຄາ​ທີ່​ດິນ​ໃນ​ປັດ­ຈຸ­ບັນ​ແມ່ນ​ມີ​ລາ­ຄາ​ແພງ ຈົນ​ບໍ່​ສາ­ມາດ​ໃຫ້​ປະ­ຊາ­ຊົນ​ທຳ​ມະ​ດາ​ຊື້​ໄດ້ ນອກ​ນີ້ ຍັງ​ສະ­ເໜີ​ກ່ຽວ​ກັບ​ຮ້ານ M Park ເປິດ​ເຄື່ອງ​ສຽງ​ດັງ​ເກີນ ແລະ ເປີດ​ກາຍ​ໂມງ​ສົ່ງ​ສຽງ​ລົບ​ກວນ​ແກ່​ປະ­ຊາ­ຊົນ​ຢູ່​ອ້ອມ​ຂ້າງ ແລະ ສະ­ເໜີ​ໃຫ້​ມີ​ການ​ກວດ­ກາ​ເຄື່ອງ​ອຸ­ປະ­ໂພກ-ບໍ­ລິ­ໂພກ​ຕາມ​ຕະ­ຫຼາດ ເປັນ­ຕົ້ນ ຜັກ ຊີ້ນ ປາ ທີ່​ກິນ​ຢູ່​ປັດ­ຈຸ­ບັນ ແມ່ນ​ປອດ​ສານ­ພິດ ຫຼື ບໍ່.

    ຕອນ​ບ່າຍ​ວັນ​ດຽວ​ກັນ​ນີ້ ຄະ­ນະ​ດັ່ງ­ກ່າວ ຍັງ​ໄດ້​ລົງ​ພົບ​ປະ​ປະ­ຊາ­ຊົນ​ຢູ່​ວັດ​ທົ່ງ​ຂັນ​ຄຳ ເພື່ອ​ຮັບ​ຟັງ​ຄຳ​ຄິດ​ເຫັນ ຄຳ​ສະ­ເໜີ​ຂອງ​ປະ­ຊາ­ຊົນ​ກ່ຽວ​ກັບ​ບັນ­ຫາ​ຂັດ­ຂ້ອງ​ໃຈ​ຕ່າງໆ ເພື່ອ​ຈະ​ສະ­ເໜີ​ຕໍ່​ອຳ­ນາດ​ການ​ປົກ­ຄອງ ແລະ ພາກ­ສ່ວນ​ກ່ຽວ­ຂ້ອງ​ປັບ­ປຸງ​ແກ້​ໄຂ.

ຂ່າວທີ່ກ່ຽວຂ້ອງ