ຂ່າວຫຼ້າສຸດ

ກຽມຈັດງານວາງສະແດງສິນຄ້າວຽງຈັນເຟີນິເຈີ ຄັ້ງທີ 4

197 20 ກ.ພ. 2019 ຂ່າວໜ້າ​ໜຶ່ງ
ກຽມຈັດງານວາງສະແດງສິນຄ້າວຽງຈັນເຟີນິເຈີ ຄັ້ງທີ 4

    ສະ­ມາ­ຄົມ​ເຟີ​ນິ​ເຈີ​ລາວ ຫຼື ສຟລ ກຳ­ລັງ​ຫ້າງ​ຫາ​ກະ­ກຽມ​ຈັດ​ງານ​ວາງ­ສະ­ແດງ​ສິນ­ຄ້າ​ວຽງ​ຈັນ​ເຟີ​ນິ​ເຈີ ຄັ້ງ​ທີ 4 ປະ­ຈຳ​ປີ 2019 ຂຶ້ນ​ໃນ​ກາງ​ເດືອນ​ໜ້າ​ນີ້ ທີ່​ສູນ​ການ​ຄ້າ​ລາວ-ໄອ​ເຕັກ ນະ­ຄອນ­ຫຼວງ​ວຽງ​ຈັນ ຊຶ່ງ​ມາ​ຮອດ​ປັດ­ຈຸ­ບັນ ການ​ກະ­ກຽມ​ຄວາມ​ພ້ອມ​ຂອງ​ຄະ­ນະ​ຮັບ­ຜິດ­ຊອບ​ແມ່ນ​ມີ​ຄວາມ​ຄືບ​ໜ້າ​ຫຼາຍ​ດ້ານ ທັງ​ນີ້ ຄາດ​ວ່າ​ພາຍ​ໃນ​ງານ​ຈະ​ມີ​ຄວາມ​ຄຶກ­ຄັກ​ຈາກ​ຜູ້​ຄົນ ແລະ ສິນ­ຄ້າ​ກວ່າ​ງານ​ຄັ້ງ​ຜ່ານ​ມາ.

    ທ່ານ ກອງ​ມາ­ລາ ພົມ​ມະ​ໄລ ຮອງ​ປະ­ທານ​ສະ­ມາ­ຄົມ​ເຟີ​ນິ​ເຈີ​ລາວ ທັງ​ເປັນ​ຜູ້​ຊີ້​ນຳ​ການ​ຈັດ​ງານ​ວາງ­ສະ­ແດງ​ຄັ້ງ​ນີ້ ເປີດ­ເຜີຍ​ໃຫ້​ຮູ້​ວ່າ: ເພື່ອ​ເປັນ​ການ​ໂຄ­ສະ­ນາ​ສິນ­ຄ້າ​ເຟີ​ນິ​ເຈີ​ໄມ້​ລາວ ເປັນ​ການ​ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ດ້ວຍ​ກັນ​ຂອງ​ນັກ­ທຸ­ລະ­ກິດ​ຫົວ­ໜ່ວຍ​ເຟີ​ນິ​ເຈີ ທີ່​ເຮັດ​ໃຫ້​ມີ​ຜະ­ລິດ​ຕະ​ພັນ​ເຟີ​ນິ​ເຈີ​ຈາກ​ໄມ້​ລາວ​ອອກ​ມາ​ຮັບ​ໃຊ້​ສັງ­ຄົມ ພ້ອມ​ເປັນ​ການ­ສະ­ແດງ​ຜົນ­ງານ​ຜະ­ລິດ​ຕະ​ພັນ​ເຟີ​ນິ​ເຈີ ທີ່​ໃຊ້​ຫົວ­ຄິດ​ປະ­ດິດ​ສ້າງ ໂດຍ​ໃຊ້​ນາຍ​ຊ່າງ​ທີ່​ມີ​ຄວາມ​ຊຳ­ນິ​ຊຳ­ນານ ແລະ ຄວາມ​ປາ­ນີດ ສາ­ມາດ​ສ້າງ​ໄດ້​ຫຼາກ​ຫຼາຍ​ຜະ­ລິດ​ຕະ​ພັນ​ຫຼາຍ​ຮູບ​ແບບ ໃຫ້​ລູກ​ຄ້າ​ສາ­ມາດ​ມາ​ເລືອກ​ຊື້ ແລະ ຊົມ​ຢ່າງ​ສະ­ດວກ ສຟລ ກຳ­ລັງ​ຫ້າງ​ຫາ​ກະ­ກຽມ ເພື່ອ​ຈະ​ຈັດ​ງານ​ວາງ­ສະ­ແດງ​ສິນ­ຄ້າ​ວຽງ​ຈັນ​ເຟີ​ນິ​ເຈີ ຄັ້ງ​ທີ 4 ປະ­ຈຳ​ປີ 2019 ຂຶ້ນ​ໃນ​ລະ­ຫວ່າງ​ວັນ​ທີ 23-31 ມີ­ນາ​ໜ້າ​ນີ້ ທີ່​ສູນ​ການ​ຄ້າ​ລາວ-ໄອ​ເຕັກ ນະ­ຄອນ­ຫຼວງ​ວຽງ​ຈັນ.

    ໂດຍ​ມາ​ຮອດ​ປັດ­ຈຸ­ບັນ ຄະ­ນະ​ຈັດ​ງານ​ໄດ້​ມີ​ຄວາມ​ກຽມ­ພ້ອມ​ຈັດ​ງານ​ແລ້ວ 90% ບໍ່​ວ່າ​ຈະ​ເປັນ​ດ້ານ​ເນື້ອ​ໃນ ສະ­ຖານ­ທີ່ ຕະ­ຫຼອດ​ຮອດ​ສິນ­ຄ້າ​ທີ່​ຈະ​ນຳ​ມາ​ຮ່ວມ​ງານ​ວາງ­ສະ­ແດງ ໂດຍ​ງານ​ຄັ້ງ​ນີ້ ຄາດ​ວ່າ​ຈະ​ມີ​ຫົວ­ໜ່ວຍ​ທຸ­ລະ​ກິດ​ທັງ​ພາຍ​ໃນ ແລະ ຕ່າງ­ປະ­ເທດ​ນຳ​ສິນ­ຄ້າ​ເຂົ້າ​ຮ່ວມ​ບໍ່​ຫຼຸດ 170 ຫ້ອງ ດຽວ­ນີ້​ຈອງ​ແລ້ວ 50% ລວມ​ມູນ​ຄ່າ​ສິນ­ຄ້າ​ທັງ​ໝົດ​ງານ​ປະ­ມານ 30 ຕື້​ກີບ ໃນ​ນີ້ ສິນ­ຄ້າ 70% ຈະ​ໄດ້​ຂາຍ​ໃຫ້​ຜູ້​ຄົນ​ທີ່​ມາ​ທ່ຽວ​ຊົມ​ງານ​ປະ­ມານ 1,5 ແສນ​ຄົນ.

    ນອກ­ຈາກ​ນີ້ ພາຍ​ໃນ​ງານ​ຍັງ​ຈະ​ມີ​ສິນ­ຄ້າ​ໂອ​ດ໊ອບ​ຈຳ­ນວນ​ໜຶ່ງ ແລະ ກິດ­ຈະ­ກຳ​ອຶ່ນໆ ເປັນ­ຕົ້ນ ກາ­ນວາງ­ສະ­ແດງ​ຊື້-ຂາຍ​ສິນ­ຄ້າ ການ​ຜະ­ລິດ​ເຄື່ອງ​ເຟີ​ນິ​ເຈີ​ໄມ້ ແລະ ແກະ­ສະ­ຫຼັກ​ໄມ້ ຈົກ​ສະ­ຫຼາກ​ຊີງ​ລາ­ງວັນ ມີ​ການ­ສະ­ແດງ​ສິ­ລະ​ປະ​ດົນ­ຕີ​ໃນ​ທຸກ​ຄ່ຳ​ຄືນ ແລະ ອີກ​ຫຼາຍ​ກິດ­ຈະ­ກຳ​ທີ່​ໜ້າ​ສົນ­ໃຈ ໂດຍ​ຫົວ­ໜ່ວຍ​ທຸ­ລະ​ກິດ​ໃດ​ທີ່​ມີ​ຄວາມ​ສົນ­ໃຈ​ນຳ​ສິນ­ຄ້າ​ເຂົ້າ​ຮ່ວມ​ງານ​ກໍ​ສາ­ມາດ​ເຂົ້າ​ພົວ­ພັນ​ທີ່ ສຟລ ຫຼື ຕິດ­ຕໍ່​ສອບ​ຖາມ​ໄດ້​ທີ່​ໝາຍ​ເລກ­ໂທລະ­ສັບ 021 720 454.

ຂ່າວທີ່ກ່ຽວຂ້ອງ