ຫາລືແຜນແມ່ບົດ ການຮ່ວມມືແລວທາງເສດຖະກິດ ລາວ-ຈີນ

273 20 ກ.ພ. 2019 ຂ່າວໜ້າ​ໜຶ່ງ
ຫາລືແຜນແມ່ບົດ ການຮ່ວມມືແລວທາງເສດຖະກິດ ລາວ-ຈີນ

    ທ່ານ ໜິງ ຈີ່​ເຈີ ຮອງ​ປະ­ທານ​ຄະ­ນະ​ພັດ­ທະ­ນາ ແລະ ປະ­ຕິ​ຮູບ​ແຫ່ງ​ຊາດ​ຈີນ ພ້ອມ​ຄະ­ນະ ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ແຕ່​ວັນ​ທີ 18-21 ກຸມ­ພາ ນີ້ ເພື່ອ​ຮັດ​ແໜ້ນ​ສາຍ​ພົວ­ພັນ​ການ​ຮ່ວມ​ມື​ສອງ​ຝ່າຍ​ໃຫ້​ນັບ​ມື້​ໜັກ​ແໜ້ນ ແລະ ເຂັ້ມ­ແຂງ​ຍິ່ງ​ຂຶ້ນ ໂດຍ​ສະ­ເພາະ ການ​ປຶກ­ສາ​ຫາ­ລື​ກ່ຽວ​ກັບ​ແຜນ​ແມ່​ບົດ ການ​ພັດ­ທະ­ນາ​ເສດ­ຖະ­ກິດ ລາວ-ຈີນ ໃຫ້​ເກີດ​ດອກ​ອອກ​ຜົນ ສ້າງ​ຜົນ​ປະ­ໂຫຍດ​ສູງ​ສຸດ​ໃຫ້​ສອງ​ພັກ ສອງ​ລັດ ກໍ​ຄື​ປະ­ຊາ­ຊົນ​ສອງ​ຊາດ​ຢ່າງ​ໝັ້ນ­ຄົງ.

    ພິ­ທີ​ພົບ​ປະ​ສອງ​ຝ່າຍ ໄດ້​ຈັດ​ຂຶ້ນ​ວັນ​ທີ 19 ກຸມ­ພາ 2019 ຢູ່​ກະ­ຊວງ​ແຜນ­ການ ແລະ ການ​ລົງ­ທຶນ (ຜທ) ເຊິ່ງ​ຝ່າຍ​ລາວ​ນຳ​ໂດຍ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ ຜທ ແລະ ຝ່າຍ​ຈີນ​ນຳ​ໂດຍ​ທ່ານ ໜິງ ຈີ່​ເຈີ.

    ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ຊຸມ​ປີ­ຜ່ານ­ມາ ທ່າ­ແຮງ​ບົ່ມ​ຊ້ອນ ຕະ­ຫຼອດ​ເຖິງ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ກ່ຽວ​ກັບ​ການ​ສົ່ງ­ເສີມ​ການ​ລົງ­ທຶນ​ທັງ​ພາຍ​ໃນ ແລະ ຕ່າງ­ປະ­ເທດ ນອກ​ນີ້ ຍັງ​ລົງ​ເລິກ​ໃນ​ການ​ປຶກ­ສາ​ຫາ­ລື ກ່ຽວ​ກັບ​ແຜນ​ແມ່​ບົດ​ການ​ຮ່ວມ​ມື​ແລວ​ທາງ​ເສດ­ຖະ­ກິດ ລາວ-ຈີນ ສັນ­ຍາ​ຄວາມ​ສາ­ມາດ​ໃນ​ການ​ຜະ­ລິດ ແລະ ການ​ລົງ­ທຶນ ວຽກ​ງານ​ການ​ຕິດ­ຕາມ​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ທາງ​ລົດ­ໄຟ ລາວ-ຈີນ ຕະ­ຫຼອດ​ເຖິງ​ວຽກ​ງານ​ການ​ຮ່ວມ​ມື​ດ້ານ​ເສດ­ຖະ­ກິດ-ການ​ຄ້າ ແລະ ການ​ລົງ­ທຶນ ນອກ­ຈາກ​ພົບ​ປະ​ກັບ​ຄະ­ນະ​ນຳ​ກະ­ຊວງ ຜທ ແລ້ວ ຄະ­ນະ​ພັດ­ທະ­ນາ ແລະ ປະ­ຕິ​ຮູບ​ແຫ່ງ​ຊາດ ສປ ຈີນ ຍັງ​ຈະ​ໄດ້​ພົບ​ປະ ແລະ ເຮັດ​ວຽກ​ກັບ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ແລະ ເຂົ້າ​ຢ້ຽມ​ຄຳ­ນັບ​ການ​ນຳ​ຂັ້ນ​ສູງ​ພັກ-ລັດ­ຖະ­ບານ​ລາວ ຕື່ມ​ອີກ.

ຂ່າວທີ່ກ່ຽວຂ້ອງ