ຍີ່ປຸ່ນ ປະກອບສ່ວນສຳຄັນ ໃນການພັດທະນາຂະແໜງຍຸຕິທຳລາວ

253 20 ກ.ພ. 2019 ຂ່າວໜ້າ​ໜຶ່ງ

    ເພື່ອ​ສະ­ແດງ​ຄວາມ​ຮູ້​ບຸນ­ຄຸນ ແລະ ຂອບ­ໃຈ​ທີ່​ລັດ­ຖະ­ບານ ແລະ ປະ­ຊາ­ຊົນ​ຍີ່­ປຸ່ນ ໄດ້​ໃຫ້­ການ​ຊ່ວຍ­ເຫຼືອ ສປປ ລາວ ໃນ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ວຽກ​ງານ​ຍຸ­ຕິ​ທຳ ໃນ​ການ​ສ້າງ​ລັດ​ທີ່​ປົກ­ຄອງ​ດ້ວຍ​ກົດ­ໝາຍ ໄດ້​ຮັບ​ຜົນ­ສຳ­ເລັດ​ຕື່ມ​ອີກ​ບາດ­ກ້າວ​ໜຶ່ງ ອົງ­ການ​ໄອ​ຍະ​ການ​ສູງ​ສຸດ ໃນ​ຖາ­ນະ​ເປັນ​ຜູ້​ປະ­ຈຳ­ການ​ໂຄງ­ການ​ສົ່ງ­ເສີມ​ການ​ພັດ­ທະ­ນາ ແລະ ການ​ສ້າງ​ຄວາມ​ເຂັ້ມ­ແຂງ ການ​ປົກ­ຄອງ​ດ້ວຍ​ກົດ­ໝາຍ​ໃນ​ຂະ­ແໜງ​ຍຸ­ຕິ​ທຳ​ຂອງ ສປປ ລາວ ໄດ້​ຈັດ​ພິ­ທີ​ຍ້ອງ­ຍໍ​ອົງ​ການ­ຈັດ­ຕັ້ງ​ຍີ່­ປຸ່ນ ທີ່​ມີ​ຜົນ­ງານ​ດີ­ເດັ່ນ​ປະ­ກອບ­ສ່ວນ​ໃນ​ການ​ພັດ­ທະ­ນາ​ຂະ­ແໜງ​ຍຸ­ຕິ​ທຳ​ຂອງ ສປປ ລາວ ໄລ­ຍະ 20 ປີ­ຜ່ານ­ມາ (1998-2018) ຂຶ້ນ​ວັນ​ທີ 19 ກຸມ­ພາ 2019 ຢູ່​ອົງ­ການ​ດັ່ງ­ກ່າວ ເຊິ່ງ​ມອບ​ໂດຍ​ທ່ານ ໄຊ­ຊະ­ນະ ໂຄດ​ພູ­ທອນ ຮອງ​ຫົວ­ໜ້າ​ອົງ­ການ​ໄອ​ຍະ​ການ​ສູງ​ສຸດ ທ່ານ ບຸນ​ສະ­ຫວາດ ບຸບ­ຜາ ຮອງ​ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ທ່ານ ພຸດ ສິມ​ມາ­ລາ​ວົງ ຮອງ​ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ມີ​ທ່ານ ທາ​ເຄ​ຊິ ຣິ​ກິ​ຮາ​ຣະ ເອກ​ອັກ​ຄະ​ລັດ​ຖະ​ທູດ​ຍີ່­ປຸ່ນ ປະ­ຈຳ​ລາວ ພ້ອມ​ດ້ວຍ​ຕາງ­ໜ້າ​ອົງ​ການ­ຈັດ­ຕັ້ງ​ຍີ່­ປຸ່ນ ເຂົ້າ​ຮ່ວມ.

    20 ປີ­ຜ່ານ­ມາ ລັດ­ຖະ­ບານ​ຢີ່​ປຸ່ນ ໄດ້​ໃຫ້­ການ​ຊ່ວຍ­ເຫຼືອ ສປປ ລາວ ເປັນ­ຕົ້ນ ໄດ້​ສະ­ໜັບ­ສະ­ໜູນ​ເງິນ ສາດ­ສະ­ດາ­ຈານ ຜູ້​ຊ່ຽວ­ຊານ ພະ­ນັກ­ງານ​ວິ­ຊາ​ການ ໃນ​ນີ້ ເປັນ​ເງິນ 10.108.611 ໂດ​ລາ​ສະ­ຫະ­ລັດ ຫຼື ປະ­ມານ 86 ຕື້​ກີບ ຜູ້​ຊ່ຽວ­ຊານ​ໄລ­ຍະ​ສັ້ນ 91 ຄົນ ຜູ້​ຊ່ຽວ­ຊານ​ໄລ­ຍະ​ຍາວ 19 ຄົນ ມາ​ປະ­ຈຳ​ໂຄງ­ການ​ດັ່ງ­ກ່າວ ປັດ­ຈຸ­ບັນ​ນີ້​ແມ່ນ​ໄດ້​ຮັບ​ຜົນ­ສຳ­ເລັດ​ທີ່​ໜ້າ​ເພິ່ງ​ພໍ­ໃຈ ເປັນ­ຕົ້ນ ໄດ້​ສຳ­ເລັດ​ການ​ສ້າງ​ປະ­ມວນ​ກົດ­ໝາຍ​ແພ່ງ​ສະ­ບັບ​ປະ­ຫວັດ­ສາດ​ຂອງ​ລາວ ໄດ້​ສ້າງ​ປຶ້ມ​ຄູ່​ມື​ໃນ​ຂົງ­ເຂດ​ກົດ­ໝາຍ​ແພ່ງ ການ​ຄ້າ ເສດ­ຖະ­ກິດ ແຮງ​ງານ ກົດ­ໝາຍ​ອາ­ຍາ ການ​ດຳ­ເນີນ​ຄະ­ດີ​ແພ່ງ ການ​ດຳ­ເນີນ​ຄະ­ດີ​ອາ­ຍາ ປຶ້ມ​ຄູ່​ມື​ວ່າ​ດ້ວຍ​ການ​ສືບ­ສວນ-ສອບ​ສວນ ໄດ້​ຄົ້ນ­ຄວ້າ-ພັດ­ທະ­ນາ​ຫຼັກ­ສູດ​ການ​ສຶກ​ສາ ການ​ເຝິກ­ອົບ­ຮົມ​ກົດ­ໝາຍ​ຂອງ ສປປ ລາວ ພ້ອມ​ທັງ​ໄດ້​ເອົາ​ປຶ້ມ​ທີ່​ຂຽນ​ສຳ­ເລັດ​ລົງ​ໄປ​ເຜີຍ­ແຜ່ ເຝິກ­ອົບ­ຮົມ​ໃຫ້​ພະ­ນັກ­ງານ​ທີ່​ກ່ຽວ­ຂ້ອງ​ໃນ​ຂອບ​ເຂດ​ທົ່ວ​ປະ­ເທດ ເພື່ອ​ນຳ​ໃຊ້​ເຂົ້າ​ໃນ​ຊີ­ວິດ​ຕົວ​ຈິງ​ຢ່າງ​ມີ​ປະ​ສິດ­ທິ​ຜົນ​ສຳ­ຄັນ​ທີ່​ສຸດ ບັນ­ດາ​ນັກ​ຄົ້ນ­ຄວ້າ ໄດ້​ກາຍ­ເປັນ​ຜູ້​ຊ່ຽວ­ຊານ​ທີ່​ມີ​ຄວາມ​ຮູ້-ຄວາມ​ສາ­ມາດ​ເປັນ​ຊັບ­ພະ­ຍາ­ກອນ​ມະ­ນຸດ ເປັນ​ຊັບ​ສົມ­ບັດ​ອັນ​ລ້ຳ​ຄ່າ​ຂອງ ສປປ ລາວ ທີ່​ຈະ​ເປັນ​ຜູ້​ສືບ­ຕໍ່​ນຳ​ເອົາ​ຄວາມ​ຮູ້ ແລະ ປະ­ສົບ​ການ​ທີ່​ໄດ້​ນຳ​ໃຊ້​ໃນ​ວຽກ​ງານ ກໍ​ຄື ຖ່າຍ​ທອດ​ບົດ­ຮຽນ ຄວາມ​ຮູ້​ຂອງ​ຕົນ​ໃຫ້​ຜູ້​ອື່ນ​ຕໍ່​ໄປ ປະ­ກອບ­ສ່ວນ​ສຳ­ຄັນ​ໃນ​ການ​ພັດ­ທະ­ນາ​ລັດ ທີ່​ປົກ­ຄອງ​ດ້ວຍ​ກົດ­ໝາຍ​ຢູ່ ສປປ ລາວ ໃຫ້​ມີ​ຄວາມ​ສັກ­ສິດ​ເທື່ອ​ລະ​ກ້າວ.

    ສຳ­ລັບ​ອົງ​ການ­ຈັດ­ຕັ້ງ​ຍີ່­ປຸ່ນ​ທີ່​ໄດ້​ຮັບ​ການ​ຍ້ອງ­ຍໍ​ຄັ້ງ​ນີ້ ປະ­ກອບ​ມີ​ອົງ­ການ​ຮ່ວມ​ມື​ສາ­ກົນ (JICA) ກະ­ຊວງ​ຍຸ­ຕິ​ທຳ ສະ­ພາ​ທະ­ນາຍ­ຄວາມ ສະ­ມາ­ຄົມ​ຊ່ວຍ­ເຫຼືອ​ວຽກ​ງານ​ຍຸ­ຕິ​ທຳ.

ຂ່າວທີ່ກ່ຽວຂ້ອງ