ຂ່າວຫຼ້າສຸດ

ກຽມກິດຈະກຳຮຽນພາສາອັງກິດ-ເຝິກຊ້ອມເຕະບານ ທີ່ໂຮງຮຽນ ARSENAL

231 21 ກ.ພ. 2019 ວົງຈອນກີລາ
ກຽມກິດຈະກຳຮຽນພາສາອັງກິດ-ເຝິກຊ້ອມເຕະບານ ທີ່ໂຮງຮຽນ ARSENAL

    ພິ­ທີ​ຖະ­ແຫຼງ​ຂ່າວ ການ​ຈັດ​ກິດ­ຈະ­ກຳ​ຮຽນ​ພາ­ສາ​ອັງ­ກິດ ແລະ ການ​ເຝິກ­ຊ້ອມ​ເຕະ­ບານ​ທີ່​ໂຮງ­ຮຽນ ARSENAL SOCCER (ປະ­ເທດ​ອັງ­ກິດ) ຈັດ​ຂຶ້ນ​ວັນ​ຈັນ 18 ກຸມ­ພາ 2019 ຢູ່​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ໂດຍ​ມີ​ທ່ານ​ນາງ ກັນ­ຍາ ແກ້ວ​ມະ­ນີ ເລ­ຂາ­ທິ­ການ ສຕລ ທ່ານ​ນາງ ນິນ​ປະ­ເສີດ ຈັນ­ທະ​ວີ​ສຸກ ຜູ້­ອຳ­ນວຍ­ການ​ບໍ­ລິ­ສັດ HYPER LEARNING & CONSULTANCY ທ່ານ ອາ­ທິດ ທຽມ​ປະ­ເສີດ ຜູ້​ຈັດ­ການ​ຝ່າຍ​ຂາຍ ພາກ​ພື້ນ​ເອ​ເຊຍ-ປາ​ຊີ​ຟິກ ບໍ­ລິ­ສັດ Stafford House ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ແລະ ສື່​ມວນ​ຊົນ​ເຂົ້າ​ຮ່ວມ.

    ສຳ­ລັບ​ໂຄງ­ການ​ດັ່ງ­ກ່າວ ແມ່ນ​ຈັດ​ເປັນ​ປີ​ທຳ​ອິດ​ຢູ່​ປະ­ເທດ​ລາວ ທີ່​ມີ​ການ​ເປີດ​ໂຄງ­ການ​ເຝິກ­ຊ້ອມ​ເຕະ­ບານ ແລະ ຮຽນ​ພາ­ສາ​ອັງ­ກິດ ທີ່​ໂຮງ­ຮຽນ ARSENAL SOCCER ໂດຍ​ການ​ຖືກ​ຮັບ­ຮອງ​ຈາກ​ສະ­ໂມ­ສອນ​ບານ­ເຕະ​ຊື່​ດັງ​ຂອງ​ລີກ​ອັງ­ກິດ ເຊັ່ນ: ARSENAL ໂດຍ​ທາງ​ບໍ­ລິ­ສັດ HYPER LEARNING & CONSULTANCY ຮ່ວມ​ມື​ກັບ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ໄດ້​ຈັດ​ກິດ­ຈະ­ກຳ​ຮຽນ​ພັກ­ແລ້ງ​ພາ­ສາ​ອັງ­ກິດ ແລະ ການ​ເຝິກ­ຊ້ອມ​ເຕະ­ບານ​ຢູ່​ທີ່​ເມືອງ​ລອນ​ດອນ ປະ­ເທດ​ອັງ­ກິດ ໂດຍ​ໂຄງ­ການ​ນີ້ ຈະ​ເນັ້ນ​ໃສ່​ການ​ເຝິກ­ຝົນ​ທັກ​ສະ ການ​ເຝິກ­ຊ້ອມ ແລະ ຍຸດ­ທະ­ວິ­ທີ ພ້ອມ​ທັງ​ສ້າງ​ຄວາມ​ທ້າ​ທາຍ​ທາງ​ດ້ານ​ເຕັກ­ນິກ ແລະ ກົນ­ລະ­ຍຸດ ທີ່​ຈຳ­ເປັນ​ແກ່​ການ​ພັດ­ທະ­ນາ​ນັກ​ເຕະ ທັກ​ສະ​ເຫຼົ່າ​ນີ້​ເປັນ​ພື້ນ­ຖານ​ຕາມ​ຫຼັກ­ການ​ຂອງ​ທີມ ARSENAL ແລະ ເປັນ​ສິ່ງ​ທີ່​ສະ­ໂມ­ສອນ​ໃຊ້​ເພື່ອ​ຫຼິ້ນ​ຕາມ​ຮູບ​ແບບ​ທີ່​ໜ້າ​ດຶງ​ດູດ.

    ຕາ­ຕະ­ລາງ​ດັ່ງ­ກ່າວ ແຕ່​ລະ​ອາ­ທິດ​ຮຽນ​ອັງ­ກິດ 15 ຊົ່ວ­ໂມງ ແລະ ເຝິກ­ຊ້ອມ​ເຕະ­ບານ 15 ຊົ່ວ­ໂມງ ໃນ​ໄລ­ຍະ 2 ອາ­ທິດ ທາງ​ໂຮງ­ຮຽນ​ເປີດ​ຮັບ​ນັກ­ຮຽນ ຍິງ-ຊາຍ ອາ­ຍຸ 8-16 ປີ (ເປັນ​ກຸ່ມ 10) ແລະ ອາ­ຍຸ 10-16 ປີ (ໄປ​ດ່ຽວ) ສ່ວນ​ມື້​ເດີນ­ທາງ​ໂຮງ­ຮຽນ​ແມ່ນ​ວັນ​ທີ 6-21 ກໍ­ລະ­ກົດ 2019 ຫຼື ວັນ​ທີ 20 ກໍ­ລະ­ກົດ ຫາ 4 ສິງ­ຫາ 2019 ທຸກໆ​ຕາ­ຕະ­ລາງ​ຂອງ​ແຕ່​ລະ​ປະ­ເທດ ແມ່ນ​ທາງ​ບໍ­ລິ­ສັດ ໄຮ​ເປີ ຈະ​ມີ​ຜູ້­ນຳ​ພາ​ເດີນ­ທາງ ແລະ ຕິດ­ຕາມ​ນ້ອງ​ນັກ­ຮຽນ​ທີ່​ເຂົ້າ​ຮ່ວມ ແມ່ນ​ຈະ​ໄດ້​ຮັບ​ຊຸດ​ກີ­ລາ​ໂດຍ​ບໍ່​ເສຍ​ຄ່າ​ໃຊ້​ຈ່າຍ​ຈາກ ARSENAL SOCCER SCHOOL ນອກ­ຈາກ​ນີ້ ຍັງ​ໄດ້​ໄປ​ທັດ­ສະ­ນະ​ສຶກ​ສາ​ຢູ່​ທີ EMIRATES STADIUM BRIGTON CAMBRIDGE ຫຼື OXFORD ໃນ​ລອນ​ດອນ.

    ຜູ້​ທີ່​ສົນ­ໃຈ​ສາ­ມາດ​ເຂົ້າ​ມາ​ສະ­ໝັກ​ໄດ້​ຢູ່ ສຕລ ບ້ານ​ຫ້ວຍ​ຫົງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ເບີ​ໂທ: 021 560821 ແຕ່​ມື້­ນີ້​ໄປ​ຈົນ​ຮອດ ວັນ​ທີ 30 ເມ­ສາ 2019 ຫຼື ຕິດ­ຕໍ່​ສອບ​ຖາມ​ຂໍ້​ມູນ​ເພີ່ມ​ເຕີມ​ໄດ້​ທີ່​ບໍ­ລິ­ສັດ ໄຮ​ເປີ ໜ່ວຍ 13 ບ້ານ​ໜອງ​ບອນ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ເບີ​ໂທ: 030 4811310 ແລະ 020 29244565.

ຂ່າວທີ່ກ່ຽວຂ້ອງ