ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 21/02/2019

332 21 ກ.ພ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ອຸ­ທາ­ຫອນ​ສອນ​ໃຈ ໃຫ້​ມີ​ສະ­ຕິ​ຈາກ​ຍິງ​ຊະ­ລາ​ຄົນ​ໜຶ່ງ​ຖືກ​ຕົ້ມ​ຕຸນ​ຢູ່​ມາ​ເລ​ເຊຍ ແລະ ເລື່ອງ​ທາງ​ການ​ຟີ​ລິບ​ປິນ ກຳ­ຈັດ​ຄົນ​ຕ່າງ­ປະ­ເທດ​ທີ່​ເຮັດ​ແນວ​ແຕກ​ປອກ​ນອກ​ກົດ­ໝາຍ.

    ທີ່ ມາ​ເລ​ເຊຍ: ມີ​ຂ່າວ​ຈາກ​ມາ​ເລ​ເຊຍ (The Nation 30/12/2018) ກ່ຽວ​ກັບ​ຍິງ​ເຖົ້າ​ຄົນ​ໜຶ່ງ​ຖືກ​ຕົ້ມ​ຈົນ​ເປື່ອຍ ເສຍ​ເງິນ​ໄປ​ລ້າໆ 230.000 ຣິງ​ກິດ (ປະ­ມານ 380 ລ້ານ​ກີບ) ຍ້ອນ​ຫູ​ເບົາ​ເອົາ​ງ່າຍ ຍອມ​ຈຳ­ນົນ​ຕໍ່​ຄຳ​ຂູ່​ຂອງ​ນັກ​ຕົ້ມ​ຕຸນ​ທາງ​ອອນ​ລາຍ ເລື່ອງ​ມີ​ຢູ່​ວ່າ ຍິງ​ບຳ­ນານ​ອາ­ຍຸ 60 ປີ ພາຍ​ນ້ຳ​ຕາ​ເຂົ້າ​ໄປ​ລາຍ​ງານ​ເຈົ້າ​ໜ້າ­ທີ່​ຕຳ­ຫຼວດ​ວ່າ ຕົນ​ໄດ້​ຮັບ​ສາຍ​ຂົ່ມ­ຂູ່​ຈາກ​ຜູ້​ທີ່​ອ້າງ​ຕົນ​ວ່າ​ເປັນ​ເຈົ້າ​ໜ້າ­ທີ່​ຕຳ­ຫຼວດ​ປາບ​ປາມ​ອາ​ຊະ​ຍາ​ກຳ​ຟອກ​ເງິນ ຄຳ​ຂູ່​ຜ່ານ​ສາຍ​ໄດ້​ກ່າວ​ຫາ​ຍິງ​ຊະ­ລາ​ຄົນ​ນັ້ນ​ວ່າ ມີ​ຄວາມ​ຜິດ​ກ່ຽວ​ກັບ​ການ​ຟອກ​ເງິນ ໂດຍ​ໄດ້​ອ້າງ​ຂໍ້​ມູນ​ຢັ້ງ­ຢືນ​ທີ່​ບໍ່​ມີ​ຄວາມ​ຈິງ ແລະ ບອກ​ວ່າ ຖ້າ​ຢາກ​ໃຫ້​ເລື່ອງ​ນີ້​ຕົກ​ໄປ​ຕ້ອງ​ຈ່າຍ​ເງິນ​ໃຫ້ “ເຈົ້າ​ໜ້າ­ທີ່​ຕຳ­ຫຼວດ” ທີ່​ກ່ຽວ­ຂ້ອງ ຈຳ­ນວນ 230.000 ຣິງ​ກິດ ດ້ວຍ​ຄວາມ​ຢ້ານ​ກົວ ຍິງ​ບຳ­ນານ​ຜູ້​ເຄາະ​ຮ້າຍ ຈຶ່ງ​ໄດ້​ສົ່ງ​ເງິນ​ຈຳ­ນວນ​ດັ່ງ­ກ່າວ​ໃຫ້​ເປົ້າ​ໝາຍ​ຕາມ​ຄຳ​ຂູ່ ສຸດ​ທ້າຍ​ຍິງ​ຊະ­ລາ​ໄດ້​ເຂົ້າ​ໄປ​ລາຍ​ງານ​ເລື່ອງ​ນີ້​ໃຫ້​ທ່ານ ໂມ​ຮາ​ມັດ ຄາ​ລິນ ຄາ​ເດີ ຜູ້​ບັນ­ຊາ​ການ​ກຳ­ລັງ​ຕຳ­ຫຼວດ ລັດ​ໂຈ​ຮໍ ຊາບ ກົດ­ໝາຍ​ອາ­ຍາ​ຂອງ​ມາ​ເລ​ເຊຍ ໄດ້​ກຳ­ນົດ​ໂທດ​ການ​ຕົ້ມ​ຕຸນ​ໄວ້​ໃນ​ໝວດ​ທີ 420 ເຊິ່ງ​ເປັນ​ບ່ອນ​ອີງ​ໃຫ້​ແກ່​ການ​ສອບ​ສວນ ບັນ­ຫາ​ທີ່​ຍິງ​ຊະ­ລາ​ຕົກ​ເປັນ​ເຫຍື່ອ​ຄັ້ງ​ນີ້ ການ​ຕົ້ມ​ຕຸນ​ທາງ​ອອນ​ລາຍ​ນັ້ນ ມີ​ຫຼາຍ​ຮູບ​ຫຼາຍ​ສີ ລວມ​ທັງ​ການ​ຈອບ​ອອຍ​ໃຫ້​ຫຼົງ​ເຊື່ອ ການ​ຊັກ​ຊວນ​ອວນ​ອ່ອຍ​ໃຫ້​ຄ້ອຍ​ນຳ​ຜົນ​ກຳ­ໄລ​ອັນ​ມະ­ຫາ­ສານ ວ່າ​ຈະ​ໄດ້​ຮັບ ແລະ ກໍ​ມີ​ທັງ​ຮູບ​ການ​ຂົ່ມ­ຂູ່ ດັ່ງ­ນັ້ນ ຕ້ອງ​ມີ​ສະ­ຕິ​ລະ­ວັງ​ຕົວ​ໄວ້​ຈະ​ດີ​ແລ.

    ທີ່ ຟີ​ລິບ​ປິນ: 2018 ເປັນ​ອີກ​ປີ​ໜຶ່ງ​ທີ່​ທາງ​ການ​ຟີ​ລິບ​ປິນ ສາ­ມາດ​ຈັບ​ກຸມ​ຄົນ​ຕ່າງ­ປະ­ເທດ​ທີ່​ມີ​ການ​ກະ­ທຳ​ຜິດ​ຢູ່​ຟີ​ລິບ​ປິນ ໄດ້​ຈຳ­ນວນ 257 ຄົນ ໃນ​ນັ້ນ ເປັນ​ຄົນ​ຈີນ 116 ຄົນ (The Nation 18/1/2019) 80 ຄົນ ຈາກ​ເກາະ​ໄຕ້​ຫວັນ ຄົນ ສ ເກົາ­ຫຼີ 27 ຄົນ ໄທ 16 ຄົນ ສ ອາ​ເມ​ຣິ​ກາ 8 ຄົນ ແລະ ອັງ­ກິດ 5 ຄົນ ໃນ​ປີ 2017 ຄົນ​ຕ່າງ­ປະ­ເທດ​ທີ່​ຖືກ​ຈັບ​ໃນ​ຟີ​ລິບ​ປິນ ຖານ​ມີ​ການ​ກະ­ທຳ​ຜິດ​ນັ້ນ ມີ​ຈຳ­ນວນ 232 ຄົນ ລາຍ​ລະ­ອຽດ​ຂອງ​ການ​ກະ­ທຳ​ຜິດ ມີ​ດັ່ງ­ນີ້: 98 ຄົນ ຕິດ​ຄະ­ດີ​ອາ​ຊະ​ຍາ​ກຳ​ທາງ​ເສດ­ຖະ­ກິດ ແລະ ປອມ​ແປງ 98 ຄົນ ອາ​ຊະ​ຍາ​ກຳ​ຕົ້ມ​ຕຸນ​ທາງ​ເອ​ເລັກ​ໂຕຼ​ນິກ 44 ຄົນ ລະ­ເມີດ​ຄວາມ​ໝັ້ນ­ຄົງ​ທາງ​ໄຊ​ເບີ (ລະ­ບົບ​ອິນ​ເຕີ​ເນັດ) 7 ຄົນ ຕິດ​ຄະ­ດີ​ອາ​ຊະ​ຍາ​ກຳ​ທາງ​ເພດ 5 ຄົນ ມີ​ຄວາມ​ຜິດ​ຖານ​ລັກ​ພາ​ຕົວ 1 ຄົນ ຄະ­ດີ​ໂຈລະ​ກຳ 1 ຄົນ ມີ​ອາ­ວຸດ​ໄວ້​ໃນ​ການ​ຄອບ​ຄອງ ແລະ ຈຳ­ໜ່າຍ​ຢາ​ເສບ​ຕິດ ແລະ 1 ຄົນ ຕິດ​ຄະ­ດີ​ລັກ­ລອບ​ນຳ​ເຂົ້າ​ສິນ­ຄ້າ​ຜິດ​ກົດ­ໝາຍ​ຊາວ​ຕ່າງ­ປະ­ເທດ ທີ່​ຖືກ​ຈັບ​ເກືອບ​ທັງ​ໝົດ​ຖືກ​ເນ­ລະ­ເທດ ແລະ ຖືກ​ຈຳ​ຄຸກ ທ່ານ ແຮ​ເມ ໂມ​ເຣັນ​ເຕ ຫົວ­ໜ້າ​ຫ້ອງ­ການ​ຄົນ​ເຂົ້າ​ເມືອງ​ຟີ​ລິບ​ປິນ ໄດ້​ໃຫ້​ຊາບ​ຕື່ມ​ວ່າ: ນອກ­ຈາກ​ໄດ້​ຮັບ​ໂທດ​ຕາມ​ຄວາມ​ຜິດ​ແລ້ວ ຄົນ​ຕ່າງ­ປະ­ເທດ​ເຫຼົ່າ​ນີ້​ຍັງ​ຖືກ​ໝາຍ​ຫົວ​ໄວ້​ໃນ​ບັນ­ຊີ​ດຳ ວ່າ​ເປັນ​ບຸກ­ຄົນ​ບໍ່​ເພິ່ງ​ປາ­ຖະ­ໜາ​ທີ່​ຖືກ​ຫ້າມ​ເຂົ້າ​ຟີ​ລິບ​ປິນ​ອີກ​ເປັນ​ເດັດ­ຂາດ.

ຂ່າວທີ່ກ່ຽວຂ້ອງ