ຂ່າວຫຼ້າສຸດ

ອິນເຕີເນັດໄວກວ່າເດີມ 100 ເທົ່າ ດ້ວຍເຕັກໂນໂລຊີໄຟເບີອັອບຕິກໃໝ່ ທີ່ບິດລຳແສງໃຫ້ເປັນກຽວ

405 21 ກ.ພ. 2019 ຫົວຂໍ້ຂ່າວອື່ນໆ

    ເຮົາ​ອາດ​ຈະ​ຄິດ​ວ່າ​ໄຟ​ເບີ​ອິນ​ເຕີ​ເນັດ​ທີ່​ເຮືອນ​ຂອງ​ເຮົາ​ມັນ​ໄວ​ອີ່­ຫຼີ ແຕ່​ຈະ​ເປັນ​ແນວ­ໃດ ຖ້າ​ອິນ​ເຕີ​ເນັດ​ໄຟ​ເບີ​ສາ­ມາດ​ໄວ​ກວ່າ​ເດີມ​ໄດ້​ອີກ 100 ເທົ່າ ຟັງ​ເບິ່ງ​ເໝືອນ​ຈະ​ເປັນ​ໄປ​ບໍ່​ໄດ້​ແມ່ນ​ບໍ່ ? ແຕ່​ນັກ​ວິ­ໄຈ​ຈາກ​ປະ­ເທດ​ອົດ​ສະ​ຕຣາ​ລີ ເຮັດ​ໃຫ້​ເລື່ອງ​ນີ້​ເປັນ​ຈິງ​ຂຶ້ນ​ມາ​ແລ້ວ ແລະ ເປັນ​ພັດ­ທະ­ນາ​ການ​ແບບ​ກ້າວ​ກະ­ໂດດ ໃນ​ເລື່ອງ​ຄວາມ​ໄວ​ຂອງ​ການ​ທ່ອງ​ອິນ​ເຕີ​ເນັດ​ເລີຍ.

    ຜົນ­ງານ​ວິ­ໄຈ​ນີ້ ມີ​ການ​ເຜີຍ­ແຜ່​ຜ່ານ​ວາ­ລະ­ສານ Nature Communications ເປັນ​ການ​ສ້າງ​ຮູບ​ແບບ​ໃໝ່ ໃນ​ການ​ສື່­ສານ​ຂໍ້​ມູນ​ຜ່ານ​ສາຍ​ໄຟ​ເບີ​ອັອບ​ຕິກ ດ້ວຍ​ການ​ບິດ​ແສງ​ໃຫ້​ເປັນ​ກຽວ ໃນ​ຂະ­ນະ​ທີ່​ມັນ​ເດີນ­ທາງ​ຜ່ານ​ສາຍ​ໄຟ​ເບີ​ອັອບ​ຕິກ ດ້ວຍ​ເຕັກ­ນິກ​ໃໝ່​ນີ້ ເຮັດ​ໃຫ້​ແສງ​ສາ­ມາດ​ນຳ­ພາ​ຂໍ້​ມູນ​ໄປ​ໄດ້​ໃນ​ປະ­ລິ­ມານ​ທີ່​ຫຼາຍ​ກວ່າ​ເດີມ​ຢ່າງ​ມະ­ຫາ­ສານ ແຖມ​ການ​ປະ­ຍຸກ​ໃຊ້​ວິ­ທີ​ຂໍ​ສົ່ງ​ຂໍ້​ມູນ​ດ້ວຍ​ແສງ​ຮູບ​ແບບ​ໃໝ່​ນີ້ ເຮັດ​ໄດ້​ບໍ່​ຍາກ​ອີກ​ດ້ວຍ.

    ແມ່ນ​ຢູ່ ທີ່​ໃນ​ປັດ­ຈຸ­ບັນ​ນີ້ ເຄືອ​ຂ່າຍ​ໄຟ​ເບີ​ອັອບ​ຕິກ​ເປັນ​ວິ­ທີ​ການ​ສື່­ສານ​ຂໍ້​ມູນ​ທີ່​ມີ​ຄວາມ​ໄວ​ສູງ​ຢູ່​ແລ້ວ ມັນ​ໄວ​ກວ່າ​ເຄືອ​ຂ່າຍ​ທີ່​ໃຊ້​ສາຍ­ທອງ​ແດງ​ເປັນ​ສື່​ນຳ​ຂໍ້​ມູນ ໂດຍ​ໄຟ​ເບີ​ອັອບ​ຕິກ​ໃຊ້​ໄລ­ຍະ​ຈັງ­ຫວະ​ຂອງ​ການ​ປ່ອຍ​ແສງ ໃນ​ການ​ສົ່ງ​ຂໍ້​ມູນ​ຈາກ​ຈຸດ​ໜຶ່ງ​ໄປ​ອີກ​ຈຸດ​ໜຶ່ງ ເຊິ່ງ​ຄວາມ​ໄວ​ນັ້ນ​ກໍ​ໜ້າ​ປະ​ທັບ​ໃຈ.

    ໂດຍ​ເຕັກ​ໂນ​ໂລ​ຊີ​ການ​ສົ່ງ​ຂໍ້​ມູນ​ຜ່ານ​ສາຍ​ໄຟ​ເບີ​ອັອບ​ຕິກ​ຮູບ​ແບບ​ໃໝ່​ນັ້ນ ຈະ​ມີ​ການ​ບິດ​ກຽວ​ຂອງ​ລຳ​ແສງ​ເມື່ອ​ມັນ​ເຄື່ອນ​ທີ່​ຜ່ານ​ສາຍ​ໄຟ​ເບີ​ອັອບ​ຕິກ ເຮັດ​ໃຫ້​ສາ­ມາດ​ໃສ່​ຂໍ້​ມູນ​ລົງ​ໄປ​ໃນ​ແສງ​ໄດ້​ຫຼາຍ​ກວ່າ​ເດີມ ໂດຍ​ທ່ານ Min Gu ໜຶ່ງ​ໃນ​ທີມ​ງານ​ວິ­ໄຈ​ກ່າວ​ວ່າ “ມັນ​ກໍ​ເໝືອນ​ກັບ​ໂຄງ​ສ້າງ​ຂອງ DNA ທີ່​ມີ​ການ​ບິດ​ກຽວ ຍິ່ງ​ເຮົາ​ໃຊ້​ປະ­ໂຫຍດ​ຈາກ​ໂມ​ເມນ​ຕຳ​ເຊິງ​ມຸມ (Angular momentum) ໄດ້​ຫຼາຍ​ເທົ່າ­ໃດ ກໍ​ຈະ​ຍິ່ງ​ຂົນ­ສົ່ງ​ຂໍ້​ມູນ​ໄປ​ກັບ​ແສງ​ໄດ້​ໃນ​ປະ­ລິ­ມານ​ທີ່​ຫຼາຍ​ຂຶ້ນ”.

    ການ​ທີ່​ເຮົາ​ຈະ​ໄດ້​ໃຊ້​ງານ​ອິນ​ເຕີ​ເນັດ​ຄວາມ​ໄວ 100x ເມື່ອ​ໃດ​ນັ້ນ ກໍ​ຂຶ້ນ​ຢູ່​ກັບ​ຄວາມ​ກະ​ຕື​ລື​ລົ້ນ​ຂອງ​ຜູ້​ໃຫ້​ບໍ­ລິ­ການ​ອິນ​ເຕີ​ເນັດ​ເຮືອນ ຄາດ​ວ່າ​ເຮົາ​ຈະ​ໄດ້​ໃຊ້​ເຕັກ​ໂນ​ໂລ​ຊີ​ໄຟ​ເບີ​ອິນ​ເຕີ​ເນັດ​ແບບ​ໃໝ່​ນີ້ ໃນ​ໄລ­ຍະ​ປະ­ມານ​ປີ 2040 ຕອນ​ນີ້​ກໍ​ໃຊ້​ແບບ​ເກົ່າ​ນີ້​ໄປ​ກ່ອນ.

ຂ່າວທີ່ກ່ຽວຂ້ອງ