ຂ່າວຫຼ້າສຸດ

ຈະຈັດເທສະການໂຄມໄຟນາໆຊາດ ຕົ້ນເດືອນມີນາ

187 21 ກ.ພ. 2019 ຂ່າວໜ້າ​ໜຶ່ງ
ຈະຈັດເທສະການໂຄມໄຟນາໆຊາດ ຕົ້ນເດືອນມີນາ

    ຟາມ​ພູ​ຕາ­ເວັນ ຮ່ວມ​ກັບ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ແລະ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ຈະ​ຈັດ​ເທ​ສະ­ການ​ໂຄມ­ໄຟ​ນາໆຊາດ ຄັ້ງ​ທີ 1 ເພື່ອ​ສົ່ງ­ເສີມ​ການ­ທ່ອງ­ທ່ຽວ ຂຶ້ນ​ວັນ​ທີ 7-10 ມີ­ນາ 2019 ຢູ່​ຟາມ​ພູ​ຕາ­ເວັນ ບ້ານ​ນາ​ໄຊ ເມືອງ​ທ່າ​ພະ​ບາດ ແຂວງ​ບໍ​ລິ​ຄຳ​ໄຊ ເຊິ່ງ​ປະ­ກອບ​ມີ​ກິດ­ຈະ­ກຳ​ສະ­ແດງ​ໂຄມ­ໄຟ​ນາໆຊາດ ໃນ​ນີ້ ມີ​ໂຄມ­ໄຟ​ຈາກ​ສິ­ລະ​ປິນ ອາ­ຈານ​ສອນ​ໂຮງ­ຮຽນ​ວິ­ຈິດ​ສິນ ສປປ ລາວ ມີ​ໂຄມ­ໄຟ​ຈາກ​ປະ­ເທດ​ຫວຽດ­ນາມ ຈີນ ຍີ່­ປຸ່ນ ສ ເກົາ­ຫຼີ ແລະ ໄທ ພ້ອມ​ທັງ​ວາງ­ສະ­ແດງ ແລະ ຂາຍ​ອາ­ຫານ ສິນ­ຄ້າ​ຈາກ​ຜູ້​ປະ­ກອບ​ການ​ແມ່­ຍິງ ແລະ ຜູ້​ປະ­ກອບ​ການ​ທີ່​ມີ​ຊາຍ​ແດນ​ຕິດ​ກັບ​ປະ­ເທດ​ຫວຽດ­ນາມ ຈີນ ແລະ ໄທ ນອກ​ນີ້ ຍັງ​ຈະ​ມີ​ການ­ສະ­ແດງ​ສິ­ລະ​ປະ-ວັນ­ນະ­ຄະ­ດີ ແລະ ກິດ­ຈະ­ກຳ​ອື່ນໆ​ທີ່​ໜ້າ​ສົນ­ໃຈ ໂດຍ​ມີ​ຮ້ານ​ວາງ­ສະ­ແດງ 50 ຮ້ານ ໃນ​ນີ້ ຮ້ານ​ອາ­ຫານ​ຈາກ​ນະ­ຄອນ­ຫຼວງ​ວຽງ​ຈັນ 20 ຮ້ານ ຮ້ານ​ຫັດ­ຖະ­ກຳ ກະ­ສິ­ກຳ ແລະ ອື່ນໆ 10 ຮ້ານ ແລະ ຮ້ານ​ຈາກ​ປະ­ເທດ​ສະ­ມາ­ຊິກ​ອາ​ຊຽນ 20 ຮ້ານ.

    ຈຸດ​ການ​ຈັດ​ງານ​ຄັ້ງ​ນີ້ ເພື່ອ​ສົ່ງ­ເສີມ​ການ​ສ້າງ​ວຽກ​ເຮັດ​ງານ​ທຳ​ໃຫ້​ຊຸມ​ຊົນ ແລະ ໝູ່​ບ້ານ​ໃກ້​ຄຽງ​ຟາມ​ພູ​ຕາ­ເວັນ ທັງ​ເປັນ​ການ​ເຊື່ອມ​ໂຍງ​ການ­ທ່ອງ­ທ່ຽວ​ຕາມ​ເສັ້ນ­ທາງ​ຍຸດ​ທະ​ສາດ ລະ­ຫວ່າງ​ກຸ່ມ​ປະ­ເທດ​ສະ­ມາ­ຊິກ​ອາ​ຊຽນ​ໃນ​ອະ­ນາ­ຄົດ ແລະ ສົ່ງ­ເສີມ​ການ­ທ່ອງ­ທ່ຽວ​ລາວ ກ້າວ​ສູ່​ຄວາມ​ຍືນ​ຍົງ ແລະ ສົ່ງ­ເສີມ​ຜະ­ລິດ​ຕະ​ພັນ​ພາຍ​ໃນ ສປປ ລາວ ກ້າວ​ສູ່​ຕະ­ຫຼາດ​ສາ­ກົນ ແລະ ຕ້ອນ­ຮັບ​ປີ​ທ່ອງ​ທ່ຽວ ລາວ-ຈີນ 2019.

    ທ່ານ​ນາງ ດາ​ລູ​ນີ ດວງ​ປະ­ເສີດ ອຳ­ນວຍ​ການ​ຟາມ​ພູ​ຕາ­ເວັນ ໄດ້​ເຊີນ­ຊວນ​ແຂກ​ພາຍ​ໃນ ແລະ ຕ່າງ­ປະ­ເທດ ໄປ​ທ່ຽວ​ຊົມ​ຟາມ​ພູ​ຕາ­ເວັນ ແລະ ຊື້​ສິນ­ຄ້າ ອາ­ຫານ​ຫຼາຍ​ຊະ­ນິດ​ຈາກ​ພາຍ​ໃນ ແລະ ຕ່າງ­ປະ­ເທດ ນອກ­ຈາກ​ນີ້ ຍັງ​ມີ​ເຕັ້ນ​ໃຫ້​ບັນ­ດາ​ແຂກ​ທີ່​ມີ​ຈຸດ­ປະ­ສົງ​ຢາກ​ນອນ​ຄືນ​ຢູ່​ຟາມ​ດັ່ງ­ກ່າວ ມູນ​ຄ່າ 80.000 ກີບ​ຕໍ່​ເຕັ້ນ ຫຼື ສາ­ມາດ​ເອົາ​ເຕັ້ນ​ໄປ​ເອງ​ໄດ້ ໂດຍ​ຈະ​ໄດ້​ຈ່າຍ​ຄ່າ​ບໍ­ລິ­ການ 20.000 ກີບ​ຕໍ່​ເຕັ້ນ ສ່ວນ​ການ​ເຂົ້າ​ຊົມ​ວັນ​ທີ 7 8 10 ຈະ​ໄດ້​ຊື້​ປີ້​ເຂົ້າ​ລາ­ຄາ 25.000 ກີບ​ຕໍ່​ຄົນ ສະ­ເພາະ​ວັນ​ທີ 9 ປີ້​ລາ­ຄາ 50.000 ກີບ​ຕໍ່​ຄົນ.

    ພິ­ທີ​ຖະ­ແຫຼງ​ຂ່າວ​ເທ​ສະ­ການ​ດັ່ງ­ກ່າວ ຈັດ​ຂຶ້ນ​ວັນ​ທີ 19 ກຸມ­ພາ 2019 ຢູ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ໂດຍ​ມີ​ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ