ເຊີນເຂົ້າຮ່ວມມະຫະກຳອຸດສາຫະກຳປຸງແຕ່ງອາຫານນາໆຊາດ ຄັ້ງທີ I

221 21 ກ.ພ. 2019 ຂ່າວໜ້າ​ໜຶ່ງ

    ມະ​ຫະ​ກຳ​ອຸດ­ສາ­ຫະ­ກຳ​ປຸງ​ແຕ່ງ­ອາ­ຫານ​ນາໆຊາດ ຄັ້ງ​ທີ I ຈະ​ຈັດ​ຂຶ້ນ​ວັນ​ທີ 15-19 ມີ­ນາ 2019 ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ຈະ​ມີ​ຫ້ອງ​ວາງ­ສະ­ແດງ​ສິນ­ຄ້າ​ຈາກ​ປະ­ເທດ​ສະ­ມາ­ຊິກ​ອາ​ຊຽນ ຍີ່­ປຸ່ນ ສ ເກົາ­ຫຼີ ແລະ ສປ ຈີນ ຫຼາຍ​ກວ່າ 200 ຫ້ອງ​ເຂົ້າ​ຮ່ວມ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ລູກ​ຄ້າ ມາ​ຮອດ​ປັດ­ຈຸ­ບັນ ມີ​ຜູ້​ແຈ້ງ​ເຈດ​ຈຳ­ນົງ​ເຂົ້າ​ຮ່ວມ​ວາງ­ສະ­ແດງ​ແລ້ວ​ຫຼາຍ​ກວ່າ 70%.

    ພິ­ທີ​ຖະ­ແຫຼງ​ຂ່າວ​ມະ​ຫະ​ກຳ​ອຸດ­ສາ­ຫະ­ກຳ​ປຸງ​ແຕ່ງ­ອາ­ຫານ​ນາໆຊາດ ຄັ້ງ​ທີ I ຈັດ​ຂຶ້ນ​ວັນ​ທີ 20 ກຸມ­ພາ 2019 ຢູ່​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ໂດຍ​ມີ​ທ່ານ ພັນ​ທອງ ພິດ​ທຸມ­ມາ ຮອງ​ລັດ­ຖະ­ມົນ­ຕີ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ ໄຊ​ສົມ​ເພັດ ນໍ​ຣະ​ສິງ ຫົວ­ໜ້າ​ກົມ​ສົ່ງ­ເສີມ​ການ​ຄ້າ ທ່ານ ສີ​ບຸນ​ທຳ ສີ​ບຸນ​ມີ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ລາວ​ເວີນ​ມະ­ຫາ­ຊົນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສຸ​ນິ­ກອນ ລາດ​ຊະ​ວົງ ປະ­ທານ​ບໍ­ລິ­ສັດ ເດີ​ພາ​ສ​ໂປ​ເຈັກ ຈຳ­ກັດ ກ່າວ​ວ່າ: ງານ​ຄັ້ງ​ນີ້ ພວກ​ເຮົາ​ໄດ້​ຈັດ​ສັນ 200 ກວ່າ​ຫ້ອງ​ວາງ­ສະ­ແດງ ໃນ​ນີ້ ມີ​ເຂດ​ຜະ­ລິດ​ຕະ​ພັນ​ສິນ­ຄ້າ​ໂອ​ດ໋ອບ 30 ກວ່າ​ຫົວ­ໜ່ວຍ ເຂດ​ຜະ­ລິດ​ຕະ​ພັນ​ຕາງ­ໜ້າ​ຈາກ 14 ແຂວງ​ທົ່ວ​ປະ­ເທດ ນອກ­ຈາກ​ນີ້ ຍັງ​ມີ​ເຂດ​ວາງ­ສະ­ແດງ​ຜະ­ລິດ​ຕະ​ພັນ​ລາວ ແລະ ສິນ­ຄ້າ​ທີ່​ເປັນ​ທ່າ­ແຮງ​ພາຍ​ໃນ​ງານ​ຍັງ​ຈະ​ມີ​ສິນ­ຄ້າ​ຫຼາຍ​ປະ­ເພດ ເຊັ່ນ: ອາ­ຫານ​ແປ​ຮູບ ອາ­ຫານ​ສົດ ຜັກ​ປອດ​ສານ­ພິດ ວັດ­ຖຸ​ດິບ ການ​ປຸງ​ແຕ່ງ­ອາ­ຫານ ແລະ ທະ­ນາ­ຄານ​ທີ່​ຈະ​ມາ​ໃຫ້​ແນວ­ທາງ​ການ​ຊອກ​ຫາ​ແຫຼ່ງ​ທຶນ ເພື່ອ​ໄປ​ຕໍ່​ຍອດ​ໃນ​ການ​ດຳ­ເນີນ​ທຸ­ລະ​ກິດ ລວມ​ເຖິງ​ເຄື່ອງ­ມື ວັດ​ສະ​ດຸ​ການ​ປຸ່ງ​ແຕ່ງ­ອາ­ຫານ ໃນ​ນີ້ ຈະ​ເນັ້ນ​ໜັກ​ໃສ່​ການ​ນຳ​ສະ­ເໜີ​ຜະ­ລິດ​ຕະ​ພັນ​ເຂົ້າ​ລາວ ແລະ ສິນ­ຄ້າ​ທີ່​ເປັນ​ທ່າ­ແຮງ​ຈາກ 18 ແຂວງ ທົ່ວ​ປະ­ເທດ​ເປັນ​ຫຼັກ.

    ພາຍ​ໃນ​ງານ​ຍັງ​ຈະ​ມີ​ການ­ສະ­ແດງ​ສິ­ລະ​ປະ​ຈາກ​ໂຮງ­ຮຽນ​ຕ່າງໆ ການ​ແຂ່ງ​ກິນ​ອາ­ຫານ ຊີມ​ອາ­ຫານ​ລາວ ການ​ສອນ​ເຮັດ​ເຂົ້າ­ໜົມ ພ້ອມ​ທັງ​ແລກ­ປ່ຽນ​ຄວາມ​ຮູ້​ຈາກ​ຜູ້​ປະ­ກອບ​ການ​ສະ­ໄໝ​ໃໝ່ ແລະ ກິດ­ຈະ­ກຳ​ທີ່​ໜ້າ​ສົນ­ໃຈ​ອື່ນໆ​ອີກ ສະ­ນັ້ນ ບັນ­ດາ​ທ່ານ​ທີ່​ສົນ­ໃຈ ສາ­ມາດ​ເຂົ້າ​ຮ່ວມ​ງານ​ດັ່ງ­ກ່າວ​ໄດ້​ຕາມ​ວັນ ເວ­ລາ ແລະ ສະ­ຖານ­ທີ່-ທີ່​ກຳ­ນົດ​ໄວ້.

ຂ່າວທີ່ກ່ຽວຂ້ອງ