ຂ່າວຫຼ້າສຸດ

ສະເໜີຫຼາຍບັນຫາ ເພື່ອໃຫ້ ສສຊ ສສ ນວ ແກ້ໄຂ

258 21 ກ.ພ. 2019 ຂ່າວໜ້າ​ໜຶ່ງ

    ຄະ­ນະ​ອຳ­ນາດ​ການ​ປົກ­ຄອງ​ບ້ານ ແລະ ພໍ່​ແມ່​ປະ­ຊາ­ຊົນ​ພາຍ​ໃນ​ເຂດ 2 ບ້ານ​ຫ້ອມ ຈຳ­ນວນ 11 ບ້ານ ໄດ້​ໃຫ້­ການ​ຕ້ອນ­ຮັບ​ການ​ລົງ​ມາ​ຢ້ຽມ­ຢາມ ພົບ​ປະ​ຂອງ​ສະ­ມາ­ຊິກ​ສະ­ພາ​ແຫ່ງ​ຊາດ ສສຊ ຊຸດ​ທີ VIII ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ສສ ນວ ຊຸດ​ທີ I ຢູ່​ທີ່​ວັດ​ບ້ານ​ຈອມ​ທອງ ໃນ​ວັນ​ທີ 19 ກຸມ­ພາ 2019 ນຳ­ພາ​ໂດຍ​ທ່ານ ພັອ ບົວ​ເງິນ ຫົງ​ໄຂ​ຄຳ ສສຊ ຊຸດ​ທີ VIII ແລະ ທ່ານ ສຸກ​ສະ​ຫັວນ ບຸດ​ຕະ​ວົງ ສສ ນວ ຊຸດ​ທີ I ຮອງ​ເຈົ້າ­ເມືອງ​ຫາດ​ຊາຍ​ຟອງ.

   ໂອ­ກາດ​ດັ່ງ­ກ່າວ ທ່ານ​ສະ­ມາ­ຊິກ​ທັງ​ສອງ​ສະ­ພາ ໄດ້​ຮັບ​ຟັງ​ການ​ລາຍ​ງານ​ສະ­ພາບ​ລວມ​ໂດຍ​ຫຍໍ້​ຂອງ​ບ້ານ ທີ່​ໄດ້​ສະ­ເໜີ​ຕໍ່​ພິ­ທີ ພ້ອມ​ດຽວ​ກັນ​ນັ້ນ ສະ­ມາ­ຊິກ​ທັງ​ສອງ​ກໍ​ໄດ້​ນຳ​ເອົາ​ເນື້ອ​ໃນ​ຈຸດ­ປະ­ສົງ ແລະ ຜົນ­ສຳ­ເລັດ​ຂອງ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສຊ ຊຸດ​ທີ VIII ແລະ ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສ ນວ ຊຸດ​ທີ I ທີ່​ທັງ​ສອງ​ສະ­ພາ​ໄດ້​ເຫັນ​ດີ​ເອ­ກະ​ພາບ​ກັນ ຮັບ­ຮອງ​ພິ­ຈາ­ລະ­ນາ​ແກ້​ໄຂ​ບັນ­ຫາ​ສຳ­ຄັນ​ຂອງ​ຊາດ ກໍ​ຄື​ຂອງ​ນະ­ຄອນ­ຫຼວງ​ວຽງ​ຈັນ ເພື່ອ​ນຳ​ມາ​ເຜີຍ­ແຜ່​ໃຫ້​ພໍ່​ແມ່​ປະ­ຊາ­ຊົນ​ໄດ້​ຮັບ​ຊາບ ພ້ອມ​ກັນ​ນັ້ນ ກໍ​ຍັງ​ເຮັດ​ໜ້າ­ທີ່​ເປັນ​ຕົວ​ແທນ​ໃຫ້​ແກ່​ພໍ່​ແມ່​ປະ­ຊາ­ຊົນ​ບັນ­ດາ­ເຜົ່າ ໃນ​ການ​ນຳ​ເອົາ​ຂໍ້​ຄິດ​ເຫັນ​ຄຳ​ສະ­ເໜີ​ທີ່​ຂັດ­ຂ້ອງ​ຕ່າງໆ​ຢູ່​ຂັ້ນ​ພື້ນ­ຖານ ທີ່​ເຫັນ​ວ່າ​ບໍ່​ມີ​ຄວາມ​ສອດ­ຄ່ອງ ບໍ່​ໄດ້​ຮັບ​ການ​ແກ້​ໄຂ​ຢ່າງ​ເປັນ​ທຳ ເໝາະ​ສົມ ກໍ​ພ້ອມ​ຮັບ​ເອົາ ແລະ ນຳ​ສະ­ເໜີ​ຕໍ່­ໃຫ້​ພາກ­ສ່ວນ​ກ່ຽວ­ຂ້ອງ​ລົງ​ແກ້​ໄຂ.

    ໃນ​ໂອ­ກາດ​ທີ່ ສສຊ ສສ ນວ ລົງ​ພົບ​ປະ​ຄັ້ງ​ນີ້ ປະ­ຊາ­ຊົນ​ກໍ​ໄດ້​ສະ­ເໜີ​ຫຼາຍ​ບັນ­ຫາ​ຕໍ່​ຜູ້​ແທນ ເພື່ອ​ໃຫ້​ນຳ­ໄປ​ພິ­ຈາ­ລະ­ນາ​ແກ້​ໄຂ​ຢ່າງ​ຮີບ​ດ່ວນ ເປັນ­ຕົ້ນ ບັນ­ຫາ​ຄອງ​ຊົນ­ລະ­ປະ­ທານ​ຢູ່​ເຂດ​ບ້ານ​ຫ້ອມ ນັບ​ແຕ່​ໄດ້​ຮັບ​ການ​ກໍ່­ສ້າງ​ຂຶ້ນ​ມາ​ເປັນ​ເວ­ລາ​ຫຼາຍ​ປີ ຮອດ​ປັດ­ຈຸ­ບັນ​ແມ່ນ​ຍັງ​ບໍ່​ທັນ​ໄດ້​ຮັບ​ການ​ປັບ­ປຸງ​ສ້ອມ­ແປງ ເຮັດ​ໃຫ້​ນ້ຳ​ໃນ​ຄອງ​ໄຫຼ​ບໍ່​ສະ­ດວກ ປະ­ຊາ­ຊົນ​ບາງ​ພື້ນ​ທີ່​ເຮັດ​ນາ​ທຳ​ການ​ຜະ­ລິດ ນ້ຳ​ບໍ່​ພຽງ­ພໍ​ຕໍ່​ກັບ​ບັນ­ຫາ​ໜີ້​ສິນ​ຄ່າ​ກະ­ແສ​ໄຟ­ຟ້າ​ຜັດ​ເພີ່ມ​ຂຶ້ນ ນອກ​ນີ້ ຍັງ​ມີ​ບັນ­ຫາ​ສິ່ງ­ແວ­ດລ້ອມ ການ​ຖິ້ມ​ເສດ​ຂີ້​ເຫຍື້ອ​ຊະ­ຊາຍ ບັນ­ຫາ​ເສັ້ນ­ທາງ​ທີ່​ສ້າງ​ຍັງ​ບໍ່​ທັນ​ແລ້ວ ປະ­ຊາ­ຊົນ​ໄດ້​ພົບ​ຄວາມ​ຫຍຸ້ງ­ຍາກ​ໃນ​ການ​ໄປ​ມາ ບັນ­ຫາ​ຕາ­ຝັ່ງ​ເຈື່ອນ​ແຄມ​ຂອງ ນອກ​ນີ້ ຍັງ​ມີ​ບັນ­ຫາ​ອື່ນໆ​ທີ່​ມີ​ຜົນ​ກະ­ທົບ ແລະ ປະ­ຊາ­ຊົນ​ກໍ​ໄດ້​ສະ­ເໜີ​ຜ່ານ ສສຊ ສສ ນວ ເພື່ອ​ນຳ­ໄປ​ສະ­ເໜີ​ລາຍ​ງານ​ຕໍ່​ກອງ​ປະ­ຊຸມ​ສະ­ໄໝ​ຄັ້ງ​ຕໍ່​ໄປ.

ຂ່າວທີ່ກ່ຽວຂ້ອງ