ຂ່າວຫຼ້າສຸດ

ພິພິທະພັນວຽງຈັນສິນລະປະຮ່ວມສະໄໝ ສະຖານທີ່ທ່ຽວຊົມແຫ່ງໃໝ່ຂອງ ນວ

196 21 ກ.ພ. 2019 ຂ່າວໜ້າ​ໜຶ່ງ
ພິພິທະພັນວຽງຈັນສິນລະປະຮ່ວມສະໄໝ ສະຖານທີ່ທ່ຽວຊົມແຫ່ງໃໝ່ຂອງ ນວ

    ພິ­ທີ​ເປີດ​ພິ​ພິ​ທະ​ພັນ​ວຽງ​ຈັນ​ສິນ­ລະ­ປະ​ຮ່ວມ​ສະ­ໄໝ ຫຼື Vientiane Museum of Contemporary Art ໄດ້​ຈັດ​ຂຶ້ນ​ວັນ​ທີ 20 ກຸມ­ພາ 2019 ຢ່າງ​ເປັນ​ທາງ​ການ ຊຶ່ງ​ເປັນ​ການ​ສ້າງ​ແຫຼ່ງ​ທ່ອງ​ທ່ຽວ​ແຫ່ງ​ໃໝ່​ອີກ​ແຫ່ງ​ໜຶ່ງ​ຂອງ​ນະ­ຄອນ­ຫຼວງ​ວຽງ​ຈັນ ເພື່ອ​ຮອງ​ຮັບ­ແຂກ​ທັງ​ພາຍ​ໃນ ແລະ ຕ່າງ­ປະ­ເທດ ທີ່​ຈະ​ເຂົ້າ​ມາ​ທ່ອງ​ທ່ຽວ​ຢູ່​ນະ­ຄອນ­ຫຼວງ​ວຽງ​ຈັນ ເນື່ອງ​ໃນ​ໂອ­ກາດ​ເປີດ​ປີ​ທ່ອງ​ທ່ຽວ​ລາວ-ຈີນ 2019 ນີ້ ໃຫ້​ກຽດ​ເຂົ້າ​ຮ່ວມ​ພິ­ທີ​ດັ່ງ­ກ່າວ ມີ​ທ່ານ ສົມ​ສະ­ຫວາດ ເລັ່ງ​ສະ​ຫວັດ ທີ່​ປຶກ­ສາ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ບົວ​ສອນ ບຸບ­ຜາ​ວັນ ຫົວ­ໜ້າ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ ພ້ອມ​ດ້ວຍ​ພັນ​ລະ​ຍາ​ການ​ນຳ ບັນ­ດາ​ທູ­ຕາ­ນຸ­ທູດ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພິ­ສິດ ໄຊ​ຍະ​ທິດ ປະ­ທານ​ພິ​ພິ​ທະ​ພັນ​ວຽງ​ຈັນ​ສິນ­ລະ­ປະ​ຮ່ວມ​ສະ­ໄໝ ກ່າວ​ວ່າ: ສຳ­ລັບ​ພິ​ພິ​ທະ​ພັນ​ວຽງ​ຈັນ​ສິນ­ລະ­ປະ​ຮ່ວມ​ສະ­ໄໝ ຫຼື Vientiane Museum of Contemporary Art ສະ­ຖານ­ທີ່​ແມ່ນ​ຕັ້ງ​ຢູ່: ຖະ­ໜົນ​ໄກ­ສອນ ພົມ­ວິ­ຫານ ບ້ານ​ຊ້າງ​ຄູ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ຢູ່​ແຄມ​ທາງ​ໃຫຍ່ ໃກ້​ກັບ​ສູນ​ໂຄ​ລາວ ຫຼື ຄິວ​ລົດ​ສາຍ​ໃຕ້​ເກົ່າ ໃກ້​ກັບ 4 ແຍກ​ໄຟ​ແດງ​ດົງ​ໂດກ-ທາງ 450 ປີ ພິ​ພິ​ທະ​ພັນ​ແຫ່ງ​ນີ້ ແມ່ນ​ໄດ້​ນຳ​ເອົາ​ເສດ​ໄມ້ ຊາກ​ຕໍ​ໄມ້ ຮາກ​ເຫງົ້າ​ຂອງ​ຕົ້ນ­ໄມ້​ໃຫຍ່ ທີ່​ບໍ່​ທັນ​ມີ​ມູນ​ຄ່າ ນຳ​ມາ​ຂວັດ​ແກະ­ສະ­ຫຼັກ ແລະ ປຸງ​ແຕ່ງ​ຄືນ­ໃໝ່ ໃຫ້​ມີ​ຮູບ­ຊົງ ມີ​ລວ­ດລາຍ ແລະ ສີ­ສັນ​ທີ່​ງົດ​ງາມ ຕາມ​ແນວ​ຄິດ-ຈິນ­ຕະ­ນາ­ການ​ຂອງ​ຊ່າງ​ແກະ­ສະ­ຫຼັກ ແລະ ຜູ້​ຂວັດ​ລາຍ ແຕ່​ກໍ​ຄົງ​ໄວ້​ມູນ​ເຄົ້າ​ເດີມ​ຂອງ​ຮາກ​ໄມ້​ແຕ່​ລະ​ຊະ­ນິດ​ທີ່​ນຳ​ມາ​ປະ­ດິດ.

    ນອກ​ນີ້ ກໍ​ຍັງ​ມີ​ຮູບ​ພາບ​ປະ­ຫວັດ­ສາດ ວິ­ຖີ​ການ​ດຳ­ລົງ​ຊີ­ວິດ ແລະ ລວ­ດລາຍ​ອື່ນໆ ທີ່​ນາຍ​ຊ່າງ​ນັກ​ຈິດ­ຕະ­ກອນ ໄດ້​ບັນ­ຈົງ​ວາດ​ແຕ້ມ​ລວ­ດລາຍ​ລົງ​ແຜ່ນ​ໄມ້​ຂະ­ໜາດ​ໃຫຍ່ ເພື່ອ​ຊົງ​ຈຳ​ໄວ້​ໃຫ້​ເປັນ​ງານ​ສິນ­ລະ­ປະ​ເທີງ​ແຜ່ນ​ໄມ້ ເກີດ​ເປັນ​ມູນ​ຄ່າ​ມະ­ຫາ­ສານ ແລະ ເປັນ​ເອ­ກະ­ລັກ​ສະ­ເພາະ​ຂອງ​ລາວ ເອີ້ນ​ໄດ້​ວ່າ​ພິ​ພິ​ທະ​ພັນ​ແຫ່ງ​ນີ້ ໄດ້​ທ້ອນ­ໂຮມ​ເອົາ​ງານ​ສິນ­ລະ­ປະ ການ​ຂວັດ​ລາຍ ການ​ແກະ­ສະ­ຫຼັກ​ໄມ້ ເຊິ່ງ​ເກີດ​ຈາກ​ຫົວ­ຄິດ​ປະ­ດິດ​ສ້າງ​ຂອງ​ປະ­ທານ​ພິ​ພິ​ທະ​ພັນ​ວຽງ​ຈັນ​ສິນ­ລະ­ປະ​ຮ່ວມ​ສະ­ໄໝ ທີ່​ໄດ້​ສະ​ສົມ​ເອົາ​ຮາກ​ໄມ້​ທີ່​ບໍ່​ໄດ້​ໃຊ້​ແລ້ວ ມາ​ສ້າງ​ເປັນ​ງານ​ສິນ­ລະ­ປະ​ທີ່​ລ້ຳ​ຄ່າ ແລະ ມາ​ຮວບ​ຮວມ​ໄວ້​ທີ່​ພິ​ພິ​ທະ​ພັນ​ແຫ່ງ​ນີ້ ມີ​ຫຼາຍ​ພັນ​ກວ່າ​ຜົນ­ງານ ເຊິ່ງ​ບັນ­ດາ​ທ່ານ​ຕ້ອງ​ໄດ້​ມາ​ສຳ­ຜັດ ມາ​ທ່ຽວ​ຊົມ ແລະ ມາ​ເຫັນ​ດ້ວຍ​ຕົນ​ເອງ ຮັບ­ຮອງ​ວ່າ​ທ່ານ​ຕ້ອງ​ປະ​ທັບ​ໃຈ ແລະ ບໍ່​ເຄີຍ​ເຫັນ​ຢູ່​ແຫ່ງ​ໃດ​ມາ​ກ່ອນ​ຢ່າງ​ແນ່­ນອນ.

ຂ່າວທີ່ກ່ຽວຂ້ອງ