ຂ່າວຫຼ້າສຸດ

ຣັດ​ເຊຍ ຈະ​ສົ່ງ​ຄວາມ​ຊ່ວຍເຫຼືອ​ມະນຸດສະທຳ​ໄປ​ໃຫ້​ເວ​ເນ​ຊູ​ເອ​ລາ

366 22 ກ.ພ. 2019 ຂ່າວຕ່າງປະເທດ
ຣັດ​ເຊຍ ຈະ​ສົ່ງ​ຄວາມ​ຊ່ວຍເຫຼືອ​ມະນຸດສະທຳ​ໄປ​ໃຫ້​ເວ​ເນ​ຊູ​ເອ​ລາ

    ສື່ສານ​ໃນ​ທ້ອງຖິ່ນ ອ້າງ​ຕາມ​ຄຳ​ເວົ້າ​ຂອງ​ປະທານາທິບໍດີ​ເວ​ເນ​ຊູ​ເອ​ລາ ນີ​ໂກ​ລາ​​ສ ມາ​ດູ​ໂຣ ແຈ້ງ​ໃຫ້​ຮູ້ເມື່ອ​ວັນ​ທີ 18 ກຸມພາ​ນີ້​ວ່າ ຣັດ​ເຊຍ​ຈະ​ສົ່ງ​ເຄື່ອງ​ຊ່ວຍເຫຼືອ​ມະນຸດສະທຳ​ເປັນ​ສິນຄ້າ 300 ໂຕນ ໃຫ້​ແກ່​ເວ​ເນ​ຊູ​ເອ​ລາ.

   ສຳນັກ​ຂ່າວສານ Sputnik ລາຍ​ງານ​ອ້າງ​ຕາມ​ຄຳ​ເວົ້າ​ຂອງ​ປະທານາທິບໍດີ ມາ​ດູ​ໂຣ ທີ່​ກ່າວ​ຊີ້​ແຈງ ຢູ່​ໃນ​ການ​ພົບ​ປະ​ກັບ​ວົງ​ການ​ນັກວິທະຍາສາດ​ຢູ່​ໃນ​ເວ​ເນ​ຊູ​ເອ​ລາ ວ່າ: “ໃນ​ແຕ່​ລະ​ວັນ ພວກ​ເຮົາ (ເວ​ເນ​ຊູ​ເອ​ລາ) ຈະ​ໄດ້​ຮັບ​ຄວາມ​ຊ່ວຍເຫຼືອ​ມະນຸດສະທຳ” ໂດຍ​ທີ່​ເຄື່ອງ​ຊ່ວຍເຫຼືອ ຂອງ​ຣັດ​ເຊຍ ຈະ​ໄດ້​ຖືກ​ສົ່ງ​ໄປ​ເຖິງ​ສະໜາມ​ບິນ​ສາກົນ ກາ​ຣາ​ກາ​​ສ.

    ໃນ​ຂະນະ​ດຽວ​ກັນ ທ່ານ ຈວານ ກວາຍ​ໂດ ຜູ້ນຳ​ຝ່າຍ​ຄ້ານ​ໃນ​ເວ​ເນ​ຊູ​ເອ​ລາ ກ່າວ​ເມື່ອ​ວັນ​ທີ 19 ກຸມພາ​ນີ້​ວ່າ ປະເທດ​ຕ່າງໆ​ໃນ​ເອີ​ຣົບ ອັນ​ປະກອບ​ດ້ວຍ​ເຢຍ​ລະ​ມັນ ແອັດ​ສະ​ປາຍ ອີ​ຕາ​ລີ ຝຣັ່ງ ແລະ​ອັງກິດ ໄດ້​ໃຫ້​ຄວາມ​ຊ່ວຍເຫຼືອ​ເປັນ​ເງິນ​ກວ່າ 18 ລ້ານ​ໂດ​ລາ​ສະຫະລັດ ແລະ​ເຄື່ອງ​ຊ່ວຍເຫຼືອ ມະນຸດສະທຳ 70 ໂຕນ ພ້ອມ​ດ້ວຍ​ຢາ​ປົວ​ພະຍາດ ໃຫ້​ແກ່​ປະຊາຊົນ​ເວ​ເນ​ຊູ​ເອ​ລາ.

ທ່ານ ກວາຍ​ໂດ ຜູ້​ຊຶ່ງ​ໄດ້​ແຕ່ງ​ຕົນ​ເອງ​ໃຫ້​ເປັນ​ປະທານາທິບໍດີ ຊົ່ວຄາວ​ຂອງ​ເວ​ເນ​ຊູ​ເອ​ລາ ເມື່ອ​ວັນ​ທີ 23 ມັງກອນ​ທີ່​ຜ່ານ​ມາ​ນັ້ນ ເວົ້າ​ວ່າ​ໄດ້​ປະຊຸມ​ກັບ​ເອກ​ອັກ​ຄະ​ລັດ​ຖະ​ທູດ ຂອງ​ບັນດາ​ປະເທດ​ດັ່ງກ່າວ​ຢູ່​ໃນ​ເວ​ເນ​ຊູ​ເອ​ລາ ແລະ​ກໍ​ໄດ້​ຮັບ​ຄວາມ​ສະໜັບສະໜູນ​ຕໍ່​ແຜນການ ນຳ​ເອົາ​ເຄື່ອງ​ຊ່ວຍເຫຼືອ ຈາກ​ໂກ​ລົມ​ບີ ເຂົ້າ​ໄປ​ໃນ​ເວ​ເນ​ຊູ​ເອ​ລາ ໃນ​ວັນ​ທີ 23 ກຸມພາ​ນີ້.

ຂ່າວທີ່ກ່ຽວຂ້ອງ