ອັດຕະປື ເຝິກອົບຮົມຫັດກາຍະບໍລິຫານໃຫ້ພະນັກງານ

325 22 ກ.ພ. 2019 ວົງຈອນກີລາ
ອັດຕະປື ເຝິກອົບຮົມຫັດກາຍະບໍລິຫານໃຫ້ພະນັກງານ

    ກອງ​ປະ­ຊຸມ​ເຝິກ­ອົບ­ຮົມ​ຄັ້ງ​ນີ້ ໄດ້​ຈັດ​ຂຶ້ນ​ໃນ​ວັນ​ທີ 18 ກຸມ­ພາ 2019 ຢູ່​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ໂດຍ​ມີ​ທ່ານ ສົມ​ໃຕ ຫີນ​ເພັດ​ສະ​ດາ​ວົງ ຄະ­ນະ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ອັດ​ຕະ​ປື ມີ​ບັນ­ດາ​ຫົວ­ໜ້າ​ຂະ­ແໜງ ຄູ​ເຝິກ ວິ­ຊາ​ການ​ທີ່​ກ່ຽວ­ຂ້ອງ ພ້ອມ​ດ້ວຍ​ສຳ​ມະ​ນາ​ກອນ ຈາກ​ພະ­ແນກ­ການ​ອ້ອມ​ຂ້າງ​ແຂວງ​ທີ່​ຖືກ​ເຊີນ​ເຂົ້າ​ຮ່ວມ.

    ທ່ານ ສົມ​ໄຕ ຫີນ​ເພັດ​ສະ​ດາ​ວົງ ກ່າວ​ວ່າ: ການ​ຈັດ​ເຝິກ­ອົບ­ຮົມ​ຄັ້ງ​ນີ້ ແມ່ນ​ປະ­ຕິ­ບັດ​ຕາມ​ທິດ​ຊີ້​ນຳ​ຂອງ​ກະ­ຊວງ​ສຶກ​ສາ​ທິ​ການ ແລະ ກີ­ລາ ກໍ​ຄື ປະ­ຕິ­ບັດ​ຕາມ​ແຜນ​ຍຸດ​ທະ​ສາດ ການ​ພັດ­ທະ­ນາ​ກີ­ລາ-ກາຍ­ຍະ­ກຳ​ແຫ່ງ​ຊາດ ຄື​ແຕ່​ນີ້​ເຖິງ​ປີ 2020 ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ໃນ​ຂອບ​ເຂດ​ທົ່ວ​ປະ­ເທດ ໄດ້​ອອກ­ກຳ­ລັງ​ກາຍ ແລະ ຫຼິ້ນ​ກີ­ລາ​ເພື່ອ​ສຸ­ຂະ­ພາບ ໃຫ້​ບັນ­ລຸ​ໄດ້​ຕາມ​ຄາດ­ໝາຍ 30% ຢ່າງ​ເປັນ​ຂະ​ບວນ​ການ​ຟົດ­ຟື້ນ ແລະ ກວ້າງ­ຂວາງ ແຕ່​ສູນ​ກາງ​ລົງ​ຮອດ​ທ້ອງ­ຖິ່ນ ໂດຍ​ແນ­ໃສ່​ເຮັດ​ໃຫ້​ມີ​ສຸ­ຂະ­ພາບ​ແຂງ­ແຮງ ແລະ ມີ​ຈິດ­ໃຈ​ທີ່​ເຂັ້ມ­ແຂງ ແຂງ­ແຮງ ມີ​ໃບ​ໜ້າ​ແຈ່ມ​ໃສ ອາ­ລົມ​ດີ ສະ­ໝອງ​ປອດ­ໂປ່ງ ມີ​ຄວາມ​ສາ­ມັກ­ຄີ ໄມ­ຕີ​ຈິດ ມິດ­ຕະ­ພາບ​ກັບ​ເພື່ອນ​ຮ່ວມ​ງານ ແລະ ຄົນ​ອ້ອມ​ຂ້າງ​ຫຼາຍ​ຂຶ້ນ ເຮັດ​ໃຫ້­ການ​ປະ­ຕິ­ບັດ​ວຽກ​ງານ​ມີ​ປະ­ສິດ​ທີ​ພາບ​ຫຼາຍ​ຂຶ້ນ.

    ການ​ເຝິກ­ອົບ­ຮົມ​ຄັ້ງ​ນີ້ ໄດ້​ອີງ­ໃສ່​ຄູ່​ມື​ຫັດ​ກາ​ຍະ​ບໍ­ລິ­ຫານ ແລະ ການ​ອອກ­ກຳ­ລັງ​ກາຍ​ເຕັ້ນ​ແອ​ໂຣ​ບິກ​ຂອງ​ກົມ​ກີ­ລາ​ມວນ​ຊົນ ຊຶ່ງ​ປະ­ກອບ​ມີ​ທັງ​ພາກ​ທິດ​ສະ​ດີ ແລະ ພາກ​ປະ­ຕິ­ບັດ​ຕົວ​ຈິງ ລວມ​ທັງ​ໝົດ 7 ບົດ ໂດຍ​ຈະ​ໃຊ້​ເວ­ລາ 5 ວັນ ລະ­ຫວ່າງ​ວັນ​ທີ 18-22 ກຸມ­ພາ 2019 ຈຶ່ງ​ຈະ​ສຳ­ເລັດ ໂດຍ​ນຳ​ໃຊ້​ຄູ​ເຝິກ​ຈາກ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ.

ຂ່າວທີ່ກ່ຽວຂ້ອງ