ການສົ່ງເສີມການຜະລິດເປັນສິນຄ້າ ຍັງມີຫຼາຍຂອດບໍ່ສອດຄ່ອງ

312 22 ກ.ພ. 2019 ຂ່າວໜ້າ​ໜຶ່ງ

    ເພື່ອ​ສືບ­ຕໍ່​ເຜີຍ­ແຜ່​ຜົນ­ສຳ­ເລັດ​ຂອງ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ 8 ແລະ ກອງ​ປະ­ຊຸມ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຊຸດ​ທີ 1 ໃຫ້​ພະ­ນັກ­ງານ ປະ­ຊາ­ຊົນ​ພາຍ​ໃນ​ນະ­ຄອນ­ຫຼວງ ໄດ້​ຮັບ​ຮູ້ ແລະ ເຂົ້າ­ໃຈ​ຢ່າງ​ທົ່ວ​ເຖິງ ວັນ​ທີ 20 ກຸມ­ພາ 2019 ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ທີ 1 ນະ­ຄອນ­ຫຼວງ​ວຽງ​ຈັນ ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ (ສສ ນວ) ນຳ​ໂດຍ​ທ່ານ ສາຍ­ທອງ ແກ້ວ​ດວງ​ດີ ສສຊ ປະ­ທານ​ກຳ­ມາ​ທິ​ການ​ກົດ­ໝາຍ ສະ­ພາ​ແຫ່ງ​ຊາດ ໄດ້​ລົງ​ພົບ​ປະ​ອຳ­ນາດ​ການ​ປົກ­ຄອງ ປະ­ຊາ­ຊົນ​ບ້ານ​ອ່າງ​ໃຫຍ່ ແລະ ຫ້ວຍ​ຫ້ອມ ຢູ່​ວັດ​ບ້ານ​ອ່າງ​ໃຫຍ່ ເມືອງ​ສີ​ໂຄດ​ຕະ­ບອງ ໂດຍ​ມີ​ທ່ານ ບຸນ​ມີ ໄຊ​ຍະ​ວົງ ຮອງ​ເຈົ້າ­ເມືອງ​ສີ​ໂຄດ​ຕະ­ບອງ ພ້ອມ​ດ້ວຍ​ຄະ­ນະ​ໃຫ້­ການ​ຕ້ອນ­ຮັບ.

    ໂອ­ກາດ​ນີ້ ທ່ານ​ນາຍ­ບ້ານ​ອ່າງ​ໃຫຍ່ ແລະ ບ້ານ​ຫ້ວຍ​ຫ້ອມ ກໍ​ໄດ້​ລາຍ​ງານ​ສະ­ພາບ​ການ­ເຄື່ອນ­ໄຫວ ແລະ ແຜນ​ພັດ­ທະ­ນາ​ຂອງ​ບ້ານ​ໂດຍ​ລວມ ໂດຍ​ຍົກ​ໃຫ້​ເຫັນ​ທ່າ­ແຮງ​ໃນ​ການ​ຜະ­ລິດ​ກະ­ສິ­ກຳ ປູກ­ຝັງ-ລ້ຽງ­ສັດ ລາຍ​ຮັບ​ສະ­ເລ່ຍ​ຂອງ​ບ້ານ 1.400 ໂດ​ລາ​ສະ­ຫະ­ລັດ ຫຼື ປະ­ມານ 12 ລ້ານ​ກີບ​ຕໍ່​ຄົນ​ຕໍ່​ປີ 2 ບ້ານ​ໄດ້​ຖືກ​ຮັບ­ຮອງ​ເປັນ​ບ້ານ​ວັດ­ທະ­ນະ­ທຳ ແລະ ເປັນ​ບ້ານ​ພັດ­ທະ­ນາ ໃນ​ປີ 2013.

    ຈາກ​ນັ້ນ ສສຊ ແລະ ສສ ນວ ກໍ​ໄດ້​ຜັດ­ປ່ຽນ​ກັນ​ຂຶ້ນ​ລາຍ​ງານ​ຜົນ­ສຳ­ເລັດ​ຂອງ​ກອງ​ປະ­ຊຸມ ໂດຍ​ໄດ້​ຍົກ​ໃຫ້​ເຫັນ​ພາ­ລະ​ບົດ­ບາດ ສິດ ໜ້າ­ທີ່ ໃນ​ການ​ເປັນ​ຕົວ​ແທນ​ຂອງ​ປະ­ຊາ­ຊົນ ການ​ນຳ​ສະ­ເໜີ​ຂໍ້​ຄິດ​ເຫັນ​ຕໍ່​ກອງ​ປະ­ຊຸມ ການ​ຕິດ­ຕາມ​ກວດ­ກາ ການ​ປະ­ຕິ­ບັດ​ໜ້າ­ທີ່​ການ­ເຄື່ອນ­ໄຫວ​ວຽກ​ງານ​ລັດ­ຖະ­ບານ ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເຊິ່ງ​ມີ​ຫຼາຍ​ວຽກ​ງານ​ທີ່​ສາ­ມາດ​ເຮັດ​ໄດ້ ແລະ ກໍ​ມີ​ຫຼາຍ​ຂະ­ແໜງ­ການ ທີ່​ຈະ​ຕ້ອງ​ໄດ້​ເອົາ­ໃຈ­ໃສ່​ປັບ­ປຸງ​ຄືນ­ໃໝ່ ເຊິ່ງ​ການ​ພົບ​ປະ​ຄັ້ງ​ນີ້ ໂດຍ​ລວມ​ປະ­ຊາ­ຊົນ​ເຫັນ​ດີ​ເປັນ​ເອ­ກະ​ພາບ ແລະ ມີ​ຄວາມ​ເພິ່ງ​ພໍ­ໃຈ​ຕໍ່​ການ​ປະ­ຕິ­ບັດ​ໜ້າ­ທີ່​ຂອງ ສສຊ ແລະ ສສ ນວ ທີ່​ເອົາ­ໃຈ­ໃສ່​ເຮັດ​ໜ້າ­ທີ່​ຂອງ​ຕົນ ແລະ ເພິ່ງ​ພໍ­ໃຈ​ຕໍ່​ຜົນ­ງານ​ການ​ບໍ­ລິ­ຫານ​ຂອງ​ລັດ­ຖະ­ບານ ນອກ​ນີ້ ຍັງ​ໄດ້​ເປີດ​ໂອ­ກາດ​ໃຫ້​ປະ­ຊາ­ຊົນ​ປະ­ກອບ​ຄຳ​ເຫັນ ເຊິ່ງ​ສ່ວນ​ໃຫຍ່​ແມ່ນ​ເນັ້ນ​ໃສ່​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ການ​ຍົກ​ສູງ​ຄຸນ​ນະ​ພາບ​ຊີ­ວິດ​ຂອງ​ປະ­ຊາ­ຊົນ ໂດຍ​ສະ­ເພາະ ການ​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ຍັງ​ມີ​ຫຼາຍ​ຂອດ​ບໍ່​ສອດ­ຄ່ອງ ທີ່​ຈະ​ຕ້ອງ​ມີ​ການ​ປັບ­ປຸງ​ແກ້​ໄຂ ເຮັດ​ໃຫ້​ບັນ­ຍາ­ກາດ​ການ​ພົບ​ປະ​ດຳ­ເນີນ​ໄປ​ຢ່າງ​ມີ​ເນື້ອ​ໃນ ແລະ ຮັກ­ສາ​ສິດ­ຜົນ­ປະ­ໂຫຍດ​ອັນ​ຊອບ​ທຳ​ຂອງ​ປະ­ຊາ­ຊົນ.

    ຕອນ​ບ່າຍ​ວັນ​ດຽວ​ກັນ​ນີ້ ຄະ­ນະ ສສຊ ແລະ ສສ ນວ ຍັງ​ໄດ້​ພົບ​ປະ​ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ​ຢູ່​ບ້ານ​ໜອງ​ດາ ຕື່ມ​ອີກ.

ຂ່າວທີ່ກ່ຽວຂ້ອງ