ຂ່າວຫຼ້າສຸດ

ປະເມີນແຜນງານ ວຽກງານອາຫານທ່ຽງໃນໂຮງຮຽນ

436 22 ກ.ພ. 2019 ຂ່າວໜ້າ​ໜຶ່ງ

    ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຮ່ວມ​ກັບ​ອົງ­ການ​ອາ­ຫານ​ໂລກ ປະ­ຈຳ ສປປ ລາວ ຈັດ​ກອງ​ປະ­ຊຸມ​ທົບ​ທວນ​ຄວາມ​ຄືບ​ໜ້າ­ການ​ມອບ-ຮັບ​ແຜນ​ງານ​ວຽກ​ງານ​ອາ­ຫານ​ທ່ຽງ​ໃນ​ໂຮງ­ຮຽນ ຂຶ້ນ​ວັນ​ທີ 21-22 ກຸມ­ພາ 2019 ຢູ່​ໂຮງ­ແຮມ​ຄຣາວ​ພາ​ຊາ ໂດຍ​ເປັນ​ປະ­ທານ​ຂອງ​ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ​ກະ­ຊວງ ສສກ ແລະ ທ່ານ ຢານ ເດວບ​ຣາ​ເຣ ຜູ້­ອຳ­ນວຍ­ການ​ອົງ­ການ​ອາ­ຫານ​ໂລກ ປະ­ຈຳ ສປປ ລາວ ມີ​ພາກ­ສ່ວນ​ກ່ຽວ­ຂ້ອງ​ຈາກ​ສູນ​ກາງ ແລະ ທ້ອງ­ຖິ່ນ​ເຂົ້າ​ຮ່ວມ.

    ຜູ້​ແທນ​ກອງ​ປະ­ຊຸມ​ຈາກ 7 ແຂວງ ແລະ 9 ເມືອງ ທີ່​ເຂົ້າ​ຮ່ວມ​ໂຄງ­ການ ໄດ້​ປຶກ­ສາ​ຫາ­ລື​ກັນ​ກ່ຽວ​ກັບ​ຄວາມ​ຄືບ​ໜ້າ ແລະ ຜົນ​ໄດ້​ຮັບ​ຈາກ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ອາ­ຫານ​ທ່ຽງ​ໃນ​ໂຮງ­ຮຽນ​ໃນ​ໄລ­ຍະ​ຜ່ານ​ມາ ອົງ­ການ​ອາ­ຫານ​ໂລກ ປະ­ຈຳ ສປປ ລາວ ໄດ້​ສະ­ໜັບ­ສະ­ໜູນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ອາ­ຫານ​ທ່ຽງ​ໃນ​ໂຮງ­ຮຽນ 515 ແຫ່ງ ໃນ 9 ເມືອງ ຄື: ເມືອງ​ບຸນ​ເໜືອ ແຂວງ​ຜົ້ງ​ສາ­ລີ ເມືອງ​ໄຊ ເມືອງ​ນາ​ໝໍ້ ເມືອງ​ແບງ ເມືອງ​ງາ​ແຂວງ​ອຸ­ດົມ​ໄຊ ເມືອງ​ນ້ຳ​ທາ​ເມືອງ​ນາ​ແລ ເມືອງ​ວຽງ​ພູ​ຄາ ແລະ ເມືອງ​ສິງ ແຂວງ​ຫຼວງ​ນ້ຳ​ທາ ທີ່​ຈະ​ມີ​ການ​ມອບ​ຮັບ​ໃຫ້​ລັດ­ຖະ­ບານ ໃນ​ເດືອນ​ມິ­ຖຸ­ນາ 2019 ເປັນ­ຕົ້ນ​ໄປ ນອກ​ນີ້ ກອງ​ປະ­ຊຸມ​ຍັງ​ໄດ້​ນຳ​ສະ­ເໜີ​ວິ­ທີ​ການ​ໃຫ້ 21 ເມືອງ​ທີ່​ນອນ​ຢູ່​ໃນ 4 ແຂວງ​ທີ່​ເຫຼືອ ເພື່ອ​ໃຫ້​ເລີ່ມ​ຕົ້ນ​ວາງ​ແຜນ­ການ​ມອບ-ຮັບ​ອີກ 950 ໂຮງ­ຮຽນ ທີ່​ຈະ​ມີ​ຂຶ້ນ​ໃນ​ປີ 2021 ບົດ­ຮຽນ​ທີ່​ຖອດ​ຖອນ​ໄດ້​ຈາກ​ການ​ມອບ-ຮັບ​ວຽກ​ງານ​ອາ­ຫານ​ທ່ຽງ ໃນ​ໂຮງ­ຮຽນ​ຈະ​ເປັນ​ບ່ອນ​ອີງ​ໃນ​ການ​ສະ­ໜັບ­ສະ­ໜູນ​ການ​ສ້າງ​ຄວາມ​ສາ­ມາດ ແລະ ຄວາມ​ເຂັ້ມ­ແຂງ​ໃຫ້​ຊຸມ​ຊົນ ແລະ ລັດ­ຖະ­ບານ​ດ້ານ​ວິ­ຊາ​ການ​ໃນ​ຂັ້ນ​ຕໍ່​ໄປ.

    ທ່ານ ຢານ ເດວບ​ຣາ​ເຣ ກ່າວ​ວ່າ: ນັບ​ຕັ້ງ­ແຕ່​ປີ 2002 ເປັນ­ຕົ້ນ​ມາ ອົງ­ການ​ອາ­ຫານ​ໂລກ ໄດ້​ເລີ່ມ​ປະ­ຕິ­ບັດ​ວຽກ​ງານ​ອາ­ຫານ​ໃນ​ໂຮງ­ຮຽນ​ຢູ່ ສປປ ລາວ ໂດຍ​ການ​ຮ່ວມ​ມື​ກັບ​ກະ­ຊວງ ສສກ ອົງ­ການ​ອາ­ຫານ​ໂລກ​ສະ­ໜັບ­ສະ­ໜູນ​ອາ­ຫານ​ໃຫ້​ນັກ­ຮຽນ​ຊັ້ນ​ອະ­ນຸ­ບານ ແລະ ປະ­ຖົມ ເພື່ອ​ສົ່ງ­ເສີມ​ການ​ຮຽນ​ຮູ້ ແລະ ການ​ເຂົ້າ​ເຖິງ ການ​ສຶກ​ສາ​ສົ່ງ­ເສີມ​ດ້ານ​ສຸ­ຂະ­ພາບ ແລະ ໂພ­ຊະ​ນາ​ການ ໃນ​ເຂດ​ຊົນ­ນະ­ບົດ​ຫ່າງ​ໄກ​ສອກ­ຫຼີກ​ອົງ­ການ​ອາ­ຫານ​ໂລກ​ໄດ້​ໃຫ້­ການ​ຊ່ວຍ­ເຫຼືອ ເພື່ອ​ເຮັດ​ໃຫ້​ນັກ­ຮຽນ​ຊັ້ນ​ອະ­ນຸ­ບານ ແລະ ປະ­ຖົມ 1.450 ກວ່າ​ແຫ່ງ ມີ​ອາ­ຫານ​ທ່ຽງ​ກິນ​ແຕ່​ລະ​ວັນ ຫຼັງ​ຈາກ​ນະ­ໂຍ­ບາຍ​ແຫ່ງ​ຊາດ​ວ່າ​ດ້ວຍ​ການ​ສົ່ງ­ເສີມ​ອາ­ຫານ​ທ່ຽງ​ໃນ​ໂຮງ­ຮຽນ​ໄດ້​ຖືກ​ຮອງ​ຮັບ​ປີ 2014 ອົງ­ການ​ອາ­ຫານ​ໂລກ ໄດ້​ຈັດ​ຕັ້ງ​ປະ­ຕິ­ບັດ​ວຽກ​ງານ​ດັ່ງ­ກ່າວ ໃຫ້​ສອດ­ຄ່ອງ​ກັບ​ນະ­ໂຍ­ບາຍ​ຂອງ​ລັດ­ຖະ­ບານ ໄດ້​ສະ­ໜັບ­ສະ­ໜູນ​ການ​ເສີມ​ສ້າງ​ຄວາມ​ສາ­ມາດ​ໃຫ້​ພາກ​ລັດ ແລະ ຊຸມ​ຊົນ ເພື່ອ​ຍົກ​ລະ­ດັບ​ຄວາມ​ເປັນ​ເຈົ້າ​ການ​ໃນ​ວຽກ​ງານ ການ​ມີ​ສ່ວນ​ຮ່ວມ ແລະ ການ​ລົງ­ທຶນ​ໃສ່​ວຽກ​ງານ​ນີ້​ເພື່ອ​ເປັນ​ທິດ​ທາງ​ໃນ​ການ​ຄ່ຽນ​ຖ່າຍ ເທື່ອ​ລະ​ກ້າວ.

    ໂອ­ກາດ​ນີ້ ອົງ­ການ​ອາ­ຫານ​ໂລກ ຍັງ​ໄດ້​ມອບ​ຄອມ​ພິວ​ເຕີ​ຕັ້ງ​ໂຕະ 28 ໜ່ວຍ ຄອມ​ພິວ​ເຕີ ແລບ​ທອບ 14 ໜ່ວຍ ຈັກ​ພິມ 14 ໜ່ວຍ ແລະ ໂປ​ເຈັກ​ເຕີ 13 ໜ່ວຍ ໃຫ້ 9 ເມືອງ 3 ແຂວງ ແລະ ສູນ​ສຶກ​ສາ​ຮຽນ​ຮ່ວມ​ກະ­ຊວງ ສສກ ເພື່ອ​ສະ­ໜັບ­ສະ­ໜູນ​ການ​ລາຍ​ງານ ແລະ ການ​ສ້າງ​ຫຼັກ​ຖານ​ດ້ານ​ຂໍ້​ມູນ​ໃຫ້​ວຽກ​ງານ​ອາ­ຫານ​ທ່ຽງ​ໃນ​ໂຮງ­ຮຽນ​ຕື່ມ​ອີກ.

ຂ່າວທີ່ກ່ຽວຂ້ອງ