ຂ່າວຫຼ້າສຸດ

ການຮ່ວມມືຂະແໜງກົດໝາຍ ແລະ ຍຸຕິທຳ ລາວ-ຍີ່ປຸ່ນ ມີປະສິດທິຜົນສູງ

376 22 ກ.ພ. 2019 ຂ່າວໜ້າ​ໜຶ່ງ

    ໄລ­ຍະ 20 ປີ ແຫ່ງ​ການ​ຮ່ວມ​ມື​ລະ­ຫວ່າງ ລາວ-ຍີ່­ປຸ່ນ ໃນ​ຂົງ­ເຂດ​ກົດ­ໝາຍ ແລະ ຍຸ­ຕິ​ທຳ ໄດ້​ປະ­ກອບ­ສ່ວນ​ສຳ­ຄັນ ໃນ​ການ​ສ້າງ​ຄວາມ​ເຂັ້ມ­ແຂງ​ໃຫ້​ວຽກ​ງານ​ກົດ­ໝາຍ ແລະ ຍຸ­ຕິ​ທຳ​ຂອງ​ລາວ ທັງ​ປະ­ກອບ­ສ່ວນ​ເຮັດ​ໃຫ້­ການ​ຄຸ້ມ​ຄອງ​ລັດ-ຄຸ້ມ​ຄອງ​ສັງ­ຄົມ ຫັນ​ເຂົ້າ​ສູ່​ລະ­ບົບ​ກົດ­ໝາຍ​ເທື່ອ​ລະ​ກ້າວ.

    ວັນ​ທີ 19 ກຸມ­ພາ 2019 ຢູ່​ສູນ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ ໄດ້​ຈັດ​ພິ­ທີ​ສະ­ເຫຼີມ­ສະ­ຫຼອງ ຄົບ­ຮອບ 20 ປີ ແຫ່ງ​ການ​ຮ່ວມ​ມື​ມິດ­ຕະ­ພາບ ລາວ-ຍີ່­ປຸ່ນ ໃນ​ຂະ­ແໜງ​ຍຸ­ຕິ​ທຳ ແລະ ກົດ­ໝາຍ (1998-2018) ຂຶ້ນ ໂດຍ​ມີ​ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ທ່ານ ທາ​ເຄ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ ສປປ ລາວ ທ່ານ ລຽວ​ທາ​ໂລະ ໂອ​ບະ ຫົວ­ໜ້າ​ສະ​ຖາ​ບັນ​ຄົ້ນ­ຄວ້າ ແລະ ເຝິກ­ອົບ­ຮົມ​ຍຸ­ຕິ​ທຳ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ໄຊ​ສີ ສັນ­ຕິ​ວົງ ກ່າວ​ວ່າ: ຂະ­ແໜງ​ກົດ­ໝາຍ ແລະ ຍຸ­ຕິ​ທຳ ລາວ-ຍີ່­ປຸ່ນ ໄດ້​ເລີ່ມ​ແລກ­ປ່ຽນ​ດ້ານ​ວິ­ຊາ​ການ ແລະ ຮ່ວມ​ມື​ຊ່ວຍ­ເຫຼືອ​ຢ່າງ​ເປັນ​ຮູບ​ປະ​ທຳ ໃນ​ປີ 1998 ເປັນ­ຕົ້ນ​ມາ ປັດ­ຈຸ­ບັນ​ການ​ຮ່ວມ​ມື ແລະ ສາ­ມັກ­ຄີ​ລະ­ຫວ່າງ​ພະ­ນັກ­ງານ-ລັດ­ຖະ­ກອນ ໃນ​ຂະ­ແໜງ​ກົດ­ໝາຍ ແລະ ຍຸ­ຕິ​ທຳ ລາວ-ຍີ່­ປຸ່ນ ໄດ້​ຮັບ​ການ​ເພີ່ມ​ທະ­ວີ ແລະ ຂະ­ຫຍາຍ­ຕົວ​ຢ່າງ​ບໍ່​ຢຸດ​ຢັ້ງ ອັນ​ພົ້ນ​ເດັ່ນ​ແມ່ນ​ຄະ­ນະ​ນຳ​ຂັ້ນ​ສູງ ແລະ ວິ­ຊາ​ການ​ຂະ­ແໜງ​ກົດ­ໝາຍ ແລະ ຍຸ­ຕິ​ທຳ ສປປ ລາວ ສູນ​ກາງ ແລະ ທ້ອງ­ຖິ່ນ ໄດ້​ໄປ​ຢ້ຽມ­ຢາມ ແລະ ຖອດ​ຖອນ​ບົດ­ຮຽນ​ກ່ຽວ​ກັບ​ກົດ­ໝາຍ ແລະ ວຽກ​ຍຸ­ຕິ​ທຳ​ຢູ່​ປະ­ເທດ​ຍີ່­ປຸ່ນ ຫຼາຍ 100 ຄົນ ສົ່ງ​ຜົນ​ໃຫ້​ຂະ­ແໜງ​ດັ່ງ­ກ່າວ ໄດ້​ມີ​ຄູ່​ມື​ກ່ຽວ​ກັບ​ການ​ດຳ­ເນີນ​ຄະ­ດີ ແລະ ທິດ​ສະ​ດີ​ກົດ­ໝາຍ​ທີ່​ເປັນ​ພື້ນ­ຖານ ບ່ອນ​ອີງ​ໃຫ້­ການ​ປະ­ຕິ­ບັດ​ໜ້າ­ທີ່​ຂອງ​ຕົນ​ໃຫ້​ເຂັ້ມ­ແຂງ ແລະ ຖືກ­ຕ້ອງ​ສອດ­ຄ່ອງ​ກັບ​ບົດ­ຮຽນ​ທີ່​ດີ​ຂອງ​ສາ­ກົນ ນອກ​ນີ້ ຂະ­ແໜງ­ການ​ສຶກ​ສາ​ກົດ­ໝາຍ ແລະ ເຝິກ­ອົບ­ຮົມ​ກົດ­ໝາຍ ກໍ​ໄດ້​ຮັບ​ການ​ພັດ­ທະ­ນາ​ເຕັກ­ນິກ​ການ​ຮຽນ-ການ​ສອນ ແລະ ເຝິກ­ອົບ­ຮົມ​ວິ­ຊາ​ສະ­ເພາະ​ໃຫ້​ເຂັ້ມ­ແຂງ ແລະ ໜັກ​ແໜ້ນ ພະ­ນັກ­ງານ​ວິ­ຊາ​ການ​ຫຼາຍ 100 ຄົນ ໄດ້​ຮັບ​ການ​ຍົກ​ລະ­ດັບ​ປະ­ລິນ­ຍາ​ຕີ ໂທ ແລະ ເອກ ເຊິ່ງ​ສາ­ມາດ​ປະ­ກອບ­ສ່ວນ​ໃນ​ການ​ຍົກ​ລະ­ດັບ ແລະ ສ້າງ​ຄວາມ​ເຂັ້ມ­ແຂງ​ໃຫ້​ຂະ­ແໜງ­ການ​ດັ່ງ­ກ່າວ ແລະ ຈາກ​ການ​ສຶກ​ສາ​ຄົ້ນ­ຄວ້າ ຖອດ​ຖອນ​ບົດ­ຮຽນ​ກົດ­ໝາຍ ແລະ ທິດ​ສະ​ດີ​ຂອງ​ປະ­ເທດ​ຍີ່­ປຸ່ນ ຈຶ່ງ​ມີ​ກົດ­ໝາຍ​ຈຳ­ນວນ​ໜຶ່ງ​ໄດ້​ຮັບ​ການ​ພັດ­ທະ­ນາ ແລະ ປັບ­ປຸງ​ໃຫ້​ດີ​ຂຶ້ນ ໂດຍ​ສະ­ເພາະ ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ແພ່ງ ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ອາ­ຍາ ກົດ­ໝາຍ​ອາ­ຍາ ແລະ ອື່ນໆ.

    ພິ­ເສດ ນັບ​ແຕ່​ປີ 2007 ເປັນ­ຕົ້ນ​ມາ ສປປ ລາວ ໄດ້​ຮັບ​ການ​ຊຸກ­ຍູ້​ຊ່ວຍ­ເຫຼືອ​ທຶນ­ຮອນ ແລະ ວິ­ຊາ​ການ​ຈາກ​ລັດ­ຖະ­ບານ​ຍີ່­ປຸ່ນ ເພື່ອ​ດຳ­ເນີນ​ການ​ສ້າງ​ປະ­ມວນ​ກົດ­ໝາຍ​ແພ່ງ ສະ­ບັບ​ປະ­ຫວັດ­ສາດ​ສຳ­ເລັດ ແລະ ໄດ້​ຮັບ­ຮອງ​ຈາກ​ສະ­ພາ​ແຫ່ງ​ຊາດ ໃນ​ວັນ​ທີ 6 ທັນ­ວາ 2018 ສະ­ແດງ​ເຖິງ​ການ​ຮ່ວມ​ມື​ທີ່​ມີ​ປະ​ສິດ­ທິ​ຜົນ​ສູງ​ຂອງ​ຂະ­ແໜງ​ກົດ­ໝາຍ ແລະ ຍຸ­ຕິ​ທຳ ລະ­ຫວ່າງ ລາວ-ຍີ່­ປຸ່ນ.

ຂ່າວທີ່ກ່ຽວຂ້ອງ