ຂ່າວຫຼ້າສຸດ

ຄະນະຜູ້ແທນມູນນິທິຈີນ ເພື່ອສັນຕິພາບ ແລະ ການພັດທະນາ ຢ້ຽມຢາມ ສປປ ລາວ

438 22 ກ.ພ. 2019 ຂ່າວໜ້າ​ໜຶ່ງ
ຄະນະຜູ້ແທນມູນນິທິຈີນ ເພື່ອສັນຕິພາບ ແລະ ການພັດທະນາ ຢ້ຽມຢາມ ສປປ ລາວ

    ໂດຍ​ຕອບ​ສະ­ໜອງ​ຄຳ​ເຊີນ​ຂອງ​ສະ­ຫາຍ ສົມ​ພັນ ແພງ​ຄຳ​ມີ ກຳ­ມະ­ການ​ສູນ​ກາງ​ພັກ ຮອງ​ປະ­ທານ​ສະ­ພາ​ແຫ່ງ​ຊາດ ປະ­ທານ​ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ສະ­ຫາຍ ກາວ ຢູນ​ຫຼົງ ຮອງ​ປະ­ທານ​ສະ­ພາ​ທີ່​ປຶກ­ສາ​ການ­ເມືອງ​ແຫ່ງ​ປະ­ເທດ​ຈີນ ປະ­ທານ​ມູນ​ນິ­ທິ​ຈີນ​ເພື່ອ​ສັນ­ຕິ­ພາບ ແລະ ການ​ພັດ­ທະ­ນາ ໄດ້​ນຳ­ພາ​ຄະ­ນະ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ແຕ່​ວັນ​ທີ 21-22 ກຸມ­ພາ 2019.

    ພິ­ທີ​ພົບ​ປະ​ສອງ​ຝ່າຍ ໄດ້​ຈັດ​ຂຶ້ນ​ວັນ​ທີ 21 ກຸມ­ພາ ຢູ່​ນະ­ຄອນ­ຫຼວງ​ວຽງ​ຈັນ ເຊິ່ງ​ຝ່າຍ​ລາວ​ນຳ​ໂດຍ​ສະ­ຫາຍ ສົມ​ພັນ ແພງ​ຄຳ​ມີ ແລະ ຝ່າຍ​ຈີນ ນຳ​ໂດຍ​ສະ­ຫາຍ ກາວ ຢູນ​ຫຼົງ ເຊິ່ງ​ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະ­ພາບ​ການ​ພົ້ນ​ເດັ່ນ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ແຕ່​ລະ​ປະ­ເທດ ໄດ້​ທົບ​ທວນ­ຄືນ ແລະ ຕີ​ລາ­ຄາ​ການ​ພົວ­ພັນ​ຮ່ວມ​ມື​ໃນ​ໄລ­ຍະ​ຜ່ານ​ມາ ພ້ອມ​ທັງ​ປຶກ­ສາ​ຫາ­ລື​ແຜນ­ການ​ແລກ­ປ່ຽນ​ພົວ­ພັນ​ຮ່ວມ​ມື​ວຽກ​ງານ​ໃນ­ຕໍ່­ໜ້າ ໃຫ້​ມີ​ຄວາມ​ເລິກ­ເຊິ່ງ ແລະ ມີ​ຜົນ­ສຳ­ເລັດ​ຍິ່ງ​ຂຶ້ນ ຈາກ​ນັ້ນ ຄະ­ນະ​ຜູ້​ແທນ​ສັນ­ຕິ­ພາບ 2 ຝ່າຍ ກໍ​ໄດ້​ເຂົ້າ​ຮ່ວມ​ພິ­ທີ​ມອບ-ຮັບ​ອາ­ຄານ​ໂຮງ­ຮຽນ​ມັດ­ທະ­ຍົມ​ຕອນ​ຕົ້ນ​ບ້ານ ເມືອງ​ນ້ອຍ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ເຊິ່ງ​ເປັນ​ໂຮງ­ຮຽນ​ຫຼັງ​ທີ 7 ທີ່​ສ້າງ​ຂຶ້ນ​ໂດຍ​ການ​ຮ່ວມ​ມື​ລະ­ຫວ່າງ​ຄະ­ນະ​ສັນ­ຕິ­ພາບ ແລະ ສາ­ມັກ­ຄີ​ຂອງ​ລາວ ແລະ ມູນ​ນິ­ທິ​ຈີນ​ເພື່ອ​ສັນ­ຕິ­ພາບ ແລະ ການ​ພັດ­ທະ­ນາ ເຊິ່ງ​ໄດ້​ເລີ່ມ​ກໍ່­ສ້າງ​ວັນ​ທີ 1 ເມ­ສາ 2018 ແລະ ສຳ­ເລັດ​ວັນ​ທີ 1 ກຸມ­ພາ 2019 ມູນ​ຄ່າ 450.000 ໂດ​ລາ​ສະ­ຫະ­ລັດ ຫຼື ປະ­ມານ 3,86 ຕື້​ກີບ ເປັນ​ອາ­ຄານ​ຮຽນ 2 ຊັ້ນ ມີ 14 ຫ້ອງ​ຮຽນ 2 ຫ້ອງ­ການ 6 ຫ້ອງ​ນ້ຳ 4 ຫ້ອງ​ພັກ​ຄູ 1 ຫ້ອງ​ສະ­ໝຸດ ແລະ ມີ​ອຸ­ປະ­ກອນ​ການ​ຮຽນ​ຄົບ​ຊຸດ.

    ໃນ​ໄລ­ຍະ​ການ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ຄະ­ນະ​ຜູ້​ແທນ​ດັ່ງ­ກ່າວ ຍັງ​ໄດ້​ເຂົ້າ​ຢ້ຽມ​ຄຳ­ນັບ​ສະ­ຫາຍ​ນາງ ປາ­ນີ ຢາ​ທໍ່​ຕູ້ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ສະ­ພາ​ແຫ່ງ​ຊາດ ແລະ ພົບ​ປະ​ກັບ​ສະ­ຫາຍ​ນາງ ສູນ​ທອນ ໄຊ​ຍະ​ຈັກ ກຳ­ມະ­ການ​ສູນ​ກາງ​ພັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ ສູນ​ກາງ​ພັກ ເຊິ່ງ 2 ຝ່າຍ​ໄດ້​ຕີ​ລາ­ຄາ​ສູງ​ຕໍ່​ສາຍ​ພົວ­ພັນ​ມິດ­ຕະ­ພາບ​ອັນ​ເປັນ​ມູນ­ເຊື້ອ ແລະ ການ​ຮ່ວມ​ມື​ແບບ​ຄູ່​ຮ່ວມ​ຍຸດ​ທະ​ສາດ​ຮອບ­ດ້ານ ແລະ ຄວາມ​ໝັ້ນ­ຄົງ​ຍາວ​ນານ ລະ­ຫວ່າງ​ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ-ຈີນ ທີ່​ນັບ​ມື້​ໄດ້​ຮັບ​ການ​ເສີມ​ຂະ­ຫຍາຍ ແລະ ແຕກ​ດອກ​ອອກ​ຜົນ ພ້ອມ​ທັງ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ການ​ພົວ­ພັນ​ຮ່ວມ​ມື ລະ­ຫວ່າງ​ສອງ​ອົງ­ການ​ສັນ­ຕິ­ພາບ​ລາວ ແລະ ຈີນ ທີ່​ໄດ້​ປະ­ກອບ­ສ່ວນ​ໃນ​ການ​ສ້າງ­ສາ​ພັດ­ທະ­ນາ ສປປ ລາວ ໂດຍ​ສະ­ເພາະ ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ດ້ານ​ການ​ສຶກ​ສາ ເຮັດ​ໃຫ້​ນັກ­ຮຽນ​ລາວ​ໄດ້​ຮັບ​ການ​ສຶກ​ສາ​ໃນ​ເງື່ອນ­ໄຂ​ທີ່​ດີ​ຂຶ້ນ.

    ວັນ​ດຽວ​ກັນ​ນີ້ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ຍັງ​ໄດ້​ຕາງ­ໜ້າ​ໃຫ້​ລັດ­ຖະ­ບານ ສປປ ລາວ ປະ­ດັບ​ຫຼຽນ​ໄຊ​ພັດ­ທະ­ນາ ຊັ້ນ I ເຊິ່ງ​ເປັນ​ຫຼຽນ​ສູງ​ສົ່ງ​ຂອງ​ລັດ­ຖະ­ບານ​ລາວ ໃຫ້​ມູນ​ນິ­ທິ​ຈີນ ເພື່ອ​ສັນ­ຕິ­ພາບ ແລະ ການ​ພັດ­ທະ­ນາ ເພື່ອ​ຕອບ​ແທນ​ບຸນ­ຄຸນ​ທີ່​ມູນ​ນິ­ທິ​ດັ່ງ­ກ່າວ ໄດ້​ປະ­ກອບ­ສ່ວນ​ສຳ­ຄັນ​ໃນ​ການ​ຊຸກ­ຍູ້-ສົ່ງ­ເສີມ​ວຽກ​ງານ​ຕ່າງໆ​ຢູ່ ສປປ ລາວ.

ຂ່າວທີ່ກ່ຽວຂ້ອງ