ອະນຸສອນສະຖານ ທ່ານ ໜູຮັກ ພູມສະຫວັນ ຈະໄຂເປັນທາງການຕົ້ນເດືອນເມສານີ້

394 22 ກ.ພ. 2019 ຂ່າວໜ້າ​ໜຶ່ງ

    ທ່ານ ໜູ​ຮັກ ພູມ​ສະ­ຫວັນ ແມ່ນ​ໜຶ່ງ​ໃນ​ຜູ້­ນຳ​ການ​ປະ­ຕິ­ວັດ​ລາວ​ຮຸ່ນ​ທຳ​ອິດ​ຂອງ​ພັກ ຜູ້­ນຳ​ທີ່​ແສນ​ເຄົາ­ລົບ​ຮັກ​ຂອງ​ປວງ​ຊົນ​ລາວ​ທັງ​ຊາດ ຕະ­ຫຼອດ​ຊີ­ວິດ​ຂອງ​ເພິ່ນ ໄດ້​ທຸ່ມ​ເທ​ໝົດ​ກຳ­ລັງ­ວັງ­ຊາ ສະ­ຕິ​ປັນ­ຍາ​ອຸ­ທິດ​ໃຫ້​ພາ­ລະ­ກິດ​ຕໍ່­ສູ້​ປົດ​ປ່ອຍ​ຊາດ ເພື່ອ​ຄວາມ​ເປັນ​ເອ­ກະ­ລາດ ແລະ ອິດ­ສະ­ຫຼະ­ພາບ​ຂອງ​ຊາດ ອຸ­ທິດ​ໃຫ້​ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ເພື່ອ​ຄວາມ​ສົມ­ບູນ​ພູນ​ສຸກ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ຢ່າງ​ບໍ່​ຮູ້​ອິດ​ຮູ້​ເມື່ອຍ ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ ທີ່​ເພິ່ນ​ໄດ້​ສ້າງ​ໄວ້­ໜ້າ​ປະ­ຫວັດ­ສາດ​ຂອງ​ຊາດ​ລາວ​ວີ­ລະ​ຊົນ ແມ່ນ​ບໍ່​ມີ​ສິ່ງ​ໃດ​ຈະ​ປຽບ­ປານ ກົມ​ການ­ເມືອງ​ສູນ​ກາງ​ພັກ ຄະ­ນະ​ເລ­ຂາ­ທິ­ການ​ສູນ​ກາງ​ພັກ ຈິ່ງ​ໄດ້​ອອກ​ມະ­ຕິ​ຕົກ­ລົງ​ສະ­ບັບ​ເລກ​ທີ 143/ຄລສພ ລົງ​ວັນ​ທີ 14 ຕຸ­ລາ 2016 ວ່າ​ດ້ວຍ​ການ​ອະ­ນຸ​ຮັກ ຮັກ­ສາ​ອະ­ນຸ­ສອນ​ສະ­ຖານ​ທ່ານ ໜູ​ຮັກ ພູມ​ສະ­ຫວັນ ທີ່​ເປັນ​ເຮືອນ​ຂອງ​ເພິ່ນ ເພື່ອ​ໃຫ້​ຄົນ​ຮຸ່ນ​ໃໝ່ ສືບ​ທອດ​ໄດ້​ສຶກ​ສາ​ຄົ້ນ­ຄວ້າ​ຮ່ຳ­ຮຽນ ເອົາ​ແບບ­ຢ່າງ​ອັນ​ປະ­ເສີດ​ເລີດ​ລ້ຳ ແລະ ການ​ດຳ­ລົງ​ຊີ­ວິດ​ທີ່​ປອດ​ໃສ ຂາວ​ສະ­ອາດ​ຂອງ​ເພິ່ນ​ເຂົ້າ​ໄປ​ໝູນ​ໃຊ້​ໃນ​ວຽກ​ງານ.

    ວັນ​ທີ 21 ກຸມ­ພາ 2019 ຢູ່​ອະ­ນຸ­ສອນ​ສະ­ຖານ​ທ່ານ ໜູ​ຮັກ ພູມ​ສະ­ຫວັນ ບ້ານ​ສະ­ພານ​ທອງ​ເໜືອ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ກອງ​ປະ­ຊຸມ​ສຳ​ມະ​ນາ​ໂຕະ­ມົນ ຄັ້ງ​ທີ I ສັນ​ນະ​ສູດ​ຮູບ​ພາບ ແລະ ວັດ­ຖຸ​ພັນ​ຂອງ​ທ່ານ ໜູ​ຮັກ ພູມ​ສະ­ຫວັນ ໂດຍ​ມີ​ທ່ານ ທອງ​ວັນ ທອງ​ດີ ຫົວ­ໜ້າ​ຄະ­ນະ​ກຳ­ມະ­ການ​ກວດ­ກາ ການ​ຈັດ​ວາງ­ສະ­ແດງ​ອະ­ນຸ­ສອນ​ສະ­ຖານ ໜູ​ຮັກ ພູມ​ສະ­ຫວັນ ພ້ອມ​ດ້ວຍ​ວິ­ທະ­ຍາ­ກອນ ຄອບ­ຄົວ​ທ່ານ ໜູ​ຮັກ ພູມ​ສະ­ຫວັນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ເປັນ​ຂໍ້​ມູນ​ດ້ານ​ເນື້ອ​ໃນ​ທີ່​ຊັດ​ເຈນ ຈຶ່ງ​ໄດ້​ຈັດ​ກອງ​ປະ­ຊຸມ​ດັ່ງ­ກ່າວ​ຂຶ້ນ ເພື່ອ​ໃຫ້​ບັນ­ດາ​ທ່ານ​ທີ່​ເຄີຍ​ເຮັດ​ວຽກ​ຮັບ​ໃຊ້ ເຄີຍ​ດຳ­ລົງ​ຊີ­ວິດ​ຕິດ​ແທດ​ໃກ້­ຊິດ​ກັບ​ທ່ານ ໜູ​ຮັກ ພູມ​ສະ­ຫວັນ ໃນ​ເຮືອນ​ຫຼັງ​ນີ້ ໄດ້​ມີ​ຄຳ​ເຫັນ​ຫວນ​ຄືນ​ຄວາມ​ຊົງ​ຈຳ​ການ​ຈັດ​ວາງ​ບັນ­ດາ​ເຄື່ອງ­ໃຊ້ ຢູ່​ໃນ​ເຮືອນ​ຫຼັງ​ນີ້ ໃນ​ໄລ­ຍະ​ທີ່​ທ່ານ ໜູ​ຮັກ ພູມ​ສະ­ຫວັນ ຍັງ​ມີ​ຊີ­ວິດ​ຢູ່ ເພື່ອ​ໃຫ້​ຂໍ້​ມູນ​ອັນ​ລະ­ອຽດ​ໃຫ້​ວິ­ຊາ​ການ​ຄົ້ນ­ຄວ້າ​ໄດ້​ຮັບ​ຮູ້​ເຊື່ອມ​ຊຶມ ແລະ ນຳ­ໄປ​ຈັດ​ຕັ້ງ​ປະ­ຕິ­ບັດ​ໃຫ້​ຖືກ­ຕ້ອງ​ກັບ​ເຫດ­ການ​ຕົວ​ຈິງ ປັດ­ຈຸ­ບັນ ການ​ກະ­ກຽມ​ຈັດ​ວາງ­ສະ­ແດງ​ອະ­ນຸ­ສອນ​ສະ­ຖານ​ທ່ານ ໜູ​ຮັກ ພູມ​ສະ­ຫວັນ ມີ​ຄວາມ​ຄືບ​ໜ້າ 90% ແລະ ຄາດ​ວ່າ​ຈະ​ໄຂ​ເປັນ​ທາງ​ການ​ວັນ​ທີ 9 ເມ­ສາ 2019 ເຊິ່ງ​ກົງ​ກັບ​ວັນ​ຄ້າຍ​ວັນ​ເກີດ​ຂອງ​ທ່ານ ໜູ​ຮັກ ພູມ​ສະ­ຫວັນ ຄົບ­ຮອບ 105 ປີ ຈາກ​ນັ້ນ ກໍ​ຈະ​ໄດ້​ເປີດ​ໃຫ້​ປະ­ຊາ­ຊົນ​ລາວ​ເຂົ້າ​ຊົມ ໂດຍ​ບໍ່​ເສຍ​ຄ່າ ວັນ​ອັງ­ຄານ-ວັນ​ອາ­ທິດ ໃນ​ໂມງ​ລັດ​ຖະ​ການ.

ຂ່າວທີ່ກ່ຽວຂ້ອງ