ປູເປ້ ກັບມາລົງສະໜາມເຝິກຊ້ອມເທນນິສໄດ້ແລ້ວ

246 25 ກ.ພ. 2019 ວົງຈອນກີລາ
ປູເປ້ ກັບມາລົງສະໜາມເຝິກຊ້ອມເທນນິສໄດ້ແລ້ວ

    ນາງ ອາ​ລິ​ຍາ ວົງ​ດາ­ລາ (ປູ​ເປ້) ອາ­ຍຸ 13 ປີ ອະ­ດີດ​ນັກ­ກີ­ລາ​ເທັນ​ນິດ​ເຍົາ­ວະ​ຊົນ​ຍິງ ມື​ວາງ​ອັນ​ດັບ 1 ຂອງ ສປປ ລາວ ກັບ​ມາ​ລົງ​ສະ­ໜາມ​ແຂ່ງ­ຂັນ​ໄດ້​ແລ້ວ ຫຼັງ​ຈາກ​ພັກ​ອາ­ການ​ບາດ­ເຈັບ​ຍາວ​ນານ ພ້ອມ​ວາງ​ເປົ້າ​ໝາຍ​ຈະ​ສູ້​ຊົນ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ນາໆຊາດ ເພື່ອ​ສະ​ສົມ​ຄະ­ແນນ​ຂອງ​ສະ­ຫະ­ພັນ​ເທນ​ນິ​ສ​ສາ­ກົນ (ITF) ຈັດ​ຂຶ້ນ​ປີ 2019 ໃຫ້​ໄດ້ 10 ລາຍ­ການ ກ່ອນ​ກຽມ​ຄວາມ​ພ້ອມ​ຄວ້າ​ຫຼຽນ​ຄຳ​ໃຫ້​ທັບ​ນັກ­ກີ­ລາ​ນະ­ຄອນ­ຫຼວງ​ວຽງ​ຈັນ ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຢູ່​ແຂວງ​ຊຽງ​ຂວາງ​ທ້າຍ​ປີ​ນີ້.

    ທ່ານ ພູ­ເຂົາ​ທອງ ພົມ​ມະ​ວົງ ຜູ້​ປົກ­ຄອງ​ນາງ ອາ​ລິ​ຍາ ວົງ​ດາ­ລາ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ກ່ອນ​ຈະ​ກັບ​ມາ​ຄັ້ງ​ນີ້ ປູ​ເປ້ ໄດ້​ເຝິກ­ແອບ​ປະ­ມານ 2 ເດືອນ ເຝິກ­ຊ້ອມ​ວັນ​ເສົາ ແລະ ວັນ​ອາ­ທິດ ການ​ເຝິກ­ຊ້ອມ​ສ່ວນ​ໃຫຍ່​ຢູ່​ສະ­ໜາມ​ກີ­ລາ​ເທັນ​ນິດ​ມາ​ຣີ​ນາ ແລະ ສະ­ໜາມ​ກີ­ລາ​ເທນ​ນິ​ສ​ແຫ່ງ​ຊາດ (ຫຼັກ 16) ການ​ກັບ​ມາ​ຄັ້ງ​ນີ້ ມີ​ແຜນ​ຈະ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ນາໆຊາດ​ຂອງ​ສະ­ຫະ­ພັນ​ເທນ​ນິ​ສ​ສາ­ກົນ ເພື່ອ​ຕໍ່​ຍອດ​ການ­ເຄື່ອນ­ໄຫວ​ເຂົ້າ​ຮ່ວມ​ແຂ່ງ­ຂັນ​ໃນ­ຕໍ່­ໜ້າ ລາຍ­ການ​ຕໍ່​ໄປ​ຖ້າ​ມີ​ສິດ​ເຂົ້າ​ຮ່ວມ​ແຂ່ງ­ຂັນ​ເທນ​ນິ​ສ ລາຍ­ການ​ນາໆຊາດ​ຈັດ​ຂຶ້ນ​ວັນ​ທີ 18-25 ມີ­ນາ ຢູ່​ປະ­ເທດ​ອິນ​ເດຍ ກໍ​ພ້ອມ​ຈະ​ສົ່ງ​ລູກ​ເຂົ້າ​ຮ່ວມ​ເພື່ອ​ເກັບ​ກ່ຽວ​ປະ­ສົບ​ການ​ໃຫ້ ອາ​ລິ​ຍາ ໄດ້​ປະ­ສົບ​ຜົນ­ສຳ­ເລັດ​ຕາມ​ຄວາມ​ໄຝ່​ຝັນ​ທີ່​ຕັ້ງ​ໄວ້.

    ປັດ­ຈຸ­ບັນ ນ້ອງ ປູ​ເປ້ ມີ​ອາ­ຍຸ 13 ປີ 6 ເດືອນ ລວງ​ສູງ 1,58 ຊັງ​ຕິ​ແມັດ ນ້ຳ­ໜັກ 56 ກິ​ໂລ ໂດຍ​ລາຍ­ການ​ຂອງ​ໄອ​ທີ​ເອັບ ຈູ​ເນ່ຍ ຈະ​ອາ​ນຸ​ຍາດ​ໃຫ້​ນັກ­ກີ­ລາ​ທີ່​ມີ​ອາ­ຍຸ 13-18 ປີ ເຂົ້າ​ຮ່ວມ​ແຂ່ງ­ຂັນ ເພື່ອ​ເກັບ​ຄະ­ແນນ​ນັກ­ກີ­ລາ​ເທນ​ນິ​ສ​ເຍົາ­ວະ​ຊົນ​ໂລກ ແລະ ສາ­ມາດ​ເຂົ້າ​ຮ່ວມ​ແຂ່ງ­ຂັນ​ໃນ​ສາຍ​ອາ­ຊີບ​ຕໍ່​ໄປ​ໃນ​ພາຍ​ໜ້າ ສະ­ນັ້ນ ປູ​ເປ້ ຈະ​ຕ້ອງ​ໄດ້​ເຂົ້າ​ຮ່ວມ​ແຂ່ງ­ຂັນ​ໃຫ້​ໄດ້​ຫຼາຍ​ລາຍ­ການ​ເທົ່າ​ທີ່​ຈະ​ຫຼາຍ​ໄດ້.

ຂ່າວທີ່ກ່ຽວຂ້ອງ