ຂ່າວຫຼ້າສຸດ

ເຊີນໄປສຳຜັດ ແລະ ຮຽນຮູ້ກິດຈະກຳປຸງແຕ່ງອາຫານລາວ ຢູ່ບ້ານສວນມະນີຈັນ

250 25 ກ.ພ. 2019 ຂ່າວໜ້າ​ໜຶ່ງ
ເຊີນໄປສຳຜັດ ແລະ ຮຽນຮູ້ກິດຈະກຳປຸງແຕ່ງອາຫານລາວ ຢູ່ບ້ານສວນມະນີຈັນ

    ເພື່ອ​ແນ­ໃສ່​ເຮັດ​ໃຫ້​ປີ​ທ່ອງ​ທ່ຽວ​ລາວ 2018 ມີ​ບັນ­ຍາ­ກາດ​ຄຶກ­ຄື້ນ ແລະ ບັນ­ລຸ​ຕົວ​ເລກ​ຄາດ­ໝາຍ​ນັກ​ທ່ອງ​ທ່ຽວ​ຕ່າງ­ປະ­ເທດ ເຂົ້າ​ມາ​ທ່ຽວ​ປະ­ເທດ​ລາວ ບໍ­ລິ­ສັດ ທ່ອງ​ທ່ຽວ​ເອັມ​ພີ​ທົວ ຈຳ­ກັດ ຈຶ່ງ​ໄດ້​ຈັດ​ກິດ­ຈະ­ກຳ​ສ້າງ​ບ້ານ​ສວນ​ມະ­ນີ​ຈັນ​ຂຶ້ນ ຢູ່​ບ້ານ​ດ່ານ​ຊ້າງ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເພື່ອ​ສ້າງ​ເປັນ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໜຶ່ງ ທີ່​ຮຽນ​ຮູ້​ການ​ປຸງ​ແຕ່ງ­ອາ­ຫານ​ລາວ ໂດຍ​ໄດ້​ເປີດ​ບໍ­ລິ­ການ​ໃຫ້​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ເຂົ້າ​ທ່ຽວ​ຊົມ​ຕົ້ນ­ໄມ້​ທີ່​ຫາ​ຍາກ ແລະ ໃກ້​ຈະ​ສູນ­ພັນ ເຂົ້າ​ຮ່ວມ​ກິດ­ຈະ­ກຳ​ປຸງ​ແຕ່ງ­ອາ­ຫານ​ລາວ ແລະ ກິດ­ຈະ­ກຳ​ອື່ນໆ ເພື່ອ​ຮຽນ​ຮູ້​ວັດ­ທະ­ນະ­ທຳ ການ​ດຳ­ລົງ​ຊີ­ວິດ ຮີດ­ຄອງ​ປະ­ເພ­ນີ ເຄື່ອງ­ມື​ການ​ທຳ​ມາ​ຫາ​ກິນ ແລະ ວິ­ຖີ​ຊີ­ວິດ​ຂອງ​ບັນ­ພະ­ບຸ­ລຸດ​ລາວ.

    ທ່ານ​ນາງ ມະ­ນີ​ຈັນ ຜັນ​ຫວາດ​ວົງ​ສຸກ ປະ­ທານ​ບໍ­ລິ­ສັດ ທ່ອງ​ທ່ຽວ​ເອັມ​ພີ​ທົວ ຈຳ­ກັດ ເຈົ້າ​ຂອງ​ບ້ານ​ສວນ​ມະ­ນີ​ຈັນ ໃຫ້​ສຳ­ພາດ​ວັນ​ທີ 21 ກຸມ­ພາ 2019 ວ່າ: ຈາກ​ຜົນ­ສຳ­ເລັດ​ໃນ​ການ​ຈັດ​ກິດ­ຈະ­ກຳ​ສ້າງ​ບ້ານ​ສວນ​ມະ­ນີ​ຈັນ ໃນ​ໂອ­ກາດ​ປີ​ທ່ອງ​ທ່ຽວ​ລາວ 2018 ເພື່ອ​ດຶງ​ດູດ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ​ມາ​ທ່ຽວ​ຊົມ ສຶກ​ສາ​ຮຽນ​ຮູ້​ການ​ປຸງ​ແຕ່ງ­ອາ­ຫານ​ລາວ ເຮັດ​ໃຫ້​ອາ­ຫານ​ລາວ​ເປັນ​ທີ່​ຮູ້­ຈັກ​ໃນ​ທົ່ວ​ໂລກ 1 ປີ­ຜ່ານ­ມາ ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຊົມ​ບ້ານ​ສວນ​ແຫ່ງ​ນີ້​ຫຼາຍ​ຄະ­ນະ ສາ­ມາດ​ສ້າງ​ຜົນ­ງານ​ອັນ​ໂດດ​ເດັ່ນ​ໃນ​ການ​ປະ­ກອບ­ສ່ວນ​ປີ​ທ່ອງ​ທ່ຽວ​ລາວ ຈົນ​ໄດ້​ຮັບ​ລາ­ງວັນ ແລະ ໃນ​ໂອ­ກາດ​ປີ​ທ່ອງ​ທ່ຽວ ລາວ-ຈີນ 2019 ບໍ­ລິ­ສັດ ທ່ອງ​ທ່ຽວ​ເອັມ​ພີ​ທົວ ຈຳ­ກັດ ໄດ້​ສືບ­ຕໍ່​ມີ​ສ່ວນ​ຮ່ວມ ໃນ​ການ​ປະ­ກອບ­ສ່ວນ​ເປີດ​ໃຫ້​ບໍ­ລິ­ການ​ຮ່ວມ​ກິດ­ຈະ­ກຳ ທີ່​ບ້ານ​ສວນ​ມະ­ນີ​ຈັນ ເພື່ອ​ຮຽນ​ຮູ້​ການ​ປຸງ​ແຕ່ງ­ອາ­ຫານ​ລາວ ພາຍ­ຫຼັງ​ທີ່​ສຳ­ເລັດ​ການ​ປັບ­ປຸງ​ສະ­ຖານ­ທີ່​ຄືນ­ໃໝ່ ເນື່ອງ​ຈາກ​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ ປີ 2018 ປັດ­ຈຸ­ບັນ ບ້ານ​ສວນ​ມະ­ນີ​ຈັນ ໄດ້​ເປີດ​ໃຫ້​ບໍ­ລິ­ການ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ເຂົ້າ​ທ່ຽວ​ຊົມ​ແລ້ວ.

    ບ້ານ​ສວນ​ມະ­ນີ​ຈັນ ເປັນ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໜຶ່ງ ທີ່​ມີ​ຄວາມ​ແຕກ​ຕ່າງ​ຈາກ​ສະ­ຖານ­ທີ່​ທ່ອງ​ທ່ຽວ​ອື່ນ ໂດຍ​ເນັ້ນ​ຮຽນ​ຮູ້​ການ​ປຸງ​ແຕ່ງ­ອາ­ຫານ​ລາວ ເຊິ່ງ​ປະ­ເພດ​ອາ­ຫານ​ລາວ​ທີ່​ເປັນ​ລາຍ­ການ ສຳ­ລັບ​ນັກ​ທ່ອງ​ທ່ຽວ​ຕ່າງ­ປະ­ເທດ ສາ­ມາດ​ເຂົ້າ​ໄປ​ປຸງ​ແຕ່ງ​ເອົາ​ເອງ​ໄດ້​ຕາມ​ການ​ສັ່ງ​ຈອງ​ລາຍ­ການ​ໄວ້​ລ່ວງ​ໜ້າ​ເຊັ່ນ: ປົ່ນ​ປາ­ດຸກ​ນາ ລວກ​ຜັກ ແຈ່ວ​ໝາກ​ເລັ່ນ ເຂົ້າ­ຫຼາມ ໂອດ​ບອນ ແກງ​ໜໍ່­ໄມ້ ຕຳ​ໝາກ­ຫຸ່ງ ຕຳ​ໝາກ­ຖົ່ວ ໜຶ້ງ​ເຂົ້າ­ໜຽວ ປີ້ງ​ຊີ້ນ​ໝູ​ຫໍ່​ໃບ​ເຕີຍ ແລະ ຊຸບ​ຜັກ​ແວ່ນ ນອກ​ນີ້ ຍັງ​ຮັບ​ຈັດ​ງານ​ແລກ­ປ່ຽນ​ວັດ­ທະ­ນະ­ທຳ ບາ­ສີ­ສູ່­ຂວັນ ສະ­ແດງ​ສິ­ລະ​ປະ​ພື້ນ​ບ້ານ ສະ­ແດງ​ເຄື່ອງ­ນຸ່ງ​ຫົ່ມ​ຊົນ­ເຜົ່າ​ໄຕ​ແດງ ມີ​ອາ­ຫານ​ແບບ​ລາວໆ​ໄວ້​ຄອຍ​ບໍ­ລິ­ການ​ເປັນ​ໝູ່​ຄະ­ນະ​ເຊັ່ນ: ຄະ­ນະ​ນັກ​ທ່ອງ​ທ່ຽວ ນັກ­ຮຽນ-ນັກ​ສຶກ​ສາ ເຍົາ­ວະ​ຊົນ ໂດຍ​ການ​ສັ່ງ​ຈອງ​ກ່ອນ ບ້ານ​ສວນ​ມະ­ນີ​ຈັນ ສາ­ມາດ​ໃຫ້​ນັກ​ທ່ອງ​ທ່ຽວ​ປຸງ​ແຕ່ງ­ອາ­ຫານ​ດ້ວຍ​ຕົນ​ເອງ ໂດຍ​ມີ​ແມ່­ຄົວ-ພໍ່­ຄົວ​ເປັນ​ຜູ້​ແນະ­ນຳ​ວິ­ທີ​ປຸງ​ແຕ່ງ​ຫຼາຍ​ລາຍ­ການ ທີ່​ເປັນ​ອາ­ຫານ​ພື້ນ​ບ້ານ​ປະ­ຈຳ​ທ້ອງ­ຖິ່ນ ເພື່ອ​ຮັກ­ສາ​ໄວ້​ຄູ່​ບ້ານ​ຄູ່​ເມືອງ​ມາ​ຫຼາຍ­ເຊັ່ນ­ຄົນ ໃນ​ການ​ສືບ​ທອດ​ກັນ​ມາ​ເຖິງ​ເຊັ່ນ​ລູກ​ເຊັ່ນ​ຫຼານ ແຕ່​ອະ­ດີດ​ເຖິງ​ປັດ­ຈຸ­ບັນ.

ຂ່າວທີ່ກ່ຽວຂ້ອງ