ຂ່າວຫຼ້າສຸດ

ສົ່ງເສີມການຂຽນພາສາລາວໃຫ້ຖືກຕ້ອງ

280 25 ກ.ພ. 2019 ຂ່າວໜ້າ​ໜຶ່ງ
ສົ່ງເສີມການຂຽນພາສາລາວໃຫ້ຖືກຕ້ອງ

    ຫ້ອງ­ການ​ສຶກ​ສາ​ທິ​ການ ແລະ ກີ­ລາ (ສສກ) ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ຈັດ­ການ​ແຂ່ງ­ຂັນ​ຂຽນ​ງາມ ຊັ້ນ​ປະ­ຖົມ​ສຶກ​ສາ ປະ­ຈຳ​ສົກ­ຮຽນ 2018-2019 ຂຶ້ນ ວັນ​ທີ 21 ກຸມ­ພາ 2019 ຢູ່​ໂຮງ­ຮຽນ​ປະ­ຖົມ​ສົມ­ບູນ​ນາ​ໄຮ່​ດຽວ ໂດຍ​ມີ​ທ່ານ ບຸນ​ເຖິງ ສຸ­ວັນ­ນະ​ສີ ຮອງ​ເຈົ້າ­ເມືອງ​ຈັນ­ທະ​ບູ​ລີ ຜູ້​ຊີ້​ນຳ​ວຽກ​ງານ​ວັດ­ທະ­ນະ­ທຳ-ສັງ­ຄົມ ພ້ອມ​ດ້ວຍ​ຫົວ­ໜ້າ-ຮອງ​ຫົວ­ໜ້າ​ຫ້ອງ­ການ ສສກ ເມືອງ​ຈັນ­ທະ​ບູ​ລີ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທອງ​ດີ ແກ້ວ​ມີ​ໄຊ ຫົວ­ໜ້າ​ຫ້ອງ­ການ ສສກ ເມືອງ​ຈັນ­ທະ​ບູ​ລີ ກ່າວ​ວ່າ: ເພື່ອ​ສົ່ງ­ເສີມ​ການ​ຂຽນ​ພາ­ສາ​ລາວ​ໃຫ້​ຖືກ­ຕ້ອງ​ຕາມ​ຫຼັກ​ໄວ­ຍາ­ກອນ ແລະ ຄວາມ​ເປັນ​ເອ­ກະ​ພາບ​ກັນ​ໃນ​ການ​ຂຽນ​ພາ­ສາ​ລາວ ໃຫ້​ນັກ­ຮຽນ​ຜູ້​ເປັນ​ໜໍ່​ແໜງ​ຂອງ​ປະ­ເທດ​ຊາດ​ໃນ​ອະ­ນາ­ຄົດ ເຫັນ​ໄດ້​ຄວາມ​ໝາຍ​ຄວາມ​ສຳ­ຄັນ​ຂອງ​ພາ­ສາ​ຊາດ ໂດຍ​ສະ­ເພາະ ການ​ຂຽນ​ພາ­ສາ​ລາວ​ໃຫ້​ຖືກ­ຕ້ອງ​ຕາມ​ຫຼັກ­ການ ຈຶ່ງ​ໄດ້​ຈັດ­ການ​ແຂ່ງ­ຂັນ​ຂຽນ​ງາມ​ໃຫ້​ນັກ­ຮຽນ​ຊັ້ນ​ປະ­ຖົມ​ສຶກ​ສາ ປ1-ປ5 ຂຶ້ນ​ທຸກໆ​ປີ ສະ­ເພາະ​ປີ​ນີ້ ມີ​ນັກ­ຮຽນ​ເຂົ້າ​ຮ່ວມ 169 ຄົນ ຍິງ 131 ຄົນ ໃນ​ນີ້ ປ5 ມີ 32 ຄົນ ຈາກ​ໂຮງ­ຮຽນ​ປະ­ຖົມ 35 ແຫ່ງ ໃນ​ນີ້​ພາກ​ລັດ 15 ແຫ່ງ ແບ່ງ​ເປັນ 5 ຫ້ອງ​ສອບ­ເສັງ.

    ຜົນ​ໄດ້​ຮັບ​ຈາກ​ການ​ແຂ່ງ­ຂັນ​ຄັ້ງ​ນີ້ ຈະ​ເຮັດ​ໃຫ້​ນັກ­ຮຽນ​ມີ​ຄວາມ​ຮູ້-ຄວາມ​ສາ­ມາດ ແລະ ປະ­ສົບ​ການ​ໃນ​ການ​ປະ­ຕິ­ບັດ​ການ​ຂຽນ​ພາ­ສາ​ລາວ ຄູ​ສອນ​ມີ​ຄວາມ​ຮັບ­ຜິດ­ຊອບ​ຕໍ່​ການ​ຈັດ​ກິດ­ຈະ­ກຳ​ການ​ຮຽນ-ການ​ສອນ ວິ­ທີ​ການ​ຂຽນ​ພາ­ສາ​ລາວ​ທີ່​ຖືກ­ຕ້ອງ ເປັນ​ການ​ແລກ­ປ່ຽນ​ບົດ­ຮຽນ ປະ­ສົບ​ປະ­ການ ຜູ້­ອຳ­ນວຍ­ການ​ໂຮງ­ຮຽນ ຈະ​ໄດ້​ມີ​ການ​ວາງ​ແຜນ­ທີ່​ດີ ໃນ​ການ​ຈັດ­ການ​ຮຽນ-ການ​ສອນ​ພາ­ສາ​ລາວ​ໃຫ້​ຖືກ­ຕ້ອງ ແລະ ມີ​ຄຸນ​ນະ​ພາບ​ດີ​ຂຶ້ນ.

ຂ່າວທີ່ກ່ຽວຂ້ອງ